Kalama Washinshika Niizaza Dindi Dalombolaña

‘Kalama washinshika wukweti maana yowinyi, akushilawu kudi mwanta windi mudimu wakutala mukala windi, enkaña añamba jindi yakudya yawu hayinkelañawu?’—LUKA 12:42.

1, 2. Lwihwinyi lwalema lwehwiliyi Yesu kutalisha hamafuku akukuminina?

 HAMPINJI yashimwineñayi chinjikijilu chikweti yuma yayivulu yashiyashana, Yesu wehwili ilu lwihu nindi: ‘Indi nduñu wamaana nikashinshi anenkuwu kudi mwanta windi mudimu wakuhemba amwitala dindi, nakuyinka yakudya yawu hampinji yatelela hinyi?’ Yesu watwalekeluhu nindi, nduñu yeniwu akamwinka wuloku hamuloña wakashinshi kindi kuhitila mukumwinka mudimu wakuhemba yuma yejima yahetayi Mwanta windi.—Matewu 24:45-47.

² Hahitili tukweji twatuvulu kufuma hampinji yehwiliyi Yesu lwihu lwamuchidiwu. (Tañenu Luka 12:42-44.) Wamuteneni nduñu nindi “kalama.” Kalama himuntu wahembaña itala hela mukwakutala añamba. Ilaña, kalama wekala cheñi ñamba. Indi iwu nduñu, hela kalama hinyi, nawa wahanaña ñahi ‘yakudya hampinji  yatelela’? Chalema kudi wejima wetu kwiluka njila yazatishañawu hakuhana yakudya yakuspiritu.

3. (a) Indi akwakuhoshahu amuKristendomu esekaña ñahi kulumbulula mazu ahosheliyi Yesu kutalisha hadi “nduñu”? (b) Indi “kalama” hela “nduñu” hinyi, nawa ‘Izaza dawañamba’ hela ‘amwitala dindi’ hiyanyi?

³ Akwakuhoshahu amuKristendomu kakavulu amonaña awa mazu aYesu neyi atena antu akweti yifulu hakachi kawantu aditenaña nawu hiyakwaKristu. Hela chochu, Yesu “mwanta” wamuchakutalilahu, hahosheli nindi kwakela anduñu amavulu akapalañena muyipompelu yashiyashana yamuKristendomuku. Ilaña, washimwini hatooka nindi kwakela “kalama” hela “nduñu,” wumu hohu akenkawu mudimu wakuhemba yuma yindi yahetayi yejima. Kwesekeja nachalumbululaña ayinu magazini, kalama wemenañaku “kamukanka kawanyikoku kantesha” kawatumbanji awayishewa neyi izanvu hela izaza. MuNsañu Yayiwahi yaLuka, Yesu wateneni hadi antu wenawa. (Luka 12:32) Nhoshelu yakwila nawu ‘Izaza dawañamba’ hela ‘amwitala dindi’ yashimuna hezaza dodimu ilaña yakonkomwenaña hamudimu wukwetuwu hamuntu hamuntu. Chumichi chaleteshaña kwihula lwihu lwaluwahi lwakwila nawu, Komana muntu himuntu wamunidi izaza danduñu wazatañaku mudimu wakuloñesha yakudya yakuspiritu yahampinji yatelela? Tunateli kwiluka ñakwilu neyi tushinshika chachiwahi chahosha Nsona haniyi nsañu.

Kambuña aYehova muMpinji yaKunyima

4. Indi Yehova wateneni munza waIsarela wakushankulu nindidi, nawa chumanyi chalema kwiluka haniwu munza?

⁴ Mumpinji yaIsarela wakushankulu, Yehova wateneni antu jindi nindi, kambuña. “Yehova nindi, Yenu [amavulu] ayinsahu jami [amavulu] nikambuñami [wumu] inatondi.” (Isaya 43:10) Antu ejima amumunza ayibombeleli mwiizaza dakambuña wumu. Hela chochu, chalema kwiluka nawu atupristu hohu hamu nawaLevi abulili kwikala atupristu diwu adiña namudimu wakutañisha munza Nshimbi.—2 Kushindulula 35:3; Malaki 2:7.

