Ikalenu Ovwahila Nawa Akadi Woma Neyi Kristu

‘Tiyenu kuwaha, ami nemiki mpata yamunu mwishina mushindu.’—YOWANU 16:33.

1. Indi Yesu wamwovwahilili ñahi Nzambi chikupu?

 YESU KRISTU welileña nkeñelu yaNzambi mpinji yejima. Wadiña nakumwovwahila Tata yindi wamwiwulu mafuku ejima. (Yowanu 4:34; Aheberu 7:26) Hela chakwila yuma yamweniyi hanu hamaseki yadiña yakala wovwahilileña hohu. Ayilumbu jaYesu kushilahu niSatana yomweni esekeli kumukanjikija hela kumudimba Yesu kulonda yaleki kashinshi kindi kufuma tuhu hampinji yatachikiliyi mudimu windi wakushimwina. (Matewu 4:1-11; Luka 20:20-25) Ayilumbu wenawa amuletesheli Yesu kuneña nikuzeya chikupu. Nkumininaku amujahilili hamutondu wakuyandishila. (Matewu 26:37, 38; Luka 22:44; Yowanu 19:1, 17, 18) Muyuma yejimiyi nimakabi asweja amweniyi, Yesu ‘wovwahilili ho-o, ndo nikukufwa.’—Tañenu Afwilipi 2:8.

2, 3. Chumanyi chitunateli kudizila kukwovwahila kwaYesu hela chakwila wamweni makabi?

² Yuma yamweniyi Yesu hadiñayi neyi muntu hamaseki yamudizishili chakwikala wovwahila hampinji yamakabi akadi kumonañahu dehi. (Aheberu 5:8) Chinateli kumwekana neyi kwosi chuma chadi kudizayi Yesu kutalisha hakumukalakela Yehova. Kafwampi, wadiluñishili wulunda wawuwahi naYehova hadi yaaka yayivulu nawa wadiña “mukalawenu” waNzambi hampinji yaleñeleñayi yuma yejima. (Yishimu 8:30) Hela chochu, kuumika kwomikiliyi makabi  amweniyi mpinji yadiñayi hamaseki kwamwekeshaña nawu wadiña washinshika chikupu. Yesu, Mwana kaNzambi wakundamini chikupu kudi Tata yindi. Tukudizilaku yumanyi kuyuma yamweniyi?

³ Hela chakwila Yesu wadiña muntu wawanina, hadishindameneni yomweni hakwila yovwahiluku. Walombeleña kudi Nzambi kulonda yamukwashi kwikala wovwahila. (Tañenu Aheberu 5:7.) Anetu nawa neyi tunakukeña kwikala ovwahila, twatela kudizoza nikulomba kudi Nzambi mafuku ejima kulonda yatukwasheña. Hamuloña weniwu, kapostolu Pawulu wayifumbili akwaKristu nindi: “Yitoñojoka yadiñi mudi Kristu Yesu yiikali nimudenu nawa,” wadiña ‘wadizoza, hakwovwahilaña ho-o, ndo nikukufwa.’ (Afwilipi 2:5-8) Yesu chadiñayi wovwahila chamwekeshaña nawu antu anateli kwovwahila hela chakwila adi mukaayi katama. Hela chochu, Yesu wadiña wawanina, indi antu abula kuwanina chidi neyi etu anateli kwovwahila?

Tunateli Kwovwahila Hela Hitwawaninaku

4. Indi chatwinkawu wuswa wakudifuukwila chalumbulukadi?

⁴ Nzambi wayileñeli Adama naEvu neyi yileñaleña yikweti maana nawa adiña nawuswa wakudifuukwila. Hakwikala anyanawu, anetu nawa tukweti wuswa wakudifuukwila. Indi chumichi chalumbulukadi? Chalumbuluka nawu tunateli kufuukulahu kwila yuma yayiwahi hela yatama. Munjila yikwawu, Nzambi watwinka wuswa wakufuukulahu kumwovwahila hela kudinkaña nindi. Twamba kalumbulula chineli tukweti wuswa weniwu. Eñañi, yuma yitwafuukulaña yatela kutuleñela kuhanda hela kufwa. Yumiyi yakundama cheñi nikudi antu itwadikuma nawu.

