Komana Wudi Kalama kaLuwi lwaNzambi Lwasweja?

‘Keñañanenu nawana kwenu nawushona; itejenu mwinenu abadiki kulema.’—AROMA 12:10.

1. Indi Izu daNzambi datulejaña nawudi?

 IZU DANZAMBI kakavulu datulejaña chikupu nawu Yehova wakutukwasha neyi tudi nawusweleli hela chineñi. Chakutalilahu, talenu awa mazu akukundeja: “Yehova wayikwataña chachiwahi ejima adimbukaña, wayihindwishaña wejima wawu anoñamaña.” “Wakuswishaña abaluka nyichima; wakasaña hayilonda yawu.” (Masamu 145:14; 147:3) Kubombelahu, Tata yetu wamwiwulu wahosha nindi: “Ami Yehova Nzambi yeyi nakakukwataña kuchikasa cheyi chachidiilu, nakakwilaña nami, Bayi wutiya womaku, nukukukwashañaku.”—Isaya 41:13.

2. Indi Yehova wakwashaña ñahi ambuñindi?

² Indi Yehova washakama mwiwulu mwabulaña kumwekana wukutukwata ñahi ‘kuchikasa chetu’? Munjilanyi ‘mwatuhindwishilañayi wejima wetu twanoñamaña’ nachineñi? Yehova Nzambi watukwashaña munjila jashiyashana. Chakutalilahu, wayinkaña antu jindi “ñovu jabadika nankashi” kuhitila mudi spiritu yindi yajila. (2 Akorinda 4:7; Yowanu 14:16, 17) Ambuña aNzambi ayihindwishaña cheñi naMazu aNzambi Bayibolu yonenewa, yikweti ñovu. (Aheberu 4:12) Komana kuduhu cheñi njila yikwawu mwatukoleshelañayi Yehova? Twawanaña ñakwilu mumukanda waPetulu waMuchimu.

‘Luwi lwaNzambi Lwasweja Alumwekeshaña Mweñi naMweñi’

3. (a) Nsañwinyi yatalisha hakweseka yashimunayi kapostolu Petulu? (b) Yumanyi yashimunawu muchikunku chakukumishaku chamukanda waPetulu wamuchimu?

³ Hakusonekela akwakwitiya awayishewa naspiritu, kapostolu Petulu wayisonekeleli nindi adiña nayuma yayiwahi yaletesheli muzañalu muloña wakuchiñeja wuloku wawuwahi. Kuhiñahu nindi: “Hela katataka anayineñeshi mpinji yantesha nakweseka kweñi nakweñi.” (1 Petulu 1:1-6) Shinshikenu mazu akwila nawu “kweñi nakweñi.” Anakumwekesha nawu kweseka kwekala kwashiyashana. Hela chochu, Petulu hemeneni henaha kulonda ana kwindi ajinooki neyi chakwila akatwesha kuumika kweseka kweniku kwashiyashana tahindi nehi. Ilaña, Petulu washimuna nindi akwaKristu anateli kukuhwelela chikupu nawu Yehova wukayikwasha kuumika kweseka kwejima kwakumonawu, hichidi namuloña nakukala kwejima kuyakumonawuku. Iku kukana akushimuna muchikunku chakukumishaku chamukanda waPetulu, mwashimunayi kapostolu nsañu yakundama ‘kukukuma kwayuma yejima.’—1 Petulu 4:7.

