Zañalalenu naMudimu waKwilisha Atumbanji
Zañalalenu naMudimu waKwilisha Atumbanji
‘Dichi yenu mwakelishi atumbanji.’—MATEWU 28:19.
1-3. (a) Indi antu amavulu atiyaña ñahi kutalisha hakulombola kudiza kwaBayibolu? (b) Malwihwinyi yitukuhanjekahu?
M UHELA wapompaña mwizanvu dahoshaña idimi daHindi muUnited States wasonekeli nindi, “Nadizileña nachisaka chafumini kuPakistan hadi nyilungu 11 yinahituhu.” Watwalekeluhu nindi, “tunekali amabwambu. Chinatoñojoka nami ichi chisaka hichikufunta kuPakistan, madilu enzaña. Bayi neyi madilu enzaña hohu hachineñi chinatiyaña hakujimbesha wulunda wawuku, ilaña hamuzañalu wunatiyileña hakuyidizisha hadi Yehova.”
2 Kufwana iwu muhela, komana ninenu mwatiyahu dehi muzañalu wekalaña hakudiza Bayibolu namuntu? Yesu niatumbanji twindi amunkulakaji yayaaka yakusambila azañaleli chikupu namudimu wakwilisha atumbanji. Chelili atumbanji 70 adizishiluwu kudi Yesu afunti namujimbu wawuwahi, Yesu ‘wazañaleli mudi spiritu yajila.’ (Luka 10:17-21) Hohamu, antu amavulu makonu ekalaña namuzañalu hakwilisha atumbanji. Kafwampi, mu 2007, akwakushimwina adikita nawa amuzañalu alombweli kudiza kwaBayibolu naavareji yakushika ku 6,500,000 hakakweji nikakweji.
3 Hela chochu, akwakushimwina amakwawu kanda alomboleñahu dehi kudiza kwaBayibolu. Amakwawu munahiti yaaka chakubula kulombola kudiza kwaBayibolu. Kukalanyi kutunateli kumona hampinji yitunakufwila kulombola kudiza kwaBayibolu? Tunateli kushinda ñahi kukala kweniku? Nkiswinyi yitwekalaña nayu neyi tukalakala nañovu jetu jejima hakwovwahila kuleja kwaYesu kwakwila nawu: “Dichi yenu mwakelishi atumbanji”?—Matewu 28:19.
Kukala Kunateli Kutumanishila Muzañalu
4, 5. (a) Indi antu amavulu mumatuña amakwawu atambwilaña ñahi nsañu yayiwahi? (b) Kukalanyi kwamonañawu akwakushimwina mumatuña amakwawu?
4 Mumatuña amakwawu, antu atambwilaña chikupu nyikanda yetu nawa akeñaña kudiza Bayibolu nanetu. Eyala namumbanda akuAustralia azatilili muZambia hakapinji kantesha asonekeli nawu: “Nsañu yitwatiyaña yalala. Zambia hiluña dadiwahi kushimwinamu. Kushimwina mumukwakwa kwakuwahi nankashi. Antu atusolomokaña, amakwawu ehulaña nijimagazini jinakukeñawu.” Muchaaka chimu chinahituhu amana kwetu niahela muZambia alombweli kudiza kwaBayibolu kubadika ha 200,000, dikwila nawu mukwakushimwina wumu walombweli kudiza kwaBayibolu kubadika hamuntu wumu haavareji.
5 Hela chochu, mumatuña amakwawu, chayikalilaña akwakushimwina kuhana nyikanda nikulombola kudiza kwaBayibolu mpinji yejima. Muloñadi? Kakavulu, antu hiyawanikaña hamatalaku neyi chakwila akwakushimwina anayendeli, nawa ana awanikaña hamatala hadaha adiwula nsañu yansakililu. Hadaha akulilili muchisaka chabula kwitiya indi kwiji ahela wunfwikiji wekala munsakililu yakutwamba. Antu amavulu ayikabisha nikuyipalañesha kudi atubiña akutwamba. (Matewu 9:36) Chakadi nikujina, antu amuchidiwu anateli kuleya kuhanjeka hansañu yamuBayibolu.
