Tukulenu Tupami Muloña, “Ifuku daYehova Deneni Didi Kwakwihi”

‘Tukulenu tupami.’—AHEBERU 6:1.

1, 2. Indi akwaKristu amuyaaka nkulakaji yakusambila amuYerusalema niYudeya adiña nakukoolekanyi ‘kwakutemukila kumapidi’?

 HAMPINJI yadiñayi Yesu hamaseki, atumbanji twindi amuwanini nakumwila nawu, tuleji “chinjikijilu chakwiluka nachu hiwamba kenzeyi, nihamba kakuma nyaka yamakonu.” Kushikijewa kwatachi kwawuprofwetu wayilejeliyi Yesu atumbanji hakwakula lwihu lwehwiluwu kwashikijeweli muyaaka nkulakaji yakusambila. Yesu wahosheli hayuma yakala yikamwekesha nawu kukuma kudi mukamwihi. Hakumona yumiyi hiyikumwekana ‘antu adiñi muYudeya ateleleli kutemukila kumapidi.’ (Matewu 24:1-3, 15-22) Komana atumbanji twaYesu elukili chinjikijilu nikulondela nshimbi jayilejeliyi?

² Chimwahitili yaaka kwakwihi namakumi asatu, mu 61 C.E., kapostolu Pawulu wasonekeli nsañu yayishikili hamuchima akwaKristu Aheberu ashakamineña muYerusalema ninyikala yadiña kwakwihi. Pawulu niakwawu akwakwitiya elukili wanyi nawu kunashali hohu yaaka yitanu hakwila nawu chuma chakusambila chakumwekesha chinjikijilu ‘chalukadi lwasweja’ chitachiki. (Matewu 24:21) Mu 66  C.E., Cestius Gallus walombweli amashidika akuRoma nawa wakeñeli kulukuka Yerusalema. Ilaña, chakadi kwiluka Gallus nimashidika afuntilumu, ichi chaleñeleli akwaKristu adiña muwumbanji kutemuka.

3. Indi Pawulu wakonkomweneni akwaKristu Aheberu nindidi, nawa muloñadi?

³ AkwaKristu wenawa ateleleli kwiluka nawu yuma yamwekeneña hikushikijewa kwamazu aYesu, nawa ateleleli kutemuka. Hela chochu, amakwawu ekalili “akwakutiya nakuhuwañesha.” Adiña neyi anyikeki akuspiritu akeñaña “mayeli.” (Tañenu Aheberu 5:11-13.) Hela tuhu antu amakwawu ashimbwili muchalala amwekesheleña chinjikijilu ‘chakuleka Nzambi wamumi.’ (Aheberu 3:12) Amakwawu adiñi ‘nachaaku’ chakujiña kukupompa kwawakwaKristu mumpinji yelili ‘ifuku datama hidikuswila kwakwihi.’ (Aheberu 10:24, 25) Pawulu wayikonkomweneni hampinji yatelela nindi: ‘Chineli tunaleki dehi ntañishilu yatachi yaKristu, tukulenu tupami.’—Aheberu 6:1.

4. Muloñadi chichalemena kusoñama kuspiritu, nawa chumanyi chikutukwasha kwila mwenimu?

⁴ Tunakushakama mumpinji yakushikijewa kwakukumishaku kwawuprofwetu waYesu. “Ifuku daYehova deneni” dakujilumuna kaayi kaSatana kejima “didi kwakwihi.” (Zefwaniya 1:14) Twatela kusweja kwikala asoñama chinakushikijewa wuprofwetu wamuBayibolu nikwikala nawulunda wakola naYehova. (1 Petulu 5:8) Komana chalala tunakwila mwenimu? Kupama kuspiritu kukutukwasha kwikala asoñama nakwiluka mafuku itunakushakamamu.

Kupama kwawakwaKristu hiChumanyi?

5, 6. (a) Indi kupama kuspiritu kwakeñekañadi? (b) Hakwila nawu tukuli nakupama chakeñekaña kuzata nañovu muyumanyi yiyedi?

