Kashinshi Kenu Katiyishaña Muchima waYehova Kuwaha

‘Eyi mwanami, ikalaku mukwamaana, wutiyishaña muchima wami kuwaha, kulonda nakatweshi kwakula muntu wukunsawula.’—YISHIMU 27:11.

1, 2. (a) Muloñanyi waheniyi Satana washimunawu mumukanda waYoba? (b) Chumanyi chamwekeshaña nawu Satana watwalekeluhu kumusawula Yehova hanyima yakufwa kwaYoba?

 YEHOVA wetejeli Satana kweseka kashinshi kakambuñindi washinshika Yoba. Chafuminumu Yoba wajimbesheli yimuna, wafwishili anyana nawa wakatili. Ilaña, Satana chajinokeliyi kashinshi kaYoba, wajinokeli cheñi nikashinshi kawantu amavulu bayi Yoba hohuku. Satana wahosheli nindi: “Ikowa nekowa, muntu wukuhana yuma yakwetiyi yejima nawumi windi.” Iku kujinoka kwaleta nsañu yabombelelumu antu amavulu bayi Yoba hohuku, nawa kwatwalekahu kufuma hampinji yafwiliyi Yoba.—Yoba 2:4.

² Chimwahitili yaaka kwakwihi na 600 hanyima yakumweseka Yoba, Yehova wamoneneni Solomoni kusoneka nindi: “Eyi mwanami, ikalaku mukwamaana, wutiyishaña muchima wami kuwaha, kulonda nakatweshi kwakula muntu wukunsawula.” (Yishimu 27:11) Chakadi nikujina, hayina mpinji Satana wachidiña nakumuzuñesha Yehova. Kubombelahu, muchimwenu chamumwekesheleluwu kapostolu Yowanu, Satana amumweni nakwinka ambuña aNzambi muloña hanyima yakumutemuna mwiwulu chelili anemiki dehi Wanta waNzambi mu 1914. Eña, hela munanu mafuku akukuminina ayinu nyaka yamakonu yatama, Satana wuchidi kujinoka kashinshi kawambuña aNzambi.—Chimwekeshu 12:10.

3. Yumanyi yalema yitwatela kudiza mumukanda waYoba?

³ Ichi dinu, tushinshikenu hayuma yisatu yalema yitwadizaña mumukanda waYoba. Chatachi, kweseka kwamweniyi Yoba kwatuleñelaña twiluki chilumbu yomweni wawantu nihafumaña kudikaña nawantu jaNzambi. Chilumbu yeniwu diyi Satana Diyabolu. Chamuchiyedi, neyi twikala nawulunda waweni naNzambi chikutukwasha kwikala akashinshi hela chakwila tukumona kweseka kwasweja. Chamuchisatu, neyi kumwekana kweseka nawa atweseka, Nzambi watukwashaña kuumika neyi chamukwashiliyi Yoba. Makonu, Yehova watukwashaña kuhitila Mwiizu dindi, mukuloñesha, nimudi spiritu yindi yajila.

Anukenuña Chilumbu Yomweni

4. Hinyi wunakukojeja kukala kudi mukaayi kamakonu?

⁴ Antu amavulu akuhwelela wanyi nawu Satana wekala kwoku. Hela chakwila, anateli kwakama hayuma yinakumwekana mukaayi, hiyamwiluka wakojejaña yumiyuku—Satana Diyabolu. Chalala, antu aweni diwu akojejaña kukala kwakuvulu kwamonañawu antu. Anvwali jetu atachi, Adama naEvu, hiyakeñeli kuyilombola kudi Nleñi yawuku. Kufuma tuhu hayina mpinji, makiñu awantu ahiñañamu anakukoña yuma  yaheña. Hela chochu, Diyabolu diyi wamudimbili Evu kulonda yadikaña naNzambi. Diyi waleta kaayi kayulañayi mudi antu abula kuwanina nawa afwaña. Hamuloña wakwila Satana diyi “nzambi yampata yamakonu,” nyunza yawantu yinakumwekesha yililu yoyimu yamwekeshañayi—kudivwimba, ntaadi, ichima, lwisu, makudi, nikudikaña. (2 Akorinda 4:4; 1 Timotewu 2:14; 3:6; tañenu Yakoba 3:14, 15.) Yililu yamuchidiwu yinakojeji yikonkojola mujipolitiki nimunsakililu, kuhelañana, majikakanwa, nimapumba nawa yuma yeniyi yinakuleñela antu kuyanda chikupu.

5. Chumanyi chitwatela kwila kutalisha hansañu yalema yitweluka?

⁵ Hakwikala ambuña aYehova tweluka nsañu yalema chikupu. Eña, tweluka wunakukojeja kukala kunakuswejelaku mukaayi. Chumichi chatela kutusañumuna kuya nakushimwina kulonda kulejaku amakwawu amwiluki chilumbu yomweni. Twazañalalaña kumuhakwilaku Yehova Nzambi walala, nikulejaku amakwawu chakamukisañanawu Satana nikumanisha kukala kwawantu.

