2 Ilukenu Walala Hadi Nzambi

“Wumi wahaya nyaka woweniwu, wakukwiluka eyi Nzambi walala wumu hohu.”—Yowanu 17:3.

KUKALANYI KUNATELI KUYIKAÑESHA KWIKALA NACHIKUHWELELU? Antu amakwawu ahoshaña nawu hikwekala Nzambuku. Amakwawu akuhwelela nawu Nzambi himuntuku, hiñovu hohu yabadika. Antu akuhwelela nawu himuntu yomweni atañishaña yuma yabulaña kuditeja naBayibolu kutalisha hachekalayi Nzambi niyililu yikwetiyi.

MUNATELI KUMANISHA ÑAHI KUKALA KWENIKU? Njila yimu yakwilukilamu nsañu yalala hadi Nzambi yekala yakushinshika hayuma yaleñayi. Kapostolu Pawulu wahosheli nindi: ‘Kufumisha haleñeluwu mpata yamunu mwishina, yuma yaNzambi yakadi kumonewa, yinamonewi chalala, yinalumbuluki nayuma yaleñeliyi, joju ñovu jindi jahaya nyaka  niwuNzambi windi.’ (Aroma 1:20) Neyi mushinshika nakanañachima yuma yaleñayi Nzambi, munateli kudiza maana niñovu jaNleñi yetu.—Masamu 104:24; Isaya 40:26.

Hela chochu, hakwila nawu twiluki nsañu yalala kutalisha hayililu yaNzambi, muntu himuntu watela kudiza Izu daNzambi Bayibolu nikushinshikamu yomweni. Bayi mwiteja amakwawu ayifuukwili yuma yimwatela kutoñojokaku. Ilaña, londelenu kufumba kwaBayibolu kwakwila nawu: ‘Bayi mulondeja mwelañawu antu amakonuku; ilaña yitoñojoka yenu yibalumuki kwikala yayiha; kulonda mushinshiki mwaya muchima waNzambi, diwu wawuwahi, watiyishaña kuwaha, walala chikupu.’ (Aroma 12:2) Chakutalilahu, talenu walala washimunaña Bayibolu hadi Nzambi.

Nzambi wukweti ijina. Ijina daNzambi damwekanaña mapampa kakavulu muBayibolu yejima. MumaBayibolu amavulu, ijina denidi aditena haMasamu 83:18, hahosha nawu: ‘Kulonda akeluki nawu yeyi hohu, yeyi wukweti ijina deyi daYehova, yeyi mukwakubadika kwiwulu deseki dejima.’

Yehova Nzambi watiyaña kutama hela kuwaha nayililu yawantu. Chelili Yehova nayilubuli dehi aIsarela kufuma muwuduñu muEjipitu, mpinji jikwawu adiwileña kufumba kwindi kwakuwahi. Yililu yawu yakudikaña ‘yamutiyishili kutama.’—Masamu 78:40.

Yehova watwakamenaña hamuntu hamuntu. Hampinji yahosheleñayi nawatumbanji twindi, Yesu welili nindi: ‘Tujila twanyanya tuyedi hiyatulandishaña nakadaluku? Hosi kakajila kamu kaholokelaña heseki chakadi Tata yenu [kwilukaku]; ilaña ninsuki jakunyitu yena jajeni ajichinda dehi jejima. Dichi bayi mutiyaña womaku; enu mwalema chakubadika tujila twatuvulu.’—Matewu 10:29-31.

Nzambi hakomokaña antu ekowa hela achisemwa chimu kubadika amakwawuku. Kapostolu Pawulu walejeli aGriki muAtenisi nindi, Nzambi ‘wafumishili kudi muntu wumu nyunza yawantu ejima, kulonda ashakami heseki dejima.’ Wahosheli cheñi nindi, Nzambi “hekala kwakulehi nanetu ejimaku.” (Yililu 17:26, 27) Kapostolu Petulu wahosheli nindi: ‘Nzambi haakamaña antu kumesuku; hakwila munyunza yejima, muntu wamwakamaña yena, welaña mwaloña, amutiyaña kuwaha kudi Nzambi.’—Yililu 10:34, 35.

NKISWINYI YEKALA MUKUKUHWELELA BAYIBOLU? Antu amakwawu akweti ‘iyena hansañu yaNzambi, ilaña iyena denidi hidesekana nansañu yalalaku.’ (Aroma 10:2) Neyi mwiluka chatañishaña Bayibolu hadi Nzambi, hiyakayidimbaku nawa ‘mwakakundama kwakwihi naNzambi.’—Yakoba 4:8.

Neyi munakukeña kwilukilahu nsañu yikwawu, talenu kapetulu 1, “Indi Ntañishilu Yalala Hadi Nzambi Hichumanyi?,” mumukanda waChumanyi Chacheni Chatañishaña Bayibolu? *

[Tumazu twaheshina]

[Mwevulu wudi hefu 6]

Njila yimu yakwilukilamu walala hadi Nzambi yekala yakushinshika hayuma yaleñayi