Komana Kuvwalika Chachiha​—Diyi Njila yaWamwinu?

MUNATELI kwakula nenudi neyi ayihula nawu, “Komana mwavwalika dehi chachiha?” Akwakwitiya amavulu mukaayi kejima anateli kwakula nawu, “Eña.” Akuhwelela nawu kuvwalika chachiha dichinjikijilu chakwilukilaku akwaKristu alala ejima nawa diyi njila yawamwinu. Akuhwelela yitoñojoka yawakulumpi jansakililu chidi neyi Robert C. Sproul wadiza jansakililu wasonekeli nindi: “Neyi muntu wavwalika chachiha wanyi, . . . dikwila nawu himukwaKristu wanyi.”

Komana mwekala hakachi kawantu akuhwelela nawu kuvwalika chachiha diyi njila yawamwinu? Neyi dimu, chakadi kujina munakukeña kukwasha antaña niamabwambu jenu kulonda awani iyi njila kulonda atachiki kwendamu. Hela chochu, hakwila nawu eli mwenimu, atela kwiluka chaambu chekala hakachi kamuntu wavwalika dehi chachiha nimuntu wabula kuvwalika chachiha. Munateli kuyilumbulwila ñahi chalumbuluka kuvwalika chachiha?

Amavulu akuhwelela nawu nhoshelu yakwila nawu ‘kuvwalika chachiha’ yatalisha kudi muntu wadihana chikupu kumukalakela Nzambi niKristu, chikufumamu wukuhimpa kufuma kukufwa kuspiritu nakwikala wamumi kuspiritu.

Komana munakukeña kwiluka chuma chacheni chatañishaña Izu daNzambi hakuvwalika chachiha? Chakadi kujinoka, mukuhetelamu neyi mutaña chikupu iyi nsañu. Muloñadi? Muloña kwiluka chalala kutalisha hachalumbuluka kuvwalika chachiha kukuyikwasha muwumi wenu nikwiluka yuma yimwatalilaña kumbidi.

Chumanyi Chatañishaña Bayibolu?

Nhoshelu yakwila nawu ‘kuvwalika chachiha’ yekala haYowanu 3:1-12, iyi nsona yahosha hayuma yayiwahi yahanjekeliyi Yesu nanlomboli wansakililu muYerusalema. Mukuwana iyi nsañu yamuBayibolu anayisombololi yejima muchikasha chidi hamu nachinu chibaba. Tunayikoleshi kutaña ichi chikasha nakanañachima.

Muniyi nsañu, Yesu wahosheli  yuma yayivulu kutalisha ‘hakuvwalika chachiha.’ Kafwampi, yuma yahosheliyi Yesu yatukwashaña kwakula awa malwihu atanu alema chikupu:

◼ Indi kuvwalika chachiha kwalema ñahi?

◼ Komana tunateli kuditondela kuvwalika chachiha?

◼ Indi kuvwalika chachiha kukweti nkeñelwinyi?

◼ Indi muntu wavwalikaña ñahi chachiha?

◼ Indi kuvwalika chachiha kwaletaña wulunda wamuchidinyi?

Tushinshikenu malwihu wenawa lumu hampinji.

[Chikasha/Mwevulu wudi hefu 4]

“Chiña Muvwalika Chachiha”

‘Kwadiña iyala wumu, kaFwarisi, nyuli yawaYudeya, ijina didi Nikodemu. Yeniwu wayili kudi yena nawufuku, hakumwila nindi, Eyi Rabi, etu tuneluki netu eyi wunkuluñaña wafuma kudi Nzambi; muloña yinjikijilu iyi yiwelañeyi kwosi muntu niwumu wukutwesha kuyila, chiña wekala naNzambi. Yesu hakumwakula nindi, Chalala chalala, nukukuleja nami, muntu kutwesha kumona wanta waNzambi chiña avwalika chachiha. Nikodemu hakumwila nindi, Muntu wakula dehi wukutwesha kuvwalika ñahi? Wukutwesha kwiñila mwivumu damama yindi kamuchiyedi avwaliki cheñi, tahindi? Yesu hakwakula nindi, Chalala chalala, nukukuleja nami, muntu kutwesha kwiñila muwanta waNzambi, chiña avwalika nikumeji nikudi spiritu. Chavwalikaña kumujimba himujimba; chavwalikaña kudi spiritu hispiritu. Bayi wuhayama chinakwili nami chiña muvwalika chachihaku. Mpepela yakunkaña kwokuyinakeñi kuya kwoku, eyi watiyaña chiyikuvuma, ilaña kwiluka kuyikufuma, hela kuyikuya nehi, dichi chaduwu ejima akuvwalika kudi spiritu. Nikodemu hakumwihula nindi, Yumiyi yikutwesheka ñahi? Yesu hakumwakula nindi, Eyi yeyi nkuluñaña yawaIsarela, wubuli kushinshika mwalumbulukila yumiyi? Chalala chalala, nukukuleja nami, twahoshaña yitweluka, twashimunaña wunsahu wayuma yakumona namesu, enu kwitiya mutwashimunaña nehi. Chinayileji yuma yahamaseki enu kwitiya nehi, indi chinukuyileja yuma yamwiwulu mukwitiya ñahi?’—Yowanu 3:1-12.