Malwihu Kufuma Kudi Antañi

Neyi nkemba yofwila mwivumu damama yindi, komana kuduhu kuchiñeja kudi kwejima kwakusañuka?

Antu abula kujimbeshahu nkemba muniyi njila chinateli kuyikalila kwiluka chatiyañawu antu ajimbeshahu dehi. Anvwali amakwawu aneñaña chikupu neyi ajimbesha nkemba munjila yamuchidiwu. Mama yawantu wumu wajimbesheli anyana atanu henohu kanda avwaliki. Chimwahitili mpinji, wazañaleli hakulela anyana awamayala ayedi akola. Hela chochu, wanukileña anyana ejima ajimbesheliyi. Mafuku ejima wanukileña nindi neyi ankemba jindi abulili kufwila mwivumu nikusulumuka asi anashikiji dehi yaaka mukanaña. Komana akwaKristu amuchidiwu akweti hashindamena kuchiñeja kwakusañuka kulonda akekali nawanyanawu ajimbesheluwu?

Ñakwilu yapela yanilu lwihu yidi nawu, hitunelukuku. Bayibolu hiyahosha chikupu hansañu yakusañuka kwawankemba afwaña henohu achidi atufuña hela asulumukañaku. Hela chochu, Izu daNzambi dikweti nshimbi jalema jakundama kunilu lwihu nawa jinateli kutukundeja.

Tushinshikenu malwihu ayedi adifwana. Lwihu lwatachi, kwesekeja nachamonañayi Yehova, indi wumi wamuntu watachikaña mpinjinyi, hakwimita tahindi hakuvwalika? Lwamuchiyedi, indi Yehova wamonaña ñahi nkemba wabula kuvwalika, neyi muntu wadimena tahindi neyi masewuzi amukunkulwayi mwivumu damumbanda? Nshimbi jamuBayibolu jikweti ñakwilu yatiyakana kumalwihu ejima ayedi.

Nshimbi yamwinkeluwu Mosi yamwekesheli hatooka nawu wumi watachikaña bayi neyi hakuvwalikaku, ilaña watachikaña henohu muntu kanda yovwaliki. Munjilanyi? Yamwekesha nawu neyi muntu yojaha kafuña niyena akumujaha. Talenu chahosha iyi nshimbi: ‘Mwatela kuhana wumi nawumi.’ * (Kwidika 21:22, 23) Dichi nkemba wuchidi mwivumu wukweti wumi nawa himuntu. Kwiluka chikuma chakwila nawu mwana wuchidi mwivumu hiwumi wamuntu kunakwashi yihita yawakwaKristu kukaana chaaku chakufumisha ivumu nakuchimona neyi hinshidi yeneni kumesu aNzambi.

Twili netu mwana wunabuli kuvwalika wamumi, indi Yehova walemesha ñahi iwu wumi? Nshimbi yinashimunuwu hewulu yahosheli nawu atela kujaha mukulumpi wunakojeji kufwa kwamwana wunabuli kuvwalika. Chakubula nikujina, wumi wamwana wunabuli kuvwalika walema chikupu kumesu aNzambi. Kubombelahu, Nyikanda yayivulu yamwekesha nawu Yehova wamonaña mwana wunabuli kuvwalika neyi muntu wadimena. Chakutalilahu, Mwanta Davidi amoneneni kuhosha hadi Yehova nindi: “Wannuñili chachiwahi mwivumu damama yami. . . . Chinadiñi nichidi wamwisu, mesu eyi anmweni, asonekeli mumukanda weyi yidi yami yejima yatuñilañawu.”—Masamu 139:13-16; Yoba 31:14, 15.

Yehova wamonaña cheñi nindi mwana wunabuli kuvwalika wukweti yililu yashiyashana nawa watela kukula kumbidi. Henohu Rebeka iñoda Isaka wudi nevumu dawampamba, Yehova wahosheli wuprofwetu hadi anyana ayedi awamayala adiña nakulwa mwivumu dindi, chinakumwekesha nawu Nzambi wamweni yililu yawu yadi kakuma chikupu antu amavulu kumbidi.—Kutachika 25:22, 23; Aroma 9:10-13.

Nsañu yaYowanu Mpapatishu niyena hinsañu yayiwahi chikupu. Nsañu Yayiwahi yahosha nawu: ‘Elizabeta chanatiyiyi kwimusha kwamwimushiluwu kudi Mariya, mwana wadiñi mwivumu dindi hakutuntoka. Elizabeta hakwinzala spiritu yajila.’ (Luka 1:41) Hakulumbulula iyi nsañu, ndotolu Luka wazatishili izu dachiGriki datena kafuña chili nkemba neyi navwaliki. Wazatishili izu dodimu hakutena nkemba Yesu wakamikiluwu mwadiishilañawu ayimuna.—Luka 2:12, 16; 18:15.

