“Shakamenu Mukukeña kwaNzambi”

“Dihembenu kulonda mushakami mukukeña kwaNzambi, nakutalila luwi lwaMwanta wetu Yesu Kristu lwashika kuwumi wahaya nyaka.”—YUDA 21.

1, 2. Indi Yehova watumwekeshelaña ñahi kukeña, nawa tuneluki ñahi netu kudi chuma chitwatela kwila kulonda yatuhembi mukukeña kwindi?

 YEHOVA NZAMBI watumwekeshelaña kukeña munjila jajivulu. Chakadi nikujina, mulambu wefutu danyiloña diwunsahu waweni wamwekeshaña nawu Yehova watukeña. Wakeña chikupu antu chakwila watemesheli Mwanindi wakeñayi kwinza hanu heseki nakutufwila. (Yowanu 3:16) Yehova welili mwenimu muloña wakeñaña nindi tukahandi haya nyaka, cheñi wakeñaña nindi mukukeña kwindi tuwaninumu kukooleka kwahaya nyaka.

² Komana, mwalala Yehova nateli kutuhemba mukukeña kwindi neyi tufuukulahu kukoña yuma yidi yejima yitunakukeña kwila? Inehi. Muloña hamukanda waYuda 21, atukonkomwena nawu: “Dihembenu kulonda mushakami mukukeña kwaNzambi, nakutalila luwi lwaMwanta wetu Yesu Kristu lwashika kuwumi wahaya nyaka.” Mazu akwila nawu “Dihembenu kulonda mushakami mukukeña kwaNzambi” atalisha mukwila nawu kudi yuma yitwatela kwila. Chumanyi chitwatela kwila kulonda tushakami mukukeña kwaNzambi?

Tunateli Kushakama Ñahi Mukukeña kwaNzambi?

3. Chumanyi chashimwiniyi Yesu nindi dichadiña chalema hakwila nawu yashakami mukukeña kwaTata yindi?

³ Ñakwilu yanilu lwihu yawanikaña mumazu aYesu, ahosheliyi hawufuku wakukumishaku wakuhanda kwindi kwahamaseki. Wahosheli  nindi: “Neyi mukuhembaña munayilejaña mukushakama mukukeña kwami; neyi chinahembañami mwanlejañawu kudi Tata yami, nashakamaña mukukeña kwindi.” (Yowanu 15:10) Mwalala, Yesu welukili nindi kuhemba nshimbi jaYehova kwadiña kwalema hakwikala nawubwambu wawuwahi naTata yindi. Neyi ichi chakeñekeleña kudi Mwana kaNzambi wawanina, komana ninetu kwila twila mwenimu nehi?

4, 5. (a) Njilanyi yalema mutwatela kumwekeshela netu twamukeña Yehova? (b) Chumanyi chatuleñelaña kwovwahila nshimbi jaYehova?

⁴ Sweje-e dinu, twamwekeshaña netu twamukeña Yehova kuhitila mukumwovwahila. Kapostolu Yowanu wahosheli nindi: “Kumukeña Nzambi yowu kwila mwatulejañayi; mwatulejañayi himwakalaku.” (1 Yowanu 5:3) Mwalala, antu amavulu makonu hiyakeñaña kwovwahilaku. Hela chochu, talenu awa mazu akwila nawu: “Mwatulejañayi himwakalaku.” Yehova hatulejaña nindi twili chuma chitukubula kutweshaku.

⁵ Chakutalilahu: Komana munateli kuleja ibwambu denu nenu yasendi chiteli chimuneluki nenu chalema chikupu? Inehi. Yehova watubadika luwi nawa weluka chikupu kuzeya kwetu. Bayibolu yatukonkomwenaña nawu Yehova ‘waanukaña kwindi nindi tudi lunkuñu hohu kwetu.’ (Masamu 103:14) Hanateli kutuleja nindi twili yuma yitukubula kutweshaku. Dichi kwosi chuma chatela kutuleñela kukaana kwovwahila nshimbi jaYehovaku. Kwambukaku, tweluka netu kumwovwahila Yehova, kwatwinkaña kukooleka kwakumwekesha kudi Tata yetu wamwiwulu netu twamukeña chikupu nawa tunakukeña kushakama mukukeña kwindi.