⁵ Pawulu hayikolesheli akwaKristu Aheberu amuyaaka nkulankaji yakusambila kukula nakupama hohuku, ilaña wayilejeli cheñi yuma yakeñekaña hakupama kuspiritu. (Tañenu Aheberu 5:14.) ‘Antu apama’ hiyatiyaña kuwaha kunwa “mayeli” hohuku. Adyaña “kudya kwakola.” Dichi, eluka yejima yiyedi ‘yuma yatachi’ ‘niyuma yaNzambi yayeni yakunama.’ (1 Akorinda  2:10) Kubombelahu, afumba dehi yitoñojoka yawu kuhitila mukuzatisha yuma yadizawu nawa yayikwashaña kwambula yayiwahi nayatama. Neyi anakukeña kufuukulahu mwakwilila, yuma yadizawu yayikwashaña kwiluka nshimbi yekala muNsona nichakuyizatisha.

⁶ Pawulu wasonekeli nindi, “Twadi kusweja kusha muchima kunsañu oju jitwatiyili, twakenda kahuñumuka.” (Aheberu 2:1) Tunateli kuhuñumuka kuchikuhwelelu chakadi kwiluka. Tunateli kukañesha kuhuñumuka kuhitila ‘mukusha kashinshi chikupu’ hampinji yitunakudiza Bayibolu chili hetala chili kukupompa kwawakwaKristu. Dichi, wejima wetu twatela kudihula netu: ‘Komana natañaña hohu yuma yatachi? Komana nakuminaña hohu dakutaña chakadi kushaku muchima chikupu kunsañu yalala yinakudiza? Nateli kuyilaku ñahi hambidi chikupu kuspiritu?’ Kukula nakupama kwakeñekaña kuzata nañovu muyuma yiyedi. Twatela kwiluka chikupu Izu daNzambi. Nawa twatela kudiza kwovwahila.

Ilukenu Chikupu Izu

7. Tunateli kuhetelamu ñahi mukwiluka chikupu Izu daNzambi?

⁷ Pawulu wasonekeli nindi: ‘Muntu wanwaña mayeli wabula kushinshika mwaya izu dakuloña, muloña himukeki.’ (Aheberu 5:13) Hakwila nawu tupami, twatela kwiluka chikupu izu daNzambi, nsañu yatulejañayi. Chineli iyi nsañu yekala Mwiizu dindi Bayibolu, twatela kwikala atudizi amawahi aBayibolu ninyikanda ‘yanduñu wamaana nikashinshi.’ (Matewu 24:45-47) Kudiza muniyi njila kukutuletesha kwiluka chatoñojokañayi Nzambi, nawa kukutukwasha kufumba yitoñojoka yetu. Shinshikenu chakutalilahu chamukwaKristu wejina daOrchid. * Wahosheli nindi: “Chuma chankwashili nankashi muchihandilu chami hichanukishu chakutañaña Bayibolu mpinji yejima. Mwahitili yaaka kwakwihi nayiyedi hakwila nawu nimanishi kutaña Bayibolu yejima, ilaña natiyileña neyi inakumwiluka Nleñi yami katachi. Nadizili nshimbi jindi, yuma yakeñayi niyahelayi, nichaswejayi ñovu, nimaanindi chiyakunamawu. Kutaña Bayibolu mafuku ejima kunankwashi kuumika hampinji yinamonaña kukala kwasweja muchihandilu chami.”

8. Indi Izu daNzambi dikweti ñovu yamuchidinyi muwumi wetu?

⁸ Kutaña chikunku Chezu daNzambi mafuku ejima kwaleñelaña nsañu yekalamu ‘kwikala nañovu’ muwumi wetu. (Tañenu Aheberu 4:12.) Kutaña Bayibolu muniyi njila kukutuleñela kwikala nayililu yayiwahi nawa tukumuzañaleshaña Yehova chikupu. Komana mwatelela kutanjika mpinji yeneni yakutaña Bayibolu nikutoñojoka chikupu hansañu yahosha Bayibolu?

9, 10. Indi kwiluka Izu daNzambi chaya mukwila nawudi? Lumbululenu.

