Kambuña Yehova “Amukatishilili Nyiloña Yetwetu”
Kambuña Yehova “Amukatishilili Nyiloña Yetwetu”
‘Amukatishilili nyiloña yetwetu, amuchikilili kuluwa kwetwetu; . . . Muloña nyinkakambu yindi yena anatukuswishi.’—ISAYA 53:5.
1. Yumanyi yitwatela kwanuka hampinji yitunakwanakana Chanukishu, nawa wuprofwetwinyi wukutukwasha kwila mwenimu?
TWANAKANAÑA Chanukishu kulonda kwanuka kufwa kwaKristu niyuma yejima yashikijewa hamuloña wakufwa nikusañuka kwindi. Chanukishu chatwanukishaña kuyiñisha wuswa waYehova wakuyula, kujilika ijina dindi, kushikija nkeñelu yindi nikupulwisha muchidi wamuntu. Hadaha muBayibolu mwosi wuprofwetu wukwawu wabadika hawuprofwetu wasonekawu haIsaya 53:3-12, washimuna chikupu hamulambu waKristu niyuma yinashikijewi kuhitila muniwu mulambu. Isaya washimwineñahu dehi yihuñu yakamonayi Kambuña nikushimuna yuma yadimena kutalisha hakufwa kwaKristu nihankisu yakatambwilawu amana kwindi awayishewa ‘ninyikoku yindi yacheñi’ hamuloña wakufwa kwindi.—Yowanu 10:16.
2. Indi wuprofwetu waIsaya wamwekeshaña wunsahwinyi, nawa chumichi chikutukwasha ñahi?
2 Chelili kunashali dehi yaaka 700 hakwila nawu Yesu yovwaliki, Yehova wamoneneni Isaya kuprofweta nindi Kambuña Yehova watondewa wakekala washinshika hela chakwila anamweseki. Walala wakwila nawu Yehova woneneni iwu wuprofwetu hiwunsahu wunakumwekesha nawu wamukuhwelela chikupu Mwanindi nindi washinshika. Chitukuhanjekaña haniwu wuprofwetu, tukusweja kumusakilila nawa chikuhwelelu chetu chikukoleshewa.
“Amudiwili” Nawa ‘Hiyamumweni Kulemaku’
3. Muloñadi aYudeya chateleleli kumutambwilawu Yesu, hanu dinu amutambwilili ñahi?
3 Tañenu Isaya 53:3. Toñojokenu ntahi chatiyiliyi Mwana kaNzambi wasemuka nkawindi hohu hakushiya muzañalu wakuzatila hamu naTata yindi nakwinza hamaseki hakwila yahani wumi windi neyi mulambu kulonda kupulwisha muchidi wamuntu kunshidi nikufwa. (Afwilipi 2:5-8) Mulambu windi wadiñi wakwanakena chikupu nshidi yamuchidi wamuntu, wemeneneñaku nyilambu yawanyama yalambwileñawu muNshimbi yamwinkeluwu Mosi. (Aheberu 10:1-4) Chadi kuwaha neyi Yesu amutambwilili nikumulemesha kudi aYudeya adiñi nakuchiñeja Mesiya wakaninuwu. (Yowanu 6:14) Ilaña, aYudeya “amudiwili” Kristu nawa ‘hiyamumweni kulemaku,’ neyi chaprofweteliyi Isaya. Kapostolu Yowanu wasonekeli nindi: ‘Wenjili kumukala windi, ilaña antu jindi hiyamutambwiluku.’ (Yowanu 1:11) Kapostolu Petulu walejeli aYudeya nindi: ‘Nzambi yawankakulula jetu . . . nalemeshi kambuñindi Yesu mwahaninenu, mwalekelenu chemeniyi kumesu aPilatu, chakeñeliyi kumuumbaku. Ilaña enu mwalekeli wajila, waloña.’—Yililu 3:13, 14.