Chawaana Chakufuma Kudi Yehova

6, 7. (a) Indi chinleji hichumanyi? (b) Shimunenu chakutalilahu chinakumwekesha chinleji chichatela kutukwasha kushakama mukukeña kwaNzambi.

⁶ Munu mukaayi mutwashakama, mudi yuma yayivulu yitwatela kufuukulahu yabombelamu kumwovwahila Nzambi. Tunateli kwiluka ñahi netu kufuukula kwetu kunesekani nakukeña kwaNzambi? Yehova watwinka chawaana chatela kutukwasha chikupu kumwovwahila. Ichi chawaana hichinleji. Indi chinleji hichumanyi? Hiwuswa wadimena wakusandujola yililu yetu, yitoñojoka yetu niyuma yitwatondaña. Chazatikaña neyi nsompeshi wamumuchima, chatukwashaña kwiluka yuma yitwafuukulaña muchihandilu hela kushinshika hayuma yitwelili nikwiluka neyi yayiwahi hela yatama, yaloña hela nehi.—Tañenu Aroma 2:14, 15.

⁷ Tunateli kuzatisha ñahi chachiwahi chinleji chetu? Toñojokenu hanichi chakutalilahu. Fwikijenu neyi wufuku wuneeli henohu muntu wudi hawenyi. Chumanyi chikusendayi kulonda yabuli kuhukana nakudimbuka nawa yabuli kumona wubanji? Chikubadika kuwaha neyi wukusenda toochi yakumunyika nachu munjila. Neyi himukweti toochuku, himukutwesha kumona munjilaku, munateli kuhukana nakudimbuka hela kumona wubanji. Chochimu, muntu wabula chinleji hanateli kufuukula mwamuwahiku neyi hakufuukula hayililu yayiwahi nayatama, nihayuma yaloña muchihandilu.

8, 9. (a) Yumanyi yitwatela kwiluka hadi chinleji chetu? (b) Chumanyi chitwatela kwila kulonda chinleji chetu chizatikeña chachiwahi?

⁸ Hela chochu, kufwana toochi, chinleji chikweti mwakukumina. Neyi malola amana kesi hiyikutwesha kumunyika munjilaku. Chochimu, neyi twiteja kufwila kwamumuchima wetu kutulomboleña, chumanyi chikumwekana? Yililu yetu yalwisu yinateli kuleñela chinleji chetu chitulomboleña mwaluwa. Bayibolu yatusoñamishaña nawu, “muchima wasweja kudimbana, wadimbana chakubadika yuma yejima, wasweja nikukata.” (Yeremiya 17:9; Yishimu 4:23) Kubombelahu, neyi toochi yibulaña kumunyika chachiwahi, muntu nateli kuhukana nakudimbuka. Chochimu, neyi tukañanya kushindamena hawunlomboli walala Wezu daNzambi, Bayibolu, chinleji chetu hichinateli kutukwashaku. (Masamu 119:105) Chawushona, antu amavulu mukaayi aswejaña kusha maana kukufwila kwanyichima yawu,  ilaña hiyashaña maana kunshimbi jekala Mwizu daNzambuku. (Tañenu Aefwesesa 4:17-19.) Dichaleñelaña antu amavulu, akoñeña yuma yahamesu bwi-i hela chakwila akweti chinleji.—1 Timotewu 4:2.

⁹ Twatela kufuukulahu kubula kwila mwenimu. Ilaña, tutwalekuhu kwiteja izu daNzambi didizishi nikufumba chinleji chetu kulonda chizatikeña chachiwahi. Chatela twitejeña kufwila kwanyichima yetu kutulomboleña, twatela kulondela chinleji chetu chafumbewa naBayibolu. Cheñi nawa, tufwileña kulemesha chinleji chawana kwetu niahela akwaKristu. Twatela kushaku kashinshi chikupu kulonda tubuleña kuyidimbwisha, nikwanukaña netu chinleji chawana kwetu chinateli kuyikanisha kwila yuma yinateli kumona ana kwawu nawu hiyatamaku.—1 Akorinda 8:12; 2 Akorinda 4:2; 1 Petulu 3:16.

