Muloñadi Chimwatelela Kuhembela Kashinshi Kenu?

‘Nsompeshi, eyi Yehova, . . . mwomwesekela kashinshi kami.’—MASAMU 7:8.

1, 2. Yumanyi yinateli kuleñela mukwaKristu kumukalila kuhemba kashinshi kindi?

 FWIKIJENU hayuma yisatu yashiyashana: Kansi weyala anakumusupisha kudi akwawu akashikola. Hadaha anakumuvuloka kulonda yohili, yatachiki kutukana hela kuzuña. Dichi wukufuntisha katama nakatama tahindi, wukudiwula nakudiyila? Cheñi, iyala wasumbula nashali hetala nkawindi nakusandujola haIntaneti. Dichi, hakompyuta yindi hihakwinza chikasha chinakumwekesha yuma yatama. Komana wukukeña kutala hayina yuma yatama tahindi wukuyitondolwela chikupu? Nawa, mumbanda mukwaKristu nakuhanjeka nawahela amakwawu, nkumininaku mpanji yawu hiyikwikala matuñu, hiyakuhosha hadi muhela wamuchipompelu. Komana niyena wukudiñija muniyi mpanji tahindi wukuhimpa mpanji?

² Hela chakwila iyi yuma yisatu yashiyashana, yejima yikweti chuma chimu chadifwana. Wejima wawu atela kufwila kuhemba kashinshi kawu hamu neyi akwaKristu. Komana mwafwilaña kuhemba kashinshi kenu neyi kudi yuma yayileñelaña kwakama, yimwakeñaña niyimwafwilaña kwila muchihandilu? Mafuku ejima antu atoñojokaña hanvwalilu, hakwikala chachiwahi mumujimba, kukala kwachihandilu, hakuwaha nikutama kwawubwambu, hadaha niwubwambu hakachi kawantu adisumbula. Tunateli kutoñojoka chikupu hayuma yamuchidiwu. Hanu dinu, chumanyi chalema chakeñañayi Yehova neyi nakusandujola munyichima yetu? (Masamu 139:23, 24) Wakeñaña kashinshi ketu.

3. Kukoolekanyi kwalema nankashi kwatwinkayi Yehova, nawa yumanyi yitukudiza muchinu chibaba?

³ Yehova Mukwakuhana “yuma yayiwahi yahanañawu yejima, niyamukunkulu yalala yejima,” watwinka yuma yashiyashana wejima wetu. (Yakoba 1:17) Twamusakililaña Yehova hakutwinka yamukunkulu yidi neyi mujimba, yitoñojoka, niwuswa washiyashana. (1 Akorinda 4:7) Hela chochu, Yehova hatukanjikijaña kwikala nakashinshuku. Watwitejaña kutondahu kwikala nanichi chililu hela nehi. (Kuhituluka 30:19) Dichi twatela kwiluka chalumbuluka kashinshi. Tukutala cheñi yuma yisatu yaleñelaña ichi chililu kwikala chalema chikupu.

Indi Kashinshi hiChumanyi?

4. Indi kashinshi kabombelamu yumanyi, nawa chumanyi chitunateli kudizila kunshimbi yaYehova kutalisha hakulambula anyama?

⁴ Antu amavulu amwekena neyi hiyelukisha chalumbuluka kashinshuku. Kushinshika kwakundama kukashinshi. Neyi chashimuna Bayibolu, kashinshi kalumbuluka kwikala nayililu yayiwahi chikupu, kubula kutama. Mazu achiHeberu esekana ‘nakashinshi’ afuma kwizu dalumbuluka chuma chabula kutama, chuma chawanina, hela kubula chiluwa. Hakachi kanawa mazu, izu dimu adizatishaña kutalisha hanyilambu yakulambula kudi Yehova. Kanyama wakulambula adiña nakumwiteja kudi Yehova neyi wakadi hataminayi, hela wamuwahi. (Tañenu Alevi 22:19, 20.) Yehova watanyishileña chikupu antu adiwileña iyi nshimbi mumushikila kuhitila mukulambula atunyama akata, ayifwayi, hela amputamesu.—Malaki 1:6-8.

