Añelu ‘hiyaSpiritu Akalakelaña Antu’

‘Wejima wawu hiyaspiritu anatemeshuwu kukalakela hansañu yawantu akaswana wamwinu.’—AHEBERU 1:14.

1. Mukanda waMatewu 18:10 niAheberu 1:14 watukundejaña ñahi?

 YESU KRISTU wasoñamishili muntu wudi wejima wunateli kudimbwisha atumbanji twindi nindi: “Babalenu mubuli kudiwula hela mwana wanyanya wumu wudi neyi iwu; muloña nukuyileja nami akweti añelu jawu atalaña mafuku ejima kumesu aTata yami wekala mwiwulu.” (Matewu 18:10) Hakutena añelu aloña, kapostolu Pawulu wasonekeli nindi: “Wejima wawu hiyaspiritu anatemeshuwu kukalakela hansañu yawantu akaswana wamwinu.” (Aheberu 1:14) Awa himazu akukolesha hakwiluka netu Nzambi wazatishaña iyi yileñaleña yamwiwulu hakukwasha antu. Indi Bayibolu yatulejañadi kutalisha hadi añelu? Atukwashaña ñahi? Yumanyi yitunateli kudizila kudi añelu?

2, 3. Indi yileñaleña yakuspiritu yamwiwulu yikweti nyidimwinyi?

² Mwiwulu mwekala yihita yawañelu akashinshi. Wejima wawu ‘asweja ñovu, elaña mwahoshañayi.’ (Masamu 103:20; tañenu Chimwekeshu 5:11.) Awa anyana kaNzambi awamayala akuspiritu akweti yuma yakeñawu yashiyashana, niyililu neyi yaNzambi niwuswa wakudifuukwila. Adiloñesha chiwahi nawa akweti yifulu yashiyashana mukuloñesha kwaNzambi, Mikeli diyi mukulumpi wawañelu (Ijina daYesu damwiwulu). (Danyeli 10:13; Yuda 9) Iwu “wedi wayuma yaleñeluwu yejima” diyi “Izu,” hela Wamuhoshelañaku Nzambi nawa amuzatishili kudi Yehova hakuleña yuma yejima.—Akolose 1:15-17; Yowanu 1:1-3.

³ Kufuma hadi mukulumpi wawañelu hahiña aserafwi, ashimunaña kujila kwaYehova nikukwasha antu jindi kuhemba nshimbi jindi. Kwekala cheñi akerubi, ahembaña itanda daNzambi nikuhakwilaku wukeleñi windi. (Kutachika 3:24; Isaya 6:1-3, 6, 7) Añelu amakwawu, hela antemesha, akweti nyidimu yashiyashana hakukalakala nkeñelu yaNzambi.—Aheberu 12:22, 23.

4. (a) Chumanyi chiyeliluwu añelu hampinji yaaliluwu chikuku cheseki? (b) Chumanyi chadi kumwekana neyi chakwila antu azatishili chachiwahi wuswa wawu wakudifuukwila?

⁴ Añelu ejima azañaleli hampinji ‘yaaliluwu  chikuku cheseki’ nawa atiyili kuwaha hakukalakala nyidimu yawu chelili iseki dikali mwakushakama antu. (Yoba 38:4, 6) Yehova waleñeli muntu “wakuminamu chanti hadi añelu” ilaña neyi ‘chekalayi’ Yena, chumichi chaleñela antu kumwekesha yililu neyi yaNzambi. (Aheberu 2:7; Kutachika 1:26) Neyi chakwila Adama niEvu azatishili chachiwahi wuswa wawu wakudifuukwila, mutenowu anyanawu adi kutwalekahu kuhanda muparadisa neyi chisaka chaYehova chamukaayi kejima.

5, 6. Kudikañanyi kwamwekeni mwiwulu, nawa Nzambi welili hodi?

⁵ Chalala, añelu akashinshi atela ahayamini hakumona ntachikilu yakudikaña muchisaka chaNzambi chamwiwulu. Kañelu wumu hatiyileña kuwaha kumuhameka Yehovaku, ilaña wakeñeleña nindi adifukuleña kudi yena. Wadilishili yomweni kwikala Satana (chalumbuluka nawu “Mukwakudimbulula”) kuhitila mukujinoka ñovu jaYehova jakuyula nakweseka kwimika chiyulu chakuzuñesha Nzambi. Chatwambiliyi Satana, mukubabala waletesheli antu akusambila ayedi kudibomba nindi mukudikaña naNleñi yawu wukweti kukeña.—Kutachika 3:4, 5; Yowanu 8:44.