10. Njilanyi jisatu jamuchihandilu jitukuhanjekahu?

¹⁰ Tushinshikenu hanjila jisatu jamuchihandilu chetu mutwatela kumwekeshela netu twamukeña Yehova kuhitila mukumwovwahila. Muniji njila jejima jisatu, chinleji chikuzatikaña, ilaña hakwila nawu chitulomboleña chachiwahi, chinakukeñeka kuchifumba nanshimbi yonenawu yamuBayibolu. Njila jisatu mutwatela kumwekeshela netu twamukeña Yehova nikumwovwahila dijije: (1) Twakeña antu akeñayi Yehova, (2) twalemeshaña wunlomboli, nawa (3) twafwilaña kwikala akadi majilu kumesu aNzambi.

Keñenu Antu Akeñayi Yehova

11. Muloñadi wutwatela kukeñela antu akeñayi Yehova?

¹¹ Chatachi, twatela kukeña antu akeñayi Yehova. Kutalisha hakudikunda nawakwetu, antu adi neyi wanda. Twembujolaña yuma yitwamonaña. Nleñi yetu weluka chikupu wubanji nikuwaha kwafumaña mukudikunda kwatela kwinza hadi antu abula kuwanina. Dichi, watufumbaña nindi: “Endaku nawakwamaana nineyi wakekala mukwamaana; ilaña wadikunda  nawayisupi wakamwenamu jakala.” (Yishimu 13:20; 1 Akorinda 15:33) Wonsu wetu kwosi wakeñaña ‘kumwenamu jakala.’ Wejima wetu twakeñaña ‘kwikala akwamaana.’ Kwosi watela kumuleñela Yehova kwikala namaana kubadika chekalayi, nawa kwosi watela kumudimbaku. Ilaña, watwimikila chakutalilahu chachiwahi kutalisha hakudikunda. Toñojokenu, muntu wamuchidinyi wabula kuwanina watondañayi Yehova kwikala ibwambu dindi?

12. Yehova watondaña antu amuchidinyi kwikala amabwambu jindi?

¹² Yehova wateneni nkakulula Abarahama nindi ‘ibwambu dami.’ (Isaya 41:8) Wadiña iyala washinshika chikupu, waloña, wovwahila, nawa wamukuhwelela Nzambi. (Yakoba 2:21-23) Muntu wamuchidiwu diyi watondañayi Yehova kwikala ibwambu dindi. Nimakonu, watondaña antu amuchidiwu kwikala amabwambu jindi. Chineli Yehova watondaña amabwambu amuchidawa, komana ninetu hitwatela kutonda amabwambu amawahi, kulonda twendeña nawakwamaana nawa twikali akwamaanaku?

13. Hakutonda amabwambu, chumanyi chatela kutukwasha kutonda chachiwahi?

¹³ Chumanyi chatela kuyikwasha kutonda amabwambu amawahi? Kutañaña yakutalilahu yamuBayibolu yinateli kuyikwasha. Shinshikenu hawubwambu wadiña hakachi kaLuti namukuwindi wamumbanda Nyawomi, niwubwambu waDavidi naJonatani, hela Timotewu naPawulu. (Luti 1:16, 17; 1 Samweli 23:16-18; Afwilipi 2:19-22) Kudi chuma chakolesheleña wubwambu wawu: Wubwambu wawu washindameneni hakumukeña Yehova chikupu. Komana munateli kuwana amabwambu amukeña Yehova neyi chimwamukeñenu? Ilukenu nenu munateli kuwana amabwambu amavulu amuchidawa muchipompelu chawakwaKristu. Awa amabwambu hiyanateli kuyileja nawu mwili chuma chikumuhilisha Nzambuku. Ilaña, akuyikwasha kulonda mumwovwahili Yehova nikukundama kudi yena, nikukuwila kuspiritu. (Tañenu Aŋalija 6:7, 8.) Akuyikwasha kushakama mukukeña kwaNzambi.

Lemeshenu wuNlomboli

14. Yumanyi yavula kutukañesha kulemesha wunlomboli?

¹⁴ Njila yamuchiyedi mutwamwekeshelaña netu twamukeña Yehova hikulemesha wunlomboli. Twatela kulemesha wunlomboli. Muloñadi mpinji yikwawu chichakalilaña kulemesha wunlomboli? Muloña alomboli hiyawaninaku. Cheñi, anetu nawa hitwawaninaku. Twalwishaña nachaaku chakusemuka nachu chakudikaña.

15, 16. (a) Muloñadi chichalemena kulemesha antu enkayi Yehova mudimu wakwakamena antu jindi? (b) Chumanyi chalema chitwadizilaña kudi Yehova chamweniyi aIsarela adikañili naMosi?

