Komana Kulomba Kwenu Kwashindamenaña haMazu aYesu?
Komana Kulomba Kwenu Kwashindamenaña haMazu aYesu?
‘Chelili Yesu nakumishi dehi mazu awa, mazaza awantu hiyakuhayama ntañishilu yindi.’—MATEWU 7:28.
1, 2. Muloñadi antu chahayamininuwu ntañishilu yaYesu?
TWATELA kwiteja mazu aMwana kaNzambi wasemuka nkawindi hohu, Yesu Kristu nikuyizatisha muchihandilu chetu. Chakadi nikujina, kwosi muntu niwumu wahosheleña neyi yenaku. Chalala, antu ahayamini ntañishilu yindi muMpanji yahaMpidi.—Tañenu Matewu 7:28, 29.
2 Mwana kaYehova, hatañishileña neyi ansonekuku, ashindameneni hantañishilu yawantu abula kuwanina. Kristu watañishili ‘neyi muntu wukweti wanta’ muloña yuma yahosheleñayi yafumineña kudi Nzambi. (Yowanu 12:50) Ichi, twayenu tushinshikenu mazu aYesu amuMpanji yahaMpidi chiyanateli kutukwasha nikushindamena hamazu indi mukulomba kwetu.
Bayi Mulombaña Neyi Chalombañawu Anfwikijuku
3. Shimunenu mukwihihisha mazu aYesu ekala haMatewu 6:5.
3 Kulomba kwalema hama mukudifukula kwalala, nawa twatela kulombaña kudi Yehova mpinji yejima. Hela chochu, kulomba kwetu kwatela kushindamena hamazu aYesu amuMpanji yahaMpidi. Yesu wahosheli nindi: ‘Neyi mukulomba, bayi mwilaña neyi chelañawu anfwikijuku, muloña wena afwila kwimana nakulomba mumashikola, hela kumaakenu anyikwakwa, kulonda ayimoni kudi antu. Nukuyileja chalala nami anatambuli dehi wufwetu wawu.’—Matewu 6:5.
4-6. (a) Muloñadi Afwarisi chakeñeleleñawu ‘kwimana nakulomba mumashikola nihamaakenu anyikwakwa’? (b) Indi anfwikiji amuchidiwu ‘atambwilileña ñahi wufwetu wawu’?
4 Hakulomba, atumbanji twaYesu hiyateleleli kwimbujola “anfwikijuku” chidi neyi Afwarisi adimweneña neyi aloña, adimbileña akwawu neyi hiyakwakujila chikupu. (Matewu 23:13-32) Anfwikiji wenawa akeñeli “kwimana nakulomba mumashikola, hela kumaakenu anyikwakwa.” Muloñadi? “Kulonda ayimoni kudi antu.” A Yudeya amuyaaka nkulakaji yakusambila alombeleleña hamu neyi chipompelu hampinji yakulambula nyilambu yakushita hatembeli (nantetemena kwakwihi na 09:00 namwaana nampinji ya 15:00). Antu amavulu amuYerusalema alombeleña hamu namazaza awakwakudifukula mulubanza lwatembeli. A Yudeya adiñi akwakwitiya, alombeleña kapampa kayedi hefuku kunsa yamusumba “nakwimana mumashikola.”—Esekejenu Luka 18:11, 13.
5 Chineli antu amavulu hiyadiñi kwakwihi natembeli hela sinagogi hakwila awaniki kukulomba kwanatenuwu hewulu, alombeleleña kwiluña didi dejima kwadiñawu hampinji yakulomba. Amakwawu akeñeleña kuwanikaña “kumaakenu anyikwakwa” neyi mpinji yakulomba yinashiki dehi. Akeñeleña ‘kuyimona kudi antu’ ahitilileña kumaakenu wenawa. Anfwikiji wenawa adiña ‘nakulomba lombe-e kulomba kwakudimbana nachu’ kulonda ayikomoki kudi ayitalileña. (Luka 20:47) Hitwatela kwikala nayililu yamuchidiwuku.
