Mwani Tunayitambiki

HADAHA mwahitahu dehi Hetala daWanta dawaYinsahu jaYehova dekala kumwashakama nawa mwadihulahu dehi nenu yumanyi yakoñañawu munidi itala. Tahi mweluka nenu antu ejima atela kwinza nakupompa nawu kukupompa kwejima kwamumulungu? Mwani nienyi ejima atela kwinza nakupompa.

Hela chochu, hekwawu mwadihulaña malwihu. Muloñadi aYinsahu jaYehova chapompelañawu hamu? Yumanyi yamwekanaña hakupompa? Indi antu abula kwikala aYinsahu jaYehova ahoshañahu nawudi kutalisha hayuma yamonañawu hakupompa?

‘Pompeshenu Antu’

Kufuma tuhu kumashiita, antu apompaña hamu nakudifukula nikudiza kulonda amwiluki Nzambi. Kwakwihi nayaaka 3,500 yinahituhu, aIsarela ayilejeli nawu: “Wakapompeshaña antu ejima, niamayala, niambanda, niatwansi, nimwenyi weyi wekala hamukala weyi, kulonda akatiyi, akadizi, akatiyi Yehova Nzambi yenu woma, akashuku muchima wakwila mazu ejima anshimbiji.” (Kuhituluka 31:12) Dichi, muIsarela atwansi niakulumpi ayilejeleña kudifukula nikumwovwahila Yehova Nzambi.

Chimwahitili yaaka yayivulu, chelili chipompelu chawakwaKristu chinatachiki dehi, kupompa kwatwalekeluhu kwikala chuma chalema mukudifukula kwalala. Kapostolu Pawulu wasonekeli nindi: “Twayenu tudakamenenuña wumu namukwawu kulonda tusañumuni kukeña ninyidimu yayiwahi, bayi kujiñaña kukupompa kwetu, neyi chelañawu amakwawuku, ilaña nakudikolesha wumu namukwawu.” (Aheberu 10:24, 25, Holman Christian Standard Bible) Chochanuñañanaña chisaka neyi antu muchisaka ashakamaña mpinji yeneni nakuhanjeka nikudikolesha, nimpanda yakukeña yawantu anakukeña kumuzatila Nzambi yakolaña neyi akwaKristu ahumañanaña nakudifukula.

A Yinsahu jaYehova apompaña Hetala dawu daWanta kayedi mumulungu kwesekeja nachaaku chamuNsona. Kupompa kwakwashaña ana anapompi kudiza, nikutiya nikwiluka chakuzatisha nshimbi jamuBayibolu. Neyi chinatwesheki, ntanjikilu yeniyi yekalaña yoyimu mukaayi kejima, kupompa hikupompa kukweti nkeñelu yachu. Henohu kupompa kanda kutachiki nihanyima yakupompa, wonsu anapompi ‘adikoleshaña wumu namukwawu’ munhoshelu yakudituña. (Aroma 1:12) Chumanyi chamwekanaña hakupompa hikupompa?

Mpanji yaBayibolu

Antu amavulu avula kuwanika kupompa kwatachi nakutiya mpanji yaBayibolu yaloñeshelawu antu amavulu, yavula kwikalaku kunsa yamulungu. Yesu wavulileña kuhosha jimpanji kudi antu amavulu ilaña Mpanji yahaMpidi diyaya mpuhu. (Matewu 5:1; 7:28, 29) Kapostolu Pawulu wahosheli nawantu amuAtenisi. (Yililu 17:22-34) Kulondela chakutalilahu chaYesu niPawulu, kupompa kwawaYinsahu jaYehova kwekala nampanji yaloñeshelawu sweje-e antu amavulu, amakwawu yekalaña himpinji yatachi kwinza nakupompa.

Kupompa kwatachikaña nakamina kufuma mumukanda Imbileni Yehova Amalumbo. * Wonsu akukeña kwimana nakwimba kamina anatweshi kwimana. Kulondelahu, kwekalaña kulomba kwakwihi, halondela nimpanji yajiminiti 30 yahoshañawu kudi nhoshi weluka kuhosha. (Talenu chikasha chinakwila nawu  “Jimpanji Jatela Kukwasha Antu Amavulu.”) Mpanji yindi yikushindamena chikupu haBayibolu. Kakavulu nhoshi walejaña izaza kubakula jinsona jakundama kumutu wampanji nakumulondela chikutañañayi. Dichi, neyi munakeñi munateli kusenda Bayibolu yenu, hela  kulomba Bayibolu kudi Chinsahu chaYehova henohu kupompa kanda.

Kudiza Kaposhi Kakutalila

Muyipompelu yayivulu yawaYinsahu jaYehova, neyi mpanji yawantu amavulu yinamani dehi, hasinsaña Kudiza Kaposhi Kakutalila, kuhanjeka kwamalwihu niñakwilu hansañu yamuBayibolu muora yimu. Iku kupompa kwakwashaña ejima anapompi kwimbujola akwaBereya amumafuku aPawulu, ‘atambwilili mazu; hiyakutalatala muNyikanda yajila hefuku hefuku.’—Yililu 17:11.

