Yesu hiChakutalilahu Chachiwahi chaKwimbujola

KOMANA munakukeña kwikala muntu wamuwahi, nawa wamuzañalu? Kapostolu Petulu walumbulula chitwatela kwikala amawahi nawa amuzañalu. Wasonekeli nindi: “Kristu niyena wayimweneni yihuñu, wayishiyilili chuma chakutalilahu, kulonda mwendi mumahaji indi.” (1 Petulu 2:21) Eñañi, chineli wahandili chihandilu chabadika kuwaha, Yesu Kristu wakoñeli yuma yayivulu yitwatela kudizilaku. Kuhitila mukudiza hadi Yesu nikwimbujola chihandilu chindi, tunateli kwikala antu amawahi nawa amuzañalu. Tushinshikenu chachiwahi hayililu yadiña naniwu muntu wabadika kulonda twiluki chitwatela kudizilaku kuchakutalilahu chindi.

Yesu wesekejeleña yuma muchihandilu. Hela chakwila Yesu wahosheli nindi wadiña wudana “nihakusachila mutu,” hadiña nakuhanda chihandilu chawuzweñi hela kuleja antu kwikala atuzweñuku. (Matewu 8:20) Wayileña kuyawija. (Luka 5:29) Chihayamisha chindi chatachi chakoñeliyi chasonekawu, chakubalumuna menji kwikala vinyu hachawija, chamwekeshaña nawu wadikundeleña nawantu nawa halejeleña antu kwikala atuzweñuku. (Yowanu 2:1-11) Hela chochu, Yesu washimwini hatooka chuma chalemesheliyi chikupu. Wahosheli nindi: “Kudya kwami yowu kwila muchima wayena wantemesheli, nakamanishi mudimu windi.”—Yowanu 4:34.

□ Komana munashinshiki hachihandilu chenu kulonda mwiluki chimwatela kwesekeja yuma yakumujimba niyakuspiritu?

Yesu wadiña wakasunuka. Bayibolu yamulumbulula Yesu nawu wadiña muntu waseha nawa wakasunuka. Chiyenjileñawu antu nakumuleja kukala kwawu nikumwihula malwihu akola, hahilileñaku. Mpinji yimu izaza chidapompeli kudi yena, mumbanda wayandili nachikatu hadi yaaka 12 wamukunkili, wakeñeleña nindi amuuki. Yesu hamukaaninuku neyi chatoñojokeli antu nawu wakoñeli chuma chatama ilaña wahosheli mumesu akuwunda nindi: “Eyi mwanami, kukuhwelela kweyi kunakukoleshi dehi.” (Maku 5:25-34) Anyana niwena adiñi akasunuka kwinza kudi yena, chakadi kutoñojoka nawu wukuyidiwula. (Maku 10:13-16) Nzatilu yindi nawatumbanji ayilukilili hampinji yahanjekeleñayi nawu mukukasunuka. Adiña akasunuka kudikunda nindi.—Maku 6:30-32.

□ Komana antu ekala akasunuka kuhanjeka nenu?

Wadiñi nakutiyila antu wushona. Chililu chimu chaYesu chabadika chadiñi chakutiyila antu wushona, kwikala nawushona neyi wadiña nawantu amakwawu, nikuyikwasha. Kapostolu Yowanu washimuna nindi Yesu chamweniyi Mariya nakudila mana kwindi Lazaru wafwili, Yesu ‘wadishishimwini muspiritu, atiya nikukala’ nawa ‘wadilili.’ Antu amumweneña amweni wushona waweni watiyililiyi Yesu achina chisaka, hatiyili nsonyi yakumwekesha wushona weniwuku. Chalala, wamwekesheli wushona waweni hampinji yamusañwiliyi ibwambu dindi.—Yowanu 11:33-44.

 Cheñi, hampinji yikwawu, iyala wakatileña mbumba—musoñu wafwana chikupu wamuleñeleli kushakama kwakankawindi—wamulembeleleli Yesu nindi: “Mwanta, neyi wuneteji, wukutwesha kuntookesha.” Chuma chakoñeliyi Yesu chadiñi chachiwahi: ‘Hakwolola chikasa chindi, hakumukunka nindi: Neteji, tookaku.’ (Matewu 8:2, 3) Yesu hadiñi nakuuka antu kulonda kushikija wuprofwetuku. Wakeñeli kuyikombola madilu. Yuma yejima yeliliyi yashindameneni hanhoshelu yindi yitwanukaña yakwila nawu: “Mwomukukeña antu kuyilenu ninenu nawa yililenu wena chochimu.”—Luka 6:31.

□ Komana yililu yenu yamwekeshaña wushona kudi antu adi nakukala?