4. Muloñadi mazu ekala ha 1 Petulu 4:10 chiyatukundejelañawu?

⁴ Petulu nindi: ‘Wejima wenu kalakelenu akwenu mwaya chamukunkulu chimunatambuli, neyi atulama amawahi aluwi lwaNzambi lwasweja lwamwekeshawu mweñi namweñi.’ (1 Petulu 4:10) Petulu wazatishili cheñi mazu akwila nawu “lweñi nalweñi.” Natalishi mukwila nindi, ‘Kweseka kwenzaña munjila jashiyashana, ilaña luwi lwaNzambi lwasweja lwamwekenaña cheñi munjila jashiyashana.’ Muloñadi awa mazu chiyekalilawu akukundeja? Alumbulula nawu kweseka kwejima kutukweti, mpinji yejima Nzambi wukutumwekeshela luwi lwasweja lukutukwasha kuumika kweseka. Komana mwamona nhoshelu yaPetulu yakwila nawu hela, chiyinakushimuna njila mwatumwekeshelañayi Yehova luwi lwasweja? Kuhitila mudi akwetu akwaKristu.

 “Kalakelenu Akwenu”

5. (a) Indi mukwaKristu wejima watela kwiladi? (b) Malwihwinyi ehulañawu?

⁵ Hakuhosha nawantu ejima amuchipompelu chawakwaKristu, Petulu nindi: “Chasweja kulema yowu kukeñañana chacheni mukachi kenu.” Wahosheli cheñi nindi: “Wejima wenu kalakelenu akwenu mwaya chamukunkulu chimunatambuli.” (1 Petulu 4:8, 10) Dichi, muntu nimuntu muchipompelu wukweti mudimu wakukolesha akwawu akwaKristu. Atwinka mudimu wakutala chuma chalema chaYehova, nawa tukweti mudimu wakulejaku amakwawu ichi chuma. Hanu dinu, hichumanyi chatwinkawu? Petulu wahosha nindi, ‘hichamukunkulu.’ Hichamukunkulwinyi chenichi? Twachizatishaña ñahi ‘hakukalakela akwetu’?

6. Yamukunkulwinyi yikwawu yayinkawu akwaKristu?

⁶ Izu daNzambi dahosha nawu: “Yuma yayiwahi yahanañawu yejima, niyamukunkulu yalala yejima yasulukaña kwiwulu.” (Yakoba 1:17) Mwamweni, yamukunkulu yejima yahanañayi Yehova kudi antu jindi yamwekeshaña luwi lwindi lwasweja. Chamukunkulu chabadika kulema chatwinkayi Yehova hispiritu yajila. Ichi chamukunkulu chatukwashaña kwikala nayililu yamuzañaleshaña Nzambi yidi neyi kukeña, kuwaha, nikwovwaha. Iyi yililu yatusañumunaña, kutiyila akwetu akwakwitiya wushona nikuyikwasha mukudikeñela. Maana alala nikwiluka yekala cheñi hakachi kayamukunkulu yayiwahi yitwekalaña nayu nawukwashu waspiritu yajila. (1 Akorinda 2:10-16; Aŋalija 5:22, 23) Kafwampi, ñovu jetu jejima, wuswa, ninyidimu yitweluka twatela kuyimona neyi hiyamukunkulu yitwatela kuzatisha hakumuhameka nikumulemesha nachu Tata yetu wamwiwulu. Nzambi watwinka mudimu wakuzatisha wuswa wetu niyililu neyi njila yakumwekeshelamu luwi lwaNzambi lwasweja kudi akwetu akwakwitiya.

Munateli ‘Kuzatisha Ñahi Chamukunkulu haKukalakala’?

7. (a) Indi nhoshelu yakwila nawu “mwaya” yamwekeshañadi? (b) Malwihwinyi itwatela kudihula, nawa muloñadi?