Kudiza Kaposhi Kakutalila kwatachikaña nakamina. Nsañu yahoshewaña nimalwihu ehulañawu kudi mukwakulombola ekalaña muchibaba chakudiza chayinu magazini. Mwatela kutambula magazini yakudizamu kudi Chinsahu chaYehova. Hakachi kanyitu yitunadizi katataka hadi iye: “Anvwali—Dizishenu Anyanenu muKukeña,” “Bayi Mwila Mwinenu Chatama Nakatama Kanayiliyuku,” ‘niMuloña Wukumanina Makabi Ejima Katataka.’ Hela chakwila kupompa kweniku akulombolaña munjila yakwihula malwihu niñakwilu, antu mwizaza akulañahu chakadi kuyikanjikija nawa ñakwilu avula kuyihana kudana atañila chadimu chibaba nawa anatoñojokuhu nikutaña nsona yinakukolesha yikuma. Kupompa kwamanaña nakamina nikulomba.—Matewu 26:30; Aefwesesa 5:19.

Kudiza Bayibolu haChipompelu

Ifuku dimu mumulungu nimulungu, aYinsahu jaYehova ahumañanaña cheñi Hetala daWanta nakutiyilila kuprogiramu yambadi jisatu nakupompa hadi ora yimu najiminiti 45. Chibalu chatachi hikupompa kwaKudiza Bayibolu haChipompelu hadi jiminiti 25. Kwakwashaña anapompi kwiluka Bayibolu yawu chikupu, nikuhimpa yitoñojoka yawu niyililu, nikupaminaku  neyi atumbanji twaKristu. (2 Timotewu 3:16, 17) Iku kupompa kudi neyi kudiza Kaposhi Kakutalila kwakuhanjeka hamalwihu niñakwilu hansañu yamuBayibolu. Antu ahoshañahu chakadi kuyikanjikija. Chozelu chakuzatisha hakudiza Bayibolu kakavulu chekalaña himukanda hela buloshuwa yasonekawu kudi aYinsahu jaYehova.

Muloñadi chazatishilañawu nyikanda yahoshaña haBayibolu? Kumashiita, kutaña hohu Izu daNzambi hikwadiñi nakukwashanaku. “Hiyakulumbulula muwaya kulonda atiyi mwanatañuwu.” (Nehemiya 8:8) Makonu, nyikanda yahosha hamukanda waIsaya, Danyeli, niChimwekeshu yinakwashi antu apompaña kwiluka iyi nsañu yamuBayibolu.

Shikola yaMudimu waTeokalatiki

Neyi kupompa kwaKudiza Bayibolu kunamani dehi hakusinsa Shikola yaMudimu waTeokalatiki. Iku kupompa kwajiminiti 30 akwitanjika kulonda kukwasheñaku akwaKristu ‘kwiluka mwakutañishila.’ (2 Timotewu 4:2) Chakutalilahu, komana mwanenu hela ibwambu denu wayihulahu dehi lwihu hadi Nzambi hela haBayibolu mukañanya kwakula chiwahi? Shikola yaMudimu waTeokalatiki yikuyidizisha chakuwana ñakwilu yayiwahi yamuBayibolu. Dichi tunateli kwimbujola mazu akaprofwetu Isaya, wahosheli nindi: “Mwanta Nzambi nanyinki idimi dawalejewaña, kulonda niiluki kuhosha mazu akukolesha nachu muntu nazeyi.”—Isaya 50:4.

Shikola yaMudimu waTeokalatiki yatachikaña nampanji yashindamena hachikunku chamuBayibolu chalejañawu ejima anenzi kutaña munowu mulungu. Kufumahu, nhoshi wukuleja izaza kuhoshahu mukwihihisha hayikuma yayiwahi yawanawu muchikunku chakutaña owu mulungu. Hanyima yaniyi mpanji, atudizi asonekesha mushikola akuhana mpanji jayinkawu.

Atudizi ayinkaña mudimu wakutaña kapetulu kamuBayibolu hachinañamu hela kumwekesha chakutañisha nsañu yamuNsona kudi mukwawu. Mpanji nimpanji chiyamana, mukwakufumba wakuluka yitembi wahamekaña kadizi hazatayi chiwahi, kuzatisha nsañu yidi  mumukanda wakudizamu waNonkelenimo mu Masambililo ya Isukulu lya Butumikishi Ilya Bulesa. Nkumininaku, watela kumuleja kadizi heluña hatela kuwahishayi kwakankawawu.

