Talenu Kambuña Yehova Atiyañayi Kuwaha

‘Talenu kambuñami, . . . inatiyaña kuwaha mumuchima wami.’—ISAYA 42:1.

1. Indi antu jaYehova anayikoleshi kwiladi chineli Chanukishu hichikuswila kwakwihi, nawa muloñadi?

 CHINELI mpinji yakwanakana kufwa kwaKristu hiyikuswila kwakwihi, antu jaNzambi anayikoleshi kulondela kufumba kwakapostolu Pawulu ‘kwakutalisha mesu kudi Yesu, diyi Mukwakubuza, diyi Mukwakumanisha kwitiya kwakukuhwelela.’ Pawulu wabombeleluhu nindi: “Toñojokenu yeniwu wetejeli ntadi jawakwanshidi jasweja jadikañiluwu nindi, kulonda mubuli kuzeya nakuyekela munyichima yenu.” (Aheberu 12: 2, 3) Kusha maana kukashinshi kaKristu kamulombweli hakudihana neyi mulambu, chikukwasha akwaKristu ejima awayishewa niakwawu anyikoku acheñi kutwalekahu kumuzatila Yehova nakashinshi nikutondolwela ‘kuzeya kwawu.’—Esekejenu Aŋalija 6:9.

2. Chumanyi chitwatela kudizila kuwuprofwetu waIsaya washimuna nsañu yaMwana kaNzambi?

² Yehova woneneni wuprofwetu wawuvulu wakundama chikupu kudi Mwanindi kuhitila mudi kaprofwetu Isaya. Iwu wuprofwetu wukutukwasha ‘kutalisha mesu kudi Yesu Kristu, diyi Mukwakubuza, diyi Mukwakumanisha kwitiya kwakukuhwelela.’ * Wuprofwetu weniwu washimuna yililu yindi, kukabakana kwindi nichamutuumbakeshawu hamu neyi Mwanta wetu nawa Nkuli. Wukutukwasha kutiyishisha Chanukishu chitwakanakana chinu chaaka haChiwana April 9, hanyima yakuhuma kwetañwa.

Kambuña Anamuteni

3, 4. (a) Indi izu dakwila nawu “kambuña” dalumbulukadi mumukanda waIsaya? (b) Indi Bayibolu yayeni yamwekesha ñahi Kambuña yatenawu muIsaya tupetulu 42, 49, 50, 52, ni 53?

³ Izu dakwila nawu “kambuña” damwekanaña mapampa kakavulu mumukanda waIsaya. Adizatisha chantesha hakumutena kaprofwetu yomweni. (Isaya 20:3; 44:26) Mpinji yikwawu adizatisha hakutena muza waIsarela wejima, hela Yakoba. (Isaya 41:8, 9; 44:1, 2, 21) Indi wuprofwetu wadimena wahosha hadi Kambuña wasonekawu muIsaya tupetulu 42, 49, 50, 52, ni 53 watenanyi? Nyikanda yawakwaKristu yachiGriki yamulumbulula chiwahi Kambuña Yehova yatenawu munitu tupetulu. Kafwampi, kaEtiyopiya yatenawu mumukanda waYililu wadiña nakutaña wuprofwetu wumu hakachi kaniwu wuprofwetu hampinji yamulombweluwu Fwilipu mukwakushimwina naspiritu kuya nakumuwana. Chelili kaEtiyopiya yatañi nsañu yamuBayibolu yitwawanaña haIsaya 53:7, 8, wamwihwili Fwilipu nindi: “Kaprofwetu nateninyi, mwani? Naditeni yomweni, tahindi nateni muntu wacheñi?” Fwilipu wamulumbulwili hohenohu nindi Isaya wateneni hadi Mesiya, Yesu.—Yililu 8:26-35.

