4 Lekenu Kujinoka

‘Eyi wukweti chikuhwelelu chantesha, wajinokeladi?’—Matewu 14:31.

KUKALANYI KUNATELI KUYIKAÑESHA KWIKALA NACHIKUHWELELU? Atumbanji twaYesu niwena mpinji jikwawu ajinokeleña. (Matewu 14:30; Luka 24:36-39; Yowanu 20:24, 25) Kafwampi, Bayibolu yashimuna kubula chikuhwelelu nawu ‘nshidi yanyakalaña kutulamata.’ (Aheberu 12:1) Kapostolu Pawulu wasonekeli nindi: ‘Antu amakwawu hiyakweti chikuhweleluku.’ (2 Atesalonika 3:2) Bayi neyi antu ejima akweti chikuhweleluku. Hela chochu, amavulu hiyazatilaña hakwikala nachikuhweleluku. Nzambi wakakiswila antu azatilaña hakwikala nachikuhwelelu.

MUNATELI KUMANISHA ÑAHI KUKALA KWENIKU? Ilukenu yuma yayileñelaña kujinoka. Chakutalilahu, kambanji Tomasi wajinokeli neyi chakwila Yesu amusañwili, hela chakwila atumbanji amakwawu ahosheli nawu amumweni. Tomasi wakeñeleña wunsahu. Chumanyi chafuminumu? Yesu  wamulejeli wunsahu wakeñeleñayi kulonda yekali nichikuhwelelu chakola.—Yowanu 20:24-29.

Yehova Nzambi watulejaña ñakwilu yitwakeñaña kuhitila muBayibolu kulonda tubuleña kujinoka. Chakutalilahu, antu amavulu alekaña kumukuhwelela Nzambi muloña amutwikaña muloña mukwiluka hela chakubula kwiluka hamuloña wamajita, madombu, nikukala kwamwekenaña antu. Indi Bayibolu yahoshaña ñahi haniyi nsañu?

Nzambi hayuulaña nfulumendi jawantuku. Yesu wateneni spiritu yabulaña kumwekana Satana nindi diyi “wayulaña mpata yamunu mwishina.” (Yowanu 14:30) Satana wamulejeli Yesu mawanta ejima ahamaseki kulonda yadifukuli kudi yena, nakumwila nindi: “Nukukwinka mawantawa ejima nikulema kwawu, muloña ananyinkuwu ami; yonsu muntu inakeñi kwinka nukumwinkawu.” Yesu wetejeli nindi Satana wukweti nañovu jamawanta wenawa. Wahosheli nindi: “Anasoneki nawu, Kadifukulaña kudi Yehova Nzambi yeyi, diyi wakakalakelaña kanka windi hohu.” (Luka 4:5-8) Antu atela kumwinka Satana muloña ninfulumendi jawantu hamakabi amonañawu, bayi Nzambuku.—Chimwekeshu 12:9, 12.

Yehova Nzambi keña yafumishuhu yuma yejima yakojejaña makabi. Waloñesha dehi Wanta hela nfulumendi yekala mumakasa aMwanindi Yesu Kristu, kulonda kuyuula antu. (Matewu 6:9, 10; 1 Akorinda 15:20-28) Hakushikija wuprofwetu waBayibolu, nsañu yayiwahi yaniwu Wanta anakuyishimwañena mukaayi kejima. (Matewu 24:14) Iwu Wanta keña wufumishuhu antu ejima awudimbululaña nawa wakafumishahu yuma yejima yakojejaña makabi amonañawu antu.—Danyeli 2:44; Matewu 25:31-33, 46; Chimwekeshu 21:3, 4.

NKISWINYI YEKALA MUKUKUHWELELA BAYIBOLU? Antu ajinokaña adi neyi mankanda abankañilaña niniku niniku “nampepela jakuleja kwawantu jejima, namaleñu nimakasu awantu.” (Aefwesesa 4:14; 2 Petulu 2:1) Kwambukaku, antu elukaña ñakwilu yalala yamalwihu awu ‘emanaña chakola muchikuhwelelu.’—1 Akorinda 16:13.

A Yinsahu jaYehova, ansoneki ayinu magazini, akukeña kuyikwasha kuwana ñakwilu yamalwihu ayileñelaña mujinokeña. Anayitambiki kupompa nawu kulonda mudilukili enu aweni ntañishilu yawu. Neyi mwila mwenimu, mukukolesha chikuhwelelu chenu mudi Nzambi chikupu.

Neyi munakukeña kwilukilahu nsañu yikwawu, talenu kapetulu 8, “Wanta waNzambi hiChumanyi?,” nikapetulu 11, “Muloñadi Nzambi Chetejelayi Makabi?,” mumukanda waChumanyi Chacheni Chatañishaña Bayibolu? *

[Tumazu twaheshina]

[Mwevulu wudi hefu 9]

Antu elukaña ñakwilu yalala yamalwihu awu, ekalaña nachikuhwelelu chakola