‘Inzaku Wikali Kambanji Kami’

‘Muntu wukukeña kunlondami, adibondi yomweni anyamunaña mutondu windi wakuyandishila hefuku hefuku, anlondaña.’—LUKA 9:23.

1, 2. (a) Mutambinyi wawuwahi waheniyi Yesu? (b) Indi enu muneluhu hodi hamutambi waYesu?

 KWAKWIHI nakukumisha mudimu windi, Yesu wadiña nakushimwina mwiluña daPeliya mwishinadi daYodana, hela kabeta kachimunswa iku kabeta kakumusela kaYudeya iku. Amuwanini kudi mukwenzi weyala wamwihwili chuma chateleleli kwila hakwila yaheti wumi wahaya nyaka. Yesu chelukiliyi nindi mukwenzi weyala wadiña nakuhemba chikupu Nshimbi yamwinkeluwu Mosi, wamulejeli mutambi wawuwahi. Wamwilili nindi: “Yaña wakalandishi yuma yeyi yejima winki atuzweñi, eyi wakaheta maheta mwiwulu; winzi wunlondaña.” (Maku 10:21) Toñojokenu ntahi—mutambi wakumulonda Yesu, Mwana kaNzambi Mukwakubadika wasemuka nkawindi!

² Ona mukwenzi weyala wakaanini mutambi, ilaña amakwawu etejeli mutambi. Hakusambila, Yesu wamwilili Fwilipu nindi: ‘Ikalaku kambanji kami.’ (Yowanu 1:43) Fwilipu wetejeli nawa wekalili kapostolu. Yesu wamutambikili cheñi Matewu nawa wetejeli. (Matewu 9:9; 10:2-4) Mwamweni, Yesu watambikili antu ejima akeña kuloña hampinji yahosheliyi nindi: ‘Muntu wukukeña kunlondami, adibondi yomweni, anyamunaña mutondu windi wakuyandishila hefuku hefuku, anlondaña.’ (Luka 9:23) Dichi, muntu wejima nateli kwikala kambanji kaYesu neyi chalala nakeñi. Komana mwafwilaña kwila mwenimu? Etu amavulu tweteja dehi mutambi waYesu wawuwahi, nawa neyi tudi mumudimu wakushimwina twalejañaku amakwawu iwu mutambi.

3. Tunateli kutondolwela ñahi kubula kuhuñumuka hakumulonda Yesu?

³ Hela chochu, chawushona hama amakwawu amwekeshaña mpwila yakudiza chalala chamuBayibolu, alekaña kudiza. Dichi, alekaña chovu-chovu nkumininaku ‘ahuñumukaña’ nakuleka kumulonda Yesu. (Aheberu 2:1) Tunateli kutondolwela ñahi kufwa muniwu muhetu? Chikutukwasha neyi tudihula netu: Muloñanyi waweni wunatondelahu kumulonda Yesu? Indi kumulonda kwalumbulukadi? Kwanuka ñakwilu yanawa malwihu ayedi kukutukwasha kukolela kuyuma yitwafuukulahu nakukakela njila yayiwahi yitwatonda. Cheñi chikutukwasha kukolesha amakwawu kumulonda Yesu.

Muloñadi Wutwatelela Kumulonda Yesu?

4, 5. Muloñadi Yesu chekalilayi washikahu kulombola?

⁴ Kaprofwetu Yeremiya wahosheli nindi: “Eyi Yehova, neluki nami njila yamuntu hiyekala mudi yomwenuku, mudi muntu wendaña himwekala yakuyula nyendu yinduku.” (Yeremiya 10:23) Nsañu yinakumwekana yinakumwekesha walala wamazu aYeremiya. Wunsahu wawuvulu wunamwekeshi hatooka to-o nawu antu abula kuwanina hiyanatweshi kudiyula chachiwahuku. Twetejeli mutambi wakulondela Yesu muloña twadizili netu diyi washikahu kwikala nlomboli yetu chakwila antu hiyakutweshaku. Talenu yuma yaletesha Yesu kwikala nlomboli washikahu.