⁷ Kutalisha hachamukunkulu chitwatambwilili, Petulu wahosheli cheñi nindi: ‘Mwaya chamukunkulu chimunatambuli, wejima wenu chizatishenu.’ Nhoshelu yakwila nawu “mwaya” yamwekeshaña nawu yililu niwuswa yinateli kwambuka bayi neyi wuswa wukwetiyi muntu hohuku, ilaña nihakumina ñovu. Hela chochu, wejima wetu anatukoleshi ‘kuchizatisha [dikwila nawu, chamukunkulu chejima chinatambwiliyi muntu] hakukalakela  akwetu.’ Kubombelahu, nhoshelu yakwila nawu ‘chizatishenu . . . neyi atulama amawahi’ hilushimbi. Dichi, twatela kudihula netu: ‘Komana chalala, nazatishaña chamukunkulu chanyinkawu hakukolesha nachu akwetu akwakwitiya?’ (Esekejenu 1 Timotewu 5:9, 10.) ‘Tahindi nazatishaña wuswa wunatambwila kudi Yehova kulonda kudiluñisha ami aweni—hadaha kwikala namaheta hela kuya mpuhu?’ (1 Akorinda 4:7) Neyi tuzatisha yamukunkulu yetu ‘hakukalakela akwetu’ tukumuzañaleshaña Yehova.—Yishimu 19:17; tañenu Aheberu 13:16.

8, 9. (a) Jinjilanyi jikwawu mwakalakelañawu akwaKristu akwawu akwakwitiya amukaayi kejima? (b) Indi amana kwetu niahela amuchipompelu chenu adikwashaña ñahi?

⁸ Izu daNzambi dashimuna jinjila jamboka-mboka mwakalakeleluwu akwaKristu akwawu amuyaaka nkulakaji yakusambila. (Tañenu Aroma 15:25, 26; 2 Timotewu 1:16-18.) Chochimu nimakonu, akwaKristu alala ovwahilaña chikupu lushimbi lwakuzatisha chamukunkulu chawu hakukwasha akwawu akwakwitiya. Shinshikenu jinjila jikwawu mwazatilañawu chumiche.

⁹ Amana kwetu amavulu azatishaña mpinji yeneni chikupu kakweji nikakweji kulonda kuloñesha jimpanji jakupompa. Hampinji yakupompa, neyi ahosha nsañu yalema yawanawu mukudiza kwaBayibolu, mazu awu amaana aleñelaña ejima muchipompelu kuumika. (1 Timotewu 5:17) Amana kwetu niahela amavulu ayilukila kumuzañalu niluwi lwamwekeshelañawu akwawu akwakwitiya. (Aroma 12:15) Amakwawu ahempulaña antu adi nachineñi mpinji yejima nikulomba nawu hamu. (1 Atesalonika 5:14) Amakwawu ekalaña nampinji yakusonekela akwawu akwaKristu adi mukweseka mazu akukolesha. Amakwawu niwena akwashaña antu azeya kumujimba kuwanika kukupompa kwachipompelu. A Yinsahu amavulu azataña mudimu wakukwasha akwawu akwakwitiya kutuñulula matala anahumoki nawubanji. Kutiyila wushona ninyidimu yakukwasha yazatañawu awa amana kwetu niahela akamenaña, yejimiyi yamwekeshaña ‘luwi lwaNzambi lwasweja lwamwekeshañayi mweñi namweñi.’—Tañenu 1 Petulu 4:11.

Mudimwinyi Wabadika Kulema?

10. (a) Pawulu washili maana kuyumanyi yiyedi hakumukalakela Nzambi? (b) Twamwimbujolaña ñahi Pawulu makonu?

¹⁰ Ambuña aNzambi hiyayinka hohu chamukunkulu chakukalakela akwawu akwakwitiyaku, ilaña akweti cheñi nsañu yakulejaku akwawu. Kapostolu Pawulu welukili iyi yuma yiyedi hakumukalakela Yehova. Wasonekeleli chipompelu chaAefwesesa kutalisha ‘hamudimu wamukunjikiluwu wakuyishimwina akwawu luwi lwaNzambi lwasweja’ kulonda ahetelumu. (Aefwesesa 3:2) Ilaña, wahosheli cheñi nindi: “Chanatwitejuwu kudi Nzambi, watukunjikili mudimu wakushimuna nsañu yayiwahi.” (1 Atesalonika 2:4) Kufwana Pawulu, anetu nawa tweluka netu atukunjika mudimu wakukalakala neyi akwakushimwina Wanta waNzambi. Kuhitila mukudikita mumudimu wakushimwina, twembujolaña chakutalilahu chaPawulu hamu neyi mukwakushimwina nsañu yayiwahi wadikita. (Yililu 20:20, 21; 1 Akorinda 11:1) Tweluka netu kushimwina nsañu yaWanta kunateli kupulwisha antu. Hampinji yoyimu twakeñaña kumwimbujola Pawulu kuhitila mukwikala nampinji yakwinka akwetu akwakwitiya ‘chamukunkulu chakudi spiritu.’—Tañenu Aroma 1:11, 12; 10:13-15.

