Yoba Walemesheli Ijina daYehova

‘Ijina daYehova adikiswili nkisu.’—YOBA 1:21.

1. Hinyi wasonekeli mukanda waYoba, nawa mpinjinyi?

 MOSI wadiña nayaaka kwakwihi na 40 hampinji yatemukiliyi muEjipitu nakuya nakushakama kuMidiyani kuchiina kumujaha kudi Fwaro. (Yililu 7:23) Hampanji yashakamineñayi mwituña denidi, watela watiyili kweseka kwamweniyi Yoba, washakamineña mwituña daUzi dadiñi kwakwihi. Chimwahitili yaaka, hampanji yadiñayi Mosi nimunza waIsarela kwakwihi netuña daUzi hakumana kwalwendu lwawu muchinkalampata, Mosi watela welukili chihandilu chaYoba chamuyaaka yindi yakukumishaku. Kwesekeja nachisemwa chawaYudeya, Mosi wasonekeli mukanda waYoba chelili Yoba nafwi dehi.

2. Munjilanyi mukanda waYoba muwakoleshelaña chikuhwelelu chawambuña aYehova amakonu?

² Mukanda waYoba wakoleshaña chikuhwelelu chawambuña aNzambi amakonu. Munjilanyi? Nsañu yekalamu yatukwashañaku kwiluka yuma yalema nankashi yamwekeni mwiwulu nichiyalumbuluka, nawa yashimunaña nsañu yalema nankashi yawanta waNzambi wakuleña kwejima. Nsañu yaYoba cheñi yatuleteshaña kwiluka chikupu yuma yakeñekaña hakwikala akashinshi nawa yatukwashaña kwiluka muloña wetejelañayi Yehova ambuñindi kukabakana mpinji jikwawu. Kubombelahu, mukanda waYoba washimuna nawu Satana Diyabolu himukwankunyi naYehova chikupu nawa chilumbu chawantu. Mukanda weniwu washimuna cheñi nawu antu abula kuwanina neyi Yoba anateli kwikala ashinshika kudi Yehova hela anakuyeseka chikupu. Tushinshikenu nsañu yikwawu yashimunawu mumukanda waYoba.

Yoba Amwesekeli Kudi Satana

3. Chumanyi chitweluka hadi Yoba, nawa muloñadi Satana chamulukukililiyi?

³ Yoba wadiña waheta nawa muntu walema, nkakulula wadiñi nayililu yayiwahi. Chakadi nikujina, wadiña mukwakuleja maana walemesheluwu wakwashileña atuzweñi. Sweje-e dinu, Yoba wadiña wamwakama Nzambi. Yoba amushimuna nawu, ‘iyala walala woloka, muntu waakamini Nzambi, wambukili kuyuma yatama.’ Satana Diyabolu wamulukukili Yoba muloña wadiña wamwakama Nzambi bayi neyi wamulukukililili hamuloña wakuheta hela kulemaku.—Yoba1:1; 29:7-16; 31:1.

4. Indi kashinshi hichumanyi?

⁴ Nsañu yakutachikilahu yekala mumukanda waYoba yashimuna hakuhumañana kwadiñi mwiwulu hapompeluwu añelu nakwimana kumesu aYehova. Satana niyena wadiñi nawu, nawa wamwinkeli Yoba muloña. (Tañenu Yoba 1:6-11.) Hela chakwila Satana wateneni maheta aYoba, ilaña wemeneni hakufumpa kashinshi kaYoba. Izu dakwila nawu “kashinshi” datalisha mukwikala woloka, walala nawa waloña. Kwesekeja nachiyadizatishawu muBayibolu, kashinshi kamuntu kamwekeshaña chadihanayi muntu kudi Yehova namuchima wejima.