⁵ Tachi, Yesu amutondeli kudi Yehova yomweni kwikala Mesiya Nlomboli. Kwosi muntu weluka kubadika Nleñi yetu wukutonda muntu watela kwikala Nlomboli yetuku. Chamuchiyedi, Yesu wukweti yililu yitwatela kutiya kuwaha nikwimbujola. (Tañenu Isaya 11:2, 3.) Hichakutalilahu chaloña. (1 Petulu 2:21) Chamuchisatu, Yesu wakeña chikupu antu amulondaña, neyi chamwekesheliyi hampinji yafwiliyi kukola wumi wawu. (Tañenu Yowanu 10:14, 15.) Wadimwekesha cheñi kwikala kabiña wakukeña hakutulombola kuwumi wamuzañalu makonu niwumi wawuwahi wahaya nyaka kumbidi. (Yowanu 10:10, 11; Chimwekeshu 7:16, 17) Hamuloña waniyi  yikuma niyikuma yikwawu, twafuukwiluhu chiwahi hakutonda kumulonda. Yumanyi yakeñekaña hakumulonda Yesu?

6. Yumanyi yakeñekaña hakumulonda Yesu?

⁶ Kwikala atumbanji twaKristu bayi neyi hikuditena hohu netu tudi akwaKristuku. Makonu antu akushika kumabiliyoni ayedi aditenaña nawu hiyakwaKristu, ilaña yililu yawu yamwekeshaña nawu ‘hiyakwakukoña yakuluwa.’ (Tañenu Matewu 7:21-23.) Neyi antu amwekesha mpwila kumutambi wakumulonda Yesu, twayilejaña netu akwaKristu alala ejima alondelaña ntañishilu nichakutalilahu chaYesu muchihandilu chawu chejima, nawa elaña mwenimu muwumi wawu wamafuku ejima. Hakulumbulula muchatalisha, tushinshikenu hayuma yikwawu yitweluka hadi Yesu.

Imbujolenu Chakutalilahu chaYesu chaMaana

7, 8. (a) Indi maana hichumanyi, nawa muloñadi Yesu chekalilayi namaana chikupu? (b) Indi Yesu wamwekesheli ñahi maana, nawa tunateli kumwimbujola munjilanyi?

⁷ Yesu wamwekesheli yililu yayiwahi yayivulu, ilaña tukushinshika hayililu yiwana: maana, kudizoza, kudikita, nikukeña. Tachi, shinshikenu hamaanindi—wuswa windi wakuzatisha chiwahi kashinshi nikwiluka. Kapostolu Pawulu wasonekeli nindi: “Mudi yena [Yesu] dimu mwanajindiluwu maheta ejima amaana nakashinshi.” (Akolose 2:3) Kudihi kwawaniniyi Yesu awa maana? Yomwenidi wahosheli nindi: “Nahoshaña mazu awa mwomwanlejeluwu kudi Tata.” (Yowanu 8:28) Yehova diyi wamwinkeli maana, dichi hitwatela kuhayama hakashinshi kakwetiyi Yesuku.

⁸ Chakutalilahu, Yesu wazatishili chiwahi kashinshi hakutonda chihandilu chindi. Wafuukwiluhu kupelesha chihandilu chindi, nakushinshika hachuma chimu: kwila nkeñelu yaNzambi. Wadiheni kuzatisha mpinji niñovu jindi chachiwahi nakutwala nsañu yaWanta hambidi. Twembujolaña chakutalilahu chaYesu kuhitila mukuhemba ‘disu datala mumu hohu’ nikutondolwela yuma yamukunkulwayi yinateli kutuzeyesha nikutuluwañesha. (Matewu 6:22) AkwaKristu amavulu apelesha chihandilu chawu kulonda atweshi kuzata mpinji yeneni mumudimu wakushimwina. Amakwawu azataña mudimu wawupayiniya. Neyi mwela mwenimu, dikwila nawu munakuzata mudimu wawuwahi nankashi. ‘Kusambila kukeña wanta’ kwaleteña muzañalu weneni chikupu.—Matewu. 6:33.

Ikalenu Adizoza Neyi Yesu

9, 10. Indi Yesu wamwekesheli ñahi kudizoza?