4. Indi Yesu welukili ñahi kukala kwawantu?
4 Isaya waprofweteli cheñi nindi Yesu “wenjililili yakala.” Hampinji yamudimu windi, Yesu wazeyeleña mpinji jikwawu, ilaña kwosi wunsahu niwumu washimuna nawu Yesu wakatili. (Yowanu 4:6) Hela chochu, welukili kukala kwawantu ashimwinineñayi. Wayitiyilili wushona nawa wokili antu amavulu. (Maku 1:32-34) Dichi, Yesu washikijili wuprofwetu wahosha nawu: “Chalala naditwiki yuma yetu yakala, nasendi yihuñu yetu.”—Isaya 53:4a; Matewu 8:16, 17.
Neyi Kwiji “Anamweti Kudi Nzambi”
5. Indi aYudeya amavulu amweni ñahi kufwa kwaYesu, nawa muloñadi ichi chichawejeleluku makabi indi?
5 Tañenu Isaya 53:4b. Antu amavulu adiñaku mumafuku aYesu hiyelukili muloña wakabakeneniyi nikufwaku. Akuhweleleli nawu Nzambi wamubabesheleña, neyi kwiji anamukatishi namusoñu wafwana chikupu. (Matewu 27:38-44) A Yudeya amutwikili Yesu muloña nawu himukwakutukana. (Maku 14:61-64; Yowanu 10:33) Hela chochu, Yesu hadiñi mukwanshidi hela mukwakutukanaku. Ilaña hamuloña wakumukeña Tata yindi chikupu, yitoñojoka yakwila nawu wakafwa hamuloña wakwila nawu natukani yatela yawejeleluku makabi indi hamu neyi Kambuña Yehova. Hela chochu, wadikeñeleli kwovwahila nkeñelu yaYehova.—Matewu 26:39.
6, 7. Munjilanyi Yehova mwamuchikililiyi kambuñindi washinshika, nawa muloñadi chumichi chichamutiyishili ‘kuwaha’?
6 Hichatuhayamishañaku hakutaña netu wuprofwetu waIsaya wahosha nawu amakwawu akamutena Yesu neyi ‘anetuwu kudi Nzambi,’ ilaña chatela kutuhayamisha netu wuprofwetu washimuna nawu: “Yehova welili nindi chachiwahi kumuchika.” (Isaya. 53:10) Chineli Yehova wahosheli cheñi nindi: “Talenu kambuñami . . . wami natonda, inatiyaña kuwaha mumuchima wami,” indi Yehova nateli kutiya ñahi ‘kuwaha kumuchika’? (Isaya 42:1) Munjilanyi mutunateli kuhoshela netu chumichi chamuzañalesheli Yehova?
7 Hakwila nawu tutiyishishi iyi nsañu yawuprofwetu, twatela kwanuka netu hampinji yalukukiliyi Satana wuswa waYehova wakuyula, wajinokeli kashinshi kawambuña aYehova amwiwulu nihamaseki. (Yoba 1:9-11; 2:3-5) Dichi Yesu hakutwalekahu kwikala wakashinshi ndo nikukufwa, waheni ñakwilu yayiwahi kukujinoka kwaSatana. Hela chakwila Yehova wetejeli Kristu kumujaha kudi ayilumbu jindi, chakubula nikujinoka, Watiyili kutama chamweniyi Kambuñindi atondayi anakumujaha. Hela chochu, Yehova watiyili kuwaha chikupu hakumona kashinshi kakeni kaMwanindi. (Yishimu 27:11) Kubombelahu, kwiluka nkisu yikatambwila antu anabalumuki munyichima kuhitila mukufwa kwaMwanindi kwamutiyishili Yehova kuwaha chikupu.—Luka 15:7.
“Amukatishilili Nyiloña Yetwetu”
8, 9. (a) Indi Yesu “amukatishilili” ñahi ‘hanyiloña yetwetu’? (b) Indi Petulu wasonekeli nindidi hachumichi?
8 Tañenu Isaya 53:6. Kufwana nyikoku yajimbala, antu akwanshidi ajimbala, akeñaña kuyamwina kuyikatu nikukufwa kwaswaninuwu kudi Adama. (1 Petulu 2:25) Hakwikala akwanshidi, kwosi mwana kaAdama niwumu wadi kutwesha kufweta yuma yajimbesheliyi Adamaku. (Masamu 49:7) Hela chochu, kwesekeja nakukeña kwindi kwasweja, “Yehova namutwiki yena kuluwa kwetwetu ejima,” Mwanindi waswejayi kukeña chikupu nawa Kambuñindi watondewa. Kuhitila mukwiteja ‘kumukatishila hanyiloña yetwetu’ nawa ‘nikumuchikila hakuluwa kwetwetu,’ Kristu wasendeli nshidi yetu hamutondu nikutufwila.
