Yisaka YawakwaKristu—Imbujolenuña Chakutalilahu chaYesu

‘Kristu . . . wayishiyilili chuma chakutalilahu, kulonda mwendi mumahaji indi.’—1 PETULU 2:21.

1. (a) Chifulwinyi chadiña naMwana kaNzambi hakuleña yileñaleña? (b) Indi Yesu wayimonaña ñahi antu?

 NZAMBI haleñeleñayi mawulu nimaseki, wadiña hamu naMwanindi wawedi neyi “mukalawenu.” Cheñi, Mwana kaNzambi wazatilileña hamu naTata yindi hampinji yafuukwiliyi Yehova kuleña atunyama amaneni amboka-mboka ninyitondu hamaseki nawa Waleñeli Paradisa kulonda antu ashakameñamu. Mwana kaNzambi, Yesu, ‘watiyilaña kuwaha nawanyana kawantu.’—Yishimu 8:27-31; Kutachika 1:26, 27.

2. (a) Indi Yehova wayinkadi antu abula kuwanina kulonda kuyikwasha? (b) Njilanyi yimu mwatulombwelaña Bayibolu muchihandilu chetu?

² Chelili antu atachi anavulumuni dehi, kukuula muchidi wamuntu kunshidi kwekalili chuma chalema munkeñelu yaYehova. Yehova waheni mulambu wefutu daKristu kulonda kukuula muchidi wamuntu. (Aroma 5:8) Kubombelahu, Yehova waheni Izu dindi, Bayibolu, yalombolaña antu kulonda atweshi kushakama chachiwahi hela chakwila aswana nshidi. (Masamu 119:105) Kuhitila Mwiizu dindi, Yehova wahana wunlomboli wakwashaña antu kwikala  nayisaka yayiwahi, yamuzañalu. Hansañu yamaluwi, mukanda waKutachika wahosha nawu iyala ‘wakamukakela iñodindi; niwena akela mujimba wumu.’—Kutachika 2:24.

3. (a) Chumanyi chatañishiliyi Yesu kutalisha hamaluwi? (b) Yumanyi yitukudiza muchinu chibaba?

³ Hampinji yakalakeleñayi mudimu windi wakushimwina heseki, Yesu wakonkomweneni nindi maluwi ayitoñweli kwikala ahaya nyaka. Watañishili nshimbi jatela kukwasha antu amuchisaka kutondolwela yililu yatama neyi ayizatisha, yaluwañeshaña maluwi hela kumanisha muzañalu muchisaka chawu. (Matewu 5:27-37; 7:12) Ichi chibaba chikuhosha hantañishilu yaYesu nichakutalilahu chemikiliyi hampinji yadiñayi hamaseki chichinateli kukwasha amayala, ambanda, anvwali, nianyana kwikala namuzañalu.

Iyala mukwaKristu Chalemeshañayi Iñodindi

4. Kudifwananyi kwekala hakachi kachifulu chaYesu nacheyala mukwaKristu?

⁴ Nzambi watondeli iyala kwikala mutu wachisaka, neyi chochekalayi Yesu Mutu wachipompelu. Kapostolu Pawulu wahosheli nindi: “Iyala diyi mutu wamumbanda, chochadiyi Kristu mutu wachipompelu, diyi Chamwinu chamujimba. Enu amayala, keñenu añodi jenu neyi chakeñeliyi Kristu chipompelu, hakudihanahu yomweni kuchikoola.” (Aefwesesa 5:23, 25) Mwalala, Yesu chahembeleñayi atumbanji twindi chachiwahi, dichakutalilahu chatela kwimbujola amayala akwaKristu hakuhemba añodijawu. Tushinshikenu hajinjila jazatishilileñamu Yesu wuswa wamwinkeluwu kudi Nzambi.

5. Indi Yesu wazatishileña ñahi wuswa wamwinkeluwu hakuhemba atumbanji twindi?

⁵ Yesu wadiña ‘wawunda, wadizoza mumuchima.’ (Matewu 11:29) Cheñi wadiña nawuswa wakufuukulahu hayuma yakeñekeleña. Hakañenyeña kuzata nyidimu yinduku. (Maku 6:34; Yowanu 2:14-17) Wayifumbileña atumbanji twindi munjila yayiwahi, neyi chinatwesheki wadiña nakufuntilahu. (Matewu 20:21-28; Maku 9:33-37; Luka 22:24-27) Hela chochu, Yesu hadiña nakuyizuwila, kuyisawula, kuyihela hela kuyimona neyi akukañanya kwila yuma yayitañishileñayuku. Ilaña, wayihamekeleña nikuyikolesha kwila yuma yayiwahi. (Luka 10:17-21) Hamuloña wakuyikeña nikuyihemba chachiwahi chaletesheli atumbanji twindi kumulemesha.