6. Kukalanyi kunateli kumonawu akwakushimwina amakwawu?
6 Akwakushimwina ashinshika amakwawu amonaña kukala kwashiyashana kunateli kumanisha muzañalu wawu. Hela chakwila kunyima adikitileña chikupu mumudimu wakwilisha atumbanji, chayinu mpinji anakumona kukala kwayikatu hela kukala kwenzaña muwushinakaji. Talenu cheñi kukala kukwawu kutunateli kudikolomwena. Chakutalilahu, komana mwatiyaña nenu himwashikahu kulombola kudiza kwaBayiboluku? Munateli kutiya neyi chatiyiliyi Mosi hampinji yamulejeluwu kudi Yehova kuhosha naFwaro. Mosi wahosheli nindi: “Ala Mwanta wami! Ami neluka kuhosha wanyi! Kanda dehi niilukañahu dehi kuhoshaku.” (Kwidika 4:10) Woma wakukañanya kuzata chuma diwaleteshaña muntu kutoñojoka nindi hashikahuku. Tunateli kwakamena netu muntu hanateli kwikala kambanjuku muloña hitudi antañishi amawahuku. Hakwila tutondolweli woma weniwu, tunateli kufuukulahu kubula kulombola kudiza. Tunateli kushinda ñahi kukala kutunateni?
Diloñeshenu muMuchima
7. Chumanyi chamusañumwini Yesu mumudimu windi wakushimwina?
7 Chuma chatachi chitwatela kwila hikuloñesha muchima wetu. Yesu wahosheli nindi: “Kanwa . . . kahoshaña yoyuma yalumbama mumuchima.” (Luka 6:45) Chuma chamusañumwini Yesu mumudimu windi wakushimwina hikwikala nampwila yayeni muchihandilu chawantu amakwawu. Chakutalilahu, chamweniyi nindi akwawu aYudeya adambwili kudi Nzambi, ‘wayitiyilili wushona.’ Wayilili atumbanji twindi nindi: “Mbutu jajivulu jinahi dehi . . . Lombenu kudi Mwanta wakumuna atemeshi akwakukalakala kukumuna kwindi.”—Matewu 9:36-38.
8. (a) Yumanyi yitwatela kutoñojokahu? (b) Yumanyi yitunateli kudizilaku kumazu asonekeli kadizi waBayibolu wumu?
8 Hampinji yitudi mumudimu wakwilisha atumbanji, chikuwaha neyi tukutoñojoka chikupu hankisu yitunahetelumu hamuloña wakwila muntu wumu wadiheni kutudizisha Bayibolu. Toñojokenu cheñi hadi antu yitukuwana mumudimu wakushimwina nawa nichuma chiyakuhetelamu hakutiyilila kunsañu yitwashimwinaña. Mumbanda wumu wasonekeleleli kasanji kamutayi kamwituña mwashakamañayi nindi: “Inakukeña kuyileja chinasakililaña nankashi aYinsahu andizishaña hetala dami. Neluki nami mpinji jikwawu atela aneñaña muloña nayihulaña malwihu amavulu nawa mpinji yejima nabadishaña hampinji yitwaditeja kudiza. Ilaña afwilaña chikupu kundizisha mumesu awunda yuma yadizawu. Namusakililaña Yehova niYesu hamuloña wakwila awa antu anankwashi muwumi wami.”
9. Indi Yesu watili muchima hachumanyi, nawa tunateli kumwimbujola ñahi?
9 Kafwampi, bayi neyi antu ejima etejeli ntañishilu yaYesuku. (Matewu 23:37) Amakwawu amulondeleleli hakampinji kantesha ilaña akaanini ntañishilu yindi, “kwenda nawa cheñi nindi nehi.” (Yowanu 6:66) Hela chochu, Yesu hatiyili kukala nanochu chabuliluwu amakwawu kwiteja nsañu yindi nakutoñojoka nindi nsañu yindi yadiñi yamukunkulwayuku. Hela chakwila mbutu yayivulu yakuwiliyi hiyasoñeli nyikabuku, Yesu watili muchima hayuma yayiwahi yadiñi nakwilayi. Wamweni nindi maha anatookashani to-o nakumuna nawa wazañaleli chikupu hakukwashana mukumuna. (Tañenu Yowanu 4:35, 36.) Chatela tushinshikeña hohu mwiluña mwabulaña kwitejawu nsañu yayiwahi, komana kwila tusha muchima hakukalakala mudimu wakumuna nikukuhwelela netu mukusoña nyikabu nehi? Tushinshikenu chitwatela kutwalekahu nayililu yayiwahi yamuchidiwu.