⁹ Kwiluka Bayibolu kwakeñekaña yuma yayivulu kubadika kwiluka hohu chiyahosha. Anyikeki akuspiritu amumafuku aPawulu elukili nsañu yikwawu Mwiizu daNzambi donenawu. Hela chochu, hiyadiña nakuzatisha nsañu yelukiluwu hakwila nawu amoni yuma yayiwahi yafumañamuku. Hiyelukili nsañu yamuBayibolu kuhitila mukwiteja nsañu yeniyi kuyilombola kulonda afuukuleñahu chachiwahi muchihandilu chawuku.

¹⁰ Kwiluka Izu daNzambi chaya mukwila nawu kwiluka chidahosha nikuzatisha yuma yekalamu. Nsañu yamuhela mukwaKristu wejina daKyle yinakumwekesha chitwatela kwila mwenimu. Kyle wabobweli namukwawu muyazatilaña. Chumanyi cheliliyi hakwila nawu yamanishi kukala? Wahosheli nindi, “Nanukili Nsona yaAroma 12:18, yahosha nawu: ‘Neyi chikutwesheka, shakamenuña chachiwahi nawantu ejima.’ Dichi namulejeli ona mukwetu nami tuhanjeki hanyima yakuzata.” Ahanjekeli chachiwahi, nawa ona mukwawu muyazatilañawu watiyili kuwaha nankashi njila yazatishiliyi Kyle hakumanisha kukala. Kyle wahosheli nindi, “kuzatisha nshimbi jamuBayibolu mpinji yejima hichuma chachiwahi.”

Dizenu Kwovwahila

11. Chumanyi chamwekeshaña nawu kwovwahila hichuma chakala neyi yuma yinakali?

¹¹ Kuzatisha yuma yitwadiza muNyikanda  chakala, sweje-e dinu neyi yuma yinakali. Chakutalilahu, chimwahitili kapinji kantesha kufuma hampinji yayilubwiluwu anyana kaIsarela muwuduñu muEjipitu kudi Yehova, atachikili, ‘kumuzuñesha Mosi’ nawa ‘amwesekeleña Yehova.’ Muloñadi? Muloña wakubula menji akunwa. (Kwidika 17:1-4) Tukweji tuyedi twamanini wanyi kufuma hampinji yatiyañenuwu chitiyañenu naNzambi nakwiteja kwila ‘mazu ejima ahosheliyi Yehova,’ afumpili nshimbi jindi kuhitila mukupesha. (Kwidika 24:3, 12-18; 32:1, 2, 7-9) Komana afumpili nshimbi hamuloña wakwila atiyili woma chashimbwiliyi Mosi henohu anakumuleja nshimbi haMpidi yaHorebi? Komana atoñojokeli nawu hadaha aAmaleki akuyilukuka cheñi nawa aIsarela adi kuyishinda muloña wakwila Mosi, wolweli makasindi mwiwulu hakwila ashindi hakusambila wafuminuhu? (Kwidika 17:8-16) Atela atiyili woma, hichikweti muloña nayuma yatoñojokeleñawuku, aIsarela ‘akaanini kwovwahila.’ (Yililu 7:39-41) Pawulu wakonkomweneni akwaKristu ‘kushaku muchima’ kulonda abuli ‘kudimbuka nakulondeja mwajikwiluwu’ aIsarela chatiyiluwu woma hakwiñila Mwituña daChikaninu.—Aheberu 4:3, 11.

12. Indi Yesu wadizili ñahi kwovwahila, nawa watambwilili nkiswinyi?

¹² Kukula nakupama kwakeñekaña kuzata nañovu yejima kulonda kumwovwahila Yehova. Kwesekeja nachakutalilahu chemikiliyi Yesu Kristu, kakavulu tunateli kudiza kwovwahila nayuma yinakabakaniyi muntu. (Tañenu Aheberu 5:8, 9.) Henohu kanda yenzi hamaseki, Yesu wamwovwahilileña Tata yindi. Hela chochu, kwila nkeñelu yaTata yindi hamaseki kwabombelelumu kuyanda kumujimba nimuyitoñojoka. Hamuloña wakwila wovwahilili hampinji yamweniyi makabi asweja, Yesu amwilishili ‘kwikala wawanina’ namudimu wawuha wamwinkeluwu kudi Nzambi, wakwikala Mwanta nawa Kapristu Muneni.

