Dikiñenu Kudi aSpiritu Atama

JAMES amukulishilili hachitutu chekala kwakulehi chaMalaita, hayitutu yaSolomon. Kufuma tuhu kuwansi windi, amulejeleña kulemesha aspiritu. Wahosheli nindi: “Hinehwileña aspiritu kulonda akatishi antuku, hela chochu, natoñojokeleña nami chakadi kuzatisha rarafono, [yaaku yachisemwa yakulomba wukwashu wawaspiritu] hakudikiña kuyuma yatama hinadi kwikala namuzañaluku.”

Neyi chochakuhwelelawu antu mumaluña amavulu amukaayi, antu ashakamaña hayitutu yaSolomon akuhwelela nawu aspiritu atama anateli kukatisha hela kukwasha muntu. Kafwampi, antu amavulu akuMelanesia amonaña aspiritu atenañawu nawu amawahi neyi akweti luwi, hiyayitiyaña womaku.

Kukuhwelela munyidimu yawaspiritu kwamwekenaña munjila jashiyashana. Chakutalilahu, hampinji yadiñayi James kansi, ambanda amumukala wawu eñijileña anyanawu mumatala chatiyawu kajila katenañawu nawu korokoro kanakwimba. Muloñadi? Akuhweleleli nawu kajila kenaka chikemba akukatishahu muntu wumu.

Antu amakwawu amumukala ashaña ilola ditooka dadimena hachipamba chahewulu chayisu yamatala awu. James niyena washili ilola denidi, nakukuhwelela nindi dinateli kumukiña kudi aspiritu atama. Nawa neyi wudi kumudimu, wakuñulwileña nkuuku yayakudya yejima yashalileñahu hachayili nakuyihembela mwipakumuna kulonda kuyinata mpinji yacheñi. Wachiinineña nindi muloji nateli kunona nkuuku yeniyi nakumulowa nachu.

Hela chakwila yaaku yeniyi hiyazatikaña mwiluña denuku, hadaha mwazatishahu dehi tushidikilu twachisemwa neyi James kulonda mudikiñi kudi aspiritu atama. Munateli kukuhwelela nenu neyi mubula kuzatisha tushidikilu twenitu akuyikatisha kudi aspiritu.

Neyi mwalemesha Bayibolu, chakadi kujina mukukeña kwiluka chiyahosha hakwakula awa malwihu analondeluhu: (1) Indi aspiritu atama anateli kuyikatisha ñahi? (2) Komana chalala kuzatisha tushidikilu twachisemwa kunateli kukojeja kuyikatisha kudi andemoni? (3) Munateli kudikiña ñahi chikupu kudi aspiritu atama nikwikala namuzañalu?

Aspiritu Atama Chiyakatishañawu Antu

Bayibolu yashimuna nawu aspiritu atama hiyekala aspiritu awafuku. Izu daNzambi dahosha nawu: “Amomi eluka dehi nawu, Twakafwa;  hakwila afu hiyeluka chumaku.” (Mukwakutaŋisha 9:5) Kafwampi, aspiritu atama, hiyañelu adikaña naNzambi adibomba naSatana kulonda kudimba antu.—Chimwekeshu 12:9.

Nsona jahosha hatooka nawu twatela kudikiña kudi aspiritu atama. Kapostolu Pawulu wasonekeleli akwaKristu amuEfwesesa nindi: “Hitwalwishaña nawantu akweti nyijimba namashuku, twalwishaña . . . nawaspiritu atama amumawulu.” Kapostolu Petulu wamuteneni nyuli wawaspiritu atama ejima, Satana Diyabolu nindi, wudi neyi ‘mutupa wabulumaña, wunakutambatamba nakukeñakeña akudyayi.’—Aefwesesa 6:12; 1 Petulu 5:8.

Satana wakatishaña antu sweje-e kuhitila mukuyidimba, hela kuyeseka kulonda akoñi yuma yamuhilishaña Nzambi. Bayibolu yahosha nawu Satana “wadifwikijaña neyi kañelu kachejeji.” (2 Akorinda 11:14) Wadifwikijaña neyi hispiritu wakiñaña, komana yitoñojoka yindi yatama. Satana waluwañeshaña yitoñojoka yawantu kulonda abuli kumwiluka nawa abuli kwiluka walala hadi Nzambi. (2 Akorinda 4:4) Chumanyi chafwilañayi hakuluwañesha antu?