5, 6. (a) Yakutalilahwinyi yinakumwekesha nawu kakavulu twalemeshaña yuma yayiwahi? (b) Kutalisha kudi antu abula kuwanina, komana kashinshi kalumbulula kuwanina? Lumbululenu.

⁵ Yitoñojoka yakukeña nikulemesha chuma chachiwahi hiyawenyuku. Chakutalilahu, fwikijenu muntu watañaña nyikanda yashiyashana nawani mukanda walema chikupu hanyima yakuwukeña hadi mpinji yayilehi, ilaña hakuwana nindi mwosi mafu amavulu adi nansañu yalema. Hamuloña wakuneña, wukuwufuntisha  mwashañawu nyikanda. Hadaha fwikijenu mumbanda wudi hachisankanu nakulanda machamacha. Hamuloña wakuwaha nikushiyashana kwamachamacha, hakwimana nakuyishinshika. Mulumba wumu wudihi watela kusakulayi? Wukusakulahu amawahi. Chochimu Nzambi nakukeña antu akweti ichi chililu, akadi hataminawu, hela adi nanyichima yalala [yayiwahi].—2 Kushindulula 16:9.

⁶ Hela chochu, munateli kujinooka neyi chakwila kashinshi kakeñekaña kwikala wawanina. Hamuloña wanshidi yetu nikubula kuwanina, tunateli kudesekeja kumukanda wabula mafu amakwawu hela machamacha atoka. Komana dichimwatiyaña mpinji jikwawu? Mwatela kwiluka nenu Yehova hakeñaña nindi mwikali awanina chikupuku. Hakuhwelelaña nindi twileña yuma yabadika hakumina ñovu yetuku. * (Masamu 103:14; Yakoba 3:2) Ilaña wakeñaña nindi tuhembi kashinshi ketu. Komana, hekala chaambu hakachi kakuwanina nakashinshi? Eña. Chakutalilahu: Mukwenzi nakeñi chañadima wunakukeñayi kusumbula. Chikwikala chaluwa neyi yakuhwelela nindi mumbanda yeniwu watela kwikala wawanina. Dichi, chikuwaha neyi wukukuhwelela nindi mumbanda yeniwu wakamukeña namuchima wejima, dikwila nawu wakekala nakukeña kwekalaña hakachi kawantu adisumbula hadi yena hohu. Munjila yoyimu, Yehova niyena wekala “Nzambi wamukawu.” (Kwidika 20:5) Nzambi hatukuhwelelaña kwikala awaninaku, ilaña wakeñaña nindi tumukeñi namuchima wejima nikudifukula kudi yena hohu.

7, 8. (a) Indi Yesu wemikili chakutalilahwinyi kutalisha hakashinshi? (b) Kwesekeja naNsona, indi kashinshi kalumbulukadi?

⁷ Twatela kwanuka ñakwilu yaYesu hamwihwiluwu kushimuna lushimbi lwalema chikupu hanshimbi jejima. (Tañenu Maku 12:28-30.) Yesu hakuminini dakwakula hohuku; ilaña wadiña nakwila yuma yakwileñayi. Waheni chakutalilahu chachiwahi hakumukeña Yehova namaana ejima, namuchima wejima, nawumi wejima, niñovu jejima. Wamwekesheli nindi kashinshi bayi kamwekenaña mumazuku, ilaña kamwekenaña munyidimu yayiwahi yakalakalañawu namuchima wumu. Hakwila tuhembi kashinshi chakeñekaña kwimbujola mumahaji aYesu.—1 Petulu 2:21.

