Komana Chalala Kudi Muntu Wañakamenaña?

Komana mwatiyahu dehi neyi kwosi muntu wakuyikwasha, neyi kwiji kwosi welukili kukala kumwamweni? Hela chakwila elukili kukala kwenu, mwatoñojokeli nenu ayakameneni wanyi.

NEYI kumwekana kukala, chihandilu chetu chinateli kumwekana neyi nvula yeneni yampepela yakadi kukuma. Mpinji yikwawu tunateli kukunkulula netu yuma yitunakumona yakala chikupu nawa hikukala kutunateli kukañanya kuumika. Chumichi chamwekanaña sweje-e neyi tunakukabakana nachikela, chineñi, maposu azeyeshaña, musoñu watwalekañahu, hela yuma yikwawu yadifwanaku. Tunateli kuzeya chikupu nakutoñojoka netu kwosi watela kutukwasha hela kutukundeja. Komana chalala kudi muntu watwakamenaña?

“Nzambi Wakukundeja Kwejima,” Watwakamenaña

Nzambi amushimuna muBayibolu nawu “Tata wavulishaña luwi, Nzambi wakukundeja kwejima.” (2 Akorinda 1:3) Nzambi wukweti ijina daYehova, weluka nindi twakeñaña kutukundeja. Bayibolu yazatisha izu dakwila nawu “kukundeja” munjila jashiyashana mapampa kakavulu, chumichi chatulejaña nawu Nzambi weluka kukala kutwamonaña nawa wafwilaña kutukundeja. Chumichi chatuleñelaña kwiluka netu hela chakwila amakwawu amwekanaña neyi hiyeluka kukala kwetu hela kwakamena kukala kutukwetuku, Yehova Nzambi watwakamenaña.

Walala wakwila nawu Yehova wakamenaña muntu himuntu wamwekenaña muNsona. Bayibolu yahosha nawu: “Mesu aYehova adi kwejima, atalaña niatama niamawahi.” (Yishimu 15:3) Chochimu, haYoba 34:21, twatañañahu nawu: “Mesu indi atalaña mwendelaña muntu, wamonaña mwayañayi mwejima.” Yehova wamonaña yuma yitwelaña, chili yayiwahi chili yatama, nawa weluka yuma yejima, kulonda kwila yuma yinamoniyi nindi yayiwahi. Chumichi achimwekesha mumazu ahosheliyi Hanani mukwakumona, hela kaprofwetu, kudi Mwanta wawaYuda Asa akwila nawu: ‘Mesu aYehova adi nakutalatala mwahita iseki dejima, kulonda akwashuku nañovu adi nanyichima yalala, kudi yena.’—2 Kushindulula 16:7, 9.

Yehova watutalaña cheñi hamuloña wukwawu. Yesu walumbulwili nindi: “Kwosi muntu natweshi kwinza kudami chakadi kumukoka kudi Tata wantemesheluku.” (Yowanu 6:44) Yehova watwakamenaña nankashi nikukeñakeña mumuchima wamuntu kulonda yeluki neyi nakukeña kumwiluka Nzambi chachiwahi. Neyi chakwila muntu nakukeña kumwiluka Nzambi chachiwahi, nateli kumukwasha munjila yakuhayamisha. Chakutalilahu, mumbanda wakuDominica Republic, wayili kuchipatela kulonda amuladiki chikatu chakansa. Walombeleña kudi Nzambi kulonda yamukwashi kuwana kwitiya kwalala. Henohu wudi muchipatela mfumwindi wamuleteleli buloshuwa yikweti muntu wakwila nawu, Chumanyi Chakeñañayi Nzambi Kudi Etu? * yamwinkeluwu kudi Chinsahu chaYehova wenjili hetala dawu nantetemena. Mumbanda yeniwu watañili buloshuwa nawa welukili nindi Nzambi namwakuli kulomba kwindi. Wetejeli kudiza Bayibolu naChinsahu, nawa chakadi kumanisha nitukweji tutanu nakamu, wadiheni kudi Nzambi nawa wapapatisheweli.

