Itejenu Mazu aYesu Ahimpi Yililu Yenu
Itejenu Mazu aYesu Ahimpi Yililu Yenu
‘Atemesheluwu kudi Nzambi wahoshaña mazu aNzambi.’—YOWANU 3:34.
1, 2. Indi mazu aYesu amuMpanji yahaMpidi anateli kuyifwanisha nanka, nawu muloñadi chitukuhoshela netu ashindameneni ‘hamazu aNzambi’?
HAMALOLA adayimani asweja kutoha elukawu makonu, hiilola dimu datenañawu nawu 530-carat Star of Africa. Chalala hiilola dawuseya chikupu. Hela chochu, muMpanji yahaMpidi Yesu watañishili yuma yayivulu yabadika kulema ilola dawuseya. Hitwatela kuhayamaku, muloña mazu atañishileñayi Yesu afuma kudi Yehova. Kutalisha hadi Yesu, Bayibolu yahosha nawu: “Atemesheluwu kudi Nzambi wahoshaña mazu aNzambi.”—Yowanu 3:34-36.
2 Hela chakwila Mpanji yahaMpidi atela ayihosheli hadi jiminiti 30, mpanji yeniyi yikweti nsañu yasombololawu 21 muNyikanda 8 yachiHeberu. Yashindameneni chikupu ‘hamazu aNzambi.’ Ichi dinu tushinshikenu chitwatela kuzatisha mazu amakwawu alema chikupu awanikaña muniyi mpanji yayiwahi yaMwana kaNzambi akeñayi.
‘Sambilaku Kutiyañana naMana Kweyi’
3. Hanyima yakusoñamisha atumbanji twindi hayuma yafumaña mukuzuwa, Yesu waheni kufumbanyi?
3 Etu akwaKristu, twekala namuzañalu nawa akwakuleta kuwunda muloña tukweti spiritu yajila yaNzambi, nimukabu wachu wabombelamu muzañalu nikuwunda. (Aŋalija 5:22, 23) Yesu hakeñeli atumbanji twindi kubula kwikala nakuwunda nimuzañaluku, dichi wayisoñamishili hayuma yafwana yafumaña mukuzuwa. (Tañenu Matewu 5:21, 22.) Kuhiñahu wahosheli nindi: ‘Dichi neyi wudi nakutwala mulambu weyi kukameña, kwenoku hiwukwanuka neyi nidi namuloña namana kwami, shiyaku mulambu weyi kwenoku kukameña, wuyi wusambili kutiyañana namana kweyi; winzi dinu nakuhana mulambu weyi.’—Matewu 5:23, 24.
4, 5. (a) Indi “mulambu” wateneniyi Yesu wasonekawu haMatewu 5:23, 24 hichumanyi? (b) Muloñadi chichalemena kutiyañana namana kweyi iwunavulumuni?
4 “Mulambu” wateneniyi Yesu hichuma chidi chejima chalambwileñawu hatembeli muYerusalema. Chakutalilahu, mulambu wawanyama wadiña walema muloña hayina mpinji wadiña mbadi yakudifukula kwawantu jaYehova. Hela chochu, Yesu wakonkomweneni chuma chalema nankashi—kusambila kutiyañana namana kweyi iwunavulumuni henohu kanda wuhani mulambu kudi Nzambi.
5 Chumanyi chitwatela kudizila kunawa mazu aYesu? Chakadi nikujina, wulunda wetu nawakwetu antu wendelaña hamu nawulunda wetu naYehova. (1 Yowanu 4:20) Mwamweni, nyilambu yalambwileñawu kushankulu yadiña yamukunkulwayi neyi muntu wunakulambula hatiyañanaña nawakwawu antu chachiwahuku.—Tañenu Mika 6:6-8.
Twatela Kudizoza
6, 7. Muloñadi kudizoza chikwakeñekelaña neyi tunakufwila kutiyañana namana kwetu itunavulumuni?