⁹ Chililu chaYesu chamuchiyedi chitukuhanjekahu, hikudizoza. Neyi antu abula kuwanina ayinka ñovu, kakavulu adimonaña neyi asweja kulema. Yesu wadiña wambukaku chikupu. Hela chakwila wadiña namudimu wabadika kulema wakushikija nkeñelu yaYehova, Yesu hadiña wadinka wanta nihantuku. Nawa anatukoleshi kwimbujola chililu chindi chakudizoza. Kapostolu Pawulu wasonekeli nindi: “Yitoñojoka yadiñi mudi Kristu Yesu yiikali nimudenu nawa. Yena wekala mwomwekalilayi Nzambi, watoñojokeli nindi kubwambuka naNzambi hichuma chakuhukulaku, ilaña wadibalumwini kwikala wakadi kulema, hakwikala mwekalila nduñu, hakwikala chaduwu antu.” (Afwilipi 2:5-7) Chumanyi chakeñekeleña?

¹⁰ Yesu wadiluñishili kukooleka kwakushakama naTata yidi mwiwulu, ilaña wadikeñeleli ‘kudibalumuna kwikala wakadi kulema.’ Wumi windi awutuntulwilili mwivumu damujiki kaYudeya, nakukula hadi tukweji tutanu natuwana sampu nichavwalikiliyi neyi nkemba mwitala damukwakusoña wakehelamu. Yesu wakulileña chovu-chovu mwitala daYosefu, nakutachika kutamañila, yekala mwana wanyanya, nichekaliliyi kampululu. Hadiña nanshiduku. Hela chochu, hadiñayi kansi wovwahilileña avwali jindi akwanshidi. (Luka 2:51, 52) Wadiña wadizoza chikupu.

11. Tunateli kwimbujola chakutalilahu chaYesu chakudizoza mujinjilanyi?

¹¹ Twamwimbujolaña Yesu neyi twiteja mukudikeñela kuzata nyidimu yamwekenaña neyi yamukunkulwayi. Chakutalilahu, shinshikenu mudimu wakushimwina nsañu yayiwahi. Iwu mudimu wunateli kumwekena neyi wamukunkulwayi, sweje-e neyi antu anakudiwula, anakuseha, nikudimbulula. Hela chochu, kuhitila mukutwalekahu kukalakala mudimu  wakushimwina, twakwashaña amakwawu kwiteja mutambi wakumulonda Yesu. Dikwila nawu twapulwishaña antu. (Tañenu 2 Timotewu 4:1-5.) Chakutalilahu chikwawu chakuhemba Itala detu daWanta. Iwu mudimu wakeñekaña kuzata yuma yidi neyi kunata nswadi, kuwahisha mushamendi, nikuwahisha nyisalanyi—iyi nyidimu yejima yamwekanaña neyi yamukunkulwayi. Ilaña, tweluka netu kuloñesha Itala detu daWanta, itala dakudifukwila kwalala mwiluña detu—himudimu wetu wajila. Kuhitila mukudikeñela kuzata nyidimu yamwekanaña neyi yamukunkulwayi, twamwekeshaña netu twadizoza nawa tukulondela mumahaji aKristu.

Ikalenu Adikita Neyi Yesu

12, 13. (a) Indi Yesu wadikitili ñahi, nawa chumanyi chamusañumwini? (b) Chumanyi chikutusañumuna kudikita mumudimu wakushimwina?

¹² Shinshikenu chadikitileñayi Yesu mumudimu wakushimwina. Yesu wazatili nyidimu yayivulu hadiñayi hamaseki. Hadiñayi kansi watela wazatili natata yindi wamuleleli, Yosefu neyi mukwakusoña. Hampinji yashimwineñayi, Yesu wakoñeli yihayamisha, kushilahu nikuuka akata nikusañula afu. Hela chochu mudimu windi walema wadiña wakushimwina nsañu yayiwahi nikutañisha antu akeñeleña kutiyilila. (Matewu 4:23) Hakwikala atumbanji twindi, tukweti mudimu wowumu. Tunateli kwimbujola ñahi chakutalilahu chindi? Tunateli kuzata iwu mudimu neyi chamuletesheli Yesu kuzata.