5. Indi Satana wahosheli nindidi kutalisha hadi Yoba?

⁵ Satana wahosheli nindi Yoba wadifukwileña kudi Nzambi hamuloña wayuma yamwinkeliyi. Satana watwambili nindi Yoba nateli kwikala wakashinshi kudi Yehova chiña neyi Nzambi yatwalekahu kumwinka maheta nikumukiña. Hakwila nawu Yehova yamukonkololi Satana, wamwitejeli Satana kumulukuka ona muntu wakashinshi. Chafuminumu, mwifuku dimu hohu, Yoba amwiyilili yimuna yindi hela kuyijaha, añamba jindi ayijahili, nawa anyanindi ikumi afwili. (Yoba 1:13-19) Komana Yoba wafumpili kashinshi kindi chamulukukiluwu kudi Satana? Nsañu yonenawu yashimuna chuma cheliliyi Yoba kutalisha hamakabi amweniyi nawu:  “Yehova diyi waheni, Yehova diyi natambuli. Ijina daYehova adikiswili nkisu.”—Yoba 1:21.

6. (a) Chumanyi chamwekeni hakuhumañana kukwawu kwadiñi mwiwulu? (b) Indi Satana watoñojokeleña hadanyi, hampinji yajinokeliyi kashinshi kaYoba kudi Yehova?

⁶ Chimwahitili mpinji, mwiwulu mwadiñi cheñi kuhumañana kukwawu. Satana cheñi wamwinkeli Yoba muloña, nindi: “Ikowa nekowa, muntu wukuhana yuma yakwetiyi yejima nawumi windi. Ololaku ntahi chikasa cheyi katataka wukwati hamujimba windi, wutali neyi wukubula kukuhosha chatama kumesu eyi.” Ilukenu nenu Satana hakuhana iwu muloña wabombelelumu niantu amakwawu. Kuhitila mukuhosha nindi, ‘Muntu wukuhana yuma yakwetiyi yejima nawumi windi,’ Diyabolu hajinokeli hohu kashinshi kaYobaku, ilaña nikashinshi ‘kamuntu’ wejima wadifukulaña kudi Yehova. Kuhiñahu, Nzambi wamwitejeli Satana kumukatisha Yoba namusoñu wakata nankashi. (Yoba 2:1-8) Hela chochu, aha hidihu hakuminini kweseka kwaYobaku.

Yumanyi Yitwatela Kudizila kuYililu yaYoba?

7. Munjilanyi ñoda Yoba niantu enjili nakumuhempula mwamuwejeleluwu Yoba makabi?

⁷ Hatachikiliyi Yoba kukabakana ñodindi niyena watiyili kutama neyi chatiyiliyi yena. Kufwisha anyana nikujimbesha maheta achisaka kwatela kwamuneñesheli nankashi. Watela watiyili kutama nankashi hakumona nfumwindi nakuyanda namusoñu wakata chikupu. Wamwilili Yoba nindi: “Eyi nihanu saña wakakelela kashinshi keyi, tahindi? Muhoshi Nzambi chatama, wufwi kweyi.” Kuhiñahu, kwenjili amayala asatu, Elifwazi, Bilidadi, Zofwari, amwekeneña neyi akumukundeja Yoba. Ilaña aka-a, ahosheleña mazu akutwamba nawa adiñi ‘ankundeji akukabisha.’ Chakutalilahu, Bilidadi wahosheli nindi anyana kaYoba elili chuma chatama chaletesheli yuma yatama yiyimwekeni. Elifwazi wahosheli nindi Yoba wakabakeneña muloña amubabesheli hayuma yatama yakoñeliyi kunyima. Wajinokeli cheñi nindi antu ashinshika ekala amukunkulwayi kumesu aNzambi. (Yoba 2:9,11; 4:8; 8:4; 16:2; 22:2, 3) Mukweseka kwasweja kwamuchidiwu, Yoba wakakeleli kashinshi kindi. Chalala, waluwañesheli ‘hakudiyiñisha yomweni chatela yayiñishi Nzambi.’ (Yoba 32:2) Hela chochu, washinshikili mumakabi ejimawa.

