1 Kuhwelelenu Bayibolu

“Nyikanda yajila yejima ayonena dehi kudi Nzambi; yawaha kuleja nachu, nikutanyisha nachu, nikwolola nachu.”—2 Timotewu 3:16.

KUKALANYI KUNATELI KUYIKAÑESHA KWIKALA NACHIKUHWELELU? Antu amavulu akuhwelela nawu Bayibolu himukanda wamaana awantu hohu. Amakwawu akuhwelela nawu nsañu yekala muBayibolu hiyalalaku. Amakwawu ahoshaña nawu kufumba kwamuBayibolu hikwazatikañaku hela nawu kwanyaka.

MUNATELI KUMANISHA ÑAHI KUKALA KWENIKU? Kakavulu, antu ajinokaña nawu Bayibolu hiyalalaku hela nawu hiyazatikañaku hiyakeñakeñaña nsañu awenuku. Ahitulukaña hohu muyuma yahoshañawu akwawu. Hela chochu, Bayibolu yababeshaña nawu: “Muntu wakadi maana wetiyaña mazu ejima, ilaña muntu wadihoñeshaña mumuchima watalaña chachiwahi mwakuyayi.”—Yishimu 14:15.

Chatela kukuhwelela yuma yahoshañawu amakwawu, kwila mukukuhwelela yuma yahalwenu neyi cheliluwu akwaKristu amuyaaka nkulakaji yakusambila ashakamineña muBereya, mwatenañawu makonu nawu northern Greece nehi? Hiyakuminini dakwiteja yuma yayilejeluwu kudi amakwawuku. Ilaña, adiñi nachaaku ‘chakutalatala muNsona yajila hefuku hefuku, kulonda amoni neyi yumiyi dimu yaya.’ (Yililu 17:11) Tushinshikenu chantesha hanyiloña yiyedi yikuyiletesha kukuhwelela Bayibolu nenu Hiizu daNzambi diyonenawu.

Nsañu yanyaka yamuBayibolu yoloka. Hayaaka yayivulu yinahituhu antu ajinokaña kutalisha hamajina awantu nimaluña ashimunawu muBayibolu nawu hiyolokaku. Hela chochu, kapampa kakavulu wunsahu wamwekeshaña nawu yuma yahoshañawu akwakujinoka yakutwamba, ilaña nsañu yamuBayibolu yalala.

Chakutalilahu, mpinji yimu atudizi ajinokeli neyi chakwila Mwanta wakuAshuri Sarigoni watenawu haIsaya 20:1 wadiñi kwoku. Hela chochu, muyaaka yamuma 1840, akwakuvumbujola atachikili kuvumbujola chipañu chamwanta yeniwu. Makonu, Sarigoni himwanta welukawu nankashi hakachi kawanyanta amuAshuri.

Akwakudimbulula ajinokeli kutalisha hadi nguvulu wakuRoma Pontusi Pilatu wetejeli nindi amujahi Yesu neyi chakwila wadiñi kwoku. (Matewu 27:1, 22-24) Ilaña mu 1961 aweni ilola hasonekeluwu ijina daPilatu nichifulu chadiñayi nachu kwakwihi namukala waKesareya muIsarela.

Kutalisha hakwoloka kwansañu yanyaka yamuBayibolu, chipapilu chansañu chaOctober 25, 1999, cha U.S. News & World Report chahosheli nawu: “Akwakuvumbujola amakonu eteja nawu nsañu yanyaka yaChitiyañenu Chachikulu niChitiyañenu Chachiha niyuma yalema nawu yekala yoloka mujinjila jajivulu, yaditeja nansañu jalema kutalisha hadi ankakulula awaIsarela, Kwidika kwawaIsarela muEjipitu, wanta waDavidi nichahadileñawu antu mumpinji yaYesu.” Hela chakwila kukuhwelela Bayibolu hikwashindamena hayuma yawanawu akwakuvumbujolaku, nsañu yanyaka yoloka yamuchidiwu diyi mwatela kukuhwelela kutalisha hamukanda wonenawu kudi Nzambi.

Maana alala ekala muBayibolu aheteshaña antu akuyisemwa yejima. Henohu kanda eluki nawu kwekala tububu twanyanya nankashi nichitwatandishaña musoñu, Bayibolu yahosheli hansañu yawunyonji yichidi kuzatika nimakonu. (Alevi 11:32-40; Kuhituluka 23:12, 13) Yisaka yazatishaña kufumba kwamuBayibolu kwahosha hachakudihemba wumu namukwawu  yekalaña namuzañalu. (Aefwesesa 5:28–6:4) Muntu watiyililaña nshimbi jamuBayibolu wekalaña nkoñi washinshika chikupu hela muntu weñijaña akwanyidimu wamuwahi muchima chikupu. (Aefwesesa 4:28; 6:5-9) Kuzatisha nshimbi jamuBayibolu kwakwashaña cheñi muntu kumujimba. (Yishimu 14:30; Aefwesesa 4:31, 32; Akolose 3:8-10) Twatela kukuhwelela kufumba kwakuwahi kwamuchidiwu kudi Nleñi yetu.

NKISWINYI YEKALA MUKUKUHWELELA BAYIBOLU? Maana amuBayibolu anateli kuleñela muntu wakadi maana kwikala namaana. (Masamu 19:7) Kubombelahu, neyi tukuhwelela Bayibolu, yinateli kutukwasha kwikala nachikuhwelelu chakola kuhitila mukuzatisha njila yinalondeluhu kubadika chikutukwasha mukanda wudi wejima.

Neyi munakukeña kwilukilahu nsañu yikwawu, talenu kapetulu 2, kanakwila nawu, “Bayibolu—hiMukanda Wafuma Kudi Nzambi,” mumukanda waChumanyi Chacheni Chatañishaña Bayibolu? *

[Tumazu twaheshina]