Indi Kuvwalika Chachiha—Kwazataña Mudimwinyi?

MULOÑADI Yesu chazatishililiyi nhoshelu yakwila nawu ‘kuvwalika . . . kuspiritu’ hampinji yahosheleñayi hakupapatishewa naspiritu yajila? (Yowanu 3:5) Izu dakwila nawu “kuvwalika” neyi adizatisha munkinji dalumbuluka nawu “kutachika.” Dichi, nhoshelu yakwila nawu “kuvwalika chachiha” yalumbuluka “kutachika chachiha.” Dichi dinu, nhoshelu yankinji yakwila nawu “kuvwalika” ‘nikuvwalika chachiha’ yakonkomwenaña hawalala wakwila nawu antu apapatishewa naspiritu yajila akatachika chachiha wulunda wawu naNzambi. Indi iku kuhimpika chikupu kwawulunda kwazatikaña ñahi?

Hakulumbulula chaloñeshañayi Nzambi antu kwikala anyuli mwiwulu, kapostolu Pawulu wazatishili chakutalilahu chawenyi anakutambwila wenimbu. Wayisonekeleli akwaKristu amumafuku indi nindi, atambwilili wenimbu wamwiwulu. Wahosheli nindi: “Kwinza etu wenimbu wetu wudi mwiwulu.” (Afwilipi 3:20) Hakwila twiluki chakutalilahu chakutambula wenimbu chichikutukwasha kutiyishisha yuma yahimpikaña neyi muntu napapatishewi naspiritu yajila, tushinshikenu cheñi chakutalilahu chamwenyi wunakukeña kulanda mpata mwituña dawenyi.

Kuhimpika Kwamwekanaña Neyi Muntu Natambwili Wenimbu

Munichi chakutalilahu, muntu hanatweshi kulanda mpataku muloña himwenimbu wamunodu ituñaku. Fwikijenu nenu ifuku dimu yuma yinahimpiki chikupu. Akwanfulumendi yamunodu ituña amwinka wenimbu kwesekeja nanshimbi. Indi chumichi chikumukwasha ñahi iwu muntu? Hamuloña wakumwiteja kwikala mwenimbu, nekali nawuswa wakulanda mpata neyi enimbu ejima amunodu ituña. Kutambwila wenimbu kunahimpi chikupu chihandilu chindi.

Ichi chinakulumbulula yuma yalema yamwekanaña kutalisha hadi antu avwalikaña chachiha. Shinshikenu kufwanañana kwekalahu. Munichi chakutalilahu, muntu nateli kulanda mpata chiña neyi yawanisha yuma yakeñekaña hakwikala mwenimbu. Ilaña, kankawindi hakutwesha kuwanisha yuma yakeñekañaku. Chochimu, antu amakwawu akayinka mudimu muWanta waNzambi, hela munfulumendi yamwiwulu, chiña neyi awanisha yuma yakeñekaña hakwikala nalusesa—dikwila nawu “kuvwalika chachiha.” Ilaña, kankawawu hiyanatweshi kuwanisha yuma yakeñekañaku, muloña kuvwalika chachiha kwashindamena hadi Nzambi.

Chumanyi chinahimpi chihandilu chanona muntu? Kutambwila wenimbu kwesekeja nanshimbi.  Kafwampi, chumichi hichinahimpi chekalayi iwu muntuku. Hanyima yakutambwila wenimbu, iwu muntu wukutwalekahu kwikala muntu yowumu, ilaña ichi nekali nachihandilu chachiha. Chalala, natachiki chihandilu chachiha hela tuhoshi netu navwaliki chachiha. Nekali mwenimbu, chinamuleteshi yekali nawuswa wakulanda nikuheta mpata.

Chochimu Yehova wahimpa chihandilu chezanvu dawantu abula kuwanina kuhitila mukuyitambwila neyi enimbu anfulumendi yindi yamwiwulu.

Kapostolu Pawulu wekala mudina izanvu, wayisonekeleli akwawu akwakwitiya nindi: “Dichi dinu, himudi nawa enyi hela akwetuña dacheñuku; munekali dehi enimbu hamu nawakwakujila, munekali dehi akwetala daNzambi.” (Aefwesesa 2:19) Eña, kuhitila mukutambwila wenimbu, akwaKristu wenawa ekala munfulumendi yaNzambi yamwiwulu.

Kafwampi, kutambwila wenimbu wamwiwulu hikwahimpa chekalawu awa atambwilaña wenimbuku, muloña hiyawaninaku. (1 Yowanu 1:8) Hela chochu, kwesekeja nachalumbulwiliyi cheñi Pawulu, hanyima yakuwanisha yuma yakeñekaña munshimbi kulonda kutambwila wenimbu, atambwila chifulu chachiha. Hampinji yoyimu, spiritu yaNzambi yayileñeleli awa antu akuhweleli chikupu nawu akashakama naKristu mwiwulu. (1 Yowanu 3:2) Ichi chikuhwelelu chakola chiyekalañawu nachu hamuloña waspiritu yajila chayiletesha kwikala nachihandilu chachiha. (2 Akorinda 1:21, 22) Eña, atachikaña chihandilu chachiha hela netu avwalikaña chachiha.

Hakuhosha hadi antu atondayi Nzambi, Bayibolu yahosha nawu: “Akekala atupristu ambala aNzambi niaKristu, akayulila hamu nindi ikombakaji danyaka.” (Chimwekeshu 20:6) Antu atondayi Nzambi akatambwila chifulu neyi anyanta muWanta waNzambi hela nfulumendi yamwiwulu hamu naKristu. Kapostolu Petulu wayisonekeleli akwawu akwakwitiya kutalisha haniwu wunyuli nindi, ‘hiwuswana wakatokaña, wakadi kujilola, wabulaña kujimuka,’ dikwila nawu, “wanayiswekeluwu enu mwiwulu.” (1 Petulu 1:3, 4) Chalala, hiwuswana walema chikupu.

Hela chochu, iyi nsañu yakuyula cheñi yaleñelaña kwihula lwihu. Neyi chakwila antu avwalika chachiha akayula neyi anyanta mwiwulu, akayulaña anyi? Ilu lwihu analwakuli muchibaba chinalondeluhu.

[Mwevulu wudi hefu 10]

Indi Pawulu wahoshelidi kutalisha hawenimbu wamwiwulu?