Indi Nzambi Hinyi?

MUNATELI kwakula ñahi ilu lwihu? Antu amavulu atoñojokaña nawu amwiluka Nzambi chikupu nawu hibwambu wadikundawu nindi. Antu amavulu akuhwelela nawu Nzambi wekala kwoku nawa adihana kudi yena nikumwakama. Ilaña amavulu hiyeluka yuma yayivulu hadi yenaku. Neyi mwamukuhwelela Nzambi, munateli kwakula ñahi awa malwihu adi heshina?

1. Komana Nzambi himuntu?

2. Komana Nzambi wukweti ijina?

3. Komana Yesu hiNzambi waÑovu Yejima?

4. Komana Nzambi wanñakamenaña?

5. Komana Nzambi wetejaña nsakililu yejima?

Neyi mwila amakwawu kwakula awa malwihu, chakubula nikujina akuyileja ñakwilu yashiyashana. Hichatela kutuhayamishaku, hakumona neyi tuheka niyitoñojoka yaluwa hadi Nzambi yinatandi.

Ñakwilu Yalema Nankashi

Yesu Kristu wakonkomweneni hakulema kwakwiluka chekalayi Nzambi hampinji yahosheleñayi namumbanda  wakuhweleleli mudi Nzambi wawaniniyi kwishima. Iwu mumbanda kaSamariya welukili nindi Yesu wadiña kaprofwetu. Ilaña kwadiña chuma chamukabishileña. Nsakililu yaYesu yadiña yambukaku nayindi. Chashimwiniyi chuma chamukabishileña, Yesu wamulejili chakadi kuhita mumbadi nindi: “Chuma chimwadifukulaña himwachilukaku.” (Yowanu 4:19-22) Ichi chinakutuleja nawu Yesu watañishili nindi bayi neyi antu ejima ekala munsakililu eluka chalala hadi Nzambuku.

Komana mazu aYesu aya mukwila nawu kwosi muntu wunateli kumwiluka Nzambuku? Inehi. Yesu wamulejeli cheñi ona mumbanda nindi: ‘Ilaña mpinji yikwinza, eña yashika dehi, yakwila akwakudifukula alala akadifukula kudi Tata muspiritu nimuwalala; muloña antu adochu diwu adinakukeñayi Tata kudifukula kudi yena.’ (Yowanu 4:23) Komana mudi hakachi kawantu anakudifukula kudi Nzambi ‘muspiritu nimuchalala’?

Chalema nankashi kwiluka ñakwilu yanilu lwihu. Muloñadi? Yesu wakonkomweneni hakulema kwakwiluka chalala hampinji yalombeliyi nindi: “Wumi wahaya nyaka woweniwu, wakukwiluka eyi Nzambi walala wumu hohu, niYesu Kristu watemesheli.” (Yowanu 17:3) Eñañi, wumi wenu wakumbidi washindamena hakwiluka chalala hadi Nzambi.

Komana chaswayi kwiluka chalala hadi Nzambi? Eña. Hanu dinu, munateli kwiluka ñahi chalala? Yesu waditeneni nindi: “Ami yami njila, yami walala, yami wumi. Kwosi muntu niwumu wukwinza kudi Tata chiña hadami.” (Yowanu 14:6) Wahosheli cheñi nindi: ‘Hikwekala nawa wamwiluka Tataku, cheñi Mwana hohu, nimuntu anetejiyi Mwana kumumwekeshelayi.’—Luka 10:22.

Dichi njila yakumwilukilamu Nzambi yekala munsañu yatañishiliyi Yesu Kristu, Mwana kaNzambi. Kafwampi, Yesu watushiika nindi: “Neyi mukushakama mumazu ami, mukwikala atumbanji twami chalala; mukwiluka nsañu yalala, ninsañu yalala yikuyifumisha muwuduñu.”—Yowanu 8:31, 32.

Indi Yesu wakwili ñahi malwihu atanu adi hewulu?

[Mwevulu wudi hefu 4]

Komana mwadifukulaña kudi Nzambi imwabula kwiluka?