8. Chakutalilahwinyi chachiwahi chemikilayi Elihu akwakufumba amakonu?

⁸ Kuhiñahu, twatañaña hadi Elihu, wenjili cheñi nakumuhempula Yoba. Elihu wasambilili kutiyilila kumazu ahosheleñayi Yoba nialundanindi asatu. Hela chakwila wadiña kansi hadi ana antu awana, Elihu wamwekesheli maana chikupu. Wahosheli naYoba munjila yakalemesha. Elihu wamuhamekeli Yoba hakwikala woloka. Ilaña, wahosheli cheñi nindi Yoba waswejeli kudimona neyi waloña. Kuhiñahu, Elihu wamukonkomweneni Yoba nindi kumukalakela Nzambi mpinji yejima nakashinshi hichuma chalema. (Tañenu Yoba 36:1, 11.) Wemika chakutalilahu chachiwahi nankashi kudi antu akeñaña kufumba akwawu makonu. Elihu wadiwunjikili, watiyililili nakanañachima, wahamekeli hanateli, nawa waheni kufumba kwakukolesha.—Yoba 32:6; 33:32.

9. Indi Yehova wamukwashili ñahi Yoba?

⁹ Nkumininaku, Yoba wamweni chuma chakukomwesha hampinji yahosheliyi Yehova nayena. Nsona yahosha nawu: ‘Yehova wamwakwili Yoba muchinjimbi.’ Kuzatisha malwihu amavulu, Yehova wamufumbili Yoba munjila yayiwahi kulonda yahimpi yitoñojoka yindi. Yoba wetejeli kufumba kweniku, nakuhosha nindi: “Ami muntu wamukunkulwayi . . . nabalumuki dehi mumuchima mulunkuñu namawuti.” Hanyima yakwila Yehova nahoshi dehi naYoba, wazuwilili alunda jaYoba asatu, muloña ‘hiyahosheli mwalalaku.’ Yoba wayilombeleluku. Kuhiñahu, ‘Chayilombeleliyi amabwambu jindi, Yehova hakubalumuna wunkoli waYoba. Yehova hakumuhetesha Yoba, hakumulunjikilamu niyikwawu yashikila muyakusambila.’—Yoba 38:1; 40:4; 42:6-10.

Indi Yehova Twamukeña Ñahi?

10. Muloñadi Yehova chabulililiyi kudiwula hela kumujaha Satana?

¹⁰ Yehova diyi Nleñi nawa Mwanta wayileñaleña Yejima. Muloñadi chabulililiyi kudiwula muloña waheniyi Diyabolu? Nzambi welukili  nindi kumudiwula hela kumujaha Satana hikunateli kumanisha muloña waleteliyuku. Diyabolu wahosheli nindi, Yoba muntu wakashinshi, hanateli kutwalekahu nakashinshuku, neyi chakwila amuhukula mahetindi. Yoba watwalekeluhu kukakela kashinshi kindi mumpinji yakweseka. Kulondelahu, Satana wahosheli nindi muntu wejima nateli kumufutalela Nzambi neyi chakwila yokabakana. Yoba wakabakeni, ilaña hafumpili kashinshi kinduku. Dichi, Satana amukonkolweli nawu hintwambi kudi Yoba muntu wakashinshi hela chakwila hadiñi wawaninaku. Indi akwakudifukula aNzambi amakwawu atela kwiladi?

11. Indi Yesu wakwili ñahi muloña waheniyi Satana?

¹¹ Kafwampi, kambuña aNzambi wejima watela kukakela kashinshi kindi hichikweti muloña nakukala kwejima kukumuletelayi Satanaku, wamwekeshaña halwindi nindi nyiloña yahanañayi iwu chilumbu wabula luwi yakutwamba. Yesu wenjili hamaseki nawa wakwili muloña waheniyi Satana. Yesu wadiña muntu wawanina, neyi chadiñayi Tata yetu Adama. Yesu wakakeleli kashinshi kindi ndo-o nikukufwa, chakadi kujina wamwekesheli nindi Satana hintwambi, nimuloña waheniyi wakutwamba.—Chimwekeshu 12:10.