9 Kapostolu Petulu wasonekeli nindi: “Dichi chayitambikililuwu, muloña Kristu niyena wayimweneni yihuñu, wayishiyilili chuma chakutalilahu, kulonda mwendi mumahaji indi. Yena yomweni wasendeli nyiloña yetu mumujimba windi hamutondu, kulonda etu tunafwi dehi kunshidi tuhandili kuloña.” Cheñi nawa, hakusombojola mazu akaprofwetu Isaya, Petulu wabombeleluhu nindi: “Anayikuswishi nanyinkakambu yindi yena.” (1 Petulu 2:21, 24; Isaya 53:5) Chumichi chenzunwini akwanshidi njila kulonda akundama kudi Nzambi, neyi chahosheliyi Petulu nindi: “Kristu nawa wamweni ihuñu hansañu yanyiloña, kamu hohu, waloña kukoola aheña, kulonda atushikiji kudi Nzambi.”—1 Petulu 3:18.
“Neyi Mwana kaMukoku aKutwalawu naKujaha”
10. (a) Indi Yowanu Mpapatishu wamulumbulwili ñahi Yesu? (b) Muloñadi mazu aYowanu chiyekaliluwu alala?
10 Tañenu Isaya 53:7, 8. Hampinji Yowanu Mpapatishu yamweniyi Yesu nakwinza kudi yena, wahosheli nindi: “Talenu Mwana kamukoku waNzambi, mukwakufumisha nshidi yawantu ampata yamunu mwishina.” (Yowanu 1:29) Hakutena Yesu nawu Mwana kamukoku, hadaha Yowanu watoñojokeleña hamazu aIsaya akwila nawu: “Neyi mwana kamukoku akutwalawu nakujaha.” (Isaya 53:7) Isaya waprofweteli nindi: ‘Wamwañili wumi windi hakufwa.’ (Isaya 53:12) Kafwampi, hawufuku watachikiliyi Yesu Chanukishu chakufwa kwindi, waheni lupasa lwavinyu kudi apostolu ashinshika ikumi nawumu nakuhosha nindi: “ Muloña diwu mashi ami achitiyañenu, akupwekela antu amavulu kulonda kuyanakena nachu nyiloña.”—Matewu 26:28.
11, 12. (a) Indi kudihana kwaIsaka kulonda kumulambula kwamwekeshadi kutalisha hamulambu waKristu? (b) Hampinji yitunakwanakana Chanukishu, chumanyi chitwatela kwanuka kutalisha hadi Abarahama Muneni, Yehova?
11 Kufwana Isaka, Yesu wadiheni hamu neyi mulambu hakameña kakwila nkeñelu yaYehova. (Kutachika 22:1, 2, 9-13; Aheberu 10:5-10) Hela chakwila Isaka wetejeli kumulambula, Abarahama diyi wakeñeleña chikupu kuhana mulambu. (Aheberu 11:17) Hohamu, Yesu wetejeli kufwa, ilaña Yehova diyi welukili chakufweta ifutu danyiloña. Mulambu waMwanindi hinjila yamwekeshelelumu Yehova kukeña kwindi kudi muchidi wamuntu.
12 Yesu yomweni wahosheli nindi: “Chaswejeliyi Nzambi kukeña mpata yamunu mwishina, waheni Mwanindi wumu hohu, kulonda muntu wukumukuhwelela aheti wumi wahaya nyaka, akabuli kunoña.” (Yowanu 3:16) Kapostolu Pawulu wasonekeli nindi: “Nzambi wamwekeshaña kukeña kwindi yomweni kudetu, hohitwachidiñi akwanshidi Kristu watufwilili.” (Aroma 5:8) Dichi, hampinji yitunakumulemesha Kristu kuhitila mukwanakana kufwa kwindi, twatela kwanuka netu muntu welukili chakufweta ifutu danyiloña wadiñi Abarahama Muneni, Yehova. Twanakanaña Chanukishu kulonda kumulemesha.
