Yipenji yawakwaKristu​—Yatela Kwikala Yatelela, yaKalemesha Nawa yaMuzañaleshaña Nzambi

MUKUTIYA antu anakudila kudi kwejima. Akwakudila anavwali yakuvwala yadimena yiyila anakutumpa nakudinatola hamaseki muloña wachineñi. Akwakuhañana anakuhañana tumina tunakuvuma chikupu. Amakwawu niwena anakudya nakudiluñisha nakuseha. Antu antesha, anakami hamaseki anasheti vinyu yamukoma niwalwa wawana. Hichidikanyi? Mumatuña amakwawu amukaayi, iyi diyuma yamwekanaña hachipenji hapompaña antu amavulu kulonda kushiika mufu.

A Yinsahu jaYehova amavulu ashakamaña mumaluña mwakwila antaña niantuñinawu alemesha kupesha nikuchina afu. Antu amavulu akuhwelela nawu muntu neyi nafwi, wekalaña spiritu yawankakulula nikwikala nawuswa wakukwasha hela kukatisha amomi. Yitoñojoka yeniyi yakundama chikupu kutushidikilu twahayipenji yayivulu. Hela chochu, kudila muntu wunafwi hichatamaku. Mpinji jikwawu, Yesu niatumbanji twindi adilileña akwawu afwileña akeñawu. (Yowanu 11:33-35, 38; Yililu 8:2; 9:39) Hela chochu, hiyadilileña chasweja neyi chelilañawu antu amumpinji yawuku. (Luka 23:27, 28; 1 Atesalonika 4:13) Muloñadi? Muloña elukili walala kutalisha hansañu yakufwa.

Bayibolu yashimuna hatooka to-o nawu: “Amomi eluka dehi nawu, Twakafwa; hakwila afu hiyeluka chumaku . . . Nimwakeñelañawu, nimwahelelañawu, nimwatiyilañawu ichima mwajiya dehi . . . Mwijamu muwukuya mwosi mudimu, mwosi kufuukula, mwosi kwiluka, mwosi maana.” (Mukwakutaŋisha 9:5, 6, 10) Awa mavasi onenewa amuBayibolu ashimuna hatooka to-o nawa neyi muntu nafwi, helukaña chumaku. Hanatweshi kutoñojoka, kutiya, kuhosha hela kwiluka chuma chidi chejimaku. Indi kwiluka ichi chalala chalema chamuBayibolu kunateli kuletesha yipenji yawakwaKristu kwikala yamuchidinyi?

“Bayi Mukunka kuChuma Chatamaku”

Hichikweti muloña namuchidi hela chisemwa chawuku, aYinsahu jaYehova atondolwelaña chikupu tushidikilu twejima twakuhwelelawu antu nawu afu elukaña yuma nawa anateli kukwasha amomi. Yaaku yidi neyi kuchiisha hachipenji, chidika chachipenji, kwanakana ifuku dafwiliyi muntu, kulambula afu niyidika yawuntuluwa, yejimiyi hiyaaku yatama nawa yamutiyishaña Nzambi kutama, muloña hintañishilu yawademoni yakwila nawu wumi hela spiritu hiyafwañaku nawa hiyamunsonaku. (Ezekeli 18:4) AkwaKristu alala ‘hiyanatweshi kutambula kumesa yaYehova, nikutambula kumesa yawandemonuku,’ dichi hiyadiñijaña muyaaku yeniyuku. (1 Akorinda 10:21) Ovwahilaña lushimbi lwakwila nawu: “Ambukenumu, bayi mukunka kuchuma chatamaku.” (2 Akorinda 6:17) Mpinji yejima, hichekala chaswayi kwambuka kuyidika yamuchidiwuku.