¹⁵ Hadaha, munateli kudihula nenu, ‘Neyi chatukalilaña chikupu kulemesha wunlomboli, muloñadi wutwatela kwovwahila?’ Ñakwilu yanilu lwihu yinabombelumu muloña wawanta. Hinyi imwatela kutonda nenu yekali mwanta, nawa nyuuli yenu? Neyi tutonda Yehova yekali Mwanta wetu, twatela kulemesha wunlomboli windi. Neyi tukañanya kumwovwahila, komana tunateli kumutena netu hiNyuuli yetu? Kubombelahu, mpinji yejima Yehova walombolaña kuhitila mudi antu abula kuwanina enkañayi mudimu wakwakamena antu jindi. Neyi tudikaña nawantu wenawa, indi Yehova nateli kutumona ñahi?—Tañenu 1 Atesalonika 5:12, 13.

¹⁶ Chakutalilahu, hampinji aIsarela hiyamutobeleli nikudikaña naMosi, Yehova wamweni nindi adikañili nayena. (Kuchinda 14:26, 27) Nzambi hahimpaku. Neyi tudikaña nawantu enkayi wunlomboli, dikwila nawu tunakudikaña nayena.

17. Yililwinyi yayiwahi yitwatela kufwila kwikala nayu kutalisha hadi antu ekala hayifulu yawunlomboli muchipompelu?

¹⁷ Kapostolu Pawulu washimwini yililu yayiwahi yitwatela kwikala nayu kutalisha hadi antu ekala hayifulu yawunlomboli muchipompelu chawakwaKristu. Wasonekeli nindi: “Ovwahilenu anlomboli jenu nakuyitiyilila, muloña ahembaña nyichima yenu, nawu twamba kashimunamu; kulonda eli mwenimu namuzañalu bayi nakuneñaku, muloña neyi  akuneña hichikuyikwasha enuku.” (Aheberu 13:17) Mwalala, twatela kuzata nañovu kulonda twikali nayililu yakwovwahila. Hela chochu, anukenu nenu tunakufwila kushakama mukukeña kwaNzambi. Komana kwila tufwila ichi chikonkwanyi nehi?

Ikalenu Akadi Majilu Kumesu aNzambi

18. Muloñadi Yehova chakeñelañayi nindi twikali awunyonji?

¹⁸ Njila yamuchisatu mutwamwekeshelaña netu twamukeña Yehova yidi yakufwila kwikala akadi majilu kumesu indi. Kakavulu anvwali azataña nañovu kulonda anyanawu amwekaneña awunyonji. Muloñadi? Muloña, kwikala awunyonji kwaleñelaña anyana kubula kukatakata. Kubombelahu, mwana wawunyonji waletaña ijina dadiwahi kuchisaka, nikumwekesha nawu anvwali amukeña nawa amwakamenaña. Munjila yoyimu, Yehova wakeñaña nindi twikali awunyonji. Weluka nindi wunyonji watuleñelaña kuhanda chachiwahi. Cheñi weluka nindi kwikala awunyonji kwamwekeshaña ijina dadiwahi, daTata yetu wamwiwulu. Ichi chalema chikupu, muloña antu anateli kukeña kumukalakela Nzambi muloña amonaña chitwambukaku nawantu amukaayi katama.

19. Tweluka ñahi netu wunyonji wakumujimba walema?

¹⁹ Munjilanyi mutwatela kwikala awunyonji? Chakadi nikujina, muchihandilu chetu chejima. MuIsarela wakushankulu, Yehova wayilejeli antu jindi hatooka nindi kwikala awunyonji kumujimba kwadiña kwalema. (Alevi 15:31) Mulushimbi lwamwinkeluwu Mosi mwabombeleli nshimbi yahosheleña hakushikila majilu, kukosa jinuñu, kwisuka kumakasa, kuwela kunyendu nikukosa yakuvwala. (Kwidika 30:17-21; Alevi. 11:32; Kuchinda 19:17-20; Kuhit. 23:13, 14) A Isarela ayanukishileña nawu Nzambi yawu, Yehova wajila, dikwila nawu “wawunyonji,” “wutooka” nawa “wajila.” Ambuña Nzambi wajila niwena atela kwikala ajila.—Tañenu Alevi 11:44, 45.