13. Yumanyi yamwekeshaña nawu tunadizi kwovwahila?

¹³ Indi etu tunateli kwovwahila? Komana tunakufwila kumwovwahila Yehova nihampinji yitukumona kukala kwasweja? (Tañenu 1 Petulu 1:6, 7.) Kufumba kwaNzambi kutalisha hakwikala nayililu yayiwahi, kashinshi, kuhosha mazu amawahi, kutaña kwahalwetu nikudiza Nyikanda, kuwanika kukupompa kwawakwaKristu, nikuzata mumudimu wakushimwina kwatiyakana. (Yoshuwa 1:8; Matewu 28:19, 20; Aefwesesa 4:25, 28, 29; 5:3-5; Aheberu 10:24, 25) Komana twamwovwahilaña Yehova muniyi yuma hela chakwila tudi mukukala? Kwovwahila kwamwekeshaña nawu tunakuli nakupama.

Kupama kwawakwaKristu Kwawahiladi?

14. Shimunenu chakutalilahu chinakumwekesha nawu kukula nakupama kunateli kukiña muntu.

¹⁴ Kupama kunateli kumukiña mukwaKristu chikupu neyi yafumba yitoñojoka yindi chachiwahi nakwaambula yayiwahi nayatama mukanu kaayi mwabulañawu “kutiya nsonyi.” (Aefwesesa 4:19) Chakutalilahu, mana kwetu wejina daJames, wadiña nakutaña Nyikanda yashindamena haBayibolu mpinji yejima nikuyilemesha, wetejeli mudimu wakuzataña nawambanda hohu. James wahosheli nindi, “Ambanda amavulu amwekeni hatooka to-o nawu yililu yawu yatama, ilaña wumu wamwekeneña neyi wadiña nayililu yayiwahi nawa wamwekesheli mpwila yakudiza chalala chamuBayibolu. Hela chochu,  hampinji yitwadiña ayedi mukapeka kakuzatila, iwu mumbanda watachikili kuhosha nsañu yawuvumbi. Natoñojokeli nami nakusenseka hohu ilaña chankalilili kumulekesha. Yoyenoyu mpinji nanukili nsañu yashimwinuwu muKaposhi Kakutalila yamana kwetu wamweni kweseka kwadifwana kumudimu kwazatileñayi. Muchibaba chenichi mwadiña chakutalilahu chaYosefu nañoda Potifwari. * Mukunyakashana namushinjikili mumbanda yenona nawa watemukilili hanzi.” (Kutachika 39:7-12) James wazañaleli chikupu hakuwana neyi kwosi chuma chikwawu chamwekeni nawa watwalekeluhu kwikala nachinleji chitooka.—1 Timotewu 1:5.

15. Indi kukula nakupama kunateli kukolesha ñahi muchima wetu wachifwikija?

¹⁵ Kupama kwakuwahi cheñi muloña kunateli kukolesha muchima wetu wachifwikija nikutukwasha kubula ‘kulelujoka nantañishilu yayiha yacheñi nayacheñi.’ (Tañenu Aheberu 13:9.) Neyi tufwilaña kupama, tukushinshikaña hohu ‘hayuma yabadika kulema.’ (Afwilipi 1:9, 10) Dichi tukusweja kumuhameka Nzambi hayuma yejima yatuloñeshelayi kulonda tuheteleñamu. (Aroma 3:24) MukwaKristu ‘wakula dehi muyitoñojoka’ wahamekaña nankashi nawa wukweti wulunda wawuwahi naYehova.—1 Akorinda 14:20.

