Indi Chikuhwelelu hiChumanyi?

MUNATELI kulumbulula ñahi chikuhwelelu? Amakwawu esekejaña chikuhwelelu nayuma yamukunkulwayi. Mukwakusoneka nsañu walema wakwituña daAmerica H. L. Mencken wateneni chikuhwelelu nindi “hikukuhwelela yuma yamukunkulwayi yikabula kumwekena.”

Kwambukaku, Bayibolu yalumbulula chikuhwelelu nawu hichuma chalala nawa chamwekanaña. Izu daNzambi dahosha nawu: ‘Chikuhwelelu hikutalila yuma yalala yitwachiñejaña netu yakamwekana, wunsahu wamwekanaña wayuma yalala hela yakadi kumonewa.’—Aheberu 11:1.

Chineli antu atoñojokaña mwashiyashana kutalisha hachikuhwelelu, tushinshikenu ñakwilu yanawa malwihu analondeluhu:

• Indi Bayibolu yalumbulula ñahi chikuhwelelu munjila yambukaku nachahoshañawu antu amavulu?

• Muloñadi chichalemena kwikala nachikuhwelelu chashimunawu muBayibolu?

• Munateli kukolesha ñahi chikuhwelelu chenu?

Tayito Didi niWunsahu Walala

Hampinji yasonekeleñawu mukanda wamuBayibolu waAheberu, izu daGiriki dabalumunawu nawu ‘kutalila yuma yalala’ adizatishileña nankashi. Izu denidi davulileña kumwekana muyipapilu yakulanda nakulandulula nachu nawa dahanineña chikuhwelelu chakuheta chuma kumbidi. Dichi mukanda wumu washimuna nawu Aheberu 11:1 atela kuyibalumuna nawu: ‘Chikuhwelelu hitayito didi yayuma yitwachiñejaña netu yakamwekana.’

Neyi mwalandahu dehi chuma kukampani yimwakuhwelela nawa mwatalilili nenu akuyiletela chumochu, dikwila nawu mwamwekesheli chikuhwelelu chamuchidiwu. Lisiti yayinkeluwu yayiletesheli kukuhwelela kampani kumwalandili ochu chuma. Munjila yimu, ayina lisiti yadiña tayito didi yenu yamwekesheleña nawu mwakatambwila chuma chimwalandili. Neyi chakwila mwajimbesheli lisiti hela kuyinata, himwadi kwikala nawunsahu wakutambwilahu chumochuku. Chochimu, antu akuhwelela nawu Nzambi wakashikija yikaninu yindi nawu akuhwelela kutambwila yuma yachiñejañawu. Munjila yikwawu, antu abula chikuhwelelu, hela ajimbeshaña chikuhwelelu, hiyanateli kutambwila yuma yakanayi Nzambuku.—Yakoba 1:5-8.

Nhoshelu yamuchiyedi yabalumunawu haAheberu 11:1, nawu ‘wunsahu wamwekanaña,’ yatalisha kuwunsahu wamwekesha chuma, sweje-e chambukaku nachuma chamwekanaña nawu chalala. Chakutalilahu, mutena wamwekanaña neyi wanyeñumukaña iseki, waselelaña kumusela, wahitaña mwiwulu nakuholokela kumujika. Hela chochu, wunsahu wakudiza tutumbwa niitañwa nimakumi wamwekesha nawu mutena hiwanyeñumukaña isekuku, ilaña iseki didanyeñumukaña. Chimweluka iwu wunsahu nakwiteja nenu walala, dikwila nawu mudi nachikuhwelelu muyuma yeniyi, hichikweti muloña nayuma yimwamonaña namesu enuku. Chikuhwelelu hichamukunkulwayuku. Chikuhwelelu hichaya mukwila nawu kukuhwelela yuma chakubula kuyilukaku. Ilaña chayinkaña wuswa wakwiluka yuma chiyidi.

Indi Chikuhwelelu Chakola Chalema Ñahi?

Bayibolu yakoleshaña kwikala nachikuhwelelu chamuchidiwu—chikuhwelelu chakola chashindamena hawunsahu walala, hela chakwila chakeñekaña nawu tuhimpi yuma yitwakuhwelela. Chikuhwelelu chamuchidiwu chalema. Kapostolu Pawulu wasonekeli nindi: ‘Chakadi kukuhwelela hichinatweshi kumutiyisha Nzambi kuwahaku; muloña muntu wukwinza kudi Nzambi chiña akuhweleli nindi wudi kwoku, nindi wasomwenaña antu amukeñakeñaña.’—Aheberu 11:6.

Kwekala kukala kwakuvulu kunateli kuyikañesha kwikala nachikuhwelelu chakola. Ilaña neyi muzatisha njila jiwana jinashimunuwu hamafu analondeluhu, munateli kwikala nachikuhwelelu chakola.