 ⁴ Henohu Yesu wuchidi mukeki, muntu waloña wejina daSimeyona amoneneni kudi spiritu yajila kuhosha nindi “mwana Yesu” wukekala “chejeji chakutoñekela aJentili,” neyi chashimwineñahu dehi haIsaya 42:6 ni 49:6. (Luka 2:25-32) Cheñi nawa, kumusawula kwamusawiluwu Yesu nawufuku hadiña nakumusompeshawu akushimwineñahu dehi muwuprofwetu waIsaya 50:6-9. (Matewu 26:67; Luka 22:63) Hanyima yaPentekosta 33 C.E., kapostolu Petulu wamuteneni Yesu hatooka to-o nindi “Kambuña” Yehova. (Isaya 52:13; 53:11; tañenu Yililu 3:13, 26.) Chumanyi chitunateli kudizila kuniwu wuprofwetu wawuMesiya?

Yehova Wamudizishili Kambuñindi

5. Indi Kambuña wadizilidi?

⁵ Wuprofwetu wumu hakachi kawuprofwetu waIsaya wahosha hadi kambuña Nzambi washimuna chikupu wulunda wawuwahi wekala hakachi kaYehova niMwana wawedi hampinji yachidiñayi Mwana kanda yenzi heseki. (Tañenu Isaya 50:4-9.) Kambuña washimwini yomweni nindi Yehova watwalekeluhu kumudizisha, nindi: “Wahindwishaña itu dami mutulu kulonda nitiyaña neyi alejewaña.” (Isaya 50:4) Mpinji yejimiyi, Kambuña Yehova wadiña nakutiyilila kudi Tata yindi nawa amudizishili, nakwikala kambanji wovwahila. Hikukooleka kwadimena kwakudizishewa kudi Nleñi wakuleña kwejima.

6. Indi Kambuña wamwekesheli ñahi kwovwahila kwindi kwakweni kudi Tata yindi?

⁶ Muwunu wuprofwetu, Kambuña wamutena Tata yindi nindi ‘Mwanta Yehova.’ Chumichi chinakumwekesha nawu Kambuña welukili nindi Yehova diyi Mwanta wakuleña kwejima. Hakumwekesha nindi wamwovwahila Tata yindi chikupu, wahosheli nindi: ‘Mwanta Yehova najikuli itu dami, ami hinadikañiluku, hinafuntili hanyimaku.’ (Isaya 50:5) ‘Wekalili mukalawenu waYehova’ hakuleña yuma yejima niantu. Iwu “mukalawenu” wadiña ‘nakuzañajala kumesu [aYehova] mafuku ejima; nakuzañajala neseki dindi dakushakama antu; [Mwana kaNzambi] watiyileña kuwaha nawanyana kawantu.’—Yishimu 8:22-31.

7. Chumanyi chamwekesha nawu Kambuña wakuhweleli wukwashu waTata yindi hampinji yamakabi?

⁷ Yuma yadiziliyi Kambuña Yesu nikukeña kwakeñeliyi antu kwamukwashili hampinji yenjiliyi hamaseki kushinda ikañesha dasweja. Watwalekeluhu kwila nkeñelu yaTata yindi hela chakwila wamweni ikabisha dasweja. (Masamu 40:8; Matewu 26:42; Yowanu 6:38) Mpinji yejima yamweniyi makabi hamaseki, Yesu wakuhweleli wukwashu waTata yindi. Yesu watwesheli kuhosha neyi chashimwineñahu dehi muwuprofwetu waIsaya nawu: ‘Mukwakunyiñisha wudi kwakwihi, akunkonkolola kudinyi? . . . Tiyenu, Mwanta Yehova wukunkwashañaku.’ (Isaya 50:8, 9) Chalala Yehova wamukwashili Kambuñindi washinshika mumudimu windi wejima wahamaseki neyi chashimuna wuprofwetu wukwawu waIsaya.