11. Twatela kumona ñahi mudimu wetu wakushimwina niwakukolesha amana kwetu?

¹¹ Hakachi kaniyi nyidimu yiyedi yawakwaKristu, wumu wudihi wabadika kulema? Kwihula lwihu lwamuchidiwu hohamu nakwihula hadi kajila nenu, Hakachi kampuula jindi jiyedi mpuula yimu yidihi yabadika kulema? Ñakwilu yatiyakana. Kajila katela kuzatisha mpuula jejima hakwila katuuki chiwahi. Chochimu, twatela kuzata nyidimu yetu yejima yatwinkayi Nzambi kulonda twendeli hamu nayuma yejima yakeñekaña kudi akwaKristu. Dichi chatela tutoñojokeña netu mudimu wetu wakushimwina nsañu yayiwahi nimudimu wakukolesha akwetu akwakwitiya wambukaku, twatela kuyimona neyi chayimweneñawu aPetulu niPawulu—neyi hinyidimu yendelaña hamu. Munjilanyi?

12. Twakalakalaña ñahi neyi chozelu muchikasa chaYehova?

¹² Hakwikala akwakushimwina, twazatishaña  yuma yejima yitweluka hakutañisha hakwila nawu tushiki hanyichima yawakwetu antu namazu amawahi aWanta waNzambi. Muniyi njila, twakeñaña kuyikwasha kwikala atumbanji twaKristu. Hela chochu, twesekaña cheñi kuzatisha wuswa wejima niyamukunkulu yitukweti hakukolesha akwetu akwakwitiya namazu amawahi ninyidimu yakukwashana—kumwekesha luwi lwaNzambi lwasweja. (Yishimu 3:27; 12:25) Dikwila nawu twayikwashaña kutwalekahu kwikala atumbanji twaKristu. Munyidimu yejima, kushimwina antu ‘nikukalakela akwetu,’ tukweti kukooleka kwabadika kwakukalakala neyi chozelu muchikasa chaYehova.—Aŋalija 6:10.

‘Tiyilenu Akwenu Wushona’

13. Chumanyi chinateli kumwekana neyi tuleka ‘kukalakela akwetu’?

¹³ Pawulu wakonkomweneni akwawu akwakwitiya nindi: “Keñañanenu nawana kwenu nawushona; itejenu mwinenu abadiki kulema.” (Aroma 12:10) Eña, kutiyila ana kwetu wushona kwatuleñelaña kuyikalakela namuchima wumu neyi atulama aluwi lwaNzambi lwasweja. Tweluka netu neyi Satana yotufuntisha munyima ‘hakukalakela akwetu,’ wukukañesha kunuñañana kwekala hakachi ketu. (Akolose 3:14) Kubula kutiyañana kukuletesha kuleka kuzata nañovu mumudimu wakushimwina. Satana weluka chikupu nindi watela kutulekesha kuzata mudimu wumu hakachi kanyidimu yetu, chidi neyi kuhatula lupuula lumu lwakajila, kulonda yatukañeshi kubuli kuzata mudimu wetu.