5. Kukalanyi kutwamonaña wejima wetu, nawa tunateli kukwishinda ñahi?

⁵ Muloña wakwila twaswana kubula kuwanina, kwovwahila kwatukalilaña. Chakala kwovwahila nshimbi jaNzambi mpinji yejima. Pawulu niyena wadiña nakukala kwokumu. Wasonekeli nindi: “Ilaña namoni lushimbi lwacheñi muyidi yami lwalwishaña nalushimbi lwayitoñojoka yami, lunakeñi kuñiñija muwuduñu walushimbi lwanshidi lwekala muyidi yami.” (Aroma 7:23) Kafwampi, chaswayi kwovwahila neyi kwosi yuma yinakukeñeka kudihana, kukala hela neyi yuma yinakwenda chiwahi. Hanu dinu twelaña ñahi neyi hadi kulwisha hakachi kampwila yetu yakukeña kwovwahila ‘nikufwila kwachisemwa chaheseki, nikufwila kwamesu’? Iku kufwila kwatama kwafumaña hakubula kuwanina hamu tuhu ‘nispiritu yamunu mwishina’ yatuluwañeshaña nawa yasweja ñovu. (1 Yowanu 2:16; 1 Akorinda 2:12) Hakwila nawu tudikañi twatela ‘kuloñesha nyichima yetu’ henohu kukala hela kweseka kanda kumwekani nawa twatela kufuukulahu chikupu kumwovwahila Yehova hela chikukala ñahi. (Masamu 78:8) Tukweti yakutalilahu yayivulu muBayibolu yawantu ashindili kweseka muloña aloñesheli nyichima yawu.—Ezera 7:10; Danyeli 1:8.

6, 7. Lumbululenu kudiza kwahalwetu chikwatela kutukwasha kufuukulahu chachiwahi.

⁶ Tunateli kuloñesha nyichima yetu kuhitila mukudiza Bayibolu nakashinshi ninyikanda yashindamena haBayibolu. Fwikijenu neyi munakwila ichi chuma chinalondeluhu. Twili netu didu ifuku dimwadizaña. Munalombi kulonda spiritu yaYehova yiyikwashi kuzatisha nsañu yimunadizi Mwizu dindi. Dichi munafuukuluhu kutala filimu haTV ifuku dikwawu namelela. Munatiyi nawu filimu yeniyi yayiwahi; ilaña muneluki nenu munoyu filimu mudi yuma yikwawu yawuvumbi nimadombu.

⁷ Himukutoñojoka kufumba kwaPawulu kwekala haAefwesesa 5:3, kwahosha nawu: “Hakwila wuvumbi, nawuzondu wamumuchima wejima, hela lwisu, bayi muyitenaña mukachi kenuku, dimu mwatelela akwakujila.” Himukwanuka cheñi nikufumba kwaPawulu kwekala haAfwilipi 4:8. (Tañenu.) Chimunakutoñojoka haniku kufumba kwonenawu, mudinhula nikudihula ninenu, ‘Neyi nitalaña mafilimu amuchidiwu mumushikila, komana inakulondela chakutalilahu chaYesu chakumwovwahila Nzambi chikupu?’ Chumanyi chimukwila? Komana mukutala filimu yeniyi?

8. Muloñadi wutwatela kwikala nayililu yayiwahi nikukakela kunshimbi jaloña?

 ⁸ Tukuluwañesha neyi tubula kukakela kunshimbi jaYehova, hadaha nakutoñojoka netu twakola chakwila tunateli kushinda yuma yafumaña mukudikunda nawantu atama, kushilahu niyuma yawuvumbi nimadombu. Ilaña, twatela kudikiña nikukiña anyanetu kuyuma yatama yamwekeshaña yililu yaSatana. Antu ekala kukaloña kayibokolu asoñamaña hakudibula hakolaña muloña achiinaña kuyikwata kudi chibokolu. Komana etu hitwatela kudikiña chikupu “namaana” aSatanaku?—Aefwesesa 6:11.