¹³ Sweje-e kumukeña Nzambi dikwasañumwini Yesu kushimwina nikutañisha antu. Yesu wakeñeli cheñi chalala chatañishileñayi. Yesu wamweneña chalala neyi maheta asweja kulema, nawa wafwilileña kuleja amakwawu. Etu hamu neyi antañishi, hela ‘akwakuleja hatooka,’ twatiyaña chochimu. Toñojokenu nsañu yikwawu yalala yalema yitunadizi Mwiizu daNzambi. Tweluka dehi nsañu yawuswa waNzambi wakuyula nichakayimanishawu. Tweluka chatañishaña Nsona kutalisha hachuma chamwekanaña neyi muntu nafwi ninkisu yakekala mwituña dadiha daNzambi. Chili tunadizi iyi nsañu yalala katataka chili kunyaka yamunyima, iyi nsañu yalala yalema. (Tañenu Matewu 13:52.) Kuhitila mukushimwina namuzañalu, twalejaña amakwawu kukeña kutukweti hayuma yinatudizishiyi Yehova.

14. Tunateli kwimbujola ñahi njila yatañishilileñamu Yesu?

¹⁴ Talenu cheñi chatañishileñayi Yesu. Wavulileña kuleja antiyilili jidi jiNsona. Kakavulu watachikileña chikuma chalema kuhitila mukuhosha nindi: “Anasoneki nawu.” (Matewu 4:4; 21:13) Mumazwindi asonekawu, wadiña nakusombolola hela kutalishaku chikupu kubadika hachikunku chanyikanda yaNsona yachiHeberu. Kufwana Yesu, mpinji yejima twatañishaña nsañu yamuBayibolu mumudimu wetu wakushimwina nikufwila kutena Nsona neyi chinatwesheki. Kwila mwenimu, twakwashaña antu akweti nyichima yashinshika kwiluka nawu twatañishaña mazu aNzambi, bayi etwetu awenuku. Twazañalalaña neyi muntu neteji kutaña Bayibolu nikuhanjeka nindi hakulema nichalumbuluka Izu daNzambi. Nawa neyi antu wenawa eteja mutambi wakumulonda Yesu, twazañalalaña chikupu.

Kumwimbujola Yesu Kwalumbuluka Kukeña Amakwawu

15. Chililwinyi chaYesu chasweja kulema, nawa kutoñojoka hanichi chililu kukutukwasha ñahi?

¹⁵ Chililu chakukumishaku chaYesu chitukuhanjekahu chikutuzañalesha chikupu—kukeña kwakeñayi antu. Kapostolu Pawulu wasonekeli nindi: “Kukeña kwaKristu kwatukakejaña.” (2 Akorinda 5:14) Neyi tutoñojoka hakukeña kwaYesu kwakeñayi antu ejima ninetu hamuntu hamuntu, nyichima yetu yatusañumunaña  nawa chatukakejaña kwimbujola chakutalilahu chindi.

16, 17. Yesu wamwekesheli kukeña kudi antu amakwawu munjilanyi?

¹⁶ Indi Yesu wamwekesheli ñahi kukeña kudi amakwawu? Kudikeñela kuhana wumi windi hanyijimba yawantu kwadiña kukeña kwabadika. (Yowanu 15:13) Hela chochu hampinji yashimwinineñayi, Yesu wamwekesheli cheñi kukeña munjila jikwawu. Chakutalilahu watiyilili wushona antu adiña nakukabakana. Chamumweniyi Mariya niantu amakwawu anakumudila Lazaru wafwili, watiyili kukala chikupu hawushona watiyiluwu. Hela chakwila wadiña kwakwihi nakumusañula Lazaru, Yesu watiyili wushona chakwila ‘wadilili.’—Yowanu 11:32-35.