6 Kutiyañana namana kwetu wutunavulumuni kwakeñekaña kwikala wadizoza. Antu adizoza hiyatadikaña hela kubobola nawakwawu akwakwitiya hamuloña wakufwila kudiyiñishaku. Chumichi chinateli kuleta kukala kwakweni, neyi kwadiña nawakwaKristu amuKorinda wakushankulu. Kutalisha haniku kukala, kapostolu Pawulu wahosheli ichi chikuma chitwatela kutoñojokahu chikupu nindi: “Ochu chimukudiholokela muntu namukwawu, chikwikala chuma chatama mukachi kenu. Mwalekelañadi kukumina dakwiteja kuyikoña chatama? Mwalekelañadi kukumina dakwiteja kuyidiila yuma yawukombi?”—1 Akorinda 6:7.
7 Yesu hahosheli nindi twatela kumuwana mana kwetu kulonda kumushinjila netu hitwaluwañeshaku, ilaña yena diyi waluwañesha. Nkeñelu yetu yayeni yatela kwikala yakuya nakutiyañana. Hakwila nawu tutiyañani twatela kuhosha chakubula kuhita mumbadi chitunakutiya. Cheñi twatela kwiluka netu tunamuneñeshi mukwetu. Nawa neyi tunaluwañeshi, chakadi nikujina twatela kudanakena mukudizoza.
‘Neyi Disu Deyi daChidiilu dinaKukudimbwisha’
8. Shimunenu mukwihihisha mazu aYesu ekala haMatewu 5:29, 30.
8 MuMpanji yindi yahaMpidi, Yesu waheni kufumba kwakuwaha kutalisha hakwikala nayililu yayiwahi. Welukili nindi hamuloña wakubula kuwanina yidi yetu yamujimba yinateli kutuluwañesha chikupu. Dichi Yesu wahosheli nindi: ‘Neyi disu deyi dachidiilu dikukudimbwisha, ditubuli wudinati; chinawahi chidi cheyi chimu kukisika, hichinawahi kunatila mujimba weyi wejima [muGehenaku]. Neyi chikasa cheyi chachidiilu chikukudimbwisha, chiketuli wuchinati; chinawahi chidi cheyi chimu kukisika, hichinawahi mujimba weyi wejima kuya [muGehenaku].’—Matewu 5:29, 30.
9. Munjilanyi munateli ‘kutudimbwishila’ “disu” hela “mwendu” wetu?
9 “Disu” dateneniyi Yesu dinakwimenaku ñovu hela wuswa wutukweti wakushinshika hachuma, nawa “chikasa” chinakwimenaku yuma yitwelaña namakasa. Neyi tubula kubabala, iyi yidi yamujimba yinateli ‘kutwidimbwisha’ nikutukañesha ‘kwenda naNzambi.’ (Kutachika 5:22; 6:9) Neyi atweseka nawu tukoñi chuma chikutuletesha kudikaña naYehova, twatela kuzata nañovu, dikwila nawu kutubula disu muchifwikija hela kuketula mwendu.
10, 11. Chumanyi chatela kutukwasha kutondolwela wuvumbi?
10 Tunateli kukeñesha ñahi mesu etu kubula kushinshika yuma yatama? Yoba, muntu wamwakama Nzambi wahosheli nindi: “Natiyañana dehi namesu ami; indi chañadima nukumutala ñahi?” (Yoba 31:1) Yoba, wadiña muntu wasumbula nawa wafuukwiluhu kubula kufumpa nshimbi jaNzambi jaloña. Ichi dichitwatela kwila chili tudi mumaluwi chili tudi ajiki. Hakwila nawu tutondolweli wuvumbi, twatela kulombolewa naspiritu yaNzambi yaleñelaña antu amukeña Nzambi kudihemba.—Aŋalija 5:22-25.