5. Kwesekeja naYesu, chumanyi chalema chahimpikili?

⁵ Komana nduñu wateneniyi Yesu, wadiña munza waIsarela? Piñi. Tweluka chumichi muloña wamazu ayilejeliyi Yesu aYudeya amumafuku indi nindi: ‘Wanta waNzambi akayamukawu, akawinka munza wakasoñaña nyikabu yawu.’ (Matewu 21:43) Chalala, kwadiña kuhimpika. Yehova wakazatisha munza wawuha. Hela chochu, kutalisha hanshimbi jakuspiritu, mudimu wanduñu wamuchakutalilahu chaYesu wadifwana namudimu wakambuña kaNzambi wamuIsarela wakushankulu.

Nduñu waKashinshi Namwekani

6. Munzanyi wawuha watachikili haPentekosta 33 C.E., nawa anyi ekalili muniwu munza?

⁶ Munza wawuha, ‘Isarela wambala waNzambi’ watuñewa nawaIsarela akuspiritu. (Aŋalija 6:16; Aroma 2:28, 29; 9:6) Munza weniwu watachikili hampinji yechililuwu spiritu yaNzambi haPentekosta 33 C.E. Kuhiñahu, akwaKristu ejima awayishewa ekalili munza wunakukalakala neyi izaza danduñu datondawu kudi Mwanta, Yesu Kristu. Muntu wejima wamuniwu munza amwinkeli mudimu wakushimwina nsañu yayiwahi nikwilisha atumbanji. (Matewu 28:19, 20) Komana muntu wejima wamunidi izaza wukweti mudimu wakuloñesha yakudya yakuspiritu yahampinji yatelela? Tushinshikenu Nsona chijikwakula ilu lwihu.

7. Hakusambila, apostolu adiña namudimwinyi, nawa mudimwinyi wukwawu watambwililuwu?

⁷ Hampinji yatondeliyi Yesu apostolu jindi 12, mudimu wawu waweni wadiña wakuya nakushimwina nsañu yayiwahi kudi antu. (Tañenu Maku 3:13-15.) Mudimu weniwu wesekeni nachalumbuluka izu dachiGriki dakwila nawu apostolos, dafuma kwiizu dalumbuluka nawu “kutemesha.” Hela chochu, chimwahitili mpinji helili chipompelu chawakwaKristu chidi dehi kwakwihi nakutachika,  mudimu wakapostolu wekalili ‘wakutwaminina.’—Yililu 1:20-26.

8, 9. (a) Mudimwinyi waweni wakalakeleñawu apostolu 12? (b) Anyi amakwawu enkeluwu nyidimu yikwawu neyi chetejeluwu kudi izaza dalombolaña?

⁸ Mudimwinyi waweni wakalakeleñawu apostolu 12? Tunateli kuwana ñakwilu muyuma yamwekeni hanyima yefuku daPentekosta. Chikwavulumukili kutoba kutalisha hakwinka antuluwa yakudya, apostolu 12 apompesheli atumbanji nakuyila nawu: “Hichachiwahi etu kushiya mazu aNzambi nakukalakela kujimesaku.” (Tañenu Yililu 6:1-6.) Kufumahu apostolu atondeli amana kwetu apama kuspiritu kulonda kukalakala iwu ‘mudimu wakeñekeleña’ hakwila nawu apostolu adikiteña chikupu ‘mumudimu wakushimwina izu.’ Chumichi chaletesheli ekali nankisu jaYehova chakwila ‘izu daNzambi datandili; nawa atumbanji avulili nankashi muYerusalema.’ (Yililu 6:7) Dichi apostolu diwu adiña namudimu waweni wakudyisha antu kuspiritu.—Yililu 2:42.

