Komana Yesu hiNzambi waÑovu Yejima?
Komana Yesu hiNzambi waÑovu Yejima?
Ñakwilu yaseka:
▪ “Eña, Yesu hiNzambi Wañovu Yejima.”
▪ “Yesu wamumwekesheli Nzambi mumujimba.”
Indi Yesu wahosheli nindidi?
▪ “Neyi mwankeña, mutenowu munazañalali nanichi chinukuya kudi Tata, muloña Tata wambadikami.” (Yowanu 14:28) Yesu wahosheli nindi yena naTata yindi hiyekala wowamuku.
▪ “Hinukukandama kudi Tata yami ninenu Tata yenu, kudi Nzambi yami ninenu Nzambi yenu.” (Yowanu 20:17) Yesu haditeneni nindi hiNzambuku, ilaña wamuteneni Nzambi nindi hiMuntu nahindi.
▪ “Hinahoshi chakumuchima wamami awenuku; Tata wantemesheli diyi nanleji munukuleja antu, nimunukuhosha.” (Yowanu 12:49) Yesu hatañishileña nsañu yinduku; ilaña watañishileña nsañu yakufuma kudi Tata yindi.
YESU wahosheli nindi hiMwana kaNzambi, bayi neyi Nzambi Wañovu Yejimaku. Neyi Yesu hiNzambi, walombeleña kudinyi hampinji yadiñiyi hamaseki? (Matewu 14:23; 26:26-29) Chalala, Yesu hadiña nakutwamba neyi nakuhosha namuntu wacheñuku.
Chelili atumbanji twaYesu ayedi amulombi nawu yoyinki yifulu yadimena muWanta windi, wayakwili nindi: “Kushakama kuchikasa chami chachidiilu, hela kuchikasa chachimunswa, hichuma chakuhana amuku, chambala chawaloñeshelawu dehi kudi Tata yami.” (Matewu 20:23) Komana Yesu wayidimbileña hampinji yayilejeliyi nindi hadiña nañovu yakuyinka chuma chalombeluwuku? Inehi. Ilaña, wadizozeli nakwiluka nindi Nzambi hohu diyi wukweti ñovu yakwila mwenimu. Yesu wahosheli cheñi nindi kudi yuma yikwawu yabuliliyi kwilukayi yena niañelu chiña Tata yindi hohu diyi wayiluka.—Maku 13:32.
Komana Yesu wadiña nakumwovwahila Nzambi hohu hampinji yadiñayi hanu hamaseki neyi muntu? Inehi. MuBayibolu Yesu amushimuna nawu, wamwovwahilileña Nzambi nihampinji yasañukiliyi. Kapostolu Pawulu watwanukishaña nindi, “Mutu waKristu diyi Nzambi.” (1 Akorinda 11:3) Bayibolu yahosha nawu kumbidi “chakela yuma yejima yinamwovwahili dehi yena, henohu niyomweni Mwana nawa wakamwovwahila Mukwakwovwahisha yuma yejima; kulonda Nzambi akekali diyi hohu kanka windi chikupu, mwejima.”—1 Akorinda 15:28.
Chalala, Yesu hiNzambi Wañovu Yejimaku. Dimuloña wahosheleliyi hadi Tata yindi nindi, “Nzambi yami.”—Chimwekeshu 3:2, 12; 2 Akorinda 1:3, 4. *
[Tumazu twaheshina]
^ Nsañu yikwawu yinakuhosha haniyi nsañu, talenu mafu 201-204 mumukanda wunakwila nawu Chumanyi Chacheni Chatañishaña Bayibolu? wasonekawu kudi aYinsahu jaYehova.
[Mazu ekoku adi hefu 7]
Yesu wahosheli nindi kudi yuma yikwawu yabuliliyi kwilukayi yena niañelu chiña Tata yindi hohu.