11 Hakwila nawu tutondolweli wuvumbi, twatela kudihula netu: ‘Komana netejaña mesu ami kusañumuna chipepa chayuma yatama yekalaña munyikanda, haTV, hela haIntaneti?’ Twatela cheñi kwanuka mazu akambanji Yakoba akwila nawu: “Antu ejima ayesekaña nachayikokolañawu nakuyidimbeka nakufwila kwawu aweni kwatama. Dichi kufwila kwatama chikukubaaba ivumu hikukuvwala nshidi; nshidi chiyikukula hiyikuvwala kufwa.” (Yakoba 1:14, 15) Chalala, neyi muntu wadihana kudi Nzambi ‘yatwalekahu nakutala’ muntu wamumbanda hela weyala nayitoñojoka yatama, watela kuhimpa chikupu neyi kwiji nakutubula disu nakudinata.—Tañenu Matewu 5:27, 28.
12. Kufumbanyi kwaPawulu kwatela kutukwasha kubula kufwila yuma yatama?
12 Chineli kuzatisha makasa etu chatama kunateli kutukojeja kufumpa nshimbi jaYehova jaloña, twatela kufuukulahu chikupu kutwalekahu nayililu yayiwahi. Dichi, twatela kutiyilila kufumba kwaPawulu kwakwila nawu: “Jahenu yidi yenu yidi hamaseki, wuvumbi, wuzondu wamumuchima, kufwila kwila yuma yatama, kusweja kukeña yatama, nilwisu himana kwawu nakupesha.” (Akolose 3:5) Izu dakwila nawu “jahenu” dinakukonkomwena nankashi hachuma chitwatela kuzata kulonda kubula kufwila yuma yatama yakumujimba.
13, 14. Muloñadi chichalemena kutondolwela yitoñojoka niyuma yatama?
13 Hakwila nawu muntu yotwalekuhu nakuhanda, watela kudikeñela kumuketula chidi chinakisiki. Hakwila nawu tutondolweli yitoñojoka yatama nikukoña yuma yinateli kutuleñela kujimbesha wuselewa waYehova, chalema ‘kunata’ disu nichikasa muchifwikija. Kwikala awunyonji muyitoñojoka, muyililu, nikuspiritu diyi njila yimu hohu mutwatela kupulukila Gehena yemenañaku kujilumuka kwahaya nyaka.
14 Hamuloña wanshidi yitwaswana nikubula kuwanina, hakwila nawu twikali nayililu yayiwahi chakeñekaña kuzata nañovu chikupu. Pawulu wahosheli nindi: “Nafumbaña mujimba wami nakuwukofwola, kuchina kunkinjika ami aweni nashimwinaña antu acheñi.” (1 Akorinda 9:27) Dichi tufwilenu kuzatisha kufumba kwaYesu kwahosha hayililu yayiwahi, bayi twilaña yuma munjila yakudiwula mulambu windi wefutu danyiloñaku.—Matewu 20:28; Aheberu 6:4-6.
“Hanenuña”
15, 16. (a) Indi Yesu wemikili ñahi chakutalilahu hakuhana? (b) Indi mazu aYesu asonekawu haLuka 6:38 alumbulukadi?
15 Mazu aYesu nichakutalilahu chindi chabadika kuwaha chakoleshaña kuhana. Wadihanini chikupu hakwinza hamaseki kulonda antu abula kuwanina ahetelumu. (Tañenu 2 Akorinda 8:9.) Yesu wadikeñeleleli kushiya kulema kwamwiwulu nakwikala muntu nikuhana wumi windi kudi antu akwanshidi, amakwawu akaheta maheta amwiwulu hamu neyi answana jindi muWanta. (Aroma 8:16, 17) Chalala Yesu wakolesheli antu kuhana hampinji yahosheliyi nindi:
16 ‘Hanenuña, kulonda ninenu nawa akayinki; chesekelu chakushikija, chakunyikumuna, chenda chisumpoka, akayinki muwutambwilu wenu. Muloña chesekelu chimukuyesekela akwenu, dichi chakayesekelawu ninenu nawa.’ (Luka 6:38) ‘Kwinka muwutambwilu’ kwatalisha kukashidikilu kawakwakulandisha kakwinzesha chisweku chehina chamukwakulanda chakasileñawu namushipi kulonda kusendelamu yuma. Kuhana chakubula kufuukula kunateli kutuleñela kutambwila chesekelu chachiwahi, hadaha hampinji yitunakankili.—Mukwakutaŋisha 11:2.