Mudimu waKambuña haMaseki

8. Chumanyi chamwekesha nawu Yesu wadiña ‘watondewa’ waYehova neyi chashimwineñahu dehi haIsaya 42:1?

⁸ Bayibolu yatulejaña chuma chamwekeni hampinji yamupapatishiluwu Yesu mu 29 C.E. nawu: ‘Spiritu yajila hiyikuzelumukila hadi yena . . . mwiwulu himukufuma izu nawu, Yeyi Mwanami nakeña, natiyaña kuwaha nankashi mudeyi.’ (Luka 3:21, 22) Dichi Yehova wamutena hatooka to-o windi ‘watondayi,’ washimunawu muwuprofwetu waIsaya. (Tañenu Isaya 42:1-7.) Hampinji yazatileñayi mudimu windi hamaseki Yesu washikijili iwu wuprofwetu munjila yadimena. Matewu wasombojolili mazu ekala haIsaya 42:1-4 muNsañu yindi Yayiwahi nakuyitalisha hadi Yesu.—Matewu 12:15-21.

9, 10. (a) Indi Yesu washikijili ñahi Isaya 42:3 hampinji yazatileñayi mudimu windi? (b) Indi Kristu ‘waleteli ñahi wuñaji’ hampinji yadiñayi hamaseki, nawa ‘wakasha wuñaji hamaseki’ mpinjinyi?

⁹ Akulumpi ansakililu yawaYudeya asekesheli atuzweñi amuYudeya. (Yowanu 7:47-49) Antu ayimwesheli kalula neyi ‘mateti achikeka’ hela neyi “wanda” wakatolitoli wunanoñi hiwukukeña kujima. Hela chochu, Yesu wadiña nakutiyila wushona atuzweñi niakata. (Matewu 9: 35, 36) Antu amuchidiwu wayitambikili nindi: “Inzenu kudami enu ejima mudi nakukabakana, mwasenda yalema, ami nukuyinookesha.” (Matewu 11:28) Kubombelahu, Yesu ‘waleteli wuñaji’ kuhitila mukutañisha nshimbi jaYehova kutalisha hayuma yaloña niyatama. (Isaya 42:3) Wamwekesheli cheñi nindi Nshimbi yaNzambi atela kuyizatisha nakashinshi niluwi. (Matewu 23:23) Yesu wamwekesheli cheñi wuñaji kuhitila mukushimwina kudi atuzweñi niasamaheta chakadi chaambu.—Matewu 11:5; Luka 18:18-23.

¹⁰ Wuprofwetu waIsaya washimwineñahu dehi cheñi nawu ‘watondewa’ waYehova ‘wakasha wuñaji hamaseki.’ (Isaya 42:4) Hakwikala Mwanta waWanta wawuMesiya, keña yeli mwenimu neyi nakisañani dehi mawanta ejima ajipolotiki nakuhiñishahu wanta windi waloña. Wakaleta iseki dadiha, “mwakekala kuloña.”—2 Petulu 3:13; Danyeli 2:44.

‘Chejeji’ Nawa ‘Chitiyañenu’

11. Munjilanyi Yesu mwekaliliyi ‘chejeji chawaJentili’ muyaaka nkulakaji yakusambila, nawa wekala ñahi chejeji nikulelu?

¹¹ Chalala Yesu wekalili ‘chejeji chawaJentili’ hakushikija Isaya 42:6. Hampinji yamudimu windi hamaseki, wasambilili kuleta chejeji kudi aYudeya. (Matewu 15:24; Yililu 3:26) Ilaña Yesu wahosheli nindi: “Ami yami chejeji champata yamunu mwishina.” (Yowanu 8:12) Wekalili chejeji kudi aYudeya niaJentili bayi neyi hakuleta chejeji chakuspiritu hohuku, ilaña nihakuhana wumi windi wawanina hamu neyi ifutu danyiloña kudi antu ejima. (Matewu 20:28) Chasañukiliyi, walejeli atumbanji twindi kwikala ayinsahu jindi “kwakumina maseki.” (Yililu 1:8) Hampinji yadiña nakushimwinawu aPawulu naBaranaba, asombojoleli nhoshelu yakwila nawu ‘chejeji chawaJentili’ nakuyizatisha kumudimu wawu wakushimwina washimwineñawu kudi antu abula kwikala aYudeya. (Yililu 13:46-48; esekejenu Isaya 49:6.) Iwu mudimu achidi kuwuzata hampinji yinakutandishawu ana kwaYesu awayishewa nsañu yayiwahi niakwawu ezaza deneni nikukwasha antu kumukuhwelela Yesu, ‘chejeji chawaJentili.’