6, 7. (a) Hinyi wakojejaña akwakudifukula alala kukabakana? (b) Tunateli kwimbujola ñahi chakutalilahu chaElihu?

⁶ Satana diyi wunakukojeja kukala kunasweji mukaayi niikañesha damonañawu antu jaNzambi. Wafwilaña chikupu kutweseka. Yesu wamulejili kapostolu Petulu nindi: ‘Eyi Shimona, Shimona, Satana nayilombi dehi kulonda ayisaali neyi tidiku.’ (Luka 22:31) Chochimu, wejima wetu twalondaña mumahaji aYesu twakamona kweseka kwashiyashana. Petulu wamufwanishili Diyabolu ‘namutupa wabulumaña wunakukeñakeña akudyayi.’ Pawulu wahosheli nindi: “Antu ejima akeña nawu ashakami mudi Kristu Yesu nikwakama Nzambi, akumona makabisha.”—1 Petulu 5:8; 2 Timotewu 3:12.

⁷ Neyi mukwetu mukwakwitiya yomona kukala, hitwatela kuhosha netu Yehova diyi wunakojeji iku kukalaku. Kwesekeja nachitunatañi, Satana diyi mukwankunyi yomweni. Chatela kudambula kudi mana kwetu wudi mukukala, nakwila neyi cheliluwu ana ankundeji akutwamba, twatela kwila neyi cheliliyi Elihu, wahosheli naYoba neyi ibwambu walala. Twatela kumukwasha mana kwetu kulonda yodikaña nachilumbu chetu, Satana. (Yishimu 3:27; 1 Atesalonika 5:25) Hela chikali ñahi, chikonkwanyi chetu chatela kwikala chakumukwasha mukwetu mukwakwitiya kulonda yokakeli kashinshi kindi, nikumuzañalesha Yehova.

8. Muloñadi Satana chakañenyiyi kumulekesha Yoba kumulemesha Yehova?

⁸ Maheta aYoba asambililiyi Satana kujilumuna yadiña yimuna. Yimuna yeniyi yadiña yalema chikupu, hadaha dimwawaninineñayi mali. Cheñi Yoba wazatishileña yimuna yeniyi hakudifukula. Hanyima yakwila Yoba najiliki dehi nyanindi, “hakuhindukaña budidi yayeni, hakuyilambwila wejima wawu nyilambu yakushita hamuntu hamuntu; muloña Yoba welilaña nindi, Wamba kela anyanami amayala anavulumuni dehi, anahoshi dehi Nzambi chatama munyichima yawu. Dichi chelilañayi Yoba mafuku ejima.” (Yoba 1:4, 5) Dichi, Yoba walambwileña yimuna yeniyi mafuku ejima kudi Yehova. Chatachikili kweseka hatwesheli cheñi kulambulaku. Yoba hadiña cheñi ‘nayuma’ yakumulemesha nachu Yehovaku. (Yishimu 3:9) Ilaña wamulemesheleña Yehova nakanwa kindi.

Dikundenu Chikupu naYehova

9. Chumanyi chitwasweja kulemesha muwumi wetu?

⁹ Chili twaheta chili tudi atuzweñi, kansi hela mukulumpi, twakola kumujimba hela nehi, tunateli kwikala nawulunda waweni naYehova. Hichikweti muloña nakukala kutukumonaku, neyi twikala nawulunda wakola naNzambi chikutukwasha kukakela kashinshi ketu nikumuzañalesha Yehova. Hela tuhu antu abulili kwilukisha chalala omikili nikukakela kashinshi kawu.

10, 11. (a) Indi muheletu wumu welilidi chesekeluwu kashinshi kindi? (b) Indi iwu muhela wamwakwili ñahi chachiwahi Satana?

¹⁰ Talenu chakutalilahu chaMuhela wejina daValentina Garnovskaya, Chinsahu wumu hakachi kwawaYinsahu amavulu akuRussia akakeleli kashinshi kawu neyi Yoba hela chakwila amweni kweseka kwasweja. Muchaaka cha 1945, hadiñayi nayaaka kwakwihi na 20, mana kwetu wamushimwinini.  Wafuntililuku kapampa kayedi nakuhanjeka nindi nsañu yamuBayibolu, kufuma hayina mpinji, hamumweni cheñi ona mana kwetuku. Hela chochu, Valentina watachikili kushimwina kudi antuñi nindi. Chafuminumu, amukwatili nakumusha muchilombu hadi yaaka yitanu nayisatu. Muchaaka cha 1953 amuumbiluku nawa watachikili cheñi mudimu windi wakushimwina. Chimwahitili mpinji, amukasili cheñi mukaleya hadi yaaka ikumi. Chashakaminiyi yaaka yayivulu muchilombu chimu, amutweli kuchilombu chacheñi. Muchilombu chenichi, mwadiña ahela amakwawu adiñi naBayibolu. Ifuku dimu muhela wamulejeli Valentina Bayibolu. Watiyili kuwaha nankashi. Iyi diyi Bayibolu yikwawu yamweniyi Valentina kufuma hayina yamweniyi namana kwetu wamushimwininini mu 1945.