Yesu wadiñi nakutiyilila antu. Hela chakwila Yesu hakoñeli nshidiku, hakuhweleleli antu kwikala awanina hela kudimwekesha neyi wabadika amakwawuku; indi kwiji kuzata chakadi kwilukisha chidi nsañuku. Mumbanda ‘welukiluwu mumusumba nawu himukwanshidi’ wamwekesheli chikuhwelelu chindi nikuhameka kuhitila mukuzowesha nyendu yaYesu namadilu indi. Yesu wamwitejeli kwila mwenimu, ilaña mwiniitala wamusompesheli chikupu. Hakutiyisha kashinshi kindi, Yesu hamuhishili mumbanda hanshidi jinduku. Ilaña, wahosheli nindi: “Kukuhwelela kweyi kunakuhandishi dehi; yaña nakuwunda.” Hamuloña wakwila Yesu wamwilili kakawahi, chakadi nikujina iwu mumbanda watela walekeli njila jindi jatama.—Luka 7:37-50.

□ Komana antu ayiluka nawu mwanyakalaña kuhameka akwenu nikubula kunyakala kutwinka akwenu nyiloña?

Wadiña nakalemesha nawa hadiñi nachaambuku. Hadaha muloña wakwila adiñi nayililu yoyimu nawa hakachi kawu hadiña wuntaña, dihafumini Yesu kusweja kumukeña kambanji Yowanu. * Hela chochu, hamumwekesheleli chaambu, hela kusweja kumukeña kubadika atumbanji amakwawuku. (Yowanu 13:23) Hampinji yakeñeli Yowanu nimana kwindi Yakoba chifulu chalema muWanta waNzambi, Yesu wayilejeli nindi: “Kushakama kuchikasa chami chachidiilu, hela kuchikasa chachimunswa, hichuma chami mwaka nichihanuku.”—Maku 10:35-40.

Yesu walemesheleña antu mpinji yejima. Hadiña nakumwekesha chaambu neyi chamwekesheleña antu hayina mpinjuku. Chakutalilahu, ambanda ayimweneña neyi amukunkulwayi kubadika amayala. Ilaña, Yesu wayilemesheli ambanda chikupu. Mpinji yatachi yahosheliyi hatooka nindi hiMesiya,  wadilumbulwili kudi mumbanda wabulili kwikala kaYudeya ilaña kaSamariya, wateleleli kusawulawu kudi aYudeya, nikubula kumwimusha. (Yowanu 4:7-26) Cheñi, ambanda diwu adiña nakukooleka kwakwikala ayinsahu atachi kumona kusañuka kwaYesu.—Matewu 28:9, 10.

□ Komana mwekala nachaambu hakudikunda nawantu amuchidi wacheñi, antu ahoshaña idimi dacheñi hela akumuza wacheñi?

Wazatili nyidimu yindi neyi mwana nimana kwawu. Hekwawu, Yosefu, tata yaYesu, wafwili henohu Yesu wuchidi kansi. Hadaha, Yesu wamukwashileña mama yindi nianyiki jindi awamayala niambanda kuhitila mumudimu wakusoñasoña. (Maku 6:3) Chelili wudi kwakwihi nakufwa, Yesu wamwinkeli kambanji kindi Yowanu mudimu wakwakamena mama yindi.—Yowanu 19:26, 27.

□ Komana kwila mwimbujola Yesu kuhitila mukuzata nyidimu yachisaka chenu neyi cheliliyi yena nehi?

Wadiñi ibwambu walala. Hakwikala ibwambu dawantu, Yesu wadiñi wabadika. Munjilanyi? Hakaanini amabwambu jindi hamuloña wakukoña yiluwaku, hela chakwila adiñi nakufuntila hayiluwa yoyimu. Mpinji jikwawu atumbanji twindi hiyadiñi nakwila yuma kwesekeja namwakeñeleleñayi Yesuku. Ilaña, wadimwekesheli nindi wadiñi ibwambu dawu kuhitila mukushinshika hohu hayuma yayiwahi yakoñeleñawu bayi hayililu yawu yatamaku. (Maku 9:33-35; Luka 22:24-27) Chatela yayikakejeña kwiteja mwafuukwileñayi, Yesu wayilejeli kudihoshela aweni yitoñojoka yawu.—Matewu 16:13-15.

Sweje-e, Yesu wakeñeli amabwambu jindi. (Yowanu 13:1) Wamwekesheli ñahi kukeña kwindi? Wahosheli nindi: “Hikudi kukeña kwabadika kwenikuku, kwakutulayi muntu wumi windi hanyijimba yawamabwambu jindi.” (Yowanu 15:13) Kuduhu muntu wunateli kwinka amabwambu jindi chuma chasweja kulema kubadika wumi windi?