6 Yesu washimwini nindi anfwikiji wenawa ‘atambwilileña wufwetu wawu.’ Afwilileña kuyiluka chikupu nikuyihameka kudi antu—nawa diyuma yatambwilileñawu. Atambwilili wufwetu wawu, muloña Yehova hakwileña kulomba kwawu kwawunfwikijuku. Ilaña, Nzambi wakulaña kulomba kwawatumbanji twaKristu alala, neyi chinamwekeshi mazu aYesu haniyi nsañu.
7. Indi kufumba kwakulombela ‘mwitala damukachi’ kwalumbulukadi?
7 ‘Ilaña eyi chiwukulomba, iñilaku mwitala deyi damukachi, wenzeluku, wulombi kudi Tata yeyi wudi kumbadi, niTata yeyi wamonaña kumbadi wakakwinka wufwetu weyi.’ (Matewu 6:6) Kukonkomwena kwaYesu kwakulombela mukapeka hanyima yakwenzela chenzelu hikwatalishili mukwila nawu muntu hanateli kwimenaku chipompelu mukulombaku. Ayifumbili kulonda abuleña kulombela hatooka chakwila antu akuyimona ayihamekeña. Twatela kwanukaña chumichi neyi tunakwimenaku antu jaNzambi mukulomba. Twatela cheñi kwovwahila kukonkomwena kwaYesu kutalisha hakulomba.
8. Kwesekeja naMatewu 6:7, kulombanyi kwabula kutelela kutwatela kutondolwela?
8 ‘Chimukulomba, bayi muhituluka nakutenatena mwamukunkulwayi, neyi chelañawu aJentiluku; muloña wena atoñojokaña nawu akuyitiya nanochu chakuvulishawu mazu.’ (Matewu 6:7) Yesu wateneni cheñi njila yikwawu yakulombelamu yabula kutelela—kufuntila-funtilahu. Bayi neyi Yesu watwalili mukwila nindi twatela kuleka kufuntila-funtila kulomba kwakulembelela kwakufuma kumuchima mukulomba kwakusakililaku. Muloña Yesu wazatishili ‘mazu wowamu’ mukulomba mwitempa daÑesemani hawufuku wakwila kanda yofwi.—Maku 14:32-39.
9, 10. Munjilanyi mutwatela kutondolwela kulomba kwakufuntila-funtilahu?
9 Chikwikala chaluwa neyi twimbujolaña kulomba ‘kwawaJentili’ kwakufuntila-funtilahu. ‘Ahitulukaña nakutenatena,’ mazu aswatilawu kumutu mwavulishañawu mazu amukunkulwayi. Kwila mwenimu hikwayikwashili akwakudifukula aBayaluku, alembeleleña nzambi wakutwamba “kufumisha kubudidi, tambeke-e, niitañwa mwiwulu, nawu, Eyi Bayali, tutiyi.” (1 Anyanta 18:26) Makonu antu amavulu alombaña nakutenatena mazu wowamu, nakutoñojoka mwamukunkulwayi nawu “akuyitiya.” Ilaña Yesu watukwasha kwiluka netu ‘kuvulisha mazu’ mukulomba kwakwila lombe-e nakutenatena mazu wowamu kwamukunkulwayi kumesu aYehova. Yesu wabombeleluhu nindi:
10 ‘Dichi enu bayi mwikala neyi wenaku; muloña Tata yenu neluki yuma yimunabuli himuchidi kanda mulombi kudi yena.’ (Matewu 6:8) Anlomboli amavulu ansakililu yawaYudeya adiña neyi aJentili kuhitila mukuvulisha mazu hakulomba. Kulomba kwakufuma kumuchima kwabombelamu kuhameka, kusakilila, nakulembelela kwalema hama mukudifukula kwalala. (Afwilipi 4:6) Hela chochu, chikwikala chaluwa neyi tukuhitulukaña nakutenatena yuma yoyimu nakutoñojoka netu tunakumulejamu Nzambi yuma yitwakeñaña. Neyi tunakulomba, twatela kwanuka netu tunakulomba kudi Yomweni ‘weluka yuma yitunabuli henohu kanda tulombi kudi yena.’