Kambuña Wakelisha ‘Amavulu Kwikala Aloña’
13, 14. Indi Kambuña Yehova welishili ñahi ‘antu amavulu kwikala aloña’?
13 Tañenu Isaya 53:11, 12. Yehova wahosheli kutalisha hadi Kambuñindi watondayi nindi: ‘Kambuñami waloña, wakelisha amavulu kwikala aloña.’ Munjilanyi? Kumakumishilu avasi 12 kwatukwashaña kwiluka ñakwilu. “[Kambuña] hakulembelela niakwakuputola.” Anyana kaAdama ejima avwalika akwanshidi, “akwakuputola,” dichi atambwilaña “wufwetu wanshidi,” kufwa. (Aroma 5:12; 6:23) Dichi kutiyañana hakachi kaYehova nawantu akwanshidi kwalema hama. Kapetulu 53 kawuprofwetu waIsaya kalumbulula chachiwahi njila Yesu ‘mwalembeleleliyi,’ hela kulombela akwanshidi, nawu: “Amweteli yena kulonda etu tumwenumu kuwunda; nanyinkakambu yindi yena anatukuswishi.”—Isaya. 53:5.
14 Kuhitila mukusenda nshidi yetu nikutufwila, Kristu welishili ‘antu amavulu kwikala aloña.’ Pawulu wasonekeli nindi: ‘Mwashikila wuNzambi mwejima mwetiyili kushakama mudi yena [Kristu]; kulonda akakundamishi yuma yejima kudi yomweni nayena; eña, akakundamishi hela yuma yahamaseki, hela yuma yamumawulu, nanichi chaneliyi mudimu wakuwundisha namashi apwekesheliyi hamutondu wakuyandishila.’—Akolose 1:19, 20.
15. (a) Indi “yuma yamumawulu” yateneniyi Pawulu hiyumanyi? (b) Hiyanyi hohu enkawu wuswa wakudya yifwikija yaChanukishu, nawa muloñadi?
15 “Yuma yamumawulu” yakundamishawu kudi Yehova kuhitila mumashi apwekesheliyi Kristu hiyakwaKristu awayishewa, atambikawu kuyula hamu naKristu mumawulu. AkwaKristu “akwakutambwila kutambika kwatambikawu mwiwulu” ayitena kwikala “aloña.” (Aheberu 3:1; Aroma 5:1, 18) Dichi, Yehova wayiteja kwikala anyanindi awamayala akuspiritu. Spiritu yajila yashimunaña wunsahu nawu ‘hiyanswana akuswana chimu naKristu,’ atambikawu kwikala anyanta niatupristu muWanta windi wamwiwulu. (Aroma 8:15-17; Chimwekeshu 5:9, 10) Ekalaña kabadi kaIsarela wakuspiritu, ‘aIsarela ambala aNzambi,’ nawa ayitwalaña ‘muchitiyañenu chachiha.’ (Yeremiya 31:31-34; Aŋalija 6:16) Hakwikala antu amuchitiyañenu chachiha, ayinka wuswa wakudya yifwikija yaChanukishu, kubombelahu lupasa lwavinyu yichinana, yateneniyi Yesu nindi: “Lupasilu dichi chitiyañenu chachiha chamumashi ami, awa akuyipwekela.”—Luka 22:20.
16. Indi “yuma yahamaseki” hiyumanyi, nawa munjilanyi mwekalilawu aloña kumesu aYehova?
16 “Yuma yahamaseki” hinyikoku yacheñi yaKristu, yikweti chikuhwelelu chakushakama hamaseki haya nyaka. Kambuña watondewa naYehova wayiletesha kwikala aloña kumesu aYehova. Hamuloña wakwila akuhwelela mumulambu wefutu danyiloña daKristu nawa ‘akosa dehi mahinawu, ayitookesha namashi aKana kamukoku,’ Yehova wayitena nindi aloña, bayi neyi anyana awamayala akuspirituku, ilaña neyi amabwambu jindi, nakuyinka kuchiñeja kwakuwahi kwakupuluka ‘yihuñu yeneni.’ (Chimwekeshu 7:9, 10, 14; Yakoba 2:23) Hamuloña wakubula kwikala muchitiyañenu chachiha nikubula kwikala nachikuhwelelu chakushakama mwiwulu, anyikoku acheñi hiyadyaña yifwikija yaChanukishuku, ilaña awanikañaku hohu neyi akwakutala akalemesha.
