Ntañishilu Yinasweji Kutanda

“Naloteleña innakuha muhelu! Naloteleña anañumbili mukesi nawa napapukileña innakukaloka. Chakadi nikujinooka, nazatileña nañovu kulonda nibuleña kuvulumuna.”—Arline.

KOMANA, mwakuhwelela nenu helu hiluña dahembawu dakubabeshelamu akwanshidi? Antu amavulu akuhwelela mwenimu. Chakutalilahu, mu 2005, kadizi wadiza jansakililu haUnivesiti yaSt. Andrews mwituña daScotland waweni nindi akulumpi jansakililu amavulu muScotland akuhweleli nawu antu amufutalelaña Nzambi akayanda “muyitoñojoka haya nyaka muhelu.” Akulumpi antesha hohu akuhweleli nawu antu adi muhelu akamona ihuñu kumujimba.

Mumatuña amavulu, ntañishilu yahelu yatanda chikupu. Chakutalilahu, muUnited States, antu ehujoleluwu muchaaka cha 2007 kutalisha hahelu aweneni nawu antu akushika kumapasenti 70 akuhwelela nawu helu yekala kwoku. Nimumatuña mwekala antu antesha etiya, akuhwelela nawu helu yekala kwoku. Kwihujola kukwawu kwehujoleluwu muCanada mu 2004 aweneni nawu, mapasenti awantu 42 akuhwelela nawu helu yekala kwoku. Nawa muGreat Britain, aweneni kwila nawu antu akushika kumapasenti 32 akuhwelela chikupu nawu helu yekala kwoku.

Yuma Yatañishañawu Akulumpi jaNsakililu

Akulumpi jansakililu amavulu analeki kutañisha nawu helu hiluña dadeni mwekala kesi kakubabesha nachu. Ilaña, atiyakeshaña kulumbulula kudi neyi kwasonekawu mumukanda waCatechism of the Catholic Church, wasonekeluwu mu 1994. “Kubabesha kweneni kwamuhelu,” neyi chashimuna iwu mukanda, “hikwambuka naNzambi kwahaya nyaka.”

Hela chochu, antu amavulu saña akuhwelela nawu helu hiluña dababeshelañawu antu muyitoñojoka hela kumujimba. Antu atañishaña iyi nsañu ahoshaña nawu ntañishilu yamuchidiwu yashindamena haBayibolu. R. Albert Mohler, mukulumpi waSouthern Baptist Theological Seminary, walumbulwili chikupu hayuma yakuhwelelayi nindi: “Helu hichuma chashimunawu muNsona.”

Muloñadi Chichalemena Kwiluka Yuma Yimwakuhwelela?

Neyi helu hiluña dadeni dakubabeshelamu, mwatela kuditiya woma. Dichi, neyi iyi ntañishilu yakutwamba, dikwila nawu anlomboli jansakililu atañishaña iyi ntañishilu aluwañeshaña antu nawa akojejaña antu kufwa hohu mutentu. Cheñi amusawulaña Nzambi.

Indi Izu daNzambi, Bayibolu, yahosha nawudi haniyi nsañu? Yibaba yinalondeluhu yikuzatisha maBayibolu ayedi, yabalumunawu kudi aKatolika niaProtesitanti hakwakula awa malwihu asatu: (1) Chumanyi chacheni chazatikaña neyi muntu nafwi? (2) Indi Yesu watañishili nindidi kutalisha hahelu? (3) Indi kwiluka walala hadi helu kunateli kuyikwasha ñahi?