⁹ Mukuhita kwampinji amakwawu ayinkeli nyidimu yamaneni. Chipompelu chakuAntiyoki chatemesheli aPawulu naBaranaba kulonda kukalakala neyi amishonali nawunlomboli waspiritu yajila. Niwena ayilukili neyi apostolu hela chakwila hiyadiña hakachi kawapostolu 12 akusambilaku. (Yililu 13:1-3; 14:14; Aŋalija 1:19) Izaza dalombolaña dadiña muYerusalema detejeli kutondewa kwawu. (Aŋalija 2:7-10) Kufuma haniyi mpinji, Pawulu watachikili mudimu wakuhana yakudya yakuspiritu. Wasonekeli mukanda windi watachi wonenawu.

10. Komana akwaKristu awayishewa ejima amuyaaka nkulakaji yakusambila, adiña namudimu wakuloñesha yakudya yakuspiritu? Lumbululenu.

¹⁰ Hanu dinu, akwaKristu awayishewa ejima adiña namudimu wakutwaminina mudimu wakushimwina nikuloñesha yakudya yakuspiritu? Inehi. Kapostolu Pawulu watuleja nindi: “Antu ejima hiyapostolu, tahindi? Antu ejima hiyatuprofwetu, tahindi? Antu ejima hiyankuluñaña, tahindi? Antu ejima hiyakwakukoña nyidimu yañovu, tahindi?” (1 Akorinda 12:29) Hela chakwila akwaKristu awayishewa ejima azatileña mudimu wakushimwina, antesha hohu, amayala ashiyashana atanu nasatu diwu azatishiluwu hakusoneka Nyikanda yachiGriki 27 yawakwaKristu.

Nduñu waKashinshi waMakonu

11. Indi nduñu amwinka mudimu wakuhemba ‘yumanyi’?

¹¹ Mazu aYesu asonekawu haMatewu 24:45 ashimuna hatooka to-o nawu, kwakekala izaza danduñu wamaana nikashinshi hanu hamaseki mumafuku akukumininaku. Chimwekeshu 12:17 yatena antu wenawa nawu ‘ashalahu’ ambutu yamumbanda. Hamu neyi izaza, ashalahu wenawa ayinka mudimu wakuhemba yuma yejima yahetayi Kristu hanu hamaseki. ‘Yuma’ yamwinkawu kalama washinshika kuhemba hiyuma yaMwanta yejima yahamaseki, yabombelamu antu akashakama hamaseki akayulañawu kudi Wanta nimatala azatishañawu mumudimu wakushimwina nsañu yayiwahi.

12, 13. Indi mukwaKristu welukaña ñahi nindi amutambika mwiwulu?

¹² Indi mukwaKristu welukaña ñahi neyi chakwila wukweti chikuhwelelu chakushakama mwiwulu nawa wudi hakachi kezanvu dawashalahu aIsarela akuspiritu? Ñakwilu yawanikaña mumazu ahosheliyi kapostolu Pawulu kudi akwawu akweti kuchiñeja kwokumu kwakuya mwiwulu nindi: ‘Muloña antu ejima alombolañawu kudi spiritu yaNzambi, diwu anyana kaNzambi. Muloña himwatambwili spiritu yawuduñu mwaka mutiyi cheñi womaku; mwatambwili spiritu yakwikala anyana, yowu twatambikaña nachu netu, Tata Yami! Spiritu yayeni yashimunaña wunsahu hamu naspiritu yetu, nindi muyanyana kaNzambi. Neyi tuyanyana komana tudi answana; answana aNzambi akuswana chimu naKristu, neyi tukumona nindi makabi, kulonda akatulemeshi chimu nindi nawa.’—Aroma 8:14-17.