MuAfrica nimaluña amakwawu, antu amavulu akuhwelela nawu neyi abula kulondela tushidikilu tukwawu, anateli kuhilisha aspiritu awankakulula. Neyi abula kwila mwenimu himuloña weneni chikupu wunateli kuleñela kushiña mukala wejima hela kuhalwa. Hamuloña wakukaana kudiñija muyidika yayipenji, antu jaYehova amavulu ayimweshaña kalula nikuyitukola nikuyihela kudi antuñinawu hela antaña jawu. Amakwawu ayitwambilaña nawu  hiyadikundaña nawakwawuku nawa hiyalemeshaña afuku. Mpinji jikwawu, antu abula kwitiya akakelaña kutala yuma yejima hachipenji chamukwaKristu. Hanu dinu, tunateli kutondolwela ñahi kutadika nawantu afwilaña chikupu kukakela tushidikilu twahayipenji twamutiyishaña Nzambi kutama? Sweje-e dinu, chumanyi chitwatela kwila hakwila twambuki kuyidika yatama niyililu yinateli kukisañana wulunda wetu naYehova?

Shimunenu Chatiyakana muMunafuukuli

Mumatuña amakwawu, chekala hichisemwa antaña niakulumpi kufuukulahu kutalisha mwakujiikila. MukwaKristu wakashinshi watela kushimuna chatiyakana nindi chipenji chikwikala mumakasa awaYinsahu jaYehova kwesekeja nanshimbi jamuBayibolu. (2 Akorinda 6:14-16) Yuma yazatikaña hachipenji chamukwaKristu hiyatela kuluwañesha yinleji yawakwetu akwakwitiya hela kudimbwisha akwetu eluka yuma yitwakuhwelela niyitwatañishaña kutalisha hadi afuku.

Neyi chipompelu chawakwaKristu anachileji kutala nsañu yachipenji, aeluda atela kushimuna jinjila jajiwahi nikukwasha akwakwitiya anakudila kutiyishisha nshimbi jamuBayibolu jahosha hansañu yachipenji kulonda nsañu yejima yahachipenji yesekani nanshimbi jamuNsona. Neyi chakwila antu abula kwikala aYinsahu anakukeña kuleta yililu yatama, chalema kuyilumbulwila chatiyakana yuma yitwakuhwelela etu akwaKristu mumesu awunda nawa nakalemesha. (1 Petulu 3:15) Tunateli kwiladi neyi antaña abula kwitiya anakoleli hakulondela tushidikilu twatama munsañu yachipenji? Akwakwitiya amuchisaka anateli kufuukulahu kufumishahu makasa munsañu yachipenji. (1 Akorinda 10:20) Neyi chumichi chinamwekani, anateli kuhana mpanji yachipenji yayihi Hetala daWanta hela kwiluña dikwawu kwatelela kulonda kuhanjeka ‘Nyikanda yajila yakukundeja’ nawantu ananeñi hamuloña wakufwa kwamuntu akeñawu. (Aroma 15:4) Hela chakwila mujimba hosi, mpanji yamuchidiwu yatela kwikala yakalemesha nawa yetejewa. (Kuhituluka 34:5, 6, 8) Antu abula kwitiya neyi aleta wufwinda anateli kuswejeshelaku chineñi, hela chochu, tunateli kukundejewa neyi twiluka netu Nzambi wamonaña chitwafuukulañahu kwila chuma chaloña, nawa nateli kutwinka “ñovu jabadika nankashi.”—2 Akorinda 4:7.

Sonekenu Nshimbi Jenu

Neyi muntu yasoneka nshimbi jatela kulondelawu hachipenji chindi, chekalaña chaswayi kuhanjeka nawantu amuchisaka abula kwikala aYinsahu, hadaha anateli kulemesha nshimbi jamuntu wunafwi. Yuma yalema yimwatela kusoneka kutalisha hanshimbi jakulondela hachipenji chenu yinabombelumu chakekala chipenji, iluña kuchakekalila, muntu wukekala nawuswa wakuloñesha nikutwaminina nsañu yachipenji. (Kutachika 50:5) Nsañu yatela kulemeshewa chikupu  chiña neyi ayifwachikili nawa hadi niayinsahu afwachikiluhu. Antu atoñwelañahu dehi yuma yakumbidi nakashinshi nimaana ashindamena hanshimbi jamuBayibolu eluka nawu hiyatela kutalila sampu anashinakaji dehi hela anakati chikupu mwaka dinu asonekuku.—Yishimu 22:3; Mukwakutaŋisha 9:12.

