Izu daYehova daDumi Yikuma Yamaneni Kufuma muMukanda waChimwekeshu—II

YUMANYI yikamwekena antu adifukulaña kudi Yehova Nzambi niantu abulaña kudifukula? Yumanyi yikamwekena Satana niandemoni jindi kumbidi? Nkiswinyi yakekala nawantu ovwahila hampinji yaKayula Kristu Ikombakaji daYaaka? Ñakwilu yanawa malwihu nimalwihu amakwawu alema ayishimuna muChimwekeshu 13:1–22:21. * Munitu tupetulu mwekala yimwenu 9 yakukumishaku yahakachi kayimwenu 16 yamumwekesheleluwu kapostolu Yowanu kwakwihi nakumana kwankulakaji yayaaka yakusambila C.E.

Yowanu wasonekeli nindi: “Yowu wukutañila akwawu nakooleki, ninawa akutiya mazu awuprofwetu iwu anakooleki, akuhemba yuma yanasonekuwu mwenimu.” (Chimwekeshu 1:3; 22:7) Kutaña nikuzatisha yuma yitunakudiza mumukanda waChimwekeshu kunateli kutusañumuna kumukalakela Nzambi, kumukuhwelela Yena niMwanindi, Yesu Kristu, nawa tukwikala nakuchiñeja kwalala kwakumbidi. *—Aheberu 4:12.

YEÑA YITANU NAYIYEDI YANDOMBU YANZAMBI ANAYISUKULI

(Chimwekeshu 13:1–16:21)

Chimwekeshu 11:18 yahosha nawu: “Nyuza yazuwili, kuzuwa [kwaNzambi] kwenjili; mwaka wunashiki dehi. . . . wowu mwaka wakujilumuna akukisañana iseki.” Hakushimuna chaletesheli kuzuwa kwaNzambi kwinzi, chimwenu chamuchitanu natusatu chashimuna mudimu ‘wakanyama . . . wukweti nseñu ikumi ninyitu yitanu nayiyedi.’—Chimwekeshu 13:1.

Muchimwenu chamuchitanu natuwana, Yowanu wamweni ‘Mwana kaMukoku nemani haMpidi yaZiyona,’ wudi “nankulakaji yamakombakaji namakombakaji makumi awana nawana.” “Akuuliluwu mukachi kawantu.” (Chimwekeshu 14:1, 4 ) Himukulondela kubidika kwawañelu. Muchimwenu chalondeleluhu, Yowanu hakumona “añelu atanu nayedi akweti yipupu yitanu nayiyedi.” Chakadi nikujina, Yehova yomweni wayilejeli awa añelu kusukula “yeña yitanu nayiyedi yandombu yaNzambi” mumaluña amboka-mboka amukaayi kaSatana. Yeña yeniyi yikweti nsañu nikusoñamisha kwawunsompeshi waNzambi wakaletayi. (Chimwekeshu 15:1; 16:1) Iyi yimwenu yiyedi yashimunaña nsañu yikwawu yawunsompeshi waWanta yakundama kwiihuñu damuchisatu nikwimba mpuña yamuchitanu nachiyedi.—Chimwekeshu 11:14, 15.

Malwihu amuNsona Anayakuli:

13:8—Indi ‘mukanda wawumi waMwana kaMukoku’ hichumanyi? Iwu himukanda wachifwikija wukweti hohu majina awantu ayulaña naYesu Kristu muWanta windi wamwiwulu. Mwekala cheñi majina awakwaKristu awayishewa achidi hamaseki, akweti chikuhwelelu chakutambula wumi wamwiwulu.

13:11-13—Munjilanyi kanyama wukweti nseñu jiyedi mwahoshelañayi neyi chazañombi nikusulwisha kesi mwiwulu? Walala wakwila nawu kanyama wukweti nseñu jiyedi—chiyulu chaAnglo-America Chasweja Ñovu Mukaayi chahoshaña neyi chazañombi, chinakumwekesha nawu ichi chiyulu chachinishaña, kukabisha, nikuleta ndombu kulonda kukakeja antu kwiteja chiyulu chawu. Chasulwishaña kesi mwiwulu munjila yakwila nawu chadifwikijaña kuzata neyi kaprofwetu walala kuhitila mukuhosha nawu ashinda yuma yaletaña  kutama munjita jakaayi jiyedi jankulakaji yayaaka yamu 20 nikwila nawu ashinda chiyulu chaCommunism.

16:17—Indi ‘mpepela’ hasukwililuwu cheña chamuchitanu nachiyedi hichumanyi? ‘Mpepela’ yinakwimenaku yitoñojoka yaSatana, ‘spiritu [yitoñojoka yamumuchima] yazatikaña katataka mudi akwakujikwa.’ Ejima ekala kabadi ketuña daSatana datama onaña iyi mpepela yafwana yachifwikija.—Aefwesesa 2:2.