⁸ Talenu chalumbuluka kashinshi ketu kwesekeja naNsona: Kudihana namuchima wejima kudi Muntu wumu wamwiwulu, Yehova Nzambi, nikwila yuma yakeñañayi. Kuhemba kashinshi chalumbuluka nawu mpinji yejima tufwileña kumuzañalesha Yehova Nzambi muchihandilu chetu hayuma yejima. Dikwila nawu tukulemeshaña chikupu muchihandilu chetu yuma yalemeshayi Yehova. Dichi tushinshikenu hayuma yisatu yaleñelaña ichi chuma kwikala chalema.

1. Kashinshi Ketu niNsañu yawuswa waYehova wakuyula

9. Indi kashinshi ketu kakundama ñahi kunsañu yawuswa waYehova wakuyula mukuleña kwejima?

⁹ Wuswa waYehova wakuyula hiwashindamena hakashinshi ketuku. Wuswa windi wakuyula waloña, wahaya nyaka, nawa wakuleña kwejima. Wuswa windi wakuyula wakatwalekahu, hichikweti muloña nachuma chikuhoshayi hela kwilayi muntu wudi wejimaku. Hela chochu, wanta waNzambi awusawula chikupu mwiwulu nihamaseki. Dichi wuswa windi wakuyula atela kuwulemesha, chineli Yehova hinyuli nawa wayulaña munjila yayiwahi nawa yakukeña kudi yileñaleña yejima yamaana. Hakwikala aYinsahu jaYehova, twatiyaña kuwaha kulejaku antu akeñaña kutiya nsañu yawuswa waNzambi wakuyula mukuleña kwejima. Hanu dinu, tunateli kutondahu ñahi halwetu nikuzata kwesekeja nachitwalemesha wuswa windi wakuyula? Twamwekeshaña ñahi netu twatonda Yehova kwikala Mwanta wetu? Kuhitila mukuhemba kashinshi.

10. Indi Satana wayitwika antu muloñanyi kutalisha hakashinshi kawu, nawa mwatela kwiladi?

¹⁰ Shinshikenu kashinshi kenu chikanakundami kuniwu muloña. Satana wahosheli  hatooka to-o nindi kwosi muntu wukahakwilaku wanta waNzambi, nawa kwosi muntu wakamukalakela Yehova namuchima wumu. Diyabolu wamulejeli Yehova kumesu awañelu amavulu nindi: “Ikowa nekowa, muntu wukuhana yuma yakwetiyi yejima nawumi windi.” (Yoba 2:4) Satana hatukili hohu muntu waloña Yobaku, ilaña niantu ejima. Bayibolu yamutenaña Satana nawu “mukwakuyinka ana kwetu nyiloña.” (Chimwekeshu 12:10) Wamusawulaña Yehova nakuhosha nindi akwaKristu, kushilahu ninenu, hiyakatwalekahu kwikala ashinshikaku. Satana wahoshaña nindi mwatela kumufukeja Yehova kulonda mupulwishi wumi wenu. Mwatiyaña ñahi haniyi nyiloña yayitwikañayi? Komana himunateli kumwekesha nenu Satana hisakutwambaku? Neyi muhemba kashinshi kenu, mukumwekesha nenu Satana hisakutwamba.

11, 12. (a) Yakutalilahwinyi yinakumwekesha yuma yitwafuukulaña mafuku ejima chiyakundama kukashinshi ketu? (b) Muloñadi kuhemba kashinshi chikwekalila kukooleka?

