“Yumanyi Yelañawu Hana?”

“ANTU amavulu ahitaña hamutayi weneni wawaYinsahu jaYehova mumusumba waMogale (Krugersdorp) kwakwihi naJohannesburg, mwituña daSouth Africa ehulaña ilu lwihu. Dichi aYinsahu afuukwiluhu kutambika enyi kwinza nakutala mutayi hamafuku ayedi adimena, October 12 ni 13, 2007. Kutambika enyi kweniku kwadiña nankeñelu yiyedi, kumanisha mbonji yakutwamba nikuleja antu mudimu wazataña kasanji kamutayi hakukwasha mudimu waheniyi Yesu Kristu.—Matewu 28:19, 20.

Antu azataña hakasanji kamutayi alamikili hachisu yinjikijilu yeneni yakutambika nachu antu, nawa aheni yipapilu yadimena yakutambika nachu antu kudi antuñi nawu. Atambikili akwakulanda nakulandulula niyisaka yawu. Chumanyi chafuminumu? Enyi kubadika ha 500 abula kwikala aYinsahu enjili nakutala kasanji kamutayi.

Ikina datenañawu nawu MAN Roland Lithoman web-offset press dapulintaña magazini akushika ku 90,000 haora yimu daleteli ikoku nankashi. Cheñi iluña deneni kwatentekañawu nyikanda yakushika kumatani 14 hefuku hefuku niikina dakasaña nyikanda dahayamishili enyi. Mumadipatimenti ashiyashana, ayinsahu akudekeli yuma yakusoneka yakuleta ikoku kushilahu ninsañu yashimuna mukwihihisha nsañu yanyaka yamakina apulintaña, kutachika nekina datenañawu nawu Gutenberg nakushika kwikina dakatataka datenañawu nawu litho-offset. Chuma chikwawu chakudikiluwu chamwekesheleña mutayi chiwakamenaña iluña dejima. Chakutalilahu, kwekala ikina dafumishaña mpepela nimavumba afwana mwikina dapulintaña, nawa kudi makina amakwawu akokaña lunkuñu lwayipapilu kulonda kulunata chiwahi.

Akwakusoneka yipapilu yansañu mwiluña denidi asonekeli chibaba chahosheleña nawu akwakuzata chakudikeñela ashakamaña hamutayi “hiyakwakukalakala amuchipompelu adihana aweni kudi Yehova.” Chahosheli cheñi “hawunyonji wasweja niyuma yejima chiyazatikaña mumpinji yatelela” mwitala dakupulintila. Muntu wumu wadiña nakudimbulula aYinsahu jaYehova niyena wenjili nakuhempula. Nkumininaku wasonekeli mukanda nindi: “Mwafwaku mwani. Hichavula kudi muntu kutiya kuwaha chamuchidiwuku.”

Enyi amavulu asakililili hakuhempula kasanji kamutayi nawa ahayamini hakumona nawu kasanji kamutayi kakweti nyikanda yashindamena haBayibolu mumadimi 151 nawa kapulintaña nyikanda yamatuña 18 musouthern nicentral Africa. Tusanji twanyitayi twawaYinsahu jaYehova kunyeñumuka kaayi kejima, etejaña antu kuya nakuhempula hampinji yakuzata. Mwani munateli kwihula kasanji kamutayi kamwituña denu mpinji yetejawu kuya nakuhempula.

 [Nyevulu yidi hefu 10]

Mutayi wamuSouth Africa muMusumba waMogale

[Mwevulu wudi hefu 10]

Ikina dakupulinta nachu datenañawu nawu, MAN Roland Lithoman web-offset press

[Mwevulu wudi hefu 10]

Ikina dakasaña nyikanda

[Mwevulu wudi hefu 10]

Kwakutemeshela nyikanda

[Mwevulu wudi hefu 11]

Antu anenzi nakuhempula kasanji kamutayi

[CMwevulu wudi hefu 11]

Chipapilu chakutambika nachu enyi