Yuma Yitukudizilaku:

13:1-4, 18. “Kanyama” wemenañaku nfulumendi jawantu wafumpukaña “mukaluñalwiji,” dikwila nawa wafumaña mudi antu amavulu. (Isaya 17:12, 13; Danyeli 7:2-8, 17) Iwu kanyama, elishiluwu nawa enkañawu ñovu kudi Satana, wukweti nambaala 666, yinakumwekesha chikupu nawu hawaninaku. Kwiluka chekalayi iwu kanyama kukutukwasha kulonda tubuli kumukomoka nakumulondela hela kudifukula kudi yena neyi chelañawu antu amavulu.—Yowanu 12:31; 15:19.

13:16, 17. Hichidi namuloña nakukala kutunateli kumona hakukalakala nyidimu yahefuku hefuku, yidi neyi “kulanda hela kulandisha,” bayi tumwiteja kanyama yatukakeji kutuyula muwumi wetuku. Kumwiteja ‘kanyama kutufunda mufunda muchikasa hela hehama detu’ hohamu nakumwiteja kanyama yeniwu kuyula yililu yetu hela yitoñojoka yetu.

14:6, 7. Kubidika kwawañelu kwatudizishaña nawu twatela kushimwina nsañu yayiwahi yaWanta waNzambi wemikawu mukunyakashana. Twatela kukwasha atudizi etu aBayibolu kumwakama Nzambi chikupu nikumulemesha Yehova.

14:14-20. Neyi ‘kumuna yuma yaheseki,’ dikwila nawu kupompesha antu akapulwishawu kunamani dehi, añelu akanatila “muvinyu waheseki” wakapompeshawu ‘muwukamwinu weneni wandombu yaNzambi.’ Iwu muvinyu—nfulumendi yatama yaSatana yamwekanaña yinakuyula antu hamu ‘nanyikanji yamawundu’ yamukabu watama akayikisañana haya nyaka. Twatela kufuukulahu chikupu kubula kutuluwañesha namuvinyu waheseki.

16:13-16. ‘Mazu awandemoni azonda’ anakwimenaku nsañu yamakudi yawandemoni yakwila nawu anyanta ankanu aheseki hiyayiluwañesha hamuloña wakusukula yeña yitanu nayiyedi yandombu yaNzambuku, ilaña ayileñelaña kudikaña naYehova.—Matewu 24:42, 44.

16:21. Chineli kukuma kwakanu kaayi kudi kwakwihi, kubidika wunsompeshi waYehova kutalisha hakaayi kaSatana katama kunakukeñeka kushimuna chikupu wunsompeshi waNzambi, hadaha wunakwimenaku menji adikwata. Hela chochu, antu amavulu akatwalekahu kumutukola Nzambi.

MWANTA WEMIKA MUSHINDU NAKUYULA

(Chimwekeshu 17:1–22:21)

“Babiloni Muneni,” wanta wakaayi wansakililu yakutwamba, himbadi yachishimashima chakaayi kaSatana katama. Chimwenu chanambaala 11 chamushimuna neyi “chivumbi muneni”—mumbanda watama ‘washakama hakanyama kachinana.’ Akamukisañana chikupu ‘nanseñu ikumi’ yakanyama wamweleka. (Chimwekeshu 17:1, 3, 5, 16) Kwesekeja chivumbi ‘nañanda yeneni,’ chimwenu chalondelahu chabidika hakuhumuka kwindi nikuleja antu jaNzambi ‘kufuma muñanda yeniyi’ swayi-swayi. Antu amavulu akadila kuhumuka kwañanda yeneni. Hela chochu, mwiwulu mudi kuzañalala muloña ‘wakusumbula kwaMwana kaMukoku.’ (Chimwekeshu 18:4, 9, 10, 15-19; 19:7) Muchimwenu chanambaala 13, mudi mukwakwendela ‘hakawalu katooka’ wunakuya nakwasa njita nanyuza. Hakujilumuna kaayi kaSatana katama.—Chimwekeshu 19:11-16.

Indochu, ‘kapela mukulu atenañawu nawu, Diyabolu, nawa Satana’? Mpinjinyi ‘yakamumbilawu mwijiya dakesi’? Iyi diyi nsañu yidi hakachi kansañu yamuchimwenu chanambaala 14. (Chimwekeshu 20:2, 10) Yimwenu yiyedi yakukumishaku yatulejaña chantesha chakekala wumi hampinji Yekombakaji daYaaka. Hakukunkulula ‘kwaChimwekeshu,’ Yowanu hakumona ‘kaloña kamenji awumi kanakufuma hakachi kamukwakwa,’ nawa ‘antu ejima akweti mpwila’ anayitambiki.—Chimwekeshu 1:1; 22:1, 2, 17.

