Komana Nzambi Wanñakamenaña?
Komana Nzambi Wanñakamenaña?
Ñakwilu yaseka:
▪ “Nzambi walema chikupu hanateli kutoñojoka hakukala kwamuku.”
▪ “Namoni hanñakamenaku.”
Indi Yesu wahosheli nindidi?
▪ “Tujila twanyanya tutanu hiyatulandaña natumali tuyeduku? Hela chochu, hikwekala hela kamu kavulamenañawu kudi Nzambuku. Hela nsuki jenu jajeni ajichinda dehi jejima. Dichi bayi mutiyaña womaku, kulema kwenu kwabadika kulema kwatujila twatuvulu.” (Luka 12:6, 7) Chakadi nikujina, Yesu watañishili nindi Nzambi watwakamenaña.
▪ “Dichi kwakama nenu, Tukudyadi? Tukunwadi? Hela nenu, Tukuvwaladi? Bayi mwakama mwokuku. Muloña yuma yejimiyi diyi yakeñañawu aJentili; Tata yenu wamwiwulu neluki chimunakaankili yuma yejimiyi.” (Matewu 6:31, 32) Yesu welukili chikupu nindi Nzambi weluka yuma yitwakankilaña.
BAYIBOLU yashimuna chikupu nawu Nzambi watwakamenaña. (Masamu 55:22; 1 Petulu 5:7) Neyi watwakamenaña, muloñadi wutwakabakenaña makonu? Neyi Nzambi hikukeña nawa wukweti ñovu yabadika, muloñadi chabulilayi kufumishahu makabi?
Ñakwilu yidi nawu, antu amavulu hiyeluka walala wakwila nawu Satana Diyabolu diyi nyuli wakanu kaayi katamaku. Hampinji yamwesekeleñayi Yesu, Satana wamulejeli mawanta ejima amunu mwishina, nakumwila nindi: “Nukukwinka mawantawa ejima nikulema kwawu, muloña ananyinkuwu ami; yonsu muntu inakeñi kwinka nukumwinkawu.”—Luka 4:5-7.
Hinyi wamwilishili Satana kwikala nyuli wakaayi? Anvwali jetu atachi, Adama naEvu, chamwovwahililuwu Satana nakumufutalela Nzambi, dikwila nawu amutondeli Satana kwikala nyuli yawu. Kufuma tuhu hampinji yakudikaña, Yehova Nzambi wamwinka Satana mpinji kulonda antu eluki nawu wakañanya kuyula chikupu. Yehova hakanjikijaña antu kumukalakelaku, ilaña watwinka kukooleka kwakufunta kudi yena.—Aroma 5:10.
Hamuloña wakwila Nzambi watwakamenaña, watutemesheleli Yesu kulonda yatukuuli kuchiyulu chaSatana. Yesu keña, ‘yabalumuni Diyabolu wekala nañovu yakuleta kufwa akekali chimwañaji.’ (Aheberu 2:14) Hakwila mwenimu, ‘wakakisañana nyidimu yaDiyabolu.’—1 Yowanu 3:8.
Iseki dikekala cheñi paradisa. Hayina mpinji, Nzambi “wakayikombola madilu ejima kumesu [awantu]; hikwakekala nawa cheñi kufwaku; hikwakekala nawa cheñi hela kuneña hela kudila hela kukataku. Yuma yakusambila [yikekala] yinahiti dehi.”—Chimwekeshu 21:4, 5. *
[Tumazu twaheshina]
^ Neyi munakukeña nsañu yikwawu kutalisha hamuloña wetejelayi Nzambi makabi, talenu kapetulu 11 mumukanda wunakwila nawu Chumanyi Chacheni Chatañishaña Bayibolu? wasonekawu kudi aYinsahu jaYehova.
[Mazu ekoku adi hefu 8]
Dinu iseki dikekala cheñi paradisa