⁶ Yehova wanyakeli kumusompesha Satana hampinji yahosheliyi muwuprofwetu wakusambila wamuBayibolu nindi: ‘Nukusha nkunyi mukachi keyeyi namumbanda, nimukachi kambutu yeyi nambutu yindi; akakuchika kumutu nineyi wakumuchika kukatutu.’ (Kutachika 3:15) Nkunyi yakatwalekahu hakachi kaSatana nihakachi ‘kamumbanda’ waNzambi. Eña, Yehova wamweni kuloñesha kwamwiwulu kwawañelu akashinshi neyi mumbanda wakeñewa wekala mumpanda yimu nindi neyi Nfumwindi. Iwu wuprofwetu waheni chuma hashindamena kuchiñeja, hela chakwila nsañu yayivulu yatwalekeluhu kwikala ‘nsañu yakujiinda yajila’ yakamwekeshañawu chovu-chovu. Nzambi watoñweli nindi muntu wumu wamukuloñesha kwindi kwamwiwulu wamba kachika akwakudikaña ejima nawa nindi kuhitila mudi yena “yuma yamumawulu niyahamaseki yejima” yakahwila hamu.—Aefwesesa 1:8-10.

7. Chumanyi cheliluwu añelu amakwawu mumafuku aNowa, nawa Yehova wayililidi?

⁷ Mumafuku aNowa, añelu amavulu ashili mwaawu “mwashakaminañawu” nakuvwala nyijimba yawuntu kulonda kufwila yuma yalwisu yachiseki hamaseki. (Yuda 6; Kutachika 6:1-4) Yehova wayumbilili ana akwakudikaña mumwidima wiyila bwi-i, dichi adibombeli naSatana nakwikala ‘aspiritu atama añovu’ nawa ayilumbu afwana awambuña aNzambi.—Aefwesesa 6:11-13; 2 Petulu 2:4.

Indi Añelu Atukwashaña Ñahi?

8, 9. Indi Yehova wazatishaña ñahi añelu kulonda kukwasha antu?

⁸ Hakachi kawantu akalakeleluwu kudi añelu hiAbarahama, Yakoba, Mosi, Yoshuwa, Isaya, Danyeli, Yesu, Petulu, Yowanu niPawulu. Añelu aloña asompesheli wunsompeshi waNzambi nikushimuna wuprofwetu ninshimbi, kubombelahu niNshimbi yamwinkeluwu Mosi. (2 Anyanta 19:35; Danyeli 10:5, 11, 14; Yililu 7:53; Chimwekeshu 1:1) Chineli tukweti Izu daNzambi dejima, añelu hiyanateli kushimuna nsañu yakufuma kudi Nzambuku. (2 Timotewu 3:16, 17) Hela chochu, añelu adikitaña chikupu hakwila nkeñelu yaNzambi nikukwasha ambuñindi chakadi kuyimona kudi antu.

⁹ Bayibolu yatulejaña chikupu nawu: “Kañelu kaYehova wayituñila amwakama musumba kwi-ndo, wayipulwishaña.” (Masamu 34:7; 91:11) Hamuloña wakwila Satana wajinokeli neyi chakwila antu anateli kukakela kashinshi kawu kudi Nzambi neyi ayeseka, Yehova wamwitejeli Satana kutweseka munjila jashiyashana. (Luka 21:16-19) Hela chochu, neyi tuumika kweseka hampinji yayilehi Nzambi welukaña nindi tunateli kutwalekahu kwikala akashinshi kudi yena. (Tañenu 1 Akorinda 10:13.) Añelu ekala asoñama kulonda kutukwasha kwesekeja nankeñelu yaNzambi. Apulwishili Shadaraki, Meshaki, Abedinego, Danyeli niPetulu ilaña hiyakañesheli ayilumbu kujaha  Setefwanu niYakobaku. (Danyeli 3:17, 18, 28; 6:22; Yililu 7:59, 60; 12:1-3, 7, 11) Yuma ninsañu yadiña yaambuka. Chochimu, amana kwetu amakwawu ayijahili muyilombu yakuyandishilamu yawaNazi, ilaña Yehova wapulwishili amavulu.