14. Hiyanyi ahetelaña mumudimu ‘wutwakalakelaña akwetu’? Hanenu chakutalilahu.

¹⁴ ‘Kukalakela akwetu’ hikwakwashaña hohu antu atambwilaña luwi lwaNzambi lwaswejaku, ilaña kwakwashaña cheñi niantu alushimunaña. (Yishimu 11:25) Toñojokenu chakutalilahu chaRyan niRoni, eyala namumbanda ashakamaña kuIllinois U.S.A. Chatiyiluwu nawu wubanji wampepela yasweja kutoha yatenañawu nawu Hurricane Katrina yinakisañani matala amavulu awakwawu aYinsahu, kukeña kwakeñawu ana kwawu kwayiletesheli kuleka nyidimu yawu, nakushiya itala dawu deneni, nakulanda itala dadikulu dakukokela kumotoka nakudiwahisha nawa endeli lwendu lwamakilomita 1,400, nakuya kuLouisiana. Ashakaminuku kubadika hadi chaaka chimu hampinji yazatishileñawu mpinji, ñovu, nimahetawu hakukwasha amana kwawu. Ryan, wukweti yaaka 29 wahosheli nindi: “Nakundamini kwakwihi naNzambi muloña wakuzata mudimu wakukwasha antu adi mukukala, namweni  chakamenañayi Yehova antu jindi.” Ryan wahosheli cheñi nindi: “Muloña wakuzata hamu nawamana kwetu akula dehi nadizili chikupu chinatela kwakamena amana kwetu. Nelukili cheñi nami kudi yuma yayivulu yitwatela kuzata etu atwansi mukuloñesha kwaYehova.” Roni wukweti yaaka 25, wahosheli nindi: “Natiyili kuwaha chinazatiluku mudimu wakukwasha amakwawu. Nikweti muzañalu chikupu kubadika muzañalu wunatiyahu dehi muchihandilu chami. Neluki nami muyaaka yinakwinza nikatwalekahu kuhetela munichi chakuhumañana chachiwahi.”

15. Muloñanyi wawuwahi wutukweti wakutwalekelahu kukalakala neyi atulama aluwi lwaNzambi lwasweja?

¹⁵ Eña, kwovwahila nshimbi jaNzambi jakushimwina nsañu yayiwahi nikukolesha akwetu akwakwitiya kwaletaña nkisu kudi ejima. Antu itwakwashaña atwalekañahu kumukalakela Yehova, nawa twatiyaña muzañalu wayuma yafumaña mukuhana. (Yililu 20:35) Chipompelu chejima chekalaña nawulunda wawuwahi neyi ejima adikeña. Kubombelahu, kukeña kutwamwekeshaña kudi akwetu kwatwilukishaña nawu twekala akwaKristu alala. Yesu wahosheli nindi: “Neyi mukukeñañana, dihu hakayilukilawu antu ejima nawu mudi atumbanji twami.” (Yowanu 13:35) Sweje-e, kalemesha kayaña kudi Tata yetu wakamenaña Yehova, wakeñaña kukolesha antu anakankili kuhitila mudi ambuñindi ahamaseki. Dichi tukweti muloña washikila wakuzatisha chamukunkulu chetu ‘hakukalakela akwetu hamu neyi atulama amawahi aluwi lwaNzambi lwasweja.’ Komana mukutwalekahu kwila mwenimu?—Tañenu Aheberu 6:10.

Munakwanuka?

• Indi Yehova wakoleshaña ambuñindi mujinjilanyi?

• Mudimwinyi watukunjikawu?

• Jinjilanyi mutwatela kukalakela akwetu akwakwitiya?

• Chumanyi chikutusañumuna kutwalekahu kuzatisha chamukunkulu chetu ‘hakukalakela akwetu’?

[Malwihu aKuzatisha haKudiza]

[Nyevulu yidi hefu 17]

Komana mwazatishaña “chamukunkulu” chenu hakukalakela akwenu tahindi hakudiluñisha enu aweni?

[Nyevulu yidi hefu 19]

Twashimwinaña nsañu yayiwahi kudi amakwawu nikukolesha akwetu akwaKristu

[Mwevulu wudi hefu 20]

Twatela kuhameka antu azataña mudimu wakukwasha adi mukukala hakudihana kwawu