9. Muloñadi wutwatela kufuukulahu kumwovwahila Yehova mafuku ejima?

⁹ Kafwampi ifuku nifuku twatela kufuukulahu neyi chakwila tukwila yuma kwesekeja nanshimbi jaYehova hela nehi. Hakwila nawu tukapuluki, twatela kumwovwahila Nzambi nikukakela kunshimbi jindi jaloña. Kuhitila mukulondela chakutalilahu chaKristu chakwovwahila ‘ndo-o nikukufwa,’ tukumwekesha netu tukweti chikuhwelelu chakola. Yehova wakatukiswila neyi tutwalekahu nakashinshi. Yesu wakanini nindi: “Muntu wakakakela nikunsa diyi wakahanda.” (Matewu 24:13) Hela chochu, chumichi chakeñekaña kwikala abula woma neyi Yesu.—Masamu 31:24.

Yesu Wemikili Chakutalilahu Chabadika Hakabula Woma

10. Ikakeja damuchidinyi ditunateli kumona, nawa chumanyi chitunateli kwila?

¹⁰ Chineli tudi mukanu kaayi mudi antu akweti yililu yatama, twatela kwikala akadi woma kulonda abuli kutuluwañesha. AkwaKristu azatilaña hamu nawantu elaña yuma yatama, amonaña kukala kwamali, niikakeja dansakililu dinateli kuyiluwañesha kuleka nshimbi jaYehova jaloña. Amavulu ayidimbululaña kudi yisaka. Mumatuña amakwawu, hamashikola atañishaña nawu yuma yadinjilili yayeni nawa antu amavulu anakukuhwelela ntañishilu yakwila nawu Nzambi kwosi. Hitunateli kukumina dakutondolwela ikakeja damuchidiwu chakubula kwilahu chumaku. Twatela kwilahu chuma kulonda tudikañi naniyi ntañishilu nikudikiña. Chakutalilahu chaYesu chatulejaña chitwatela kudikiña.

11. Indi kutoñojoka hachakutalilahu chaYesu kukutukwasha ñahi kwikala akadi woma?

¹¹ Yesu wayilejeli atumbanji twindi nindi: “Mukumona lukadi mumpata yamunu mwishina, ilaña tiyenu kuwaha, ami nemiki mpata yamunu mwishina mushindu.” (Yowanu 16:33) Mpinji yejima wakaanineña yuma yamukaayi. Hetejeli kaayi kumukañesha kuzata mudimu windi wakushimwina hela kumukojeja kudiwulu nshimbi yakudifukula kwalala niyililu yayiwahuku; anetu dichitwatela kwila. Yesu wahosheli hadi atumbanji twindi mukulomba nindi: ‘Wena hiyampata yamunu mwishinaku, neyi chineli ninami hinidi wampata yamunu mwishinaku.’ (Yowanu 17:16) Kudiza nikutoñojoka chakutalilahu chaKristu chakubula woma kunateli kutuleñela kwikala akadi woma nawa ambukaku netuña.

Dizenu Kwikala Akadi Woma Neyi Yesu

12-14. Shimunenu yakutalilahu mwamwekesheleliyi Yesu kubula woma.

¹² Yesu hadiña nawomaku mumudimu windi  wakushimwina wejima. Hakwikala Mwana kaNzambi, wazatishili ñovu yindi chakadi woma hampinji ‘yeñililiyi mutembeli nakutemunamu ejima alandishilaña nialandililaña mutembeli, nakuhinona jimesa jawakwakuhimpa mali, nimatanda awadiñi nakulandisha tutela.’ (Matewu 21:12) Hampinji yenjili amashidika nakumukwata Yesu hawufuku wakukumishaku hamaseki, wadishimwini yomweni chakadi kutiya woma kulonda yakiñi atumbanji twindi, wahosheli nindi: “Neyi yami mudi nakukeña yilekenu awa adiyili kwawu.” (Yowanu 18:8) Hahitili kapinji kantesha, Yesu wamulejeli Petulu kusomeka mpoku yindi muchindalu, ichi chamwekesheli nawu Yesu wakuhweleleli muwukwashu waYehova bayi muyitwa yahamasekuku.—Yowanu 18:11.

¹³ Chakadi kutiya woma Yesu wayisolweli hatooka to-o antañishi akutwamba atama nyichima amumafuku indi nintañishilu yawu yatama. Yesu