17. Indi Yehova wemika ñahi chakutalilahu chabadika hakuhana, nawa kuhana kumu kudihi kunateli kutuletela muzañalu?
17 Yehova wayikeña nawa wayifwetaña antu ahanaña namuzañalu. Yomwenidi wemika chakutalilahu chabadika chikupu hakuhana Mwanindi wasemuka nkawindi hohu “kulonda muntu wukumukuhwelela aheti wumi wahaya nyaka, akabuli kunoña.” (Yowanu 3:16) Pawulu wasonekeli nindi: ‘Muntu wukukuwa yayivulu wakaañula nawa yayivulu. Antu ejima atoñojoki chachiwahi munyichima yawu hamuntu hamuntu, ahani chakadi kuneña hela kumukanjikija; muloña Nzambi wakeña muntu wahanaña namuzañalu.’ (2 Akorinda 9:6, 7) Kuzatisha mpinji, ñovu, niyuma yitukweti kulonda kutwala kudifukula kwalala hambidi, chakadi nikujina kwatuzañaleshaña nawa kwaletaña wuloku wawuwahi.—Tañenu Yishimu 19:17; Luka 16:9.
‘Bayi Wimba Mpuña Kuwukuyaku’
18. Yumanyi yinateli kutuleñela kubula ‘kutambwila wufwetu’ kudi Tata yetu wamwiwulu?
18 ‘Babalenu mubuli kumwekesha kuloña kwenu kulonda ayimoni kudi antu. Neyi mukwila ochu himwakamona wufwetu kudi Tata yenu wudi mwiwuluku.’ (Matewu 6:1) Yesu hakuhosha nindi ‘kuloña’ watalishili kuyililu yendelaña hamu nankeñelu yaNzambi. Hatalishili mukwila nindi atela kujiinda nyidimu yaNzambuku, muloña walejeli atumbanji twindi nindi “chejeji [chawu] chitoñekaña kumesu awantu.” (Matewu 5:14-16) Hela chochu, neyi twilaña yuma ‘kulonda atumoni’ nikutuhameka neyi anhemi adi hachinañamu mwitala dayisela, ‘hitwakamona wufwetu’ kudi Tata yetu wamwiwuluku. Neyi tukweti yitoñojoka yamuchidiwu, hitwakadiluñisha wulunda waweni naNzambi hela nkisu yahaya nyaka muchiyulu chaWantaku.
19, 20. (a) Indi Yesu watalishili mudihi hampinji yahosheli nindi bayi ‘mwimba mpuña’ neyi himukuhana ‘chamukunkulu chaluwuku? (b) Tunateli kwilisha ñahi chikasa chachimunswa kubula kwiluka yuma yinakwila chikasa chachidiilu?