10. Kubombela hawukwashu wawañelu, wukwashinyi wutunateli kutambwila?

¹⁰ Nyikanda yajila hiyatañishaña nawu muntu wudi wejima hanu hamaseki wukweti kañelu kamukiñañaku. Twalombaña nakukuhwelela netu “neyi tukulomba chuma chamwaya muchima windi, [Nzambi] wukututiya.” (1 Yowanu 5:14) Kafwampi, Yehova nateli kutemesha kañelu kulonda katukwashi, ilaña wukwashu wunateli kwinjila munjila jashiyashana. Akwetu akwakwitiya anateli kuyisañumuna kulonda kutukwasha nikutukundeja. Nzambi nateli kutwinka maana niñovu yakuumika nachu “mwiña mumujimba” watukabishaña neyi kwiji anatweti kudi ‘kañelu kaSatana.’—2 Akorinda 12:7-10; 1 Atesalonika 5:14.

Mwimbujolenu Yesu

11. Indi añelu ayizatishili ñahi hakumukwasha Yesu, nawa chumanyi chashikijiliyi hakwikala wakashinshi kudi Nzambi?

¹¹ Shinshikenu Yehova chazatishiliyi añelu kutalisha hadi Yesu. Ashimwini kuvwalika nikusañuka kwaYesu nawa amukwashili hampinji yadiñayi hanu hamaseki. Añelu adi kumukiña kulonda abuli kumukwata nikumujaha chatama. Ilaña, amutemesheleli kañelu kulonda kumukolesha. (Matewu 28:5, 6; Luka 2:8-11; 22:43) Kwesekeja nankeñelu yaYehova, Yesu wafwili neyi mulambu nawa wamwekesheli hatooka to-o nawu muntu wawanina nateli kushinshika kudi Nzambi hichikweti muloña nakweseka kwasweja kuyanateli kumwesekawuku. Dichi, Yehova wamusañwili Yesu kuwumi wamwiwulu wakafwaña, nakumwinka ‘ñovu jejima’ nawa añelu amwovwahilaña. (Matewu 28:18; Yililu 2:32; 1 Petulu 3:22) Dichi Yesu wadimwekesheli kwikala ‘mbutu’ yabadika kulema ‘yamumbanda’ waNzambi.—Kutachika 3:15; Aŋalija 3:16.

12. Tunateli kwimbujola ñahi chakutalilahu chaYesu chachiwahi?

¹² Yesu welukili nindi chadiña chaluwa kumweseka Yehova kuhitila mukukuhwelela kumwaka kudi añelu neyi chakwila yasha wumi windi hakatoña. (Tañenu Matewu 4:5-7.) Dichi, tumwimbujolenu Yesu kuhitila mukwikala ‘awundisha mumesu,’ bayi kushaña wumi wetu hakatoñaku, ilaña tuumikeña makabisha nachikuhwelelu.—Titusa 2:12.

Yuma Yitunateli Kudizila Kudi Añelu aKashinshi

13. Chumanyi chitunateli kudizila kudi añelu aloña atenawu ha 2 Petulu 2:9-11?

¹³ Hakutanyisha antu ‘ahoshaña chatama’ kutalisha hadi ambuña aYehova awayishewa, kapostolu Petulu wateneni chakutalilahu chachiwahi chawañelu aloña. Hela chakwila akweti ñovu jasweja, añelu adizozaña nakutondolwela kusompesha nikuhosha chatama ‘hamuloña wakumulemesha Yehova.’ (Tañenu 2 Petulu 2:9-11.) Anetu nawa tutondolweleña kuhosha yuma yabula kutelela, nakulemesha  antwamina muchipompelu, nikushiya yuma yejima mumakasa aYehova, Nsompeshi Wabadika.—Aroma 12:18, 19; Aheberu 13:17.

