Komana Nzambi Wetejaña Nsakililu Yejima?

Ñakwilu yaseka:

▪ “Nsakililu yejima yalombolaña kudi Nzambi.”

▪ “Hichikweti muloña nayuma yiwakuhwelelaku chakala washinshika.”

Indi Yesu wahosheli nindidi?

▪ ‘Iñililenu kuchisu chanyanya; muloña chisu cheneni, ninjila yabwambwañana yaya kukujilumuka, mweñilaña amavulu. Muloña chisu chanyanya, ninjila yanyanya yaya kuwumi, ayimonaña antesha.’ (Matewu 7:13, 14) Yesu hakuhweleleli nindi nsakililu yejima yalombolaña antu kudi Nzambuku.

▪ ‘Amavulu amba kañila hefuku odu nawu, Mwanta, Mwanta, hitwaprofweteli mwijina deyuku? Hitwafumishili andemoni mwijina deyuku? Hitwakoñeli nyidimu yañovu yayivulu mwijina deyuku? Henohu nakayakula nami, Hinayilukili hela ifuku nidimuku; fumenu kudami enu mwakoñaña yakuluwa.’ (Matewu 7:22, 23) Antu ejima aditenaña nawu amulondaña Yesu, hayitejañaku.

ANTU amavulu amunsakililu alemesha chikupu yaaku niyuma yakuhwelelawu. Chumanyi chamwekanaña neyi ntañishilu yeniyi hiyinesekani nansañu yekala Mwiizu daNzambi Bayiboluku? Yesu washimwini wubanji wekala mukulondela yaaku yawantu hampinji yahosheliyi nawakulumpi ansakililu amumafuku indi nindi: ‘Munapepeleshi Izu daNzambi nachaaku chenu.’ Wasombolweli cheñi awa mazu aNzambi nindi: ‘Antu awa anlemeshaña nanyivumbu yawu, hakwila nyichima yawu yidi kwakulehi nanami. Adifukulaña tuhu kudami chamukunkulu, chatañishañawu akwawu yijila yawantu nawu diku kutañisha kwalala.’—Matewu 15:1-9; Isaya 29:13.

Kwikala nayililu yayiwahi kwalema kubadika kukuhwelela hohu. Bayibolu yahosha hadi antu aditenaña nawu adifukulaña kudi Nzambi nawu: “Ahoshaña nawu twamwiluka Nzambi, ilaña nyidimu yawu yaya mwacheñi.” (Titusa 1:16) Kafwampi Bayibolu yahosha hadi antu amavulu amumafuku etu nawu: ‘Anfukeji, akwakuchinchika, akwakuditohesha, antu akeñaña yakuditiyisha aweni kuwaha, kukeña Nzambi nehi. Kuyitala afwana neyi amwakama Nzambi, hakwinza kwiteja ñovu yindi kwonti kwawu. Ambukaku kudi antu adi chochochu.’—2 Timotewu 3:4, 5.

Kashinshi kakeñekaña, ilaña kudi yuma yayivulu yakeñekaña. Muloñadi? Muloña muntu nateli kwikala washinshika ilaña nakwila yuma yaluwa. Dichi kwiluka chalala hadi Nzambi kwalema chikupu. (Aroma 10:2, 3) Kudiza ichi chalala nikuzata kwesekeja nachahosha Bayibolu kukutukwasha kumuzañalesha Nzambi. (Matewu 7:21) Chalala, nsakililu yalala yatela kwikala nayililu yayiwahi, kukuhwelela yuma yalala, nikuzata nyidimu yayiwahi. Kuzata nyidimu yayiwahi hikwila nkeñelu yaNzambi mafuku ejima.—1 Yowanu 2:17.

Neyi munakukeña kwiluka nsañu yayivulu kutalisha hayuma yatañishaña Bayibolu hadi Nzambi, hoshenu nawaYinsahu jaYehova kulonda ayidizisheña Bayibolu hetala chawaana.

[Mazu ekoku adi hefu 9]

Nsakililu yalala yatela kwikala nayililu yayiwahi, kukuhwelela yuma yalala, nikuzata nyidimu yayiwahi