 Mumukanda waMasamu, twawanañamu mazu amavulu akuzañalesha ahosheluwu kudi añimbi yamasamu aHeberu akushankulu, adi neyi Mwanta Davidi wahosheli hakukeña kwaYehova kwakwakamena ambuñindi. HaMasamu 56:8, Mwanta Davidi wamulembeleli Nzambi nindi: ‘Shaku madilu ami muchumpa yeyi; ochu hiyadi mumukanda weyuku?’ Neyi chinamwekeshuwu naniku kwesekeja kwakusha chuma chalema muchumpa, Davidi welukili nindi Yehova hamonaña makabi indi hohuku, ilaña nichineñi chakumuchima. Yehova welukili makabi amweniyi Davidi nikwanuka yuma yatoñojokeleñayi yamuletesheli kudila. Chalala, Nleñi yetu wamonaña ejima afwilaña kwila nkeñelu yindi, ‘adi nanyichima yalala, kudi yena.’

Chikunku chikwawu chamuBayibolu chelukewa chashimuna kukeña kwaNzambi kwakwakamena hiMasamu kapetulu 23. Mazu akutachikilahu amufwanisha Nzambi nakabiña wukweti kukeña nawu: “Yehova diyi kabiña kami; hinukubula chumaku.” Kabiña wamumatuña mwasonekeleluwu Bayibolu wakameneneña anyikoku indi ejima. Mafuku ejima watambikileña anyikoku ejima nakuyilambisha chachiwahi nikukeñakeña hadi chilonda. Neyi yawana mukoku wudi nachilonda, wukulambahu manji hela yitumbu kulonda chikusuki swayi. Neyi mukoku yakata, kabiña wukumukanjikija kunwa yitumbu, nakumwimika kulonda yabuli kukaama nakufwa. Chalala chumichi chinakumwekesha Yehova chakamenañayi antu amulombaña.

Kulomba niKusañuka hiWunsahu Wamwekeshaña Nawu Nzambi Watwakamenaña

Awa masamu nimasamu amakwawu amawahi hiyayisoneka muBayibolu kulonda  tudiluñisheña kuyitaña hohuku. Atulejaña chalombeleñawu ambuña aNzambi ashinshika akushankulu kudi Yehova nikumulejamu yuma yakeñeleñawu kulonda yayikwashi hamu tuhu nikumuhameka hakuyilombola nikuyikiswila. Kulomba kwamuchidiwu kwamwekeshaña hatooka to-o nawu awa ambuña aNzambi akushankulu akuhweleleli chikupu nawu Nzambi wayakameneneña. Kutaña nikutoñojoka nankashi hanawa mazu akufuma hamuchima kunateli kutukwasha ninetu kwiluka netu Nzambi watwakamenaña. Chineli Yehova watwiteja kumulomba hiwunsahu wamwekeshaña nawu Nzambi watwakamenaña.

Hela chochu, mpinji yikwawu twamonaña kukala kwasweja chakwila hitukwiluka nichakulomba kutalisha hakukala kutukwetuku. Komana chumichi chamukañeshaña Yehova kwiluka kukala kutukweti? Aroma 8:26 yakula nawu: ‘Spiritu yatukwashaña hitwazeyazeyaña; muloña hituneluki mutwadi kulombelaku, ilaña spiritu yayeni yatulembelelaña nakwaba kwakweni kwakukañanya kushimuna.’ Iyi nsona yinakutuleja nawu kulomba kwonenawu kwalombeluwu ambuña aNzambi akushankulu, kunateli kumwekesha yitoñojoka yetu chakwila Yehova “Watiyaña mwalombañawu antu” wukutiya kulomba kwetu.—Masamu 65:2.

Kuchiñeja kwakusañuka hiwunsahu wukwawu wamwekeshaña nawu Nzambi wakamenaña chikupu muntu wudi wejima. Yesu wahosheli nindi: “Mpinji yinakwinza henohu antu ejima adi mumajamu akatiya izu dindi [daYesu]; akedikamu.” (Yowanu 5:28, 29) Izu dachiGriki dabalumunawu nawu “majamu” dafuma kwizu dachiGriki dalumbuluka nawu “kwanukisha.” Dalumbulula nawu Nzambi wanukaña chahandileñayi muntu henohu kanda yafwi.