¹¹ Muchaaka cha 1967, Valentina amufumishili mukaleya, nawa wadiheni kudi Yehova kuhitila muchipapatishu chamumenji. Haniyi mpinji wadikitili chikupu mumudimu wakushimwina chakubula kumuluwañesha ndo-o nimu 1969. Hela chochu, muchaaka chenichi amukwatili cheñi, nawa haniyi mpinji amukasili mukaleya hadi yaaka yisatu. Ilaña, Valentina watwalekeluhu kushimwina. Wafwili mu 2001, nawa wakwashili antu 44 kudiza chalala. Amukasili yaaka 21 mutuleya nimuyilombu. Walekeli yuma yejima, kushilahu niwuswa wadiñiyi nawu wakwila yuma yakeñeliyi, kulonda kukakela kashinshi kindi. Henohu wudi kwakwihi nakufwa, Valentina wahosheli nindi: “Hinadiña netala damuku. Yuma yami yejima yadiña muchikasha chimu hohu, ilaña natiyileña kuwaha kumukalakela Yehova nayuma yeniyi.” Valentina wamwakwili Satana chachiwahi nankashi, wahosheli nindi antu anateli kudikaña naNzambi neyi amona kukala. (Yoba 1:9-11) Tunakuhweleli netu wamuzañalesheli Yehova nawa Yehova nakutalila chikupu mpinji yakamusañulayi Valentina niamakwawu ashinshika afwa dehi.—Yoba 14:15.

12. Indi kukeña kwazataña mudimwinyi hawulunda wetu naYehova?

¹² Wulunda wetu naYehova washindamena hakumukeña kutwamukeña. Twakeña chikupu yililu yaNzambi nawa twafwilaña kuzata hakumina ñovu jetu kulonda twileña nkeñelu yindi. Kwambukaku nachahosheliyi Diyabolu, twamukeña Yehova nawa chakubula kutukanjikija. Iku kukeña kwakufuma hamuchima kwatukoleshaña kukakela kashinshi ketu neyi atweseka. Muloña Yehova, ‘wahembaña mwelañawu antu indi ajila.’—Yishimu 2:8; Masamu 97:10.

13. Indi Yehova wamonaña ñahi yuma yitwamukalakelaña?

¹³ Kukeña kwatusañumunaña kulemesha ijina daYehova, hela chakwila twatoñojokaña netu kwosi yuma yitunateli kwila. Wamonaña yitoñojoka yetu yayiwahi, nawa hanateli kutusompeshaku neyi tukañanya kuzata yuma yitwafwilaña kwila. Bayi neyi yuma yitwazataña diyalema hohuku, ilaña nimuloña wukutuletesha tuzati yumiyi. Hela chakwila Yoba waneñeli chikupu, nawa womikili nankashi, wayilejeli  antu amwinkeleña muloña nindi wakeña nshimbi jaYehova. (Tañenu Yoba 10:12; 28:28.) Mukapetulu kakukumishaku kamukanda waYoba, Nzambi wayizuwilili aElifwazi, Bilidadi niZofwari muloña hiyahosheli mwalalaku. Ilaña, Yehova wamwekesheli nawu wamukeña Yoba kuhitila mukumutena nindi “kambuñami” mapampa kawana, nikumuleja kulombelaku ana akwakukundeja akutwamba. (Yoba 42:7-9) Anetu nawa tuzateña munjila yitwatela kwikalila nawuselewa waYehova.

Yehova Wakwashaña Ambuñindi Ashinshika

14. Indi Yehova wamukwashili ñahi Yoba kuhimpa yitoñojoka yindi?

¹⁴ Hela chakwila Yoba hadiña wawaninaku wakakeleli kashinshi kindi. Mpinji jikwawu watoñojokeleña mwaluwa hamuloña wamakabi aswejeli. Chakutalilahu, wamwilili Yehova nindi: “Nakubilelaña, eyi kuñakula nehi; . . . hiwukunkabisha nañovu yakuchikasa cheyi.” Kubombelahu, Yoba waswejeli kudimona neyi waloña hampinji yahosheliyi nindi: “Hinatamaku,” nawa, “kumakasami hikudi ndombuku, nikulomba kwami kutooka.” (Yoba 10:7; 16:17; 30:20, 21) Hela chochu, Yehova wamukwashili Yoba chiwahi kuhitila mukumwihula malwihu amavulu amukwashili Yoba kubula kutoñojoka neyi waloña. Malwihu wenawa amukwashili Yoba kwiluka nindi Nzambi wabadika nankashi nawa kwosi muntu wukwesekana ninduku. Yoba wetejeli iku kufumba nawa wahimpili yitoñojoka yindi.—Tañenu Yoba 40:8; 42:2, 6.