14. Chumanyi chitunateli kudizila kudi añelu hakwikala adizoza?

¹⁴ Añelu aYehova atwimikilaña chakutalilahu chachiwahi chakwikala adizoza. Añelu amakwawu akaanini kushimuna majina awu kudi antu. (Kutachika 32:29; Ansompeshi 13:17, 18) Hela chakwila mwiwulu mwekala yihita yayileñaleña yakuspiritu, Bayibolu yashimuna hohu ijina daMikeli niGabireli. Chumichi chinateli kutukwasha kubula kusweja kuyilemesha añelu. (Luka 1:26; Chimwekeshu 12:7) Chelili kapostolu Yowanu yadinati hamaseki nakudifukula kudi kañelu, amubabesheli nawu: ‘Nehi, lekaku. Ami nimukwenu nduñu neyi, ninduñu kwami neyi eyi, hamu nawana kweyi.’ (Chimwekeshu 22:8, 9) Twatela kulomba nikudifukula kudi Nzambi bweñi.—Tañenu Matewu 4:8-10.

15. Indi añelu atwimikila ñahi chakutalilahu chakudiwunjika?

¹⁵ Añelu emika cheñi chakutalilahu chakudiwunjika. Hela chakwila afwilaña kwiluka chikupu nsañu yaNzambi yajila yakujinda, hiyeluka nsañu yejimaku. Bayibolu yahosha nawu: “Nsañu iyi añelu akeñaña nawu abandami atalumu.” (1 Petulu 1:12) Hanu dinu, chumanyi chiyelañawu? Ahembelelaña mukudiwunjika sampu mpinji yatoñolayi Nzambi ‘kumwekesha maana indi eñi naeñi, kuhitila muchipompelu.’—Aefwesesa 3:10, 11.

16. Indi yililu yetu yinateli kuyitiyishadi añelu?

¹⁶ AkwaKristu anakumona kweseka ekala ‘akwakutalilahu kudi añelu.’ (1 Akorinda 4:9) Añelu atiyaña kuwaha kwakweni hakumona yililu yetu yakashinshi nawa azañalalaña neyi mukwanshidi nabalumuki mumuchima. (Luka 15:10) Añelu amonaña yililu yayiwahi yawambanda akwaKristu. Bayibolu yashimuna nawu, ‘mumbanda watela  kwikala nachinjikijilu chawanta kumutu windi, hansañu yawañelu.’ (1 Akorinda 11:3, 10) Eña, añelu atiyaña kuwaha hakumona ambanda awakwaKristu niambuña aNzambi ejima ahamaseki anakwovwahila nshimbi jateokalatiki nijawumutu. Kwovwahila kwamuchidiwu hichanukishu chachiwahi kudi añelu aNzambi.

Añelu Akwashaña Mudimu waKushimwina

17, 18. Muloñadi chitukuhoshela netu añelu atukwashaña mumudimu wakushimwina?

¹⁷ Añelu azataña yuma yikwawu yakuhayamisha yamwekanaña ‘mwifuku daMwanta.’ Yumiyi yabombelamu kuvwalika kwaWanta mu 1914 nikumunatila Satana niandemoni jindi hamaseki kudi “Mikeli nawañelu jindi.” (Chimwekeshu 1:10; 11:15; 12:5-9) Kapostolu Yowanu wamweni ‘kañelu mukwawu nakutuuka hakachi kaluzwizu, nasendi nsañu yayiwahi yahaya nyaka, ashimuni kudi antu ejima ashakama heseki.’ Kañelu washimwini nindi: ‘Akamenu Nzambi mumulemeshi; muloña mpinji yindi yakusompesha yinashiki dehi; difukulenu kudi waleñeli niiwulu nimaseki nikaluñalwiji nituseloki twamenji.’ (Chimwekeshu 14:6, 7) Dichi, ambuña aYehova ayikana nawu añelu akayikwashaña hampinji yinakushimwinawu nsañu yayiwahi yaWanta wemikawu hichikweti muloña nekañesha dasweja daDiyaboluku.—Chimwekeshu 12:13, 17.

¹⁸ Makonu, añelu hiyatulombolaña kudi antu ashinshika kuhitila mukuhosha nanetu neyi chamulejeluwu Fwilipu kudi kañelu nakumulombola kudi kaEtiyopiyaku. (Yililu 8:26-29) Hela chochu, yileji yayivulu yamakonu yamwekeshaña wunsahu wakwila nawu añelu akwashaña mudimu wetu wakushimwina Wanta nikutwilombola kudi antu “afuukwilawu dehi kumona wumi wahaya nyaka” hela chakwila hitwayimonaku. * (Yililu 13:48) Dichi, chalema nankashi kukalakala mumudimu wakushimwina mafuku ejima kulonda tutweshi kuzata mudimu wetu wakukeñakeña antu anakukeña ‘kudifukula kudi Tata muchalala nimuspiritu.’—Yowanu 4:23, 24.