6. (a) Indi iyala nateli kudizilaku chumanyi munjila mwahembeleleñayi Yesu atumbanji twindi? (b) Indi Petulu wayikolesha ñahi amayala?

⁶ Chakutalilahu chaYesu chadizishaña amayala nawu neyi embujolaña wumutu windi, hiyakuzuwilaña añodijawuku, ilaña, akuyilemeshaña nikuyikeña chikupu. Kapostolu Petulu wafumbili amayala kwimbujola njila jajiwahi jazatishileñayi Yesu kuhitila ‘mukushakama chochenichi’ nawañodi jawu, “nakuyilemesha.” (Tañenu 1 Petulu 3:7.) Indi iyala nateli kuzatisha ñahi wuswa wamwinkawu kudi Nzambi hampinji yoyimu nikumulemesha iñodindi?

7. Munjilanyi iyala mwatela kulemeshelayi iñodindi? Lumbululenu.

⁷ Njila yimu mwalemeshelañayi iyala iñodindi yidi yakutiyilila chinakuhoshayi  nichinakutoñojokayi henohu kanda yafuukuluhu yuma yinakundami kuchisaka. Hadaha akukeña kufuukulahu kuhimpi iluña kwakushakama hela kukeña mudimu wacheñi indi kwiji yuma yelañawu mpinji yejima, yidi neyi kwakuya nakunookela hela kukeheshaku yuma yakulanda hetala hampinji yakukala kwamali. Chineli kufuukula kukubombelamu chisaka, chikuwaha neyi iyala wukutiyilila yitoñojoka yañodindi, muloña chikumukwasha iyala kufuukula chachiwahi, nawa chikumupelela mumbanda kulondela mukufuukulayi iyala. (Yishimu 15:22) Amayala akwaKristu alemeshaña añodijawu, hiyayikeñaña nikuyilemesha kudi añodijawu hohuku, ilaña chuma chasweja kulema, ekalaña nawuselewa waYehova.—Aefwesesa 5:28, 29.

Mumbanda Chalemeshañayi Chikupu Mfumwindi

8. Muloñadi chitwatelela kutondolwela chakutalilahu chaEvu?

⁸ Yesu, diyi chakutalilahu chachiwahi chikupu chatela kwimbujola ambanda akwaKristu hakwovwahila wunlomboli. Yitoñojoka yaYesu kutalisha hawunlomboli yambukili chikupu nayililu yamwekesheli mumbanda watachi. Evu wakañenyi kwikala chakutalilahu chachiwahi kudi ambanda. Wadiña namwini kwindi wenkeluwu wumutu kudi Nzambi nawa kuhitila mudi yena dimwahaninineñayi Yehova nshimbi. Ilaña, Evu halemesheli wunlomboli wamfumwinduku. Wakañenyi kutiyilila nshimbi yamulejeliyi Adama. (Kutachika 2:16, 17; 3:3; 1 Akorinda 11:3) Hela chakwila Evu amudimbili, wateleli kumwihula mfumwindi neyi chakwila wateleleli kutiyilila izu damulejeleña yuma ‘yelukayi Nzambi.’ Dichi, wadikehesheli wanyi hakumuleja mfumwindi mwakwilila.—Kutachika 3:5, 6; 1 Timotewu 2:14.

9. Indi Yesu wemika chakutalilahwinyi kutalisha hakwovwahila?

⁹ Kwambukaku, Yesu wemikili chakutalilahu chachiwahi nankashi chakwovwahila Mutu windi. Yililu yindi nichihandilu chindi yamwekeshaña nawu “watoñojokeli nindi kubwambuka naNzambi hichuma chakuhukulaku.” Ilaña, “wadibalumwini kwikala wakadi kulema, hakwikala mwekalila nduñu.” (Afwilipi 2:5-7) Makonu, hamu neyi Mwanta wunakuyuula, Yesu hahimpaku. Wamwovwahilaña Tata yindi muyuma yejima nikulondela wumutu Windi.—Matewu 20:23; Yowanu 5:30; 1 Akorinda 15:28.

10. Indi mumbanda nateli kumwovwahila ñahi mfumwindi neyi mutu windi?

¹⁰ Mumbanda mukwaKristu watela kumwimbujola Yesu kuhitila mukwovwahila mfumwindi neyi mutu windi. (Tañenu 1 Petulu 2:21; 3:1, 2.) Talenu njila mwatela kumwovwahila. Mwanindi weyala nakumwihula nindi nakukeña kwila chuma chinakukeña anvwali jindi amwiteji. Chineli anvwali kanda ahoshuhu haniyi nsañu, chikuwaha neyi mama yawantu wukumwihula mwana nindi, “Wunayilejumu atata yeyi?” Neyi kanda yayilejimu, mama yawantu watela kuhanjeka namfumwindi henohu kanda afuukuluhu. Kubombelahu, mumbanda  mukwaKristu hatela kumukaninaña mfumwindi hela kumutadikishaña hamesu awanyanaku. Neyi yakaana kwiteja munahoshi mfumwindi, watela kuhoshela kumbadi.—Aefwesesa 6:4.