¹⁷ Kumatachikilu amudimu waYesu, mukwambumba wamusolomokeli nakumwila nindi: “Neyi wuneteji, wunatweshi kuntookesha.” Indi Yesu welilidi? Nsona yahosha nawu: “Watiyili wushona.” Kuhiñahu wakoñeli chuma chabadika. “Wolweli chikasa chindi wamukunkili; hakumwila nindi, Neteji, tookaku. Hohenohu mbumba yimufuma nikumufuma, yotooka nikutooka.” MuNshimbi jamwinkeluwu Mosi, akwambumba adiña antu amajilu, nawa Yesu wadi kumuuka ona muntu chakadi kumukunka. Ilaña, hakumuuka wamukunkili mukwambumba, hadaha kadiña kapampa katachi muyaaka yayivulu kakumukunkahu kudi muntu. Wamutiyilili wushona chikupu.—Maku 1:40-42.

18. Tunateli kumwekesha ñahi netu ‘twatiyilaña akwetu wushona’?

¹⁸ Hakwikala atumbanji twaKristu, atukonkomwena kumwekesha kukeña kuhitila ‘mukutiyila akwetu wushona.’ (1 Petulu 3:8) Chakala kwiluka yitoñojoka yamukwetu mukwakwitiya wayekelaña nayikatu hela wukweti chineñi chikupu—sweje-e neyi kanda tumoneñahu dehi yuma yamuchidiwu. Hela chochu, Yesu welukili kukala kwamweneñawu akata hela chakwila yena hakatiluhu hoku. Munjilanyi mutwatela kumwekeshela wushona wamuchidiwu? Kuhitila mukutiyilila mumesu awunda hampinji yinakutulejawu antu anakukabakana. Twatela cheñi kudihula netu, ‘Neyi yami nadiña naniku kukala, nadi kutiya ñahi?’ Neyi tushaña maana kuyitoñojoka yawamakwawu, tukutwesha ‘kukundeja antu adi nachineñi.’ (1 Atesalonika 5:14) Dikwila nawu tukumulondaña Yesu.

19. Indi chakutalilahu chaYesu chinatukwashi mujinjilanyi?

¹⁹ Tunazañalali chikupu hakudiza mazu ninyidimu yakoñeliyi Yesu Kristu. Chitwasweja kudiza hadi yena, tukusweja kukeña kumwimbujola—chikutusañumuna chikupu kukwasha amakwawu kwila chochimu. Dichi dinu, tuzañalalenu hampinji yitunakumulonda Mwanta wawuMesiya—katataka nihaya nyaka.

Munateli Kulumbulula?

• Tunateli kumwekesha ñahi maana neyi Yesu?

• Tunateli kumwekesha kudizoza mujinjilanyi?

• Tunateli kwikala ñahi adikita mumudimu wakushimwina?

• Tunateli kumwimbujola Yesu hakumwekesha kukeña kudi amakwawu mujinjilanyi?

[Malwihu aKuzatisha haKudiza]

[Chikasha/Mwevulu wudi hefu 11]

MUKANDA WATUKWASHAÑA KUMWIMBUJOLA KRISTU

Hakupompa kwankambi kwamu 2007, mukanda wukweti mafu 192 wudi namutu wunakwila nawu “Come Be My Follower” awidishili muYingilishi. Iwu mukanda awusonekeli kulonda kukwasha akwaKristu kushinshika hadi Yesu, sweje-e hayililu ninyidimu yindi. Hanyima yatupetulu tuyedi twakulumbulula nachu, chikunku chatachi chashimuna yililu yaYesu yalema yejima—kudizoza, wulobu, maana, kwovwahila, nikuumika kwaYesu.

Halondela chikunku chahosha hanyidimu yaYesu hamu neyi ntañishi nawa mukwakushimwina wansañu yayiwahi nijinjila jikwawu mwamwekesheleliyi kukeña kwindi kwasweja. Mumukanda wejima, asoneka nsañu munjila yinateli kumukwasha mukwaKristu kumwimbojola Yesu.

Tunakuhweleli netu iwu mukanda wukutusañumuna wejima wetu kudishinshika nikudihula netu: ‘Komana chalala inakumulonda Yesu? Nateli kumulonda ñahi chikupu?’ Wukukwasha cheñi ‘antu ejima afuukwilawu dehi kumona wumi wahaya nyaka’ kwikala atumbanji twaKristu.—Yililu 13:48.