Yuma Yitwadizilaña Kudi Yesu

Kutalisha ‘haKukuma Kwetuña’

Yumanyi yikakuma?

Yesu amwihwili kudi atumbanji twindi nawu: ‘Chinjikijilwinyi chakwiluka nachu hiwamba kenzeyi, nihamba kakuma nyaka yamakonu?’ (Matewu 24:3) Hakwakula lwihu lwenilu, Yesu hahosheli nindi iseki dadeni dikakumaku. Hakusambila, Yesu wahosheli ‘hakukuma kwanyaka yinu’ nawa wazatishili nhoshelu yeniyi hakutena ituña dejima ninsakililu jalombolewaña naSatana. (Matewu 13:22, 40, 49) Idi didi ituña dateneniyi Yesu hampinji yahosheliyi nindi: “hakenza kukumisha.”—Matewu 24:14.

Indi Yesu wahosheli nindidi hakukuma kwetuña?

Kukuma kwadinu ituña datama ‘hinsañu yayiwahi.’ Yesu wahosheli nindi: ‘Ninsañu iyi yawanta yayiwahi akayishimwañena mwahita matuña ejima mwashakamawu antu, kulonda yakayilili nyunza yejima wunsahu; henohu dihu hakenza kukumisha.’ Yesu walumbulwili kukuma kwetuña damakonu ñane: ‘Kwamba kekala lukadi lwasweja, lwakwila kufumisha kutachi yamatuña kushika nikulelu, kanda alumonañahu dehi, hela kumbidi hiyamba kalumona cheñuku. Neyi akabula kukehesha wena mafuku owu, hikwakekala antu akahandaku.’—Matewu 24:14, 21, 22.

Hiyanyi akajilumunawu?

Akajilumuna hohu antu abulaña kumukeña nikumukalakela Yehova niYesu. Antu wenawa hiyamwovwahilaña Nzambuku. Yesu wahosheli nindi: ‘Chadiñi hamafuku aNowa, dichi chakela nihakenzayi Mwana kamuntu. Neyi chochichadiñi mafuku akuleta kudibaji, . . . hiyashiluku maanaku, nichenjili dibaji nakuyikumpula wejima wawu.’ (Matewu 24:36-39) Yesu wahosheli nindi antu amavulu adi munjila  yatwalaña kukujilumuka. Hela chochu, wakanini nindi kwekala “njila yanyanya yaya kuwumi.”—Matewu 7:13, 14.

Indi dinu ituña dikakuma mpinjinyi?

Hampinji yamwihwiluwu chinjikijilu chakwiluka nachu kwinza kwindi “nihamba kakuma nyaka yamakonu,” Yesu wakwili nindi: ‘Muloña munza wumu wakanyamuka nakulwa namunza wukwawu, wanta wumu nawanta wukwawu. Kwamba kaholoka nzala ninyitentanshi kweñi nakweñi . . . Muloña kuluwa chikwakavula, kukeña kwawantu amavulu kwakaya nakukeha.’ (Matewu 24:3-12) Dichi, nsañu yejima yaneñeshaña yamakonu yikweti yuma yayiwahi yakukolesha, muloña nfulumendi yaWanta waNzambi keña yileti kuwunda kudi antu ovwahila. Yesu wahosheli nindi: “Chimwakamona yumiyi hiyikumwekana, kelukenu nenu wanta waNzambi keña wushiki.”—Luka 21:31.

Chumanyi chimwatela kwila?

Yesu wahosheli nindi Nzambi ‘waheni Mwanindi wasemuka kankawindi kulonda muntu wukumukuhwelela aheti wumi wahaya nyaka, akabuli kunoña.’ (Yowanu 3:16) Hakwila nawu mumukuhweleli Nzambi niMwanindi, mwatela kuyiluka chachiwahi. Dichi, Yesu wahosheli nindi: “Wumi wahaya nyaka woweniwu, wakukwiluka eyi Nzambi walala wumu hohu, niYesu Kristu watemesheli.”—Yowanu 17:3.

Babalenu kulonda kwakama nikukala kubuli kuyikañesha kudiza chakumukeña Nzambi. Yesu wahosheli nindi: ‘Babalenu enu aweni, nyichima yenu yakenda kasweja . . . kwakama yuma yawumi wunu, ifuku odu dakenda kayikasumwisha neyi muhetu. Muloña dakenza.’ Neyi mutiyilila kusoñamisha kwaYesu, ‘mwakapuluka kuyuma yejimiyi yikamwekana.’—Luka 21:34-36.

Neyi munakukeña kwilukilahu nsañu yikwawu, talenu kapetulu 9, “Komana Tunakushakama ‘muMafuku Akukuminina’?,” mumukanda waChumanyi Chacheni Chatañishaña Bayibolu? *

[Tumazu twaheshina]