Yesu Wayimikila Anvwali Chakutalilahu

11. Indi Yesu wayimikila anvwali chakutalilahwinyi?

¹¹ Hela chakwila Yesu hasumbwili nikwikala nanyanaku, hichakutalilahu chachiwahi chatela kwimbujolawu anvwali akwaKristu. Munjilanyi? Wayidizishileña atumbanji twindi chachiwahi nawa mukuwunda kuhitila munhoshelu nimuyuma yelileñayi. Wayilejeli chakuzata mudimu wayinkeliyi. (Luka 8:1) Yililu yaYesu nichahembeleñayi atumbanji twindi yamwekesheleña chatela kudihembawu atumbanji wumu namukwawu.—Tañenu Yowanu 13:14-17.

12, 13. Chumanyi chakeñekaña hakwila anvwali akulishi anyana amwakamaña Nzambi?

¹² Anyana embujolaña anvwali jawu, chili chakutalilahu chawu chachiwahi hela chatama. Dichi, anvwali, dihulenu nenu: ‘Chakutalilahwinyi chitunakuyimikila anyana kutalisha hampinji yitwatalaña TV niyisela yakuzañalesha nikudiza Bayibolu kushilahu nikushimwina mumudimu wamwiha? Yumanyi yitwalemesha muchisaka chetu? Komana tunakuhana chakutalilahu chachiwahi kuhitila mukulemesha kudifukula kwalala muchihandilu chetu?’ Anvwali atela kusambila kwiluka nshimbi yaNzambi neyi anakukeña nawu anyana akakuli chiwahi nakumwakama Nzambi.—Kuhituluka 6:6.

¹³ Neyi anvwali afwilaña kuzatisha nshimbi jamuBayibolu muyuma yelañawu, anyana elukaña. Yuma yahoshañawu niyadizishañawu anvwali yikuyikwasha anyanawu. Ilaña neyi, anyana eluka nawu anvwali jawu hiyalondelaña nshimbi yayidizishañawuku, anateli kumona nawu nshimbi yamuBayibolu hiyalema chikupuku. Chikufumamu, anyana hiyanateli kushinda ikañesha damukaayuku.

14, 15. Indi anvwali atela kuyimikila anyanawu yikonkwanyi yamuchidinyi, nawa anateli kwila ñahi mwenimu?

¹⁴ Anvwali akwaKristu eluka nawu yuma yayivulu yakeñekaña hakukulisha mwana kubadika hakumwinka hohu yuma yakumujimba. Dichi, chikwikala chaluwa kumudizisha mwana kufwila yikonkwanyi yikamukwasha hohu kumujimba. (Mukwakutaŋisha 7:12) Yesu wadizishili atumbanji twindi kusambila kukeña wanta nikuloña kwindi. (Matewu 6:33) Dichi, hakumwimbujola Yesu, anvwali akwaKristu niwena atela kudizisha anyanawu kufwila yikonkwanyi yakuspiritu.

¹⁵ Anvwali atela kwila mwenimu kuhitila mukuwana njila yatela anyanawu ahanjekeña nawantu ekala mumudimu wampinji yejima. Talenu atwansi chiyatela kuyikolesha neyi adiluka nawapayiniya hela nankoñi wañinza niñodindi. Amishonali ahempulaña, akaBeteli, niantu afuma kumatuña acheñi azataña mumudimu wakutuña anateli kuhosha hamuzañalu wafumaña mukumukalakela Yehova. Chakadi nikujina enyi wenawa anateli kwikala nayuma yayivulu yatela kuyileja. Chakutalilahu chawu  chamumudimu wakudihana chinateli kukwasha chikupu anyanenu kufuukulahu chachiwahi, nakwimika yikonkwanyi yakumukalakela Nzambi, nikutaña shikola yinateli kuyikwasha mumudimu wampinji yejima.

Anyana, Chumanyi Chatela Kuyikwasha Kwimbujola Chakutalilahu chaYesu?