12. Kukoolekanyi nimudimu wukwetiyi kambuña aYehova wejima?

¹² Hela chochu, Satana watwalekahu kweseka akwakudifukula aYehova. Dichi wejima wetu tukweti kukooleka nimudimu wakumwekesha kashinshi ketu netu twamukalakelaña Yehova muloña wakwila twamukeña bayi hamuloña wayuma yatwinkayuku. Indi iwu mudimu twawumonaña ñahi? Twawumonaña netu hikukooleka kwabadika kwakwikala akashinshi kudi Yehova. Kwiluka netu Yehova watwinkaña ñovu yakuumika kwatukundejaña, neyi chichadiña kudi Yoba, Hetejaña kutweseka chakubadika muñovu jetuku.—1 Akorinda 10:13.

Satana hiChilumbu waWinyi Nawa Mukwakusekesha

13. Mukanda waYoba washimuna nsañwinyi kutalisha hadi Satana?

¹³ Nyikanda yachiHeberu yashimunaña nsañu yatalisha hamudimu waSatana wasawuka wakuzuñesha Yehova nikujimbesha antu. MuNyikanda yawakwaKristu yachiGriki, twatañañamu nsañu yayivulu yahosha hakudikaña kwaSatana kwadikañiliyi naYehova, nawa mumukanda waChimwekeshu, twatañañamu nsañu yahosha hakuyiñisha chiyulu chaYehova nikujilumuka kwaSatana. Mukanda waYoba watulejaña nsañu yikwawu kutalisha hakudikaña kwaSatana. Hampinji yawanikiliyi Satana kukuhumañana kwadiña mwiwulu, hadiñi namuchima wakumuhameka Yehovaku. Diyabolu wadiña nandulu niyililu yatama. Hanyima yakumwinka Yoba muloña nikumwiteja nawu yomweseki, ‘Satana wafumini kumesu aYehova.’—Yoba 1:12; 2:7.

14. Indi Satana wamwekesheli yililwinyi kutalisha hadi Yoba?

¹⁴ Dichi mukanda waYoba wamulumbulula Satana neyi chilumbu chawantu wabula luwi. Kutalisha hakuhumañana kwadiña mwiwulu kwatenawu haYoba 1:6 nikwashimunawu haYoba 2:1, hahitili mpinji yabula kushimunawu, yamwesekeluwu Yoba chatama. Hamuloña wakwila Yoba washinshikili chaletesheli Yehova kumwakula Satana nindi: “Nihanu saña akakelelayi kashinshi kindi, kutoña eyi wunanshinjili nimwili chatama, nimukisañani tuhu chakadi ninsañu.” Ilaña Satana hetejeli nindi muloña wamwinkeliyi Yoba wadiña wakutwambaku. Kwambukaku, wakeñeli nindi Yoba amweseki cheñi chasweja. Dichi, Diyabolu wamwesekeli Yoba hampinji yadiñayi namaheta nihabuliliyi maheta. Chalala, Satana hatiyilaña luwi atuzweñi hela antu adimukukalaku.  Wahela antu ekala nakashinshi. (Yoba 2:3-5) Hela chochu, Yoba chakakeleliyi kashinshi kindi wamwekesheli nindi Satana hintwambi.

15. Indi akwakusekesha amakonu adifwana ñahi naSatana?

¹⁵ Satana diyi chileñaleña chatachi kusekesha Nzambi. Akwakusekesha Nzambi amakonu amwekeshaña yililu yadifwana nayaDiyabolu. Yililu yawu yakasekesha yaluwañesha dehi yitoñojoka yawu chakwila atoñojokaña hohu yuma yaluwa hadi antu amuchipompelu, aeluda akwaKristu hela Izaza Dalombolaña. Akwakusekesha amakwawu akanaña kuzatisha ijina daNzambi, daYehova. Hiyakeñaña kudiza hadi Yehova hela kumukalakelaku. Kufwana tata yawu Satana, akwakusekesha wenawa afwilaña kufumpa kashinshi kawantu. (Yowanu 8:44) Dimuloña walekelawu chikupu ambuña aYehova kubula kudikunda nawu.—2 Yowanu 10, 11.