11. Yumanyi yitwatela kwanuka neyi tukweti kukooleka kwakwimenaku antu amavulu mukulomba?
11 Mazu aYesu kutalisha hakulomba kuyabulaña kwiteja atela kutwanukisha netu Nzambi hazañalalaña namazu akola nimazu amukunkulwayuku. Cheñi twatela kwanuka netu kulomba kwakwimenaku antu amavulu hidiyi mpinji yakuzañalesha antiyilili hela kuyileñela kujinooka mpinji yimukumanisha kulombaku. Cheñi hakulomba hitwatela kubidika hela kufumba izazaku, muloña kwila mwenimu chikwambukaku namazu aYesu amuMpanji yahaMpidi.
Yesu Watudizisha chaKulomba
12. Munateli kulumbulula ñahi kulema kwakulomba kwakwila nawu “ijina deyi dijili”?
12 Hela chakwila Yesu wababesheli kutalisha hakuzatisha kukooleka kwakulomba munjila yaheña, wayidizishili atumbanji twindi chakulomba. (Tañenu Matewu 6:9-13.) Kulomba kwalombeliyi hakuyidizisha hiyateleleli kukwiswatila kumutu kulonda kufuntila-funtilañahuku. Ilaña, hichakutalilahu chatukwashañaku kwiluka chakulomba. Chakutalilahu, Yesu watwamijiluku Nzambi mumazu akutachikilahu: ‘Tata yetu wekala mwiwulu, ijina deyi dijili.’ (Matewu 6:9) Twamutenaña Yehova chachiwahi netu “Tata yetu” muloña diyi Nleñi yetu, washakama “mwiwulu,” mwasweja kuleha. (Kuhituluka 32:6; 2 Kushindulula 6:21; Yililu 17:24, 28) Kuzatisha izu dakwila nawu “yetu” kwatela kutwanukisha netu akwetu akwakwitiya niwena akweti wubwambu waweni naNzambi. “Ijina deyi dijili” hikulembelela kwakwila nawu Yehova yakoñuhu chuma kulonda yadijiliki yomweni kuhitila mukufumishahu kasawuntu kejima kaletawu hejina dindi kufuma tuhu hakudikaña muEdeni. Hakwakula kulomba kweniku, Yehova wakafumisha kutama hamaseki, kulonda yakadijiliki yomweni.—Ezekeli 36:23.
13. (a) Indi kulomba kwakwila nawu “wanta weyi winzi” kukashikijewa ñahi? (b) Indi kwila nkeñelu yaNzambi hanu hamaseki kukabombelamu chumanyi?
13 ‘Wanta weyi winzi. Muchima weyi awili hamaseki neyi chawilañawu mwiwulu.’ (Matewu 6:10) Kutalisha hakulomba kwashimwiniyi Yesu neyi chakutalilahu, twatela kwanuka netu “wanta” hinfulumendi yawuMesiya yamwiwulu yayulañawu kudi Kristu ‘niakwakujila’ asañulawu akayula hamu nayena. (Danyeli 7:13, 14, 18; Isaya 9:6, 7) Kulombelela kulonda wanta “winzi” hikulomba kwakwila nawu Wanta waNzambi winzi nakukisañana ejima adimbululaña chiyulu chaNzambi ahamaseki. Chumichi keña chimwekani, kulonda kuloñesha paradisa yaloña, yawunda nawa yamaheta mukaayi kejima. (Masamu 72:1-15; Danyeli 2:44; 2 Petulu 3:13) Nkeñelu yaYehova yinakuzatika mwiwulu, nawa kulomba kwakwila nawu nkeñelu yindi ayili hamaseki hikulembelela nawu Nzambi yokoñi nkeñelu yafuukwilayi iseki, kubombelahu nikufumishahu ayilumbu jindi makonu neyi cheliliyi kushankulu.—Tañenu Masamu 83:1, 2, 13-18.