20. Munjilanyi mutwatela kwikala awunyonji?

²⁰ Dichi, twatela kwikala awunyonji mukachi nihanzi. Twafwilaña kwikala nayitoñojoka yakadi majilu. Twalondelaña chikupu nshimbi jaYehova jakwikala nayililu yakadi majilu, hichidi namuloña nawantu adi nayililu yawuvumbi anenzali mukaayuku. Chuma chalema chikupu, twafwilaña kwikala awunyonji mukudifukula kwetu, nikutondolwela yuma yidi yejima yatama yansakililu yakutwamba. Twanukaña kufumba kwonenawu kwasonekawu haIsaya 52:11 nawu: “Fumenuku, fumenuku, idikenumu, bayi mukunka kuchuma chamajiluku. Fumenu mukachi kawu. Ikalenu atooka.” Makonu, twahembaña kudifukula kwetu kwakadi majilu kuhitila mukubula kukwata kuyuma yidi yejima yansakililu yakutwamba. Chakutalilahu, dimuloña wutwabulilaña kudibomba muyidika yansakililu yakutwamba nikwanakana mafuku akunooka anatandi mukaayi. Mwalala, chakala chikupu kutwalekahu kwikala akadi majilu. Ilaña, antu jaYehova afwilaña kwila mwenimu muloña kwayikwashaña kushakama mukukeña kwaNzambi.

21. Tunateli kwiluka ñahi chikupu netu tukushakama mukukeña kwaNzambi?

²¹ Yehova wakeñaña nindi tushakami mukukeña kwindi haya nyaka. Ilaña wejima wetu hamuntu hamuntu twatela kudikita chikupu kulonda tushakami mukukeña kwaNzambi. Tunateli kwila mwenimu kuhitila mukwimbujola chakutalilahu chaYesu nikumukeña Yehova kuhitila mukwovwahila nshimbi Jindi. Neyi twila mwenimu, tukukuhwelela netu kwosi ‘chikutwesha kutwambula kukukeña kwaNzambi kwekala mudi Kristu Yesu, Mwanta wetuku.’—Aroma 8:38, 39.

Komana Munakwanuka?

• Indi chinleji chetu chinateli kutukwasha ñahi kushakama mukukeña kwaNzambi?

• Muloñadi chitwatela kukeñela antu akeñayi Yehova?

• Muloñadi chichalemena kulemesha wunlomboli?

• Indi wunyonji walemenadi kudi antu jaNzambi?

[Malwihu aKuzatisha haKudiza]

[Chikasha/Mwevulu wudi hefu 28]

MUKANDA WATUKWASHAÑA KWIKALA NAYILILU YAYIWAHI

Hakupompa kwankambi kwamu 2008, edishili mukanda wudi namafu 224 wukweti mutu wunakwila nawu ‘Shakamenu Mukukeña kwaNzambi.’ Muloñadi chasonekelawu iwu mukanda? Awusoneka kulonda kukwasha nachu akwaKristu eluki nikukeña nshimbi jaYehova, wakonkomwenaña nankashi hayililu yawakwaKristu. Kudiza nakashinshi mukanda “waShakamenu Mukukeña kwaNzambi” wukutuleñela kwiluka chikupu netu kulondela nshimbi jaYehova dichihandilu chachiwahi makonu nawa chalombolaña kuwumi wahaya nyaka wakumbidi.

Kubombelahu, iwu mukanda awusoneka kulonda kutukwasha kwiluka netu kwovwahila Yehova hikwakalaku. Ilaña, hinjila yakumwekeshelamu nawu twamukeña Yehova chikupu. Dichi, iwu mukanda wukutuleñela kudihula netu, ‘Muloñadi chinamwovwahilaña Yehova?’

Kakavulu yililu yatama diyaleñelaña antu amakwawu kuleka kukeña kwaYehova, bayi neyi kubula kutiyisha ntañishiluku. Dichi, chalema chikupu kukeña nikulemesha nshimbi jaYehova jatulombolaña muwumi wetu. Tunakuhweleli netu iwu mukanda wawuha wukukwasha nyikoku yaYehova mukaayi kejima kukolela kuyuma yaloña, kulonda kumwekesha nawu Satana hisakutwamba, cheñi nawa nikushakama mukukeña kwaNzambi.—Yuda 21.