Yoba Walemesheli Ijina daYehova

16. Indi Yoba wamwekesheli yililwinyi kutalisha hadi Yehova?

¹⁶ Yoba wazatishili ijina daYehova nikudilemesha. Hela chakwila watiyili kutama nansañu yakufwa kwawanyanindi, Yoba hamusupishili Nzambuku. Chili Yoba waluwañesheli hakuhosha nindi Nzambi diyi wakojejeli kukala kwindi, walemesheli ijina daYehova. Yoba wahosheli nindi: “Tiya, kumutiya Mwanta woma wowu maana, kwambuka kuyatama koku kashinshi.”—Yoba 28:28.

17. Yumanyi yamukwashili Yoba kukakela kashinshi kindi?

¹⁷ Yumanyi yamukwashili Yoba kukakela kashinshi kindi? Chakadi nikujina, wadiña nawulunda wakola naYehova henohu yihuñu kanda yimumwekeni. Hela chakwila hitukweti wunsahu wakwila nawu Yoba welukili nindi Satana wamwinkeli Yehova muloñaku, wafwilili kukakela kashinshi kindi. Wahosheli nindi: “Hinamba kafumisha kashinshi kamuku, nichinamba kafwa.” (Yoba 27:5) Indi Yoba wekalili ñahi nawulunda weniwu? Chakadi nikujinoka, walemesheli nsañu yatiyiliyi kutalisha hadi Nzambi chazatiliyi nawantaña jindi Abarahama, Isaka, niYakoba. Cheñi kuhitila mukutala yileñaleña, chamukwashili Yoba kwiluka yililu yaYehova yayivulu.—Tañenu Yoba 12:7-9, 13, 16.

18. (a) Indi Yoba wamwekesheli ñahi kudihana kwindi kudi Yehova? (b) Munjilanyi mutwembujolelaña chakutalilahu chachiwahi chaYoba?

¹⁸ Yuma yadiziliyi Yoba yamusañumwini kumuhameka Yehova. Yoba wahanineña nyilambu mpinji yejima muloña watoñojokeli nindi wamba kela chisaka chindi chikukoña chuma chikumutiyisha Nzambi kutama, hela ‘kumuhosha Nzambi chatama munyichima yawu.’ (Yoba 1:5) Nihampinji yamwesekeluwu Yoba chikupu, wahosheleña hohu mazu amawahi hadi Yehova. (Yoba 10:12) Wemika chakutalilahu chachiwahi nankashi. Anetu nawa twatela kudiza chalala hadi Yehova ninkeñelu yindi mpinji yejima. Tukweti yuma yayiwahi yakoleshaña wulunda wetu naYehova chidi neyi kudiza, kuwanika kupompa,  kulomba, nikushimwina nsañu yayiwahi. Kubombelahu, twakalakalaña hakumina ñovu jetu kulonda tutiyakeshi ijina daYehova. Chochamuzañalesheluwu Yehova kudi Yoba nakashinshi kindi, nikashinshi kawambuña aNzambi amakonu katiyishaña muchima waYehova kuwaha. Iyi diyi nsañu yitwakahanjekahu muchibaba chinalondeluhu.

Komana Munakwanuka?

• Muloñadi Yoba chamulukukililuwu kudi Satana Diyabolu?

• Kwesekanyi kwomikiliyi Yoba, nawa chumanyi cheliliyi?

• Yumanyi yikutukwasha kwikala akashinshi neyi chadiñiyi Yoba?

• Yumanyi yitwadizaña hadi Satana mumukanda waYoba?

[Malwihu aKuzatisha haKudiza]

[Mwevulu wudi hefu 12]

Yumanyi yinateli kuletesha kweseka kashinshi kenu?