¹³ Tuhoshi netu, antu wenawa ayiwayishaña  naspiritu yaNzambi yajila nawa atambwilaña “kutambika” kwamwiwulu. (Aheberu 3:1.) Dichi, Nzambi diyi wayitambikaña. Hiyajinokaña hakwiteja mutambi weniwu hela kutiya woma wakwikala anyana kaNzambuku. (Tañenu 1 Yowanu 2:20, 21.) Dichi hiyaditondelaña kwikala naniku kuchiñejaku, ilaña, Yehova wayilamikaña chilamiki, hela spiritu yindi yajila.—2 Akorinda 1:21, 22; 1 Petulu 1:3, 4.

Kwikala naYitoñojoka Yayiwahi

14. Indi awayishewa amonaña ñahi kutambika kwayitambikawu?

¹⁴ Indi awayishewa atela kudimona ñahi hampinji yinakutalilawu wuloku wawu wamwiwulu? Eluka nawu hela chakwila atambwila mutambi wawuwahi, himutambi hohu. Atela kwikala ashinshika sampu nikukufwa hakwila nawu akatambwili iwu wuloku. Mukudizoza, atiyaña neyi chatiyili Pawulu hampinji yahosheliyi nindi: “Enu ana kwetu, hinatoñojoki nami nakwatuhu dehuku; ilaña nelaña chuma chimu hohu, navulamenaña yuma yamunyima, nafwilaña nami nakashiki kuyuma yakumbidi. Nadikwatishaña nankashi, nakukabila nami nakashiki kumufunda, akansomoni kutambika kwaNzambi kwamudi Kristu Yesu kwamwiwulu.” (Afwilipi 3:13, 14) Awayishewa ashalahu atela kuzata nañovu kulonda ‘endeña mwatelela kutambika kwayitambikiluwu, nakudizoza kwejima,’ nakwila mwenimu ‘nawoma nikuzaala.’—Aefwesesa 4:1, 2; Afwilipi 2:12; 1 Atesalonika 2:12.

15. Indi akwaKristu atela kumona ñahi antu adyaña kuyifwikija haChanukishu, nawa awayishewa adimonaña ñahi?

¹⁵ Munjila yikwawu, indi akwaKristu amakwawu atela kumona ñahi muntu wunadimoni nindi nawayishewi nawa natachiki kudya kuyifwikija haChanukishu? Hiyatela kumusompeshaku. Iyi nsañu yakundama hakachi kaYehova namuntu yomweni. (Aroma 14:12) Hela chochu, akwaKristu awayishewa chikupu hiyatela kukeña nawu ayilemesheña nankashuku. Hiyakuhwelela nawu chiyekalawu awayishewa eluka yuma yadimena kubadika yelukawu antu amakwawu ‘amwizaza deneni’ akuluka yitembuku. (Chimwekeshu 7:9) Hiyakuhwelela nawu akweti spiritu yajila nankashi kubadika yekala nawalundanawu ‘anyikoku acheñuku.’ (Yowanu 10:16) Hiyakeñaña kuyilemesha  munjila yadimena; indi kwiji kuhosha nawu chiyadyaña kuyifwikija chayileñela kwikala abadika aeluda atondawu muchipompeluku.

16-18. (a) Komana awayishewa ejima ashimunaña nsañu yayiha yakuspiritu? Lumbululenu. (b) Muloñadi Izaza Dalombolaña chidabulilaña kwihula mwakwilila kudi ejima ahoshaña nawu awayishewa?

¹⁶ Komana awayishewa ejima amukaayi kejima atiyañanaña wumu namukwawu kulonda kushimuna nsañu yayiha yakuspiritu? Inehi. Hela chakwila izaza danduñu dikweti mudimu wakudyisha amwitala dakuspiritu, bayi neyi muntu himuntu wamunidi izaza wukweti mudimu wowumuku. (Tañenu 1 Akorinda 12:14-18.) Neyi chitwamona hakusambila, muyaaka nkulakaji yakusambila awayishewa ejima adiña namudimu walema wakushimwina. Ilaña, azatishili antu antesha hohu hakusoneka nyikanda yamuBayibolu nikutwaminina chipompelu chawakwaKristu.