¹¹ Dichi yuma yitwelaña mafuku ejima nikufuukulahu kwetu yashindamena hakashinshi ketu. Toñojokenu cheñi hayuma yisatu yitwatena hakusambila. Indi kansi weyala, iyala wasumbula, nimuhela atela kuhemba ñahi kashinshi kawu? Kansi weyala wunakusupishawu kudi akwawu akashikola nateli kuhila chikupu nakufuntisha katama nakatama, ilaña hakwanuka kukonkomwena kwakwila nawu: “Enu akwetu twakeña, bayi muditendaku; kuminenu dakwovwahila kuzuwa, muloña anasoneki nawu, Yehova nahoshi nindi, Yami nukutenda, yami nukufweta.” (Aroma 12:19) Hakudiyila kwindi. Iyala wasumbula wunakuzatisha Intaneti nateli kumona nsañu yasañumuna wuvumbi, ilaña hakwanuka chishina chekala mumazu aYoba akwila nawu: “Natiyañana dehi namesu ami; indi chañadima nukumutala ñahi.” (Yoba 31:1) Kufwana Yoba, iyala yeniwu hakuleka kutala nyevulu yatama, hakuyitondolwela neyi yidi nawulembi. Mumbanda wunakuhanjeka nawakwawu ambanda hakuhudikila hakutiya nsañu yamatuñu, nakwanuka lushimbi lwakwila nawu:  “Tutiyishenu akwetu kuwaha wejima wetu hamuntu hamuntu; tulondenu yuma yayiwahi yakukwasha akwetu.” (Aroma 15:2) Matuñu atelelayi kudiñijamu atama. Anateli kuneñesha muhelindi mukwaKristu; niTata yindi wamwiwulu. Dichi hakufumba idimi dindi nakuhimpa mpanji.

¹² Muniyi yakutalilahu yejima, mukwaKristu nafuukuluhu kwila nindi: ‘Yehova diyi Nyuli yami. Nukufwila kwila chuma chikumuzañalesha muniyi yuma.’ Neyi kudi yuma yimunakufuukula, komana mwakeñaña kumuzañalesha Yehova? Neyi dichimwelaña dikwila nawu munakwovwahila mazu amawahi asonekawu haYishimu 27:11 akwila nawu: “Eyi mwanami, ikalaku mukwamaana, wutiyishaña muchima wami kuwaha, kulonda nakatweshi kwakula muntu wukunsawula.” Eñañi, tukweti kukooleka kwakuzañalesha muchima waNzambi. Dichi twatela kuzata nañovu kulonda tuhembi kashinshi ketu.

2. Yehova Watusompeshaña Kushindamena haKashinshi Ketu

13. Indi mazu aYoba niDavidi anamwekeshi ñahi nawu Yehova watusompeshelaña kushindamena hakashinshi?

¹³ Tunamoni netu kashinshi katukwashaña kuhakwilaku wanta waYehova. Dichi Nzambi nateli kutusompesha kushindamena hakashinshi ketu. Yoba welukili chikupu iyi nsañu. (Tañenu Yoba 31:6.) Yoba welukili nindi Nzambi wapezeleshaña antu ejima “napezu yesekana,” nakuzatisha nshimbi yindi yaloña kulonda yamoni neyi twahembaña kashinshi ketu. Davidi niyena wahosheli nindi: “Yehova wasompeshaña antu. Nsompeshi, eyi Yehova, mwomwesekela kuloña kwami, mwomwesekela kuwaha kwami. . . . Muloña Nzambi waloña wesekaña nyichima yawantu mumavumu.” (Masamu 7:8, 9) Tweluka netu Nzambi watalaña mukachi kamuntu, dikwila nawu “nyichima yawantu mumavumu” yachifwikija. Hela chochu, twatela kwanuka yuma yakeñañayi. Neyi chahosheliyi Davidi, Yehova watusompeshaña kwesekana nakashinshi ketu.