Iyi progiramu yajimpanji jakusinsashana ayiloñesha kulonda yikwasheñaku atudizi niantu ejima enzaña nakupompa anakukeña kuwahisha ntañilu, nhoshelu, nintañishilu yawu. Neyi Shikola yaMudimu waTeokalatiki yinamani dehi, halondelaña Kupompa kwaMudimu kwatachikaña nakamina kakweti nsañu yamuBayibolu.

Kupompa kwaMudimu

Chibalu chakukumisha nachu progiramu hiKupompa kwaMudimu. Antu adi mwizaza adizaña chakutañisha chalala chaBayibolu chiwahi kuhitila mujimpanji, yimwenu, kwihujola, nikwakulahu. Henohu kanda yotemeshi atumbanji twindi nakushimwina, Yesu wayipompesheli nakuyileja nshimbi jateleleli kulondelawu. (Luka 10:1-16) Chelili anayileji dehi mwakushimwina, adiluñishili yuma yayiwahi yafuminumu. Nkumininaku, atumbanji twaYesu afuntili nakuleja Yesu yuma yamwenuwu. (Luka 10:17) Atumbanji avulileña kudileja yuma yayiwahi.—Yililu 4:23; 15:4.

Progiramu yajiminiti 35 yaKupompa kwaMudimu ayishaña muchipapilu chansañu chahakakweji chitwatenaña netu Mudimu Wetu waWanta. Nyitu yitwadiza katataka yinabombelumu: “Kudifukula Kudi Yehova Hamu naChisaka,” “Muloña Wutwafuntilañaku Kakavulu,” ‘niImbujolenu Kristu muMudimu Wenu Wakushimwina.’ Progiramu yamanaña nakamina, nawa muntu wumu wamuchipompelu walombaña kulomba kwamakumishilu.

Mazu Ahoshañawu Enyi

Antu muyipompelu afwilaña kutambwila nachisambu antu anakwinza. Chakutalilahu, Andrew watiyileña chayihosholeleñawu aYinsahu jaYehova nawu hiyantu atama. Ilaña chenjiliyi katachi nakupompa, wadihayaminini hakumona chamutambwililuwu nachisambu. Wahosheli nindi: “Dadiñi iluña dadiwahi kwatela kwikalayi muntu.” Watwelekeluhu nindi: “Nahayamini chikupu hakumona wubwambu wadiñuhu nichisambu chammwekesheleluwu.” Ashel, kampululu wakuCanada, wetejeli nindi: “Kupompa kwawaha nankashi! Natiyililaña chachiwahi nankashi.”

José, washakamaña kuBrazil, amwilukili muchituñilu nawu hichiluwañimbi. Hela chochu, amutambikili kuya nakupompa Hetala daWanta dekala mwiluña mwashakamañayi. Hanyima yakupompa, wahosheli nindi: “Antu adiña Hetala daWanta antambwilili chiwahi, hela chakwila eluka yuma yinelileña kunyima.” Atsushi, wakuJapan, wahosheli nindi: “Natela kwiteja muloña mpinji yatachi kupompa nawaYinsahu jaYehova, natiyili neyi najimbali. Hela chochu, nelukili nami aYinsahu hiyantu amawahi. Esekeli chikupu kulonda nidinjilili nawu.”

Mwani Tunakuyitambika

Neyi chinamwekeshi mazu adi hewulu, kuya nakupompa Hetala daWanta kunateli kuyikwasha mweneni. Mukumwiluka Nzambi, nawa kuhitila munshimbi jamuBayibolu jimukutambwila, Yehova Nzambi wukuyileja ‘mwakudiwahisha enu aweni.’—Isaya 48:17.

Kupompa kwawaYinsahu jaYehova kwawaana, bayi neyi afweteshaña hakwiñilaku. Komana munakukeña kuya nakupompa Hetala daWanta dekala mwiluña denu? Mwani tunakuyitambika netu mwakenzi nakupompa.

[Tumazu twaheshina]

[Chikasha chidi hefu 30]

 Jimpanji Jatela Kukwasha Antu Amavulu

Mpanji jaBayibolu ajisakulaña hajiawutilayini jakubadika ha 170 jikweti nyitu yashiyashana yamuNsona, kushilahu niniyi nyitu:

◼ Komana Yuma Yimwakuhwelela Kutalisha Kwafumini Antu, Yalema?

◼ Chamonañayi Nzambi Maluwi niKuhumañana Kweyala naMumbanda

◼ Nzambi Wukababesha Antu Akisañanaña Iseki

◼ Chakuumika Kwakama kwaMuwumi

◼ Komana Iwu diWumi Wekalaku Hohu?

[Mwevulu wudi hefu 30]

Mpanji yaBayibolu

[Mwevulu wudi hefu 30]

Kudiza “Kaposhi Kakutalila”

[Nyevulu yidi hefu 31]

Kudiza Bayibolu haChipompelu

[Mwevulu wudi hefu 31]

Shikola yaMudimu waTeokalatiki

[Mwevulu wudi hefu 32]

Kupompa kwaMudimu