Yuma Yahoshañawu Antu Hadi Yesu

“Yesu wakuNazareta . . . himuntu welukewa chikupu muchihandilu chawantu.”—H. G. Wells, kaEnglish wakuluka yitembi munsañu janyaka.

“Kristu . . . diyi muntu wambukaku hakachi kawantu aya mpuhu muchihandilu chawantu.”—Philip Schaff, mukwansakililu nawa weluka nsañu janyaka wavwalikililili kwituña daSwitzerland.

HINYI watelela kwikala nkuluñaña wabadika chikupu? Munateli kwiluka ñahi nenu iwu muntu hinkuluñaña wabadika? Komana anateli kumwilukila kukulwa njita chikupu? Tahindi kuñovu? Indi kwiji kukwiluka yuma chikupu? Tahindi amwilukilaña kunhoshelu, nikuyuma yelilayi antu nichakutalilahu chemikilayi antu?

Talenu nsañu yasonekeluwu antu eluka nsañu yanyaka, asayantisiti, atudizi, ansoneki, nianlomboli jansañu jamatuña nachiyulu, niantu amakwawu—akunyaka niakatataka—ahosha kutalisha hadi muntu wakuNazareta, Yesu Kristu nawu:

“Hakwila nawu wukaani iwu muntu waya mpuhu, chakeñekaña kwikala nawunsahu walala—nawa hiwatela kushindamena hayaaka makombakaji ayedi anahituhuku, ilaña watela kushindamena hachihandilu chejima chawantu—wunsahu wahosha hadi Yesu wakuNazareta.”—Reynolds Price, nsoneki wakuAmerica nawa kadizi waBayibolu.

“Muntu wakadi muloña wadiheni kwikala mulambu kulonda yahandishi antu, kushilahu niayilumbu jindi nawa wekalili ifutu danyiloña dawantu ejima. Wazatili chuma chachiwahi chikupu.”—Mohandas K. Gandhi, mukulumpi wajipolitiki nawa nlomboli wansakililu yamuIndia.

“Hakwikala mwana wanyanya, nadizili nshimbi jamuBayibolu nijamumukanda Talmud. Nekala kaYudeya, ilaña natiyaña kuwaha yuma yatiyakana yasonekawu hadi Yesu.”—Albert Einstein, kasayantisiti wasemukilili kuGerman.

“Kwesekeja nachinatoñojokaña, Yesu Kristu diyi wekala nayililu yambukaku chikupu mpinji yejima, muchihandilu chawantu chejima, hakwikala Mwana kaNzambi nawa Mwana kaMuntu. Yuma yejima Yahosheliyi niyakoñeliyi yalema chikupu kudetu makonu, nawa kwosi chuma chinateli kwilayi muntu wamumi hela wafwa chikwesekana nachakoñeliyi Yesu.”—Sholem Asch, wavwalikilili kwituña daPoland nsoneki wansañu neyi chashimunawu mumukanda waChristian Herald.

“Hayaaka 35 yamuchihandilu chami hinakuhwelela chuma chidi chejimaku. Hayaaka yitanu yinahituhu dihinelukili chikupu nami Yesu wadiñi kwoku. Nakuhweleleli yuma yahosha hadi Yesu Kristu nawa chihandilu chami chahimpikili mukunyakashana chikupu.”—Count Leo Tolstoy, Nsoneki wakuRussia wanyikanda nawa mukwamaana.

“Chihandilu cha[Yesu] chinakwashi antu amavulu nankashi muchihandilu chawantu nawa chichidi kukwasha antu.”—Kenneth Scott Latourette, weluka nsañu yanyaka wakuAmerica nawa nsoneki.

“Komana tukuhosha netu nsañu yanyaka yachihandilu chaYesu yakulumbisha hohu? Inehi, ibwambu dami, hinsañu yakulubishaku. Kwambukaku, nsañu yanyaka yahosha hadi Socrate, (mukwamaana wadiñaku munkulakaji yanyaka 5 B.C.E.), yetejawu antu ejima, hiyayiluka chikupu neyi chelukawu nsañu yaYesu Kristuku.”—Jean-Jacques Rousseau, mukwamaana wakwituña daFrance.

Mwalala, Yesu Kristu diyi chakutalilahu chetu chitwatela kwimbujola muchihandilu. Pawulu, muntu wataña chikupu wamuyaaka nkulakaji yakusambila watondeluwu kudi Yesu kwikala kambanji Kindi nawa wamutiyakesheli kunyuza, natukonkomweni, ‘kutalisha mesu’ kudi Yesu. (Aheberu 12:2; Yililu 9:3) Indi Yesu nateli kutukwasha ñahi chitwatela kuhanda? Indi chihandilu chindi chinateli kuyikwasha ñahi?