Kushinshika hayikuma yejimiyi nijinsona, komana Bayibolu yashimuna chaambu chekala  hakachi kankemba wuchidi mwivumu nanona wunavwaliki? Hiyashimuna chaambuku. Nawa yumiyi yinesekani nayuma yawanawu asayantisiti makonu. Chakutalilahu, akwakusandujola nsañu adiza nawu nkemba wuchidi mwivumu nateli kwiluka nikuzatahu chuma hayuma yinakumwekana hanzi. Dichi hichatela kutuhayamishaku hakumona neyi mama yawantu wudi nevumu wekalaña nawulunda wawuwahi namwana wunakukula mwivumu dindi.

Ankemba avwalikaña hakuleha kwampinji yashiyashana yakulañawu mwivumu. Shinshikenu hanichi chakutalilahu: Mama yawantu wumu navwali kabishi wamumi, chimunahiti mafuku antesha nkemba yafwa. Mama yawantu mukwawu nkemba windi nakuli chikupu mwivumu, ilaña mwana yafwa henohu kanda yovwaliki. Komana mama yawantu wakusambila wukweti kuchiñeja kwakusañuka muloña wakwila mwanindi wavwalika kabishi, ilaña mama yawantu wamuchiyedi hakweti kuchiñeja kwamuchidiwuku?

Kuhosha hohu mukwihihisha, Bayibolu yatañishaña hatooka nawu wumi watachikaña hakwimita nawa nawu Yehova wamonaña mwana wunabuli kuvwalika neyi muntu wadimena nawa walema. Hamuloña waniyi nsañu yalala yamuBayibolu, amakwawu anateli kutoñojoka nawu chinambuki naniyi yikuma yalala nakuhosha nawu kwosi kuchiñeja kwakusañuka kwamwana wunafwi henohu kanda yovwalikuku. Eña, anateli kutoñojoka nawu nsañu yamuchidiwu yinateli kuleñela kujinoka hachitwamonaña nsañu yakufumisha ivumu kwesekeja naNsona, yashindamena chikupu haniyi nsañu yalala.

Kunyima iyi magazini yehwili malwihu amawahi anateli kuleñela antu kujinoka neyi chaswayi anyana afwaña henohu kanda avwaliki anateli kusañuka. Chakutalilahu, komana Nzambi watela kusha kafuña kanakuli chantesha mwivumu damumbanda muParadisa? Hela chochu, kudiza chikupu nikulomba nakutoñojoka chikupu kunaleteshi Izaza Dalombolaña kukunkulula nawu yitoñojoka yamuchidiwu yalema wanyi kutalisha hakuchiñeja kwakusañuka. Yesu wahosheli nindi: “Yuma yejima yinatwesheki kudi Nzambi.” (Maku 10:27) Chuma chamuzatikilili Yesu yomweni chamwekesha walala wanawa mazu; wumi windi awutuntulwili kufuma mwiwulu nakuwutwala mwivumu damujiki wuchidi kansi, chalala chumichi chinateli kumwekana neyi chakala kumesu awantu.

Komana yuma yejimiyi yinakulumbulula nawu Bayibolu yatañishaña nawu anyana ejima afwaña henohu kanda avwaliki akayisañula? Twatela kukonkomwena netu Bayibolu hiyakula chikupu ilu lwihuku, dichi kwosi hashindamena nsañu yatela antu kukonkomwenawu nawu akayisañulaku. Iyi nsañu yinateli kuletesha malwihu ashiyashana akakumaña. Chalala, chikusweja kuwaha neyi tukutondolwela kuboka. Chuma chitweluka dichi iche: Nsañu yidi mumakasa aYehova Nzambi, wenzala nakukeña niluwi. (Masamu 86:15) Chakubula nikujinoka, wafwilaña chikupu kufumishahu kufwa kuhitila mukusañuka. (Yoba 14:14, 15) Twatela kukuhwelela netu mpinji yejima wakoñaña chuma chaloña. Wukooka yilonda yawantu amavulu yatukatishawu muwumi mukanu kaayi katama hampinji yakamulombolayi Mwanindi ‘kukisañana nyidimu yaDiyabolu.’—1 Yowanu 3:8.

[Tumazu twaheshina]

[Mwevulu wudi hefu 23]

Yehova wakafumishahu yuma yejima yatama yatukabishaña