Izanvu Danyanya diKayula, Ilaña Antu Amavulu Akahetelamu

KUFUMA tuhu mumafuku awapostolu, Nzambi nakutonda akwaKristu antesha ashinshika mudi antu, nakuyinka wenimbu wamwiwulu. Kuhimpika kwamonañawu awa akwaKristu kwawanina chikupu chakwila Izu daNzambi dashimuna iku kuhimpika nawu kuvwalika chachiha. Nkeñelu yakuvwalika chachiha yekala yakuloñesha awa ambuña aNzambi avwalika chachiha kwikala anyuli mwiwulu. (2 Timotewu 2:12) Hakwila nawu ekali anyuli, ayisañwilaña kuwumi wamwiwulu. (Aroma 6:3-5) ‘Akayulaña neyi anyanta hamaseki’ hamu naKristu mwiwulu.—Chimwekeshu 5:10; 11:15.

Hela chochu, Izu daNzambi dahosha cheñi nawu kudi antu amakwawu abula kuvwalika chachiha, akatambwila wamwinu wahaya nyaka. MuBayibolu (muNyikanda yachiHeberu hamu tuhu niNyikanda yawakwaKristu  yachiGriki), ashimuna nawu Nzambi wakamwina mazanvu ayedi awantu, izanvu danyanya dawanyuli akashakamaña mwiwulu niizanvu deneni dawantu akayulañawu hamaseki. Chakutalilahu, shinshikenu nsañu yasonekeleliyi kapostolu Yowanu akwawu akwakwitiya avwalikili chachiha. Wahosheli kutalisha hadi Yesu nindi: “Yena diyi ifutu danyiloña yetu; hinyiloña yetwetu hohuku [izanvu danyanya], niyawantu ampata yamunu mwishina ejima [izanvu deneni].”—1 Yowanu 2:2.

Chochimu, kapostolu Pawulu wasonekeli nindi: “Kuleña kwejima kwachiñililaña [izaza deneni] nakudihudika chamba kamwekana anyana kaNzambi [izaza danyanya].” (Aroma 8:19-21) Indi awa mazu akapostolu Yowanu niPawulu tunateli kuyitiyishisha ñahi? Muniyi njila: Antu avwalika chachiha akekala kabadi kanfulumendi yamwiwulu. Yumanyi yakazatañawu mwiwulu? Akaleta nkisu yahaya nyaka kudi antu amavulu akashakamaña hamaseki akayulañawu kudi nfulumendi yaNzambi. Dichi, Yesu wayidizishili atumbanji twindi kulomba nindi: ‘Wanta weyi winzi. Muchima weyi awili hamaseki neyi chawilañawu mwiwulu.’—Matewu 6:10.

MuNyikanda yachiHeberu atenamu cheñi mazanvu ayedi awantu akamwinawu. Chakutalilahu, shinshikenu chamulejeluwu nkakulula yaYesu Abarahama kudi Yehova nindi: ‘Mudi mbutu yeyi [izanvu danyanya] nyuza yejima yahamaseki [izanvu deneni] yakawenaku kukooleka.’ (Kutachika 22:18) Eñañi, nyunza yejima yahamaseki yikakoolekela kuhitila ‘mumbutu’ yaAbarahama.

Indi iyi ‘mbutu’ hiyanyi? HiYesu Kristu, kushilahu niantu avwalika chachiha, enkawu wenimbu wamwiwulu. Kapostolu Pawulu washimwini nindi: ‘Neyi munekali ambala aKristu, komana munekali dehi mbutu jaAbarahama.’ (Aŋalija 3:16, 29) Nawa nkiswinyi yikekala nawantu ejima ahamaseki kuhitila mudi iyi ‘mbutu’? Hikukooleka kwakwikala nawuselewa waNzambi nikudiluñisha wumi wahaya nyaka muparadisa hamaseki. Ñimbi yamasamu Davidi washimweneñahu dehi nindi: “Akwakuloña akaswana ituña, akashakamamu haya nyaka.”—Masamu 37:29; Isaya 45:18; Chimwekeshu 21:1-5.

Chalala, antu antesha diwu akayula mwiwulu, ilaña antu amavulu akahetelamu muchiyulu chamwiwulu, nawa akayikiswila chikupu nikuyinka wumi wahaya nyaka hamaseki. Dichi enu nichisaka chenu ikalenu hakachi kawantu akaheta wumi wahaya nyaka ninkisu yikaleta Wanta waNzambi.

[Mwevulu wudi hefu 12]

Antu amavulu akaheta wumi wahaya nyaka hamaseki. Komana mukekala hakachi kawu?