12. Indi Yehova wamuhana ñahi Kambuñindi neyi “wachitiyañenu chawantu”?

¹² Muwuprofwetu wowumu, Yehova wamulejeli Kambuñindi watondewa nindi: “Nukukuhembaña, nukukuhana wikali wachitiyañenu chawantu.” (Isaya 42:6) Satana wazatili nañovu chikupu kulonda yamujahi Yesu nikumukañesha kuzata mudimu windi hamaseki, ilaña Yehova wamukiñili nichashikili mpinji yafwiliyi. (Matewu 2:13; Yowanu 7:30) Kufumahu Yehova wamusañwili Yesu nakumuhana neyi “chitiyañenu,” hela chikaninu kudi antu ahamaseki. Ichi chikaninu chalala chamwekesha chikupu nawu Kambuña Nzambi washinshika wukatwalekahu kwikala ‘chejeji chawaJentili,’ nakukula ejima adi mumwidima wakuspiritu.—Tañenu Isaya 49:8, 9. *

13. Munjilanyi mwafumishililiyi Yesu “antu ashakama mumwidima” hampinji yazatileñayi mudimu windi hamaseki, nawa watwalekahu ñahi kwila mwenimu?

¹³ Kwesekeja nachikaninu chenichi, Kambuña Yehova watondewa ‘wakatonesha mesu apuuta,’ “kufumisha atuyili mukaleya,”  nikufumisha “antu ashakama mumwidima.” (Isaya 42:7) Hampinji yazatileñayi mudimu windi hamaseki, Yesu wakoñeli mwenimu kuhitila mukumwekesha hatooka to-o nsakililu yakutwamba nikushimwina nsañu yayiwahi yaWanta. (Matewu 15:3; Luka 8:1) Dichi wayifumishili aYudeya ekalili atumbanji twindi muwuduñu wakuspiritu. (Yowanu 8:31, 32) Munjila yoyimu, Yesu wakwasha yihita yawantu abula kwikala aYudeya kudiza chalala. Wayinka atumbanji twindi mudimu ‘wakuya nakwilisha atumbanji munyuza yejima,’ nawa wayikanini nindi wakekala nawu “mafuku ejima nikwakakumina nyaka.” (Matewu 28:19, 20) Yesu nakulombola mudimu wakushimwina mukaayi kejima muchifulu chidi chamwiwulu.

Yehova Wamutuumbakesheli “Kambuña”

14, 15. Indi Yehova wamutuumbakesha ñahi Kambuñindi, nawa muloñadi?

¹⁴ Muwuprofwetu wukwawu wahosha hadi Kambuña wawuMesiya, Yehova nindi: ‘Tiyenu, kambuñami wakela chakashinshi, akamutuumbakesha akamulemesha, wakekala muneni nankashi.’ (Isaya 52:13) Muloña wakwila Mwanindi wovwahilili wanta Windi nikushinshika hela tuhu mumpinji yakweseka kwasweja, Yehova wamutuumbakesheli.