16. Indi Yesu walemesheleña ñahi anvwali jindi aheseki niTata yindi wamwiwulu?

¹⁶ Anyana, ninenu Yesu wayimikila chakutalilahu chachiwahi nankashi. Yesu amuhembeleña kudi Yosefu niMariya, nawa wayovwahilileña. (Tañenu Luka 2:51.) Welukili nindi, hela hiyadiña awaninaku, Nzambi wayinkeli mudimu wakumuhemba. Dichaleñeleli Yesu yayilemesheña. (Kuhituluka 5:16; Matewu 15:4) Chakuliliyi, Yesu welileña yuma yamuzañalesheleña Tata yindi wamwiwulu. Ichi chabombelelumu kukaana kweseka. (Matewu 4:1-10) Anyana mpinji yikwawu anateli kuyeseka kubula kwovwahila anvwali jenu. Dichi, chumanyi chatela kuyikwasha kulonda mwimbujoleña chakutalilahu chaYesu?

17, 18. (a) Ikakeja damuchidinyi damonañawu atwansi kushikola? (b) Mwatela kwanuka chumanyi chatela kukwasha atwansi kukaana kweseka?

¹⁷ Hadaha, akwenu mumwatañilaña hashikola yimu hiyalemesha nshimbi jamuBayiboluku. Anateli kuyikanjikija kwila yuma yatama nawa chiwakaana akukusehaña. Komana akwenu mumwatañilaña hashikola yimu akutumba dehi nijina hamuloña wakukaana kudiñija muyuma yelañawu? Neyi akutumba ijina, watiyaña ñahi? Ilukenu nenu neyi muleka nenu ayitiyishi woma nakulondela izaza, mukuneñesha anvwali jenu niYehova. Chumanyi chikuyimwekena neyi mulondeleña akwenu ahashikola? Hadaha munemiki yikonkwanyi, yidi neyi kwikala payiniya hela nkoñi mukwakuzatila, kuya nakuzatila kwiluña kudi kukankila kwawakwakushimwina aWanta, hela kuzatila haBeteli. Komana kudikunda nawakwenu ahashikola kukuyikwasha kushikija yikonkwanyi yenu?

¹⁸ Enu atwansi mwekala muchipompelu chawakwaKristu mwamonahu dehi kukala kwesekeli chikuhwelelu chenu? Neyi mwamonahu dehi kukala, mwelili ñahi? Toñojokenu hadi Yesu, chakutalilahu chenu. Wakaanini kudiñija mukweseka nawa wakoleleli hakwila yuma yayiwahi. Kwanukaña mwenimu kukuyinka wuswa wakuleja chikupu akwenu mumwatañilaña hashikola yimu nenu himukudiñija mukwila yuma yatamaku. Kufwana Yesu, shindamenenu hakuchiñeja kwahaya nyaka kwakukalakala mudimu wawuwahi nikumwovwahila Yehova.—Aheberu 12:2.

Chuma Chalema Chakeñekaña Hakwikala naMuzañalu muChisaka

19. Njilanyi yaletaña muzañalu walala muchihandilu?

¹⁹ Yehova Nzambi niYesu Kristu akeñaña nawu antu ashakameña chachiwahi nankashi. Chili hitwawaninaku, tunateli kwikala namuzañalu. (Isaya 48:17, 18; Matewu 5:3) Yesu watañishileña nsañu yalala yayileñeleleña antu kwikala amuzañalu, ilaña hidiyi nsañu yalejeliyi atumbanji twindi hohuku. Ilaña Yesu wayidizishili njila yayiwahi yakuhandilamu. Kubombelahu, wemikili chakutalilahu chachiwahi chakwikala nachihandilu niyililu yayiwahi. Hichikweti muloña nachifulu chitukweti muchisakaku, wejima wetu tunateli kuhetela mukwimbujola chakutalilahu chindi. Dichi, amayala, ambanda, anvwali, nianyana, imbujolenuña chakutalilahu chaYesu. Kulondela ntañishilu yaYesu nikwimbujola chakutalilahu chindi, dichuma chalema chikupu chaleñelaña kwikala namuzañalu muchisaka.

Mukwakula Nenudi?

• Indi amayala atela kuzatisha ñahi wuswa wayinkawu kudi Nzambi?

• Indi mumbanda nateli kwimbujola ñahi chakutalilahu chaYesu?

• Indi anvwali anateli kudizila kwodi munjila yakameneneñamu Yesu atumbanji twindi?

• Indi anyana anateli kudizila kwodi kuchakutalilahu chaYesu?

[Malwihu aKuzatisha haKudiza]

[Mwevulu wudi hefu 13]

Indi iyala wukweti kukeña watela kwiladi henohu kanda yafuukuluhu chuma chinakundami kuchisaka?

[Mwevulu wudi hefu 14]

Chumanyi chinateli kumuleñela mumbanda kumukwasha mfumwindi neyi mutu windi?

[Mwevulu wudi hefu 15]

Anyana embujolaña yililu yayiwahi yawanvwali jawu