Chimwatela Kwiluka Chikupu Bayibolu

3. Itejenu Wukwashu Kufuma Kudi Antu Amakwawu

Hampinji mukwakwenda Edward John Eyre chahitiliyi muChaana chatenañawu nawu Nullarbor, antu akuAustralia atenañawu nawu Aborigine amudizishili Eyre chakutaha menji muwusekulula nimunyitondu. Kwiteja wukwashu wawantu elukili chakuhanda munidi iluña kwapulwishili wumi waEyre.

NEYI chinamwekeshi ichi chakutalilahu, hakwila nawu mutweshi kuzata mudimu wakala chakeñekaña kuyikwasha kudi muntu welukisha owu mudimu. Chuma chochimu chakeñekaña neyi mutachika kutaña Bayibolu.

Yesu hakuhweleleli atumbanji twindi kwiluka chikupu Bayibolu chakadi kuyikwasha kudi antu amakwawuku. Mpinji yimu, ‘wajikwili kashinshi kawu kulonda eluki mwalumbulukila nyikanda yajila.’ (Luka 24:45) Yesu welukili nindi antañi aBayibolu akeñekaña kuyikwasha kulonda eluki chikupu ntañishilu yamuBayibolu.

Hinyi Watela Kuyikwasha?

Yesu wenkeli atumbanji twindi akashinshi mudimu wakukwasha antu. Henohu kanda yayi mwiwulu, Yesu wayilejeli nindi: ‘Dichi yenu mwakelishi atumbanji munyuza yejima, . . . Mwakayileji kuhemba yuma yejima yinayilejenu.’ (Matewu 28:19, 20) Mudimu walema wawakwaKristu wekala wakudizisha, wabombelamu kulumbulula chakuzatisha nshimbi jamuBayibolu muchihandilu. AkwaKristu alala akwashaña antu amakwawu kwiluka chikupu Bayibolu.

Kudi chuma chachiwahi chamwekeni, chimwahitili mpinji yantesha kufuma hayinkeliyi atumbanji twindi iwu mudimu. Bayibolu yashimunaña nawu kalama wakuEtiyopiya watañileña mavasi awuprofwetu waIsaya. Watañili mavasi abulili kutiyishayi. Kwesekeja nachahosha Bayibolu, mavasi abulili kutiyishayi ahosha nawu: “Neyi mwana kamukoku akutwalawu nakujaha, neyi chamwenañayi  mukoku hadi akwakumutewula zo-o, dichi niyena haasamini mukanwa kinduku. Chadizozeliyi, hiyakumutambula wuñaji wakeñeli kumonayi. Muyachi windi akawushimuna kudinyi? Muloña wumi windi anawufumishi hanu hamaseki.”—Yililu 8:32, 33; Isaya 53:7, 8.

Iwu kalama wamwihwili Fwilipu, mukwaKristu welukili chikupu Nsona nindi: ‘Kaprofwetu nateninyi? Naditeni yomweni, tahindi nateni muntu wacheñi?’ (Yililu 8:34) Iwu kaEtiyopiya washinshika wafumineña kuYerusalema nakudifukula, nawa hadaha walombeli wukwashu. Chakadi kujina, wadiña nakutaña nañovu, nawa mukudizoza. Ilaña iwu kalama hatwesheli kwiluka chikupu nsañu yatañileñayuku. Mukudizoza, wamwihwili Fwilipu kulonda yamukwashi. Nsañu yamulumbulwililuwu kudi Fwilipu yamuzañalesheli chikupu nawa yamuleñeleleli kwikala mukwaKristu.—Yililu 8:35-39.

A Yinsahu jaYehova anakutwalekahu namudimu wakalakeliyi Fwilipu niakwaKristu akusambila. A Yinsahu anakudihana kulonda kukwasha antu kwiluka chikupu chuma chacheni chatañishaña Bayibolu, mumatuña  akubadika ha 235. Elaña mwenimu kuhitila mukudiza nsañu yashindamena haNsona jamuBayibolu. Iyi njila yayiwahi yakudizilamu Bayibolu yabombelamu kwiluka chahosha Bayibolu hansañu hela hamutu wumunakudizahu. *—Talenu chikasha chinakwila nawu “Ñakwilu Yayiwahi yaMalwihu Ehulañawu Hadi Bayibolu.”

“Malwihu Ami Ejima Ayakwili”

Steven, Valvanera, niJo-Anne, atenawu muchibaaba chatachi, atachikili kudiza Bayibolu nawaYinsahu jaYehova. Steven wahosheli nindi: “Chanhayamishileña hakumona nami kuhitila mukwesekeja nshimbi jamuNsona hela nsañu, kakavulu twawanineña ñakwilu muBayibolu. Henohu kanda nitachiki kudiza Bayibolu nawaYinsahu jaYehova, kwosi wanlejeli chakwila mwenimu. Chanzañalesheleña hama chinelukili nami kudiza Bayibolu hichakeñekaña kuditadikisha chakadi kuwana ñakwilu neyi chinelileña kunyimaku.”

Valvanera niyena wetejeli. Wahosheli nindi: “Yuma yejima yinadizileña nawaYinsahu yatiyakeneña chikupu nawa yadiña yalala. Nadizili nami hinateli kukuhwelela yuma yejima hamuloña wakwila ayitañishileña muchipompeluku, ilaña muloña yuma yejima ayilumbulwileña chatiyakana.” Jo-Anne wahosheli nindi: “Chineli malwihu ami ejima ayakwili kuhitila mukuzatisha Bayibolu chanleñeleli kulemesha Nsoneki yaBayibolu, muloña Nzambi welukili nindi antu akekalaña namalwihu akala kwakula nawa wamweni chikupu nindi ñakwilu yalala ayisonekeli muBayibolu.”

Komana mwelukahu Chinsahu chaYehova? Kwila mumwihula kulonda yayilumbulwili chakudiza Bayibolu nehi? Neyi kwosi Chinsahu chaYehova wumweluka, mwani sonekelenu kukeyala yidi yejima yidi hefu 2 muyinu magazini. Nawukwashu waspiritu yaNzambi yajila, niyitoñojoka yakukeña kudiza niwukwashu wantañishi yaBayibolu welukisha, Izu daNzambi bayi neyi himukanda watela kuyikalila kuwilukaku. Munateli kwiluka chikupu Bayibolu.

[Tumazu twaheshina]

[Chikasha/Mwevulu wudi hefu 8]

Ñakwilu Yayiwahi yaMalwihu Ehulañawu Hadi Bayibolu

Iyi diyi nyitu yansañu yikwawu yadizishañawu aYinsahu jaYehova hakudiza Bayibolu:

• Chumanyi chafuukulayi Nzambi kwiseki?

• Afu adi kudihi?

• Komana tunakushakama ‘mumafuku akukuminina’?

• Muloñadi Nzambi chetejelayi makabi?

• Chakuzañalesha nshakaminu yachisaka cheyi

[Nyevulu yidi hefu 7]

Hakwila nawu mwiluki Bayibolu chikupu . . . lombenu spiritu yaNzambi, tañenuña nayitoñojoka yakukeña kudiza, nawa itejenu wukwashu kufuma kudi amakwawu