Satana wakeñaña antu adifukuleña kudi yena, chili aneluki chili aneluki wanyi. Hampinji yadiñayi Yesu Mwana kaNzambi hamaseki, Satana wakeñeli nindi ‘yadinati heseki nakudifukula’ kudi yena. Yesu wahosheli nindi: “Fumaku eyi Satana, muloña anasoneki nawu, Kadifukulaña kudi Yehova Nzambi yeyi.” (Matewu 4:9, 10) Yesu wakaanini kwila chuma chidi chejima chamwekesheleña nawu nakumwovwahila Satana, chadi kwikala chuma chakudifukula.

Yehova diyi wabadika ñovu aspiritu ejima nawa hamba keteja antu amwovwahilaña kuyikatisha haya nyakaku. (Masamu 83:18; Aroma 16:20) Hela chochu, neyi tunakukeña kumuzañalesha Yehova Nzambi neyi cheliliyi Yesu, twatela kuleka yaaku yejima yamwekeshaña kwovwahila Satana hela andemoni jindi. Hakwila nawu tubuleña kwovwahila Satana hela andemoni jindi, twatela kwiluka yaaku yachisemwa yaleñelaña kudifukula kudi aspiritu atama. Munateli kwila ñahi mwenimu?

Ilukenu Tushidikilu Twamuhilishaña Nzambi

Yehova Nzambi wasoñamishili antu jindi akushankulu, aIsarela kubula kwimbujola yaaku yachisemwa chanyunza yadiña kwakwihi. Wahosheli nindi: “Kudeyi bayi kwakamwekana muntu . . . mukwakuhoña, hela mukwakuhoña natutumbwa, hela wasansa nyiseñu, hela mukwakupanda, hela mukwakukaya.” Hakuhosha hadi antu adiña nakwimbujola tushidikilu twenitu, Bayibolu yahosha nawu: “Antu ejima elaña yumiyi Yehova wayimona nindi hiyakwakushimana.”—Kuhituluka 18:10-12.

Dichi dinu, hampinji yimunakushinshika tushidikilu twavula mwiluña denu, shinshikenu hamalwihu analondeluhu: Komana kashidikilu kenaka kakoleshaña kukuhwelela mukusansa nyiseñu? Komana kashidikilu kenaka kakundama kuyuma yakupanda yabula wumi yamonañawu nawu yikweti nañovu yakiñaña? Komana kabombelamu kukaya hela kudikiña kunyikayi? Komana aka kashidikilu kabombelamu kwovwahila spiritu wudi wejima chatela kwovwahila Yehova hela ñimenu yindi watondayi, Yesu?—Aroma 14:11; Afwilipi 2:9, 10.

Chalema nankashi kukaana tushidikilu twejima twakoleshaña yaaku yamuchidiwu. Muloñadi? Kapostolu Pawulu amoneneni kusoneka nindi: ‘Himukutwesha kwila mutambula kumesa yaYehova, mutambula nawa kumesa yawandemonuku.’ Wababesheli nindi antu esekaña kuzañalesha Nzambi niaspiritu amakwawu ‘amutiyishaña Yehova mukawu.’ (1 Akorinda 10:20-22) Yehova Nzambi wakeñaña nawa watelela kumwovwahila chikupu.—Kwidika 20:4, 5.

Shinshikenu cheñi ilu lwihu: Komana aka kashidikilu kakoleshaña yitoñojoka yakwila nawu muntu hakweti muloña hayuma yelañayuku? Chakutalilahu, mumaluña amavulu akaanisha kuhumañana neyala hela  namumbanda henohu kanda mudisumbuli nikwila wuvumbi nawa Bayibolu yahiisha yumiye. (1 Akorinda 6:9, 10) Hela chochu, yisemwa yikwawu yakuPacific, yaaku yamuchidiwu anateli kuyiteja neyi kankaña yahosha nindi amwila mepeka dihafuma kwila wuvumbi.