Toñojokenu ntahi, hakwila nawu Nzambi yasañuli muntu watelela kwiluka yuma yejima hadi ona muntu, kushilahu chamwekeneñayi, yililu yakusemuka nayu niyaaku yindi, niyitoñojoka yindi yejima. (Maku 10:27) Nzambi havulamenaña muntu wafwaku hela chakwila mukuhita yaaka yayivulu nankashi. (Yoba 14:13-15; Luka 20:38) Dichi, antu amavulu afwa ayanukaña chikupu kudi Yehova Nzambi, iwu hiwunsahu wamwekeshaña nawu Nzambi watwakamenaña hamuntu hamuntu.

Yehova hiMukwakusomwena

Chumanyi chitwatela kwila hakwila nawu Nzambi yatwakameneña munjila yakukeña? Chatachi, twatela kumwekesha netu twamukuhwelela nikumwovwahila. Kapostolu Pawulu washimuna kunuñañana kwekala hakachi kakwikala nachikuhwelelu nikudiluñisha kwakamena kwaNzambi. Wasonekeli nindi: ‘Chakadi kukuhwelela hichinatweshi kumutiyisha Nzambi kuwahaku; muloña muntu wukwinza kudi Nzambi chiña akuhweleli nindi wudi kwoku, nindi wasomwenaña antu amukeñakeñaña.’—Aheberu 11:6.

Ilukenu nenu chikuhwelelu chamutiyishaña Nzambi kuwaha chakeñekaña kwikala nayuma yiyedi. Chatachi, twatela ‘kukuhwelela netu wudi kwoku,’ dikwila nawu, chiña tukuhwelela netu Nzambi wekala kwoku nawa diyi Nyuuli yetu Wabadika, wutwatela kwovwahila nikudifukulaku. Chamuchiyedi, twatela kukuhwelela netu diyi ‘wasomwenaña antu amukeñakeñaña.’ Chikuhwelelu chalala chakeñekaña kukuhwelela netu Nzambi wakamenaña chikupu antu ejima afwilaña kwila nkeñelu yindi nawa wayisomwenaña. Anenu nawa munateli kwikala nachikuhwelelu chaleñelaña Nzambi kusomwena nikwakamena antu munjila yakukeña kuhitila mukudiza izu daNzambi nikudikunda nawantu amwovwahilaña.

Antu amavulu makonu akuhwelela nawu Nzambi hakamenaña antuku. Ilaña, kwesekeja nachitunadizi, Bayibolu yashimuna hatooka to-o nawu Nzambi wakamenaña nankashi antu amukuhwelela chikupu. Hela chakwila makonu twavula kumona kukala, chineñi, kwakama, niyuma yatukatishaña kumuchima, hitwatela kuzeyaku. Yehova Nzambi watwakamenaña. Kafwampi, wakeñaña nindi tumulombeña kulonda yatukwashi. Ñimbi yamasamu wahosheli nindi: “Umbilaku chiteli cheyi hadi Yehova, yena wukukukwashaku; hamba kamwitija mukwakuloña kukosomokaku.”—Masamu 55:22.

[Tumazu twaheshina]

[Chikasha/Mwevulu wudi hefu 27]

Nsona Jinateli kuKolesha Chikuhwelelu Cheyi Mudi Nzambi Wakwakamenaña Mukukeña

‘Muloña mesu aYehova adi nakutalatala mwahita iseki dejima kulonda akwashuku nañovu adi nanyichima yalala chikupu kudi yena.’—2 KUSHINDULULA 16:9

Shaku madilu ami muchumpa yeyi; ochu hiyadi mumukanda weyuku?’—MASAMU 56:8

‘Yehova diyi kabiña kami; hinukubula chumaku.’—MASAMU 23:1

‘Yeyi watiyaña mwalombañawu antu, antu ejima akwinza kudeyi.’—MASAMU 65:2

‘Wadi kutambika, ami nadi kwakula; wunafwili mudimu wakumakaseyi.’—YOBA 14:15

‘Muloña muntu wukwinza kudi Nzambi chiña akuhweleli nindi wudi kwoku, nindi wasomwenaña antu amukeñakeñaña.’—AHEBERU 11:6

‘Umbilaku chiteli cheyi hadi Yehova, yena wukukukwashaku; hamba kamwitija mukwakuloña kukosomokaku.’—MASAMU 55:22