16. Chumanyi chamukwashili muhela wumu ‘kukolesha muchima’?

¹⁶ Muhela wejina daLouise wahosheli nindi, chimwahitili mpinji kufuma hapapatisheweliyi, chuma chacheni chamuletesheleña kutwalekahu kukalakala nyidimu yawakwaKristu chadiña chakuzañalesha antu. Wahosheli nindi, “Hinakoñeleña chuma chidi chejima chatamaku, ilaña hinadiña nampwila yayeni yakumukalakela Yehovaku. Natoñojokeli nami natela kuhimpa hakwila nimukalakeli Yehova hakumina ñovu jami. Chuma chakeñekeleña kuhimpa chikupu chadiña chakudihana namuchima wejima mukudifukula kwindi.” Louise ‘wakolesheli muchima’ kuhitila mukuzata nañovu, nawa ichi chamukwashili nankashi hampinji yakatiliyi. (Yakoba 5:8) Louise wahosheli nindi, “Yikatu yankabishili chikupu, ilaña nakundamini kwakwihi naYehova.”

‘Ikalenu akwaKwovwahila muMuchima’

17. Muloñadi kwovwahila chikwadiñi kwalema sweje-e muyaaka nkulakaji yakusambila?

¹⁷ Kufumba kwaPawulu kwakwila nawu “tukulenu tupami” kwapulwishili akwaKristu amuyaaka nkulakaji yakusambila ashakamineña muYerusalema nimuYudeya. Antu atiyilili kufumba kweniku ateleleli kusoñama kuspiritu hakwila nawu eluki chinjikijilu chayilejeliyi Yesu kulonda ‘atachiki kutemukila kumapidi.’ Chiyamwenuwu ‘chishimashima chaleteshaña mahembi . . . hichikwimana mwajila,’ dikwila nawu amashidika akuRoma hiyakukuchika nikwiñila muYerusalema, elukili nawu himpinji yakutemuka. (Matewu 24:15, 16) Kwesekeja namukwakusoneka nsañu yanyaka yayipompelu Eusebius wahosheli nindi, hamuloña wakutiyilila kusoñamisha kwawuprofwetu waYesu, akwaKristu atemukili mumusumba waYerusalema henohu kanda awujilumuni nakuya nakushakama mumusumba waPella mwiluña damapidi aGileyadi. Dichi  atondolweleli wubanji wasweja wamwekeni muYerusalema wasonekawu munsañu yanyaka.

18, 19. (a) Muloñadi kwovwahila chikwalemena nankashi makonu? (b) Chumanyi chitwakadiza muchibaba chinalondeluhu?

¹⁸ Kukula nakupama kwaleteshaña kwovwahila kukatupulwisha hampinji yitukamona kushikijewa kwakweni kwawuprofwetu waYesu wahosha nawu, “kwamba kekala lukadi lwasweja.” (Matewu 24:21) Komana twakatiyilila nshimbi jejima jitukatambwila jakunyakashana kufuma kudi “kalama washinshika”? (Luka 12:42) Dichi chalema nankashi kudiza ‘kwovwahila chakufuma kumuchima.’—Aroma 6:17.

¹⁹ Hakwila nawu tupami chakeñekaña kufumba yitoñojoka yetu. Twelaña mwenimu kuhitila mukuzata nañovu kulonda kwiluka chikupu Izu daNzambi nikudiza kwovwahila. Kukula nakupama kwawakwaKristu kwaleteña kukala kudi atwansi. Chibaba chinalondeluhu chikahosha chakumanisha kukala kweniku chachiwahi.

[Tumazu twaheshina]

Yumanyi Yimunadizi?

• Indi kupama kuspiritu hichumanyi, nawa twapamaña ñahi?

• Indi kwiluka Izu daNzambi kwazataña mudimwinyi hakukula nakupama?

• Twadizaña ñahi kwovwahila?

• Indi kupama kwatukwashaña munjilanyi?

[Malwihu aKuzatisha haKudiza]

[Mwevulu wudi hefu 15]

Kuzatisha kufumba kwamuBayibolu kwatukwashaña kumanisha kukala chachiwahi?

[Mwevulu wudi hefu 16]

Kulondela kufumba kwaYesu kwayipulwishili akwaKristu akusambila