14. Muloñadi chichekalila chatelela kulomba “kudya kwetu kutukukeña lelu”?
14 ‘Twinki kudya kwetu kutukukeña lelu.’ (Matewu 6:11; Luka 11:3) Neyi tukulomba muniyi njila, dikwila nawu tunakulomba kudi Nzambi kulonda yatwinki yakudya yitunakukeña “lelu.” Chumichi chamwekeshaña nawu twakuhwelela muwuswa waYehova wakwakamena yuma yitwakeñaña hefuku hefuku. Bayi neyi twalombaña kulonda yatwinki yakudya yayivuluku. Kulomba kulonda yatwinki yuma yitwakeñaña hefuku hefuku kunateli kutwanukisha netu Nzambi walejeli aIsarela kukuñulula manina “posu yawu yefuku dimu hefuku hefuku.”—Kwidika 16:4.
15. Lumbululenu chalumbuluka kulomba kwakwila nawu “twanakeni nyikudi yetu, neyi chitunaanakeni akweti nyikudi nanetu.”
15 Kulomba kunahiñuhu mukulomba kwakutalilahu kunakutuleja kusha kashinshi kuchuma chitwatela kwila. Yesu wahosheli nindi: ‘Twanakeni nyikudi yetu, neyi chitunaanakeni akweti nyikudi nanetu.’ (Matewu 6:12) Nsañu yayiwahi yaLuka yashimuna nawu iyi “nyikudi” ‘hinyiloña.’ (Luka 11:4) Yehova nateli kutwanakena neyi ‘twanaakena’ anatuvulumuni. (Tañenu Matewu 6:14, 15.) Twatela kwanakena akwetu antu.—Aefwesesa 4:32; Akolose 3:13.
16. Tunateli kutiyishisha ñahi kulomba kutalisha hakweseka nikutwamwina kudi mukwakutama?
16 ‘Bayi wututwala mukwesekaku, ilaña twamwini kudi mukwakutama.’ (Matewu 6:13) Tunateli kutiyishisha ñahi iku kulomba kuyedi kwadifwana mukulomba kwakutalilahu kwaYesu? Mwamweni, Yehova hatwesekaña kulonda tuvulumunuku. (Tañenu Yakoba 1:13.) Satana, ‘mukwakutama’ diyi “Mukwakweseka.” (Matewu 4:3) Hela chochu, Bayibolu yahosha hadi Nzambi neyi nakwila yuma yetejayi hohu. (Luti 1:20, 21; Mukwakutaŋisha 11:5) Dichi, kulomba kwakwila nawu “Bayi wututwala mukwesekaku” hikumulembelela Yehova kulonda yabuli kutwiteja kuvulumuna neyi anatweseki nawu tubuli kumwovwahila. Nkumininaku, kulembelela kwakwila nawu ‘twamwini kudi mukwakutama’ hikumulomba Yehova kulonda yabuli kumwiteja Satana kutushinda. Nawa, twatela kukuhwelela netu ‘Nzambi hakwiteja kutweseka chabadika muñovu jetuku.’—Tañenu 1 Akorinda 10:13.
‘Lombenuña, Keñakeñenuña, Dondomwenenuña’
17, 18. Indi mazu akwila nawu ‘lombenuña, keñakeñenuña, nawa dondomwenenuña’ alumbulukadi?
17 Kapostolu Pawulu wakonkomweneni akwawu akwakwitiya nindi: ‘kakelenu mukulomba.’ (Aroma 12:12) Yesu waheni lushimbi lwolumu hampinji yahosheliyi nindi: ‘Lombenuña akuyinka; keñakeñenuña mukuwana; dondomwenenuña akuyenzulwila. Muloña ejima akulomba akutambula; muntu wukukeñakeña wukuwana; niwukudondomwena akumwenzulwila.’ (Matewu 7:7, 8) Chachiwahi ‘kutwalekahu kulomba’ yuma yejima yinesekani nankeñelu yaNzambi. Kwesekeja namazu aYesu, kapostolu Yowanu wasonekeli nindi: “Dichi chitukubula kumutiya [Nzambi] woma, tukwiluka netu neyi tukulomba chuma chamwaya muchima windi, wukututiya.”—1 Yowanu 5:14.