¹⁷ Chakutalilahu: Mpinji jikwawu Nyikanda yahosha ‘hachipompelu’ nawu chasompeshaña. (Matewu 18:17) Hela chochu, aeluda emenañaku chipompelu diwu hohu azataña mudimu wakusompesha. Aeluda hiyehulaña antu ejima amuchipompelu kulonda ashimuni yuma yinakutoñojokawu henohu kanda afuukuluhu mwakwililaku. Azataña mudimu wayikunjikawu; emenañaku chipompelu chejima.

¹⁸ Chochimu, makonu awayishewa antesha diwu akweti mudimu wakwimenaku izaza danduñu. Atuña Izaza Dalombolaña dawaYinsahu jaYehova. Awa amayala awayishewa naspiritu atwamininaña mudimu waWanta nimudimu wakudyisha antu yakudya yakuspiritu. Neyi chichadiña muyaaka nkulakaji yakusambila, Izaza Dalombolaña hidehulaña muntu wejima wamwizaza danduñu henohu kanda afuukuluhu mwakwililaku. (Tañenu Yililu 16:4, 5.) Hela chochu, aYinsahu ejima awayishewa azataña mudimu walema wakwaañula wunakuzatewa makonu. Hamu neyi izaza, ‘nduñu wamaana nikashinshi’ himujimba wumu, ilaña akweti nyidimu yashiyashana hamuntu hamuntu.—1 Akorinda 12:19-26.

19, 20. Antu amwizaza deneni amonaña ñahi ‘nduñu wamaana nikashinshi’ Niizaza dindi Dalombolaña?

¹⁹ Indi iyi nsañu yitunadizi yinateli kukwasha ñahi antu anakuvulilaku amwizaza deneni akweti chikuhwelelu chakushakama hanu hamaseki haya nyaka? Hakwikala hakachi kayuma yahetayi Mwanta, atiyaña kuwaha kuzatila hamu hayuma yejima yafuukulaña Izaza Dalombolaña, demenañaku ‘nduñu wamaana nikashinshi.’ Antu amwizaza deneni ahamekaña yakudya yakuspiritu yaloñeshañawu kuhitila mudi Izaza Dalombolaña. Hampinji yoyimu, antu amwizaza deneni ovwahilaña izaza danduñu, ilaña hiyaswejaña kulemesha chikupu muntu wudi wejima wadimonaña nindi wekala mwiizaza danduñuku. MukwaKristu wawayishewa chikupu naspiritu yaNzambi hatela kukeña nindi amulemesheña munjila yamuchidiwuku.—Yililu 10:25, 26; 14:14, 15.

²⁰ Chili tudi ‘amwitala’ dawashalahu awayishewa, chili tudi amwiizaza deneni, tufwilenu kuzatila hamu nakalama wakashinshi Niizaza dindi Dalombolaña. Dichi wejima wetu ‘tutoneña’ nikutwalekahu kwikala ashinshika ndo-o nikunsa.—Matewu 24:13, 42.

Munakwanuka?

• Indi ‘nduñu wamaana nikashinshi’ hinyi, nawa amwitala hiyanyi?

• Indi muntu welukaña ñahi nindi amutambika mwiwulu?

• Hiyanyi akweti mudimu waweni wakuloñesha yakudya yayiha yakuspiritu?

• Indi muntu wawayishewa watela kudimona ñahi?

[Malwihu aKuzatisha haKudiza]

[Mwevulu wudi hefu 28]

Makonu, Izaza Dalombolaña demenañaku izaza danduñu wamaana nikashinshi. Nimuyaaka nkulakaji yakusambila mwadiña kuloñesha kwadifwanaku