Antu amakwawu chayikalilaña kusoneka nsañu yamuchidiwu. Hela chochu, kwila mwenimu chamwekeshaña nawu mudi akwaKristu apama nawa mwakamenaña amakwawu. (Afwilipi 2:4) Chachiwahi kusoneka iji nshimbi halwenu henohu kanda mufwi kubadika kushila amuchisaka ananeñi iwu mudimu muloña anateli kuyikanjikija kwiteja yaaku yatama yimwabulili kukuhwelela hela kwiteja.

Chipenji Chatela Kwikala Chatelela

Mumatuña amavulu amuAfrica, mwekala chaaku chatanda chakwila nawu chipenji chatela kwikala cheneni nawa chakuzañalesha kulonda kubula kuhilisha aspiritu jawankakulula. Amakwawu amonaña chipenji neyi himpinji ‘yakudisamba kwamukunkulwayi’ nachifulu chikwetuwu nimaheta. (1 Yowanu 2:16) Ombaña mpinji yeneni nikuzata nañovu nikuzatisha mali amavulu kulonda kujiika “chachiwahi” muntu wunafwi. Hakwila nawu akokoli antu amavulu, ashaña mwevulu weneni wamuntu wunafwi mumaluña ashiyashana, kulonda kutiyakesha chipenji kudi antu amavulu. Atuñaña nyipila hadi mwevulu wamutu wamuntu wunafwi nakuyinka akwakudila kulonda avwali. Alandaña jimbokoshi jasweja wuseya kulonda kuzañalesha akwakutala. Mwituña dimu damuAfrica, antu amakwawu atuñaña jimbokoshi jadifwana nanyotoka, jindeki, maatu niyuma yikwawu yatuñañawu kulonda kumwekesha maheta, kulema, niwuhandu. Mufu anateli kumufumisha mumbokoshi nakumusha hakadidi kanawahishuwu. Mumbanda wunafwi anateli kumuvwika nkanji yitooka yakusumbukilamu nikumuwahisha nayingelingeli yayivulu, wusaña niyuma yikwawu. Komana, chalala antu jaNzambi atela kwila yuma yamuchidiwu?

AkwaKristu apama eluka kulema kwakubula kudiñija muyaaku yawantu abula kwiluka hela abulaña kwakamena nshimbi jaNzambi. Tweluka netu tushidikilu niyaaku yabula kutelela nawa yabula kwikala yamunsona ‘hiyafuma  kudi Nzambuku, ilaña yamumpata yamunu mwishina yinakuhita.’ (1 Yowanu 2:15-17) Twatela kushaku maana chikupu kulonda tubuli kudiñija muyililu yakudibecha yampata yamunu mwishana yakufwila kubadika amakwawu. (Aŋalija 5:26) Yuma yamwekanaña yamwekeshaña nawu neyi muchisemwa chenu antu asweja kuchina afu, kakavulu antu avulaña hachipenji nawa chakalaña kuyileja mwakwilila. Kulemesha afu kunateli kusañumuna antu abula kwitiya kukoña yililu yatama. Hayipenji yamuchidiwu, antu anateli kudila chikupu, kumukwata mufu, kuhoshaña nindi neyi kwiji wamumi, nikusha mali niyuma yikwawu hamujimba. Neyi yuma yeniyi yimwekana hachipenji chawakwaKristu, chinateli kuleta kasawuntu chikupu hejina daYehova niantu jindi.—1 Petulu 1:14-16.