18 Kufumba kwaYesu ‘kwakutwalekahu kulomba nikukeñakeña’ kwalumbuluka nawu twatela kulomba chakufuma kumuchima nikubula kuleka. Cheñi chalema hama ‘kutwalekahu kudondomwena’ kulonda tukatweshi kwiñila muWanta nikudiluñisha nkisu yawanta. Hanu dinu, twatela kukuhwelela netu Nzambi wakaakula kulomba kwetu? Eñañi, chakala twikala akashinshi kudi Yehova, muloña Kristu wahosheli nindi: ‘Ejima akulombaña akutambula; muntu wukukeñakeñaña wukuwana; niwukudondomwenaña akumwenzulwila.’ Yuma yayivulu yadiluñishiluwu ambuña aYehova yamwekeshaña nawu, chalala Nzambi diyi “Watiyaña mwalombañawu antu.”—Masamu 65:2.
19, 20. Kwesekeja namazu aYesu asonekawu haMatewu 7:9-11, Yehova wekala ñahi neyi nvwali wukweti kukeña?
19 Yesu wamufwanishili Nzambi natata yawantu wukweti kukeña wenkaña anyanindi yuma yayiwahi. Fwikijenu neyi mwadiñuhu haMpanji yahaMpidi nakutiya chahosheleñayi Yesu nindi: ‘Mwinenwinyi wukwila mwanindi weyala namulombi dinkendi, yena amwinki ilola? Hela namulombi inshi—amwinki kapela? Dichi neyi enu atama mweluka kwinka anyanenu yamukunkulu yayiwahi, Tata yenu wudi mwiwulu abuli kubadika kuyinka akumulomba yuma yayiwahi?’—Matewu 7:9-11.
20 Tata yawantu, hela chakwila ‘watama’ hamuloña wanshidi yaswanayi, wakeña anyanindi. Hanateli kumudimba mwaninduku, ilaña wukuzata nañovu kulonda yomwinki “yamukunkulu yayiwahi.” Hamuloña wakwikala nvwali yetu, Tata yetu wamwiwulu wukweti kukeña watwinkaña “yamukunkulu yayiwahi,” chidi neyi spiritu yindi yajila. (Luka 11:13) Spiritu yajila yinateli kutukolesha kukalakala mudimu wetejewa naYehova, Mukwakuhana “yuma yayiwahi yahanañawu yejima, niyamukunkulu yalala yejima.”—Yakoba 1:17.
Twalekenuhu Kuhetela muMazu aYesu
21, 22. Yumanyi yasweja kulema kutalisha haMpanji yahaMpidi, nawu mwatiyaña ñahi hanawa mazu aYesu?
21 Kwosi mpanji yinateli kwesekana naMpanji yahaMpidi. Yuma yitwadizaña hadi Nzambi muniyi mpanji yayiwahi chikupu nawa yatiyakana. Neyi chinamwekeshi yikuma yamumpanji yeniyi muniyi yibaba yakulondashana, tunateli kuhetelamu chikupu neyi tuzatisha kufumba kwekala mumpanji yeniyi. Awa mazu aYesu anateli kuhimpa chihandilu chetu katataka nikutwinka kuchiñeja kwakuwahi kwakumbidi.
22 Muyinu yibaba, tunashinshiki hohu hamazu antesha alema amuMpanji yaYesu yahaMpidi. Dichaletesheli, antu atiyili mpanji yindi ‘kuhayama ntañishilu yindi.’ (Matewu 7:28) Chakubula nikujinoka, dichitwatela kwila ninetu neyi twinzesha yitoñojoka ninyichima yetu nanawa mazu alema niyuma yikwawu yaNtañishi muneni, Yesu Kristu.
Mukwakula Nenudi?
• Indi Yesu wahosheli nindidi kutalisha hakulomba kwawunfwikiji?
• Muloñadi chitwatela kutondolwela kufuntila-funtila mazu wowamu hampinji yitunakulomba?
• Indi mukulomba kwaYesu kwakutalilahu mwekala kulomba yumanyi?
• Tunateli ‘kutwalekahu ñahi kulomba, kukeñakeña, nikudondomwena’?
[Malwihu aKuzatisha haKudiza]
[Mwevulu wudi hefu 15]
Komana, mweluka muloña chichekalila chatelela kulomba kudya kwetu kutwakeñaña hefuku hefuku?