14. Muloñadi chitukubulila kutoñojokela netu kubula kuwanina ninshidi yakuvwalika nayu yatukañeshaña kuhemba kashinshi?

¹⁴ Yehova Nzambi wasandujolaña munyichima yawantu amavulu chikupu makonu. (1 Kushindulula 28:9) Mapampa kañahi kakuwanayi muntu nahembi kashinshi kakeni? Hichavulaku. Dichi, bayi tutoñojokaña netu kubula kuwanina dikwatukañeshaña kubula kuhemba kashinshuku. Hela chochu, kudi yuma yatuleñelaña kukuhwelela, neyi chakuhweleleliyi Yoba niDavidi, netu hela chakwila hitwawaninaku, Yehova wakamona nindi tunakuhemba kashinshi. Anukenu nenu kuwanina bayi neyi dikwatuleteshaña kuhemba kashinshuku. Antu asatu hohu diwu adiñi aloña hanu hamaseki, ilaña awa ayedi, Adama naEvu afumpili kashinshi kawu. Antu amavulu abula kuloña niwena anakuhemba kashinshi kawu. Anenu nawa munateli kuhemba kashinshi kenu.

3. Kuchiñeja kwetu kwashindamena hakashinshi

15. Indi Davidi wamwekesheli ñahi nindi kashinshi dihashindemana kuchiñeja kwetu kwakumbidi?

¹⁵ Muloña Yehova watusompeshaña kwesekeja nakashinshi ketu nawa dihashindemana kuchiñeja kwetu kwakumbidi. Davidi niyena dichelukiliyi. (Tañenu Masamu 41:12.) Walemesheli kuchiñeja kwakutambwila wuselewa waNzambi haya nyaka. Kufwana akwaKristu alala makonu, Davidi wakeñeleña kushakama haya nyaka, nakutwalekahu kukundama kwakwihi naYehova Nzambi henohu nakumukalakela. Hakwila nawu yamoni yuma yachiñejeleñayi, Davidi welukili nindi wateleli kuhemba kashinshi kindi. Chochimu, Yehova watukwashaña, watudizishaña, watulombolaña nawa watukiswilaña neyi tutwalekahu nakuhemba kashinshi ketu.

16, 17. (a) Muloñadi chimukufuukwilahu kuhemba kashinshi kenu mpinji yejima? (b) Malwihwinyi yitukahanjekahu muchibaba chinalondeluhu?

¹⁶ Makonu kuchiñeja kwatuletelaña muzañalu.  Kwatuleñelaña kwikala namuzañalu hampinji yamakabi. Kuchiñeja kunateli cheñi kukiña yitoñojoka yetu. Anukenu nenu Bayibolu yafwikija kuchiñeja netepa dachikuñu. (1 Atesalonika 5:8) Chochidakiñaña itepa dachikuñu mutu wamushidika munjita, kuchiñeja kwakiñaña yitoñojoka yetu kuyitoñojoka yatama yatandishañayi Satana mukanu kaayi kakakulu kakukeña kujilumuka. Chihandilu chikwikala chamukunkulu neyi tudana kuchiñeja. Twatela kudishinshika chikupu, kulonda twilukishi chidi kashinshi ketu nikuchiñeja kwendelaña hamu nakashinshi. Bayi muvulamena nenu neyi mukuhemba kashinshi, dikwila nawu munakwovwahila wanta waYehova nawa munakukiña kuchiñeja kwenu kwakuwahi kwayuma yakumbidi. Dichi, twalekenuhu kuhemba kashinshi kenu.

¹⁷ Chineli kashinshi kekala kalema chikupu, tukuhanjeka hamalwihu amakwawu. Tunateli kwikala ñahi nakashinshi? Tunateli kuhemba ñahi kashinshi ketu? Chumanyi chatela kwilayi muntu neyi yaleka kuhemba kashinshi hanoyu mpinji? Chibaba chinalondeluhu chikwakula awa malwihu.

[Tumazu twaheshina]

Munateli Kwakula Nenudi?

• Indi kashinshi hichumanyi?

• Indi kashinshi kakundama ñahi kunsañu yawanta wakuleña kwejima?

• Indi kuchiñeja kwetu kwashindamena ñahi hakashinshi?

[Malwihu aKuzatisha haKudiza]

[Nyevulu yidi hefu 14]

Yuma yitwelaña mpinji yejima yaleteshaña kweseka kashinshi ketu