Chineli tweluka chekalawu afu twatela kwikala nawulobu wakulombola yipenji yetu chakadi ihuji didi dejima damukaayi. (Aefwesesa 4:17-19) Hela chakwila Yesu wadiñi nkuluñaña nawa muntu wasweja kulema hanu hamaseki, amujiikili chachiwahi nawa munjila yatelela. (Yowanu 19:40-42) Antu akweti “yitoñojoka yaKristu,” amonaña kujiika muntu munjila yapela nawa yayiwahi nawu chalema. (1 Akorinda 2:16) Chalala, kupelesha yipenji yawakwaKristu diyi njila yayiwahi yakutondolwela yuma yatama yabula kwikala yamuNsona nawa chipenji chikwikala chakadi ipumba, chakalemesha nawa chatelela antu amukeña Nzambi.

Komana, Mwatela Kuzañalala haChipenji?

Hanyima yakujiika, hadaha chekala hichisemwa kudi antaña, antuñinenu, niantu amakwawu kupompa nakudya nikuhañana. Hayidika yayipenji yeniyi kakavulu hekalaña kunwa walwa chikupu niyililu yatama. Antu amakwawu ahoshaña nawu kwila mwenimu kwamanishaña chineñi. Amakwawu atoñojokaña nawu hichisemwa chawu. Hela chochu, antu amavulu akuhwelela nawu chidika chamuchidiwu chakeñekaña hakwila nawu muntu wunafwi yayi kwiluña dikwawu nikumulemesha mufu nikwiteja wumi windi kulonda wudibombi nawawankakulula jindi.

AkwaKristu alala eluka maana ekala mukukonkomwena kwamuNsona nawu: “Kuneña kunabadiki kuseha; muloña kudihomba kumesu kwawahishaña muchima.” (Mukwakutaŋisha 7:3) Kubombelahu, eluka kuwaha kwekala mukutoñojoka hawumi wakapinji kantesha nichikuhwelelu chakusañuka. Chalala, kudi antu akweti wubwambu wakola naYehova, ‘ifuku dakufwa dabadika dakuvwalika.’ (Mukwakutaŋisha 7:1) Dichi, kwiluka netu kudiluñisha hachipenji kwendelaña hamu nakupesha niyililu yatama hichikwikala chatelela kudi mukwaKristu kuloñesha hela kuwanika kuyidika yeniyuku. Kudibomba hamu nawantu anwaña namapumba chikumwekesha nawu hitwamulemesha Nzambi niyinleji yawakwetu akwakudifukula aYehovaku.

Amakwawu Atela Kumona Chaambu

Tukweti muzañalu hama hakubula kuchina afu kwatanda hakachi kawantu adi mumwidima wakuspiritu. (Yowanu 8:32) Hakwikala ‘anyana kachejeji,’ twamwekeshaña wushona nichineñi munjila yamwekeshaña chejeji chakuspiritu, njila yayiwahi, yakalemesha nawa yakoleshewaña nakuchiñeja kwakusañuka. (Aefwesesa 5:8; Yowanu 5:28, 29) Kuchiñeja kwamuchidiwu kukatuleñela kubula kuhuñumuka nakusweja kuneña neyi antu ‘abula kuchiñeja.’ (1 Atesalonika 4:13) Tukekala nawulobu wakukakela mbe kukudifukula kwalala, chakubula kutiya antu woma.—1 Petulu 3:13, 14.

Neyi twovwahila chikupu nshimbi jamuNsona twakaleñela antu ‘kwiluka chaambu chekala hadi antu amukalakelaña Nzambi, niabulaña kumukalakela.’ (Malaki 3:18) Kumbidi, kufwa kwakamana. (Chimwekeshu 21:4) Chineli tunakutalila kushikijewa kwaniwu wuprofwetu walema, Yehova yabuli kutuwana nehuji, nihitwatamina, nawa twambukuku chikupu nakanu kaayi katama niyililu yaku yabulaña kumulemesha Nzambi.—2 Petulu 3:14.

[Mwevulu wudi hefu 30]

Chachiwahi nankashi kusoneka nshimbi jenu jimunakukeña jakulondela hachipenji

[Mwevulu wudi hefu 31]

Yipenji yawakwaKristu yatela kwikala yatelela nawa yakalemesha