Indi Kuvwalika Chachiha—Kwazatikaña Ñahi?

YESU hahosheli naNikodemu hakulema kwakuvwalika chachiha, chuma chaleteshaña ninkeñelu yachu hohuku, ilaña wahosheli cheñi kuvwalika chachiha chikwazatikaña. Yesu wahosheli nindi: ‘Muntu kutwesha kwiñila muwanta waNzambi, chiña avwalika nikumenji nikudi spiritu.’ (Yowanu 3:5) Dichi, muntu wavwalikaña chachiha kuhitila mumenji nimuspiritu. Indi nhoshelu yakwila nawu ‘menji nispiritu’ yatalisha mudihi?

‘Menji niSpiritu’ Hiyumanyi?

Chakadi nikujina, hakwikala nkuluñaña munsakililu yawaYudeya, Nikodemu welukili chikupu Nsona yachiHeberu chiyazatishileña izu dakwila nawu ‘spiritu yaNzambi’—ñovu yaNzambi yinateli kuleñela antu kukoña nyidimu yamaneni. (Kutachika 41:38; Kwidika 31:3; 1 Samweli 10:6) Dichi hampinji yazatishiliyi Yesu izu dakwila nawu ‘spiritu,’ Nikodemu watela welukili nindi hispiritu yajila, ñovu yaNzambi.

Indi Yesu watalishili mudihi hakutena menji? Shinshikenu nsañu yasonekeluwu hohenohu henohu Yesu kanda yahanjeki naNikodemu nihanyima yakuhanjeka nindi. Ichi chamwekeshaña nawu Yowanu Mpapatishu niatumbanji twaYesu adiña nakupapatisha mumenji. (Yowanu 1:19, 31; 3:22; 4:1-3) Ichi chaaku achilukili nankashi muYerusalema. Dichi, hampinji yateneniyi Yesu menji, Nikodemu watela welukili nindi Yesu hanakutena menji hohuku, ilaña wateneneña menji achipapatishu. *

Kupapatishewa ‘naSpiritu Yajila’

Neyi chakwila ‘kuvwalika kumenji’ hohamu nakupapatisha mumenji, indi ‘kuvwalika . . . kuspiritu’ kwalumbulukadi? Henohu Yesu kanda yohanjeki naNikodemu, Yowanu Mpapatishu wabidikili nindi bayi neyi kwekala kupapatisha mumenji hohuku, ilaña spiritu yakakoña mudimu weneni hakupapatisha. Wahosheli nindi: ‘Ami nayipapatishi mumenji, ilaña yena [Yesu] wakayipapatisha naspiritu yajila.’ (Maku 1:7, 8) Nsoneki waNsañu Yayiwahi Maku washimuna katachi hamwekeni chipapatishu chamuchidiwu. Wasonekeli nindi: ‘Hamafuku owu Yesu hakufuma kuNazareta wamuÑaliliya, hiyakumupapatisha kudi Yowanu muYodana. Henohu hadiñi nakufumayi mumenji wamweni iwulu dinenzuluki, spiritu yidi neyi katela hiyikuwila hadi yena.’ (Maku 1:9,10) Chamujimikiluwu  Yesu muYodana, amupapatishili mumenji. Hampinji yatambwililiyi spiritu kufuma mwiwulu, amupapatishili naspiritu yajila.

Chimwahitili yaaka kwakwihi nayisatu kufuma hamupapatishiluwu, Yesu wayilejeli atumbanji twindi nindi: ‘Hakwila enu akayipapatisha mudi spiritu yajila hakadi kuhita mafuku amavulu.’ (Yililu 1:5) Chumichi chamwekeni mwakanyi?

Hefuku daPentekosta muchaaka cha 33 C.E., atumbanji twaYesu kwakwihi na 120 apompeli mwitala muYerusalema. ‘Kukasumuka mwiwulu himukufuma lushindu ludi neyi lwampepela yikukunka nañovu yasweja nankashi, hilukwinzesha itala dejima mwashakaminuwu. Hikukuyimwekena madimi adi neyi nyizuzu yakesi . . . ; wejima wawu hiyakwinzala spiritu yajila.’ (Yililu 2:1-4) Ifuku dodina antu amakwawu muYerusalema ayikonkomweneni kupapatishewa mumenji. Kapostolu Petulu walejeli izaza nindi: ‘Balumukenu munyichima yenu, ayipapatishi wejima wenu mwijina daYesu Kristu, kulonda kuyanakena nshidi jenu; mutambuli chamukunkulu chaspiritu yajila.’ Chumanyi cheliluwu? ‘Dichi wena atambwili mazu indi namuzañalu, hiyakuyipapatisha; ifuku denodu hiyakubombelaku antu kafwampi neyi makombakaji asatu.’—Yililu 2:38, 41.

Kupapatishewa Mapampa Kayedi

Indi iyi yipapatishu yamwekeshañadi kutalisha hakuvwalika chachiha? Yamwekeshaña nawu kuvwalika chachiha kwazatikaña kuhitila mukupapatishewa mapampa kayedi. Ilukenu nenu Yesu wasambilili kupapatishewa mumenji. Kuhiñahu watambwilili spiritu yajila. Chochimu, atumbanji akusambila ayipapatishili mumenji (amakwawu kudi Yowanu Mpapatishu), kuhiñahu atambwilili spiritu yajila. (Yowanu 1:26-36) Hohamu niatumbanji 3,000 amaha asambilili kuyipapatisha mumenji, kuhiñahu hiyakutambwila spiritu yajila.

Neyi twanukaña yipapatishu yamwekeni haPentekosta 33 C.E., tunateli kukuhwelela netu kuvwalika chachiha kunateli kuzatika ñahi makonu? Tukukuhwelela netu kunateli kuzatika neyi chikwazatikili kudi apostolu aYesu niatumbanji akusambila. Tachi, muntu wabalumukaña mumuchima hanshidi jindi, kuleka yililu yatama, nakudihana kulonda kudifukula nikumukalakela Yehova, nikumwekesha kudihana kwindi hatooka kuhitila mukupapatishewa mumenji. Kuhiñahu, neyi chakwila Nzambi namutondi kukalakala neyi nyuli muWanta Windi, akumuwayisha naspiritu yajila. Chibalu chatachi chaniku kupapatisha kuyedi (kupapatishewa mumenji) achitachikaña kudi muntu; chibalu chamuchiyedi (kupapatishewa naspiritu) achitachikaña kudi Nzambi. Neyi muntu yopapatishewa mapampa kayedi, dikwila nawu navwaliki chachiha.

Muloñadi Yesu chazatishililiyi nhoshelu yakwila nawu ‘kuvwalika kumenji nikuspiritu’ mumpanji yahanjekeluwu naNikodemu? Muloña wakukonkomwena nindi antu apapatishewaña namenji nikuspiritu akamona kuhimpika kweneni. Chibaba chinalondeluhu chinahoshi hansañu yakuvwalika chachiha.

[Tumazu twaheshina]

[Mwevulu wudi hefu 9]

Yowanu wapapatishileña namenji aIsarela abalumukileña mumuchima