Tumusakilileña Yehova niKambuñindi Atiyañayi Kuwaha
17. Indi kudiza hawuprofwetu waIsaya wahosha hadi Kambuña kunatukwashi ñahi kuloñesha yitoñojoka kutalisha haChanukishu?
17 Kushinshika hawuprofwetu waIsaya wahosha hadi Kambuña yinadiña njila yayiwahi yakuloñeshelamu yitoñojoka yetu kutalisha haChanukishu chakufwa kwaKristu. Wunatukwashi ‘kutalisha mesu kudi Yesu, mukwakubuza, nawa mukwakumanisha kwitiya kwakukuhwelela.’ (Aheberu 12:2) Tunadizi netu Mwana kaNzambi wekala wovwahila. Kwambukaku naSatana, Yesu watiyaña kuwaha kumudizisha kudi Yehova, nawa wamwiluka nindi hiMwanta Nzambi. Cheñi tunadizi netu hampinji yamudimu waYesu wahamaseki, watiyilili wushona antu ashimwinineñayi, wokili antu amavulu kumujimba nikuspiritu. Dikwila nawu wamwekesheli yuma yikelayi hamu neyi Mwanta wawuMesiya mwituña dadiha hampinji ‘yakashayi wuñaji hamaseki.’ (Isaya 42:4) Chadikitileñayi mumudimu wakushimwina Wanta neyi ‘chejeji chawajentili,’ chanukishaña atumbanji twindi nawu atela kudikita hakushimwina nsañu yayiwahi mukaayi kejima.—Isaya 42:6.
18. Muloñadi wuprofwetu waIsaya chiwatuleñelaña kumusakilila Yehova niKambuñindi washinshika?
18 Wuprofwetu waIsaya watukwashaña cheñi kwiluka mulambu weneni waheniyi Yehova hampinji yatemesheliyi Mwanindi wasweja kukeñayi hamaseki nakuyanda nikutufwila. Yehova hatiyili kuwaha hakumona Mwanindi chayandiliyuku, ilaña hakumona kashinshi kakeni kamwekesheliyi sampu nikukufwa. Twatela kutiya kuwaha neyi chatiyañayi Yehova, nakwiluka yuma yejima yeliliyi Yesu netu yamwekeshaña nawu Satana hisakutwamba nikujilika ijina daYehova, dikwila nawu kuhakwilaku wuswa Windi wakuyula. Kubombelahu, Kristu wasendeli nshidi jetu nikufwila hanyiloña yetwetu. Kwila mwenimu, chaletesheli kamukanka kanyanya kawamana kwindi awayishewa nianyikoku acheñi kwikala aloña kumesu aYehova. Chitukapompa kuChanukishu, twatela kumusakilila Yehova chikupu niKambuñindi washinshika.
Kuhitulukamu
• Munjilanyi Yehova ‘mwatiyililiyi kuwaha’ kutalisha ‘hakumuchika’ Mwanindi?
• Indi Yesu “amukatishilili” ñahi ‘hanyiloña yetwetu’?
• Indi Kambuña ‘welishili ñahi amavulu kwikala aloña’?
• Indi kudiza hawuprofwetu wahosha hadi Kambuña kunayikwashi ñahi kuloñesha yitoñojoka yenu ninyichima kutalisha haChanukishu?
[Malwihu aKuzatisha haKudiza]
[Mwevulu wudi hefu 26]
‘Amudiwili, nawa hitwamumweni kulemaku’
[Mwevulu wudi hefu 28]
‘Wamwañili wumi windi hakufwa’
[Mwevulu wudi hefu 29]
‘Anyikoku acheñi’ awanikañaku kuChanukishu neyi akwakutala akalemesha