19, 20. Mudimwinyi wazatañawu añelu munanu mafuku ‘akukuma kwanyaka yinu’?

¹⁹ Yesu wahosheli kutalisha munanu mafuku etu nindi, ‘hakukuma kwanyaka yinu’ añelu amba ‘kaambula atama kudi aloña.’ (Matewu 13:37-43, 49) Añelu azataña mudimu wakukumishaku wakupompesha nikulamika awayishewa. (Tañenu Matewu 24:31; Chimwekeshu 7:1-3) Kubombelahu, Yesu akamukwashaku kudi añelu hampinji ‘yakaambulayi anyikoku nawampembi.’—Matewu 25:31-33, 46.

²⁰ ‘Hakamwekanayi Mwanta Yesu kufuma mwiwulu, hamu nawañelu jindi añovu, antu ejima abula kwiluka Nzambi, niabulaña kwovwahila nsañu yayiwahi yaMwanta wetu Yesu’ akayijilumuna. (2 Atesalonika 1:6-10) Hampinji yamweniyi Yowanu chuma chochimu muchimwenu, wamulumbulwili Yesu niañelu akwanjita amwiwulu nindi adi nakwendela hatuwalu tutooka kulonda kwasa njita mukuloña.—Chimwekeshu 19:11-14.

21. Chumanyi chakamwilawu Satana niandemoni jindi kudi kañelu ‘wudi nansapi yekela niileñi deneni muchikasa chindi’?

²¹ Yowanu cheñi, ‘wamweni mwiwulu munakusuluka kañelu, wudi nansapi yekela niileñi deneni muchikasa chindi.’ Chakadi kujina, iwu hiMikeli mukulumpi wawañelu, wakamukasa Diyabolu nikumunatila hamu nawandemoni mwikela. Akayisubula kapinji kanti hakukuma kweKombakaji daYaaka daKuyula kwaKristu hakayesekawu antu awanina kweseka kwakukumishaku.  Kufumahu, Satana niakwakudikaña ejima akayijilumuna. (Chimwekeshu 20:1-3, 7-10; 1 Yowanu 3:8) Akwakudikaña naNzambi ejima akayijilumuna.

22. Indi añelu azataña mudimwinyi hayuma yikukeña kumwekana, nawa twatela kutiya ñahi hamudimu wawu?

²² Kupuluka kufuma mukaayi katama kaSatana kudi mukamwihi. Añelu akekala namudimu walema haniyi mpinji yikamwekanaña yuma yalema yamba kajilika wanta waYehova nikushikija chikupu yuma yafuukwilayi iseki niantu. Chalala, añelu aloña ekala ‘aspiritu atemeshawu kukalakela hansañu yawantu akaswana wamwinu.’ Dichi, tumusakililenu Yehova Nzambi chazatishañayi añelu hakutukwasha kwila nkeñelu yaNzambi kulonda tukaheti wumi wahaya nyaka.

[Tumazu twaheshina]

Munateli Kwakula Ñahi?

• Indi yileñaleña yakuspiritu yamwiwulu yadiloñesha ñahi?

• Chumanyi cheliluwu añelu amakwawu mumafuku aNowa?

• Indi Nzambi wazatishaña ñahi añelu kulonda kutukwasha?

• Mudimwinyi wazatañawu añelu aloña makonu?

[Malwihu aKuzatisha haKudiza]

[Mwevulu wudi hefu 22]

Añelu atiyaña kuwaha kwila nkeñelu yaNzambi

[Mwevulu wudi hefu 24]

Añelu ekala asoñama kulonda kutukwasha neyi chamukwashiluwu Danyeli kwesekeja nankeñelu yaNzambi

[Mwevulu wudi hefu 25]

Ikalenu akola, muloña añelu atukwashaña mumudimu wakushimwina Wanta

[Mazu aKusakilila eniMwevulu wudi hefu 25]

Globe: NASA photo