Shimwinenu naChikonkwanyi chaKutachika Kudiza kwaBayibolu
10, 11. Chumanyi chimwatela kwila hakwila mutwalekuhu kwikala namuzañalu?
10 Ndimi wakuwaña mbutu nachikonkwanyi chakumuna. Hohamu, twatela kushimwina nachikonkwanyi chakutachika kudiza kwaBayibolu. Indi neyi chakwila mpinji yejima mwayaña mumudimu wamwiha ilaña mwawanaña antu antesha hamatala indi kwiji himwadimonaña nawantu imwafuntilañaku? Chumichi chinateli kuyitiyisha kutama. Komana mwatela kuleka kushimwina kwitala nikwitala? Inehi! Antu amavulu achidi kuyishimwina kuhitila muniyi njila yayiwahi yakushimwinamu yinazatishuwu hadi yaaka yayivulu.
11 Hela chochu, hakwila nawu mutwalekuhu kwikala namuzañalu, kwila muzatisha njila jashiyashana jakushimwinamu, hekwawu kushilahu njila jikwawu jakuwaninamu antu nehi? Chakutalilahu, mwesekahu dehi kushimwina antu mumukwakwa hela kumaluña kwazatilañawu? Komana, kwila muhanjeka nawantu hanshiña hela kutambula jinaambala janshiña jawantu yimwashimwinini kulonda kuhanjeka nawu nehi? Kuhitila mukutatakena nikuhimpa jinjila mwakushimwina mumudimu wenu, mukekala namuzañalu wakuwana antu akatambwila chachiwahi nsañu yaWanta.
Kuumika Kadiwu
12. Chumanyi chitwatela kwila neyi chakwila antu amavulu amwiluña detu dakushimwina ekala nakadiwu?
12 Indi neyi antu amavulu mwiluña denu dakushimwinamu adiwulaña nsañu yansakililu? Komana, kwila mutachika mpanji kuhitila mukutena chuma chinateli kuyishika hamuchima nehi? Kapostolu Pawulu wasonekeleli akwawu akwakwitiya muKorinda nindi: “Kudi aYudeya nelili neyi nikaYudeya . . . Kudi antu abula nshimbi nelili neyi nabula nshimbi.” Chumanyi chafwilileñayi Pawulu? Wahosheli nindi: “Nekali dehi wesekana nawantu ejima muyuma yejima, kulonda mwejimimu nitweshi kuhandisha nachu amu.” (1 Akorinda 9:20-22) Komana, kwila ninetu tuwana nsañu yayiwahi yinateli kushika hanyichima yawantu amwiluña detu dakushimwina nehi? Antu amavulu abula kwitiya akeñaña kuwahishaku wulunda nayisaka yawu. Cheñi, hadaha anakukeñakeña muloña wutwekalilaku hamaseki. Komana, kwila tushimwina nsañu yaWanta kudi antu amuchidiwu munjila yinateli kuyishika hamuchima nehi?
13, 14. Tunateli kutwalekahu ñahi namuzañalu wutwekalaña nawu mumudimu wakwilisha atumbanji?
13 Akwakushimwina amavulu anekali namuzañalu wekala mumudimu wakwilisha atumbanji, nimumaluña mwekala antu amavulu akweti kadiwu. Munjilanyi? Kuhitila mukudiza idimi dacheñi. Eyala namumbanda adi muyaaka yamuma 60 amweni nawu atudizi amavulu akuChina niyisaka yawu ashakamineña mwiluña dachipompelu chawu dakushimwinamu. Iyala wahosheli nindi: “Ichi chatuletesheli kudiza idimi dakuChina. Hela chakwila chakeñekeleña mpinji yakudiza idimi denidi hefuku-hefuku, chatwileteleli muzañalu muloña twatachikili kudiza Bayibolu nawantu amavulu akuChina amwiluña detu.”
14 Hela chakwila himunatweshi kudiza idimi dacheñuku, neyi muwana antu ahoshaña idimi dacheñi munateli kuzatisha kamukanda kahoshaña nawu Good News for People of All Nations. Munateli cheñi kusenda nyikanda yamwidimi dawantu yimwawanaña. Chakadi nikujinoka, chakeñekaña mpinji yeneni chikupu niñovu hakwila muhanjeki nawantu akweti chisemwa chacheñi niahoshaña idimi dacheñi. Ilaña, anukenu nshimbi yawanikaña Mwiizu daNzambi yakwila nawu: “Muntu wukukuwa yayivulu wakaañula nawa yayivulu.”—2 Akorinda 9:6.
Chipompelu Chejima Chakwashaña Kwilisha Atumbanji
15, 16. (a) Muloñadi mudimu wakwilisha atumbanji chiwekalila wachipompelu chejima? (b) Mudimwinyi wakalakalañawu atushinakaji muchipompelu?
15 Hela chochu, kwilisha atumbanji hikwashindamena hohu hañovu yamuntu wumuku. Ilaña, chipompelu chejima chakwashaña kwilisha atumbanji. Muloñadi? Yesu wahosheli nindi: “Neyi mukukeñañana, dihu hakayilukilawu antu ejima nawu mudi atumbanji twami.” (Yowanu 13:35) Nawa chakubula nikujinoka, neyi atudizi aBayibolu awanikaña kukupompa, atiyaña kuwaha kukeña kwekalaña hakachi ketu. Kadizi waBayibolu wumu wasonekeli nindi: “Nadiluñishaña chikupu kuwanika kukupompa. Antu ekala nachisambu.” Yesu wahosheli nindi antu ekalaña atumbanji twindi anateli kuyidimbulula kudi chisaka chawu. (Tañenu Matewu 10:35-37.) Hela chochu, Yesu washiikili nindi antu wenawa akekala ‘nawana kwawu, ahelawu, amama jawu nianyana’ amavulu akuspiritu muchipompelu.—Maku 10:30.
16 Sweje-e amana kwetu niahela atushinakaji azataña mudimu walema hakukwasha atudizi aBayibolu kupaminaku kuspiritu. Munjilanyi? Hela chakwila atushinakaji amakwawu hiyanatweshi kulombola kudiza kwaBayiboluku, kwakulahu kwawu hakupompa kwachipompelu kwakoleshaña chikuhwelelu chawantu ejima atiyaña. Wunsahu wawu wakwenda “munjila yakuloña” wakwashaña chipompelu nawa waleñelaña antu ashinshika kwinza mukuloñesha kwaNzambi.—Yishimu 16:31.
Kushinda Woma
17. Chumanyi chitunateli kwila hakwila nawu tushindi woma?
17 Chumanyi chimwatela kwila neyi mutiya nenu himwashikahu kulombola kudiza kwaBayiboluku? Anukenu nenu Yehova wamukwashili Mosi kuhitila mukumwinka spiritu yajila ninkwashi, mana kwindi Aroni. (Kwidika 4:10-17) Yesu wakanini nindi spiritu yaNzambi yikatukwasha mumudimu wetu wakushimwina. (Yililu 1:8) Kubombelahu, Yesu watemesheli akwakuzata ayedi-ayedi mumudimu wakushimwina. (Luka 10:1) Dichi neyi chayikalilaña kulombola kudiza kwaBayibolu, lombenu spiritu yaNzambi kulonda yiyinki maana, kufumahu zatenu namukwakushimwina mukwawu wukuyikolesha nawa wakuluka yitembi wunateli kuyikwasha. Chikuhwelelu chetu chakolaña hakwiluka netu Yehova watondeli kuzatisha antu abula kulemeshawu—“yuma yampata yamunu mwishina yabula ñovu,” kuzata iwu mudimu walema.—1 Akorinda 1:26-29.
