Komana Nzambi hiMuntu?
Komana Nzambi hiMuntu?
Ñakwilu yaseka:
◼ “Wekala kwejima, muyuma yejima. Wekala neyi mpepela.”
◼ “Himukwamaana hela ñovu yakala kulumbulula nawa kwosi muntu waleñelaña iyi ñovuku.”
Indi Yesu wahosheli nindidi?
◼ “Mwitala daTata yami mwakushakama mwekala mwamuvulu.” (Yowanu 14:2) Yesu wahosheli muchifwikija neyi kwiji Nzambi wukweti itala, hela iluña dakushakama.
◼ “Nafumini kudi Tata, nenzi mumpata yamunu mwishina; cheñi nawa nukufuma mumpata yamunu mwishina, nukuya kudi Tata.” (Yowanu 16:28) Yesu welukili nindi Nzambi hiMuntu nawa wukweti iluña kwashakamañayi.
YESU hamuteneni Nzambi nindi hiñovu yakala kulumbululaku. Kwambukaku, wahosheli naNzambi nikulomba kudi yena. Kakavulu wamuteneneña Yehova nindi Tata yindi wamwiwulu, nkumbu yamwekeshaña wulunda waweni wukwetiyi naNzambi.—Yowanu 8:19, 38, 54.
Chalala “hikwekala muntu wamonahu dehi Nzambuku” nawa “Nzambi hiSpiritu.” (Yowanu 1:18; 4:24) Ilaña, ichi hichinayi mukwila nawu hakweti mujimbaku. Bayibolu yatulejaña nawu: “Kwekala mujimba waheseki, kwekala nawa mujimba waspiritu.” (1 Akorinda 15:44) Komana Yehova wukweti mujimba waspiritu?
Eña. Yesu chamusañwiluwu, “weñilili mwiwulu mwamweni, kulonda kutumwekena katataka kumesu aNzambi.” (Aheberu 9:24) Ichi chinakutudizisha yuma yiyedi yalema hadi Nzambi. Chatachi, wukweti iluña kwashakamañayi. Chamuchiyedi, hiMuntu bayi neyi hiñovu yakala kulumbulula yekala kwejimaku.
Hanu dinu, Nzambi watweshaña ñahi kulombola yuma yejima? Nzambi nateli kutemesha spiritu yindi yajila, hela ñovu yazatikaña, kwiluña didi dejima mukuleña kwejima. Neyi chakwatañayi tata yawantu anyanindi kuchikasa kulonda kuyikundeja nikuyikwasha, Nzambi wazatishaña spiritu yindi yajila kulonda kushikija nkeñelu yindi.—Masamu 104:30; 139:7.
Chineli Nzambi hiMuntu, kwekala yuma yakeñayi niyahelayi nawa kwekala yuma yatiyañayi kuwaha hela kutama. Bayibolu yatulejaña nawu wakeña antu jindi, watiyaña nyidimu yindi kuwaha, wahela kupesha, nawa watiyaña kutama nayuma yatama. (Kutachika 6:6; Kuhituluka 16:22; 1 Anyanta 10:9; Masamu 104:31) Ha 1 Timotewu1:11 amutena nawu ‘Nzambi wamuzañalu.’ Dimuloña wahosheleliyi Yesu nindi tunateli kudiza kumukeña Nzambi yeniwu namuchima wetu wejima.—Maku 12:30. *
[Tumazu twaheshina]
^ Nsañu yikwawu yinakuhosha haniyi nsañu, talenu kapetulu 1 kamukanda wunakwila nawu Chumanyi Chacheni Chatañishaña Bayibolu? wasonekawu kudi aYinsahu jaYehova.
[Mazu ekoku adi hefu 5]
Neyi chakwatañayi tata yawantu mwanindi kuchikasa, Nzambi wazatishaña spiritu yindi yajila kulonda kushikija nkeñelu yindi