Hela chochu, Bayibolu yatañishaña nawu twamba kulumbulula hayuma yitwelaña. (Aroma 14:12; Aŋalija 6:7) Chakutalilahu, mumbanda watachi, Evu, chahosheliyi nindi: “Kapela—diyi wandimba dichi nadya,” watoñojokeli nindi Satana diyi wamudimbili kulonda yabuli kumwovwahila Nzambi. Dichi, Yehova wamufwishili Evu namuloña hayuma yakoñeliyi. (Kutachika 3:13, 16, 19) Anetu nawa Nzambi watuhiishaña namuloña hayililu yetu.—Aheberu 4:13.

Chumanyi Chimwatela Kwila?

Neyi munakukeña kumuzañalesha Nzambi nikutiyilila nshimbi jamuBayibolu, mwatela kuzata hakumina ñovu jenu jejima kulonda mudikiñi kudi Satana niandemoni jindi. Antu akashinshi ashakamineña muEfwesesa muyaaka nkulakaji yakusambila atwimikila chakutalilahu chachiwahi kutalisha haniyi nsañu. Hakwambuka chikupu kukuluwañesha kwawaspiritu atama, apompesheli nyikanda yawu yejima yakundama kukupanda “nakuyochela hatooka.”—Yililu 19:19.

Henohu kanda ochi nyikanda, antu wenawa, ‘etejeli mwatamishiluwu, nikushimuna mweliluwu.’ (Yililu 19:18) Hamuloña wakwila yuma yatañishiliyi Pawulu hadi Kristu yayishikili hamuchima, chayisañumwini kukisañana nyikanda yawu yakupanda. Ahimpili cheñi yililu yawu kutalisha hayaaku yachisemwa.

Chalala kuleka yaaku yachisemwa kunateli kwikala kwakala. James, atenawu hakusambila, wadiña nakukala kweniku. Watachikili kudiza Bayibolu nawaYinsahu jaYehova nawa wadiluñishili yuma yadizileñayi. Hela chochu, watwalekeluhu kuzatisha rarafono. Chashinshikiliyi yililu yindi kutalisha haniyi yaaku, waweni kwila nindi wakuhwelela muyikaninu yaYehova yakumbidi, ilaña watoñojokeli nindi hakwila yadikiñi kuyuma yatama makonu, watela kuzatisha yaaku yachisemwa.

Chumanyi chamukwashili James kuhimpa yitoñojoka yindi? Wahosheli nindi: “Nalombeleña kudi Yehova kulonda yankiñi nikunkwasha hakwila nawu nimukuhweleli. Hampinji yoyimu nalekeli yaaku yami yachisemwa.” Komana kudi chuma chatama chamumwekena? James wahosheli nindi “Kwosi chuma chatama chinanmwekeni, ilaña nadizi kumukuhwelela Yehova. Ichi Yehova nekali ibwambu dami chikupu.” Kafwampi, James nakalakali neyi mukwakushimwina wampinji yejima hadi yaaka yitanu nayiyedi, nakukwasha amakwawu kudiza yuma yatañishaña Bayibolu.

Komana kwila mumwimbujola James nehi? Shinshikenu tushidikilu twelañawu mwiluña denu, nawa zatishenu ‘maana’ enu kulonda mwiluki neyi twesekana ‘nankeñelu yaNzambi.’ (Aroma 12:1, 2) Dichi, ikalenu nawulobu wakwambuka kuyaaku yakupesha. Neyi mwila mwenimu, munateli kukuhwelela nenu Yehova ‘wukuyitambula’ nikuyikiña. (2 Akorinda 6:16-18) Kufwana James, mukamona walala wachikaninu chamuBayibolu chakwila nawu: ‘Ijina daYehova hikaposhi kakola, mukwakuloña hakutemukilamu, amwenenamu ninzo-o.’—Yishimu 18:10.

[Mwevulu wudi hefu 30]

“Korokoro”

[Mazu aKusakilila]

Courtesy of Dr. Bakshi Jehangir

[Mwevulu wudi hefu 30]

Kankaña nakunonojola nkuuku yayakudya kulonda abuli kuyizatisha hakulowana nachu