□ Komana mwahembaña wubwambu hela chakwila antu anayihilishi hela anayivulumuni?

Wadiñi wudana woma nawa mukwañovu. Yesu wadiñi wambukaku chikupu nawantu azeya, neyi chamwekeshaña akwakufunjijeka nawu wadiña wazeya. Nsañu Yayiwahi yamushimuna Yesu nawu wadiñi wakola, nawa mukwañovu. Yesu watemwini akwakulanda nakulandulula nikumwaña yuma yawu mutembeli. (Maku 11:15-17; Yowanu 2:14-17) Izaza chidenjili nakumukasa “Yesu wakuNazareta,” wayili kumbidi chakubula woma nakudilumbulula nikukiña atumbanji twindi, nakuhosha nañovu nindi: “Diyi ami; dichi neyi yami mudi nakukeña yilekenu awa adiyili kwawu.” (Yowanu 18:4-9) Pontusi Pilatu chamweniyi kuhamuka kwaYesu akasiluwu nawa akabishileñawu wahosheli nindi: “Talenu iwu muntu!”—Yowanu 19:4, 5.

□ Neyi muneluki chuma chimunakukeña kwila komana mwafuukulaña mukunyakashana nawa chakadi woma?

Iyi yililu niyililu yikwawu yabadika yamuleñela Yesu kwikala chakutalilahu chetu chachiwahi. Neyi twimbujolaña yililu yindi, tukwikala antu amawahi nawa amuzañalu. Dihafumini kapostolu Petulu kukonkomwena akwaKristu kulondela mumahaji aYesu chikupu. Komana mwafwilaña kulondela mumahaji aYesu chikupu?

Yesu Hekala Hohu Chakutalilahu Chakwimbujolaku

Hela chochu, Yesu hadiña hohu chakutalilahu chakwimbujolaku. Wahosheli nindi: “Ami yami njila, yami walala, yami wumi. Kwosi muntu niwumu wukwinza kudi Tata chiña hadami.” (Yowanu 14:6) Kubombela hakulumbulula chekalayi Nzambi, nakwenzulula njila yakukundaminamu kwakwihi  naNzambi, Yesu waleñeleli akwaKristu ashinshika kutambula wumi.—Yowanu 3:16.

Yesu wahosheli kutalisha hachuma chamuleñeleli yenzi hanu hamaseki nindi: “Chenjiliyi Mwana kamuntu halondeli nindi akamukalakeluku, ilaña nindi akakalakeli akwawu, akahani wumi windi wakukula nachu antu amavulu.” (Matewu 20:28) Kuhitila mukulambula wumi windi, Yesu waalili chikuku chawantu kulonda akadiluñishi wumi wahaya nyaka. Chumanyi chitwatela kwila hamuntu hamuntu hakwila nawu tukadiluñishi iku kuloñesha? Yesu walumbulwili nindi: “Wumi wahaya nyaka woweniwu, wakukwiluka eyi Nzambi walala wumu hohu, niYesu Kristu watemesheli.”—Yowanu 17:3.

Eñañi, hakwila nawu tukatambwili wumi wahaya nyaka, twatela kumwiluka Yesu, kwimbujola chihandilu chindi, nikukuhwelela mukufwa kwindi kwadiheniyi. Tunayikoleshi kwikala nampinji yakudiza Bayibolu, nsulu yakwiluka, nikufwila kuzatisha yuma yahosha Bayibolu neyi cheliliyi Yesu. *

Chakutalilahu chachihandilu chaYesu chatudizishaña chitwatela kwikala. Kufwa kwindi kwakudihana kunateli kutufumisha muwuduñu wanshidi niwuloku wachi, kufwa. (Aroma 6:23) Tunateli kwikala mukukala kweneni neyi tukaana yililu yaYesu Kristu yabadika. Dichi bayi twiteja yisela nikudakamena kutuleñeli kubula kutoñojoka nikulondela chikupu chakutalilahu chamuntu wabadika—Yesu Kristu.

[Tumazu twaheshina]

[[Chikasha/Nyevulu yidi hefu 7]

◼ Yesu walemesheleña antu ejima nawa hadiñi nachaambuku

◼ Wadiñi ibwambu walala ndo nikunsa

◼ Hadiña nawomaku

Komana mwafwilaña kulondela chikupu mumahaji aYesu?

[Nyevulu yidi hefu 5]

Yesu wesekejeleña yuma muchihandilu . . .

wadiña wakasunuka . . .

Watiyilileña Antu Wushona