15, 16. Munjilanyi mwakwashilañayi Yehova ambuñindi makonu?

¹⁵ Yehova wahanaña wunlomboli nikufumba kwakuwahi kudi ambuñindi makonu. Kubombelahu, twadiluñishaña nkisu jajiwahi. Chakutalilahu, Yesu Kristu waheni mulambu wefutu danyiloña nawa chumichi chaleñela chikali chaswayi kwanakena nshidi. Tunateli kwikala nawulunda wawuwahi naNzambi kushindamena haniwu mulambu, hela chakwila hitwawaninaku. (Yakoba 4:8; 1 Yowanu 2:1) Hampinji yitunakumona kukala twalombaña cheñi spiritu yaNzambi yajila kulonda yitukwashi nikutukolesha. Tukweti cheñi Bayibolu, neyi tukutañaña nikutoñojoka hansañu yekalamu, tukudiloñesha kuumika hampinji yakesekawu chikuhwelelu chetu. Kudiza kwatukwashaña kwiluka nsañu yawanta wakuleña kwejima nikashinshi ketu.

¹⁶ Kubombelahu, twahetelañamu chikupu hakwikala hakachi kawamana kwetu amukaayi kejima, enkañayi Yehova yakudya yakuspiritu kuhitila mudi ‘nduñu wamaana nikashinshi.’ (Matewu 24:45-47) Muyipompelu yejima yawaYinsahu jaYehova yakushika kwakwihi na 100,000, twapompaña kulonda kutudizisha nikukolesha chikuhwelelu chetu neyi tumona kweseka. Tunateli kulumbulula chumichi nachuma chamweniyi Sheila Chinsahu wakansi washakamaña kuGermany.

17. Lumbululenu kuwaha kwekala mukutiyilila chikupu kufumba kwahanañawu mukuloñesha kwaYehova makonu.

¹⁷ Ifuku dimu hampinji yadiñayi Sheila kushikola, ntañishi wafuminumu mushikola yawu hakampinji kantesha. Akwawu akashikola afuukwiluhu kuzatisha Ouija board. Hohenohu Sheila wafumini mushikola, nawa chimwahitili mpinji, nsañu yatiyiliyi yamutiyishili kuwaha muloña wafumini mushikola. Hampinji yazatishileñawu Ouija board, akashikola amakwawu atiyili neyi andemoni adi mukachi kawu nawa atemokeli nalumbaji-mbaji. Chumanyi chamukwashili Sheila kufuukulahu kufuma mushikola swayi-swayi? Sheila wahosheli nindi, “henohu chumichi kanda chimwekani, hahitili hohu mpinji yantesha kufuma hitwadizili hawubanji wekala mukuzatisha Ouija board Hetala daWanta. Dichi, nelukili chuma chakwila. Nakeñeleña kumuzañalesha  Yehova, neyi chahosha Bayibolu haYishimu 27:11.” Dichi, Sheila welili chachiwahi hakuwanika kukupompa nikutiyilila nakanañachima.

18. Munafuukuluhu kwiladi halwenu?

¹⁸ Dichi wejima wetu tutiyilileña chikupu kufumba kwatufumbañawu mukuloñesha kwaNzambi. Twatambwilaña wunlomboli niwukwashu wutwakeñaña, kuhitila mukuwanika kukupompa, kudiza Bayibolu, ninyikanda yahoshaña haBayibolu, nikulomba, nikudikunda nawakwaKristu apama. Yehova wakeñaña nindi tukakeli mbe-e kashinshi ketu, nawa weluka chikupu nindi tukatwalekahu kwikala ashinshika. Tukweti kukooleka kwakweni kwakulemesha ijina daYehova, kukakela kashinshi, nikutiyisha muchima Yehova kuwaha.

Komana Munakwanuka?

• Indi Satana wakojejaña kukalanyi?

• Chumanyi chitwasweja kulemesha muwumi wetu?

• Indi wulunda wetu naYehova washindamena hankahi?

• Jinjilanyi jikwawu mwatukwashilañayi Yehova makonu?

[Malwihu aKuzatisha haKudiza]

[Mwevulu wudi hefu 15]

Tunateli kukwasha akwetu akakwitiya kukakela kashinshi kawu