 Malwihu amuNsona Anayakuli:

17:16; 18:9, 10—Muloñadi “anyanta ankanu aheseki” chakadililawu kutalisha hachuma chakakisañanawu aweni? Akadila hamuloña walwisu. Hanyima yakujilumuna Babiloni Muneni, anyanta ankanu aheseki chakadi nikujina akanuka yuma yadiña nakuyililayi. Waleteshaña nsakililu kwiteja yuma yatama yakoñañayi. Babiloni Muneni cheñi wayikwashaña kwiñija anyikwenzi munjita. Kubombelahu, wazataña mudimu weneni wakuleñela antu kumwovwahila.

19:12 Munjilanyi mutukuhoshela netu kwosi muntu weluka ijina dindi dabula kutenawu chiña yomweni Yesu? Idi ijina damwekana neyi demenañaku chifulu nimudimu walema, chidi neyi majina ekala haIsaya 9:6, adiluñishañayi Yesu mwifuku daMwanta. Kwosi muntu weluka idi ijina chiña yomweni hohu muloña iwu himudimu wadimena, nawa yena hohu diyi watela kwiluka chichalumbuluka kwikala nanichi chifulu chabadika. Hela chochu, Yesu wayinkahu antu amwizaza dansumbuki iku kukooleka, nikuyisoneka ‘ijina dindi dadiha.’—Chimwekeshu 3:12.

19:14—Hiyanyi akendela hamu naYesu hampinji yaAmagedoni? ‘Akwanjita amwiwulu’ akamulondela Yesu hakwasa njita yaNzambi hiyañelu niawayishewa emika mushindu atambwila dehi wufwetu wawu wamwiwulu.—Matewu 25:31, 32; Chimwekeshu 2:26, 27.

20:11-15—Majina awanyi asonekawu ‘mumuvuñilu [hela “mumukanda”] wawumi’? Iwu himuvuñilu wukweti majina awantu akatambwila wumi wahaya nyaka—akwaKristu awayishewa, antu amwizaza deneni, niambuña aNzambi ashinshika ‘akasañuka hakusañuka kwawantu aloña.’ (Yililu 24:15; Chimwekeshu 2:10; 7:9) Antu akasañuka hampinji yakusañuka ‘kwawantu abula kuloña’ akayisoneka majinawu “mumukanda wawumi” chiña hohu neyi azata kwesekeja ‘nansañu yakasonekawu mumukanda’ wanshimbi wakabakulawu hampinji Yekombakaji daYaaka. Hela chochu, majina wenawa hiyayisoneka nawulombu wakadi kujimaku. Majina awawayishewa ekalaña mumukanda haya nyaka neyi ashinshika ndo-o nikukufwa. (Chimwekeshu 3:5) Majina awantu akatambwila wumi hamaseki akashakama mumukanda wawumi haya nyaka neyi ahita mukweseka kwakukumishaku hakukuma Kwekombakaji daYaaka.—Chimwekeshu 20:7, 8.

Yuma Yitukudizilaku:

17:3, 5, 7, 16. “Maana afumaña mwiwulu” atukwashaña kwiluka ‘nsañu yakujinda yamumbanda, niyakanyama [kachinana] kanamweleki.’ (Yakoba 3:17) Iwu kanyama wachifwikija amuteneneña nawu League of Nations kufumahu atachikili kumutena nawu United Nations. Kwiluka chikupu nsañu yakujinda kwatela kutuleñela kudikita chikupu hakushimwina nsañu yayiwahi yaWanta waNzambi nikushimuna wunsompeshi wefuku daYehova dinakwinza.

21:1-6. Twatela kukuhwelela chikupu netu nkisu yashimwineñawu dehi yikekala muchiyulu chaWanta yikashikijewa. Muloñadi? Muloña kutalisha haniyi nkisu ahosha nawu: ‘Yinashikijewi dehi.’

22:1, 17. ‘Kaloña kamenji awumi’ kemenañaku yuma yaloñeshayi Yehova hakufumisha antu ovwahila kunshidi nikufwa. Awa menji amweseka adikoku nimakonu. Dichi, bayi twiteja hohu mutambi wakwinza ‘nakutambula menji awumi chakadi kulandaku’ ilaña tuzatenu nañovu kulonda tulejaku amakwawu.

[Tumazu twaheshina]

[Mwevulu wudi hefu 25]

Antu ovwahila akadiluñisha nkisu yabadika kuwaha mukuyula kwaWanta