¹⁵ Kapostolu Petulu wasonekeli kutalisha hadi Yesu nindi: “Yena waya dehi mwiwulu, wekala kuchikasa chaNzambi chachidiilu; añelu niakwawanta niakwañovu anamwovwahishiluwu.” (1 Petulu 3:22) Chochimu kapostolu Pawulu wasonekeli nindi: ‘Hakudizoza, hakwovwahilaña ho-o, ndo nikukufwa, eña kwokufwa kwahamutondu wakuyandishilahu. Dichi Nzambi nawa namutuumbakeshi chakubadika, namwinki ijina dabadika majina ejima; kulonda mwijina daYesu manuñu ejima akafukami, niamwiwulu, niahamaseki, niamwishina damaseki; nimadimi ejima aketeji nawu Yesu Kristu diyi Mwanta, kulonda kulemesha Nzambi Tata.’—Afwilipi 2:8-11.

16. Indi Yesu ‘wekalili muneni nankashi’ mu 1914 munjilanyi, nawa chumanyi chazatayi kufuma tuhu hayina mpinji?

¹⁶ Mu 1914 Yehova wamutuumbakesheli Yesu chikupu. ‘Wekalili muneni nankashi’ chelili Yehova yamuswanyiki hamu neyi Mwanta waWanta wawuMesiya. (Masamu 2:6; Danyeli 7:13, 14) Kufuma tuhu yina mpinji, Kristu watwalekahu ‘kwikala mwanta hadi ayilumbu jindi.’ (Masamu 110:2) Wasambilili kwikala  mwanta hadi Satana niandemoni jindi nakuyumbila hamaseki. (Chimwekeshu 12:7-12) Kufumahu, Kristu wakalakeli neyi Kirusi Muneni, walubwili anakwindi awayishewa ashalahu hamaseki kufuma ‘muBabiloni Muneni.’ (Chimwekeshu 18:2; Isaya 44:28) Watwamininaña mudimu wakushimwina mukaayi kejima wunaleteshi kupompesha ana kwindi akuspiritu “anashali” niyihita ‘yanyikoku yacheñi, ovwahila alunda ‘akamukanka kanyikoku kantesha.’—Chimwekeshu 12:17; Yowanu 10:16; Luka 12:32.

17. Yumanyi yitunadizi chikupu kuhitila mukushinshika wuprofwetu waIsaya kutalisha hadi “kambuña”?

¹⁷ Chalala kudiza iwu wuprofwetu wadimena mumukanda waIsaya kunatuleteshi kwiluka chikupu nsañu yahosha hadi Mwanta wetu nawa Nkuli, Kristu Yesu. Kwovwahila kwindi hamu neyi mwana hampinji yazatileñayi hamaseki kwamwekesheli yuma yadiziliyi kudi Tata yindi henohu kanda yenzi hamaseki. Nadimwekeshi kwikala ‘chejeji chawaJentili’ kuhitila mumudimu windi nimumudimu wakushimwina wunakulombolayi nimakonu. Neyi chitukumona cheñi, wuprofwetu wukwawu wahosha hadi Kambuña wawuMesiya wamwekesheli nawu wakakabakana nikuhana wumi windi kulonda tuhetelumu. Iyi hinsañu yitwatela ‘kutoñojokahu chikupu’ chineli Chanukishu chakufwa kwindi hichikuswila kwakwihi.—Aheberu 12:2, 3.

[Tumazu twaheshina]

Kuhitulukamu

• Indi “kambuña” yatenawu muwuprofwetu waIsaya hinyi, nawa tuneluki ñahi?

• Yumanyi yamudizishiluwu Kambuña kudi Yehova?

• Indi Yesu wekala ñahi ‘chejeji chawaJentili’?

• Indi Kambuña amutuumbakesheli ñahi?

[Malwihu aKuzatisha haKudiza]

[Mwevulu wudi hefu 21]

Fwilipu wamuteneni “kambuña” yashimwinuwu kudi Isaya hamu neyi Yesu, Mesiya

[Mwevulu wudi hefu 23]

Hakwikala Kambuña Yehova watondewa, Yesu watiyilili wushona atuzweñi niakata

[Mwevulu wudi hefu 24]

Yesu amutuumbakesheli kudi Tata yindi nikumuswanyika neyi Mwanta waWanta wawuMesiya