18. Tunateli kushinda ñahi woma wakukañanya kukwasha kadizi waBayibolu?
18 Tunateli kushinda ñahi woma wakukañanya kukwasha kadizi waBayibolu? Chikuwaha hama kwanuka netu kwilisha atumbanji hikudi neyi kutwesha kuteleka yakudya hela kukañanyaku, kwashindamena chikupu hadi muntu wumu hohu—mukwakuteleka. Ilaña chakeñekaña antu amavulu. Yehova wakalakalaña mudimu walema hama, kukokela antu kudi yena. (Yowanu 6:44) Etu niakwetu amuchipompelu twakalakalaña hakumina ñovu jetu hakutañisha chiwahi kulonda kukwasha atudizi kupaminaku. (Tañenu 2 Timotewu 2:15.) Nawa kadizi niyena watela kuzatisha yuma yadizañayi. (Matewu 7:24-27) Neyi muntu yoleka kudiza Bayibolu, tunateli kuneña. Tunakuhweleli netu atudizi aBayibolu afuukuluhu chiwahi, ilaña wejima wetu twamba “kalumbulula kudi Nzambi mutwelaña hamuntu hamuntu.”—Aroma 14:12.
Nkiswinyi Yafumañamu?
19-21. (a) Nkiswinyi yitwekalaña nayu hakulombola kudiza kwaBayibolu? (b) Indi Yehova wamonaña ñahi antu ejima akalakalaña mudimu wakushimwina?
19 Kulombola kudiza kwaBayibolu kwatuleñela kufwila kutwamijaku Wanta. Cheñi kwaleñelaña chalala Chezu daNzambi kushimata chikupu muyitoñojoka yetu nimumuchima. Muloñadi chichekalila mwenimu? Payiniya wejina daBarak walumbulula nindi: “Kulombola kudiza kwaBayibolu kwaleñelaña kwikala kadizi wamuwahi Wezu daNzambi. Namoni nami natela kukolesha chikuhwelelu chami henohu kanda nitachiki kutañisha muntu wacheñi.”
20 Neyi himwalombolaña kudiza kwaBayiboluku, dikwila nawu mudimu wenu hiwalema kudi Nzambuku? Inehi. Yehova wahamekaña chikupu chitwazataña nañovu hakumushimeka. Ejima akalakalaña mumudimu wakushimwina ‘hiyakwakukalakala hamu naNzambi.’ Hela chochu, kulombola kudiza kwaBayibolu kwaletaña muzañalu neyi tumona Nzambi chakulishañayi mbutu yitwakuwili. (1 Akorinda 3:6, 9) Payiniya wejina daAmy wahosheli nindi: “Neyi wumona kadizi waBayibolu nakupaminaku kuspiritu wukutiya kuwaha kumuhameka Yehova hakukwiteja kukuzatisha kulonda kumwinka muntu chawaana chachiwahi—kukooleka kwakumwiluka Yehova nikutambwila wumi wahaya nyaka.”
21 Kuzata nañovu jetu jejima kulonda kutachika nikulombola kudiza kwaBayibolu kukatukwasha kushindamena hakumukalakela Nzambi katataka nawa chikakolesha chikuhwelelu chetu kulonda tukapuluki nakwiñila mwituña dadiha. Nawukwashu waYehova, tunateli kukwashaku kupulwisha antu ejima atwitiyililaña. (Tañenu 1 Timotewu 4:16.) Ichi hichuma chatela kutuletela muzañalu.
Munakwanuka?
• Kukalanyi kunateli kukañesha antu amakwawu kulombola kudiza kwaBayibolu?
• Chumanyi chitunateli kwila neyi chakwila antu amavulu amwiluña detu dakushimwina ekala nakadiwu?
• Nkiswinyi yitwekalaña nayu hakulombola kudiza kwaBayibolu?
[Malwihu aKuzatisha haKudiza]