19 Neyi tukweti yililu yayiwahi, tukulondela kukonkomwena kwaYesu kwakwila nawu: ‘Dichi neyi wukuhana yamukunkulu [yaluwi], bayi wimba mpuña kuwukuya, neyi chelañawu anfwikiji mumashikola nimunyikwakwaku, nawu atiyakani mpuhu kudi antu. Nukuyileja chalala nami anatambuli dehi wufwetu wawu.’ (Matewu 6:2) ‘Yamukunkulu yaluwi’ yadiña yawana yakukwasha antu akankila. (Tañenu Isaya 58:6, 7.) Yesu niapostolu indi ahembeleña mali akukwasha nachu atuzweñi. (Yowanu 12:5-8; 13:29) Chineli hiyembileña mpuña yayeni hakwinka atuzweñuku, chakadi nikujina Yesu wazatishili nkinji hampinji yahosheliyi nindi hitwatela ‘kwimba mpuña’ kutukuya neyi hitukuhana ‘chamukunkulu chaluwuku.’ Hitwatela kushimuna yuma yitunahani neyi chelileñawu Afwarisi awaYudeyaku. Yesu wayiteneni nindi anfwikiji muloña adiña nakushimuna yamukunkulu yawu yakukwasha atuzweñi “mumashikola nimunyikwakwa.” Anfwikiji wenawa adiña ‘nakutambula wufwetu wawu.’ Chayilemesheleñawu kudi antu hadaha nikushakama hayitwamu yakumbidi hamu nawanlomboli elukawu mumashikola, diwu wufwetu watambwililuwu muloña Yehova kwosi chuma chakayinkayi. (Matewu 23:6) Indi atumbanji twaKristu ateleleli kwila ñahi? Yesu wayilejeli—kushilahu ninetu nindi:
20 ‘Ilaña eyi, neyi wukuhana yamukunkulu, chikasa cheyi chachimunswa bayi chiluka chikwila chikasa cheyi chachidiiluku; kulonda yamukunkulu yeyi yiikali yakumbadi, niTata yeyi wamonaña kumbadi wakakwinka wufwetu weyi.’ (Matewu 6:3, 4) Makasa etu avula kuzatila hamu. Dichi, neyi chikasa chetu chachimunswa chibula kwiluka chinakwila chikasa chetu chachidiilu, dikwila nawu kubula kushimuna yawana yitunahani kudi antu yitwadikunda nawu neyi chekala chikasa chachimunswa nachachidiilu.
21. Indi yuma yatufwetañayi “wamonaña kumbadi” yabombelamu yumanyi?
21 Neyi tubula kuditiya hayuma yitunahani kudi amakwawu, ‘yamukunkulu yetu yaluwi’ yikwikala yakumbadi hela yakujinda. Dichi Tata yetu, “wamonaña kumbadi” wakatufweta. Hela chakwila washakamaña mwiwulu nawa hiyamumonaña namesu awuntuku, Tata yetu wamwiwulu wekala “kumbadi.” (Yowanu 1:18) Yuma yatufwetañayi “wamonaña kumbadi” yabombelamu kwikala nawulunda waweni naYehova, kutwanakena nshidi yetu, nikutwinka wumi wahaya nyaka. (Yishimu 3:32; Yowanu 17:3; Aefwesesa 1:7) Yumiyi yayiwahi chikupu kubadika kutambwila kalemesha kudi antu.
Mazu Alema Itwatela Kulemesha
22, 23. Muloñadi wutwatela kulemeshela mazu aYesu?
22 Chalala Mpanji yahaMpidi yahosha hayuma yayivulu yabadika kulema ilola dawuseya. Chakadi kujina yikweti mazu asweja kulema anateli kutuzañalesha nimukanu kaayi kakala. Eñañi, tukuzañalala neyi tulemesha mazu aYesu nikuyiteja kuhimpa yililu nichihandilu chetu.
23 Muntu wejima ‘wukutiya’ ‘nikwila’ yuma yatañishiliyi Yesu akamukiswila. (Tañenu Matewu 7:24, 25.) Dichi tufuukuluhu kwovwahila kufumba kwaYesu. Muchibaba chakukumishaku chakunu kulondashana tukahanjeka yuma yayivulu yahosheliyi Yesu muMpanji yahaMpidi.
Mukwakula Nenudi?
• Muloñadi chichalemena kutiyañana namana kwetu wutunavulumuni
• Tunateli kutondolwela ñahi kutudimbwisha ‘nadisu detu dachidiilu’?
• Yililwinyi yitwatela kwikala nayu kutalisha hakuhana?
[Malwihu aKuzatisha haKudiza]
[Mwevulu wudi hefu 9]
Chachiwahi ‘kutiyañana’ namukwenu mukwakwitiya iwunavulumuni
[Nyevulu yidi hefu 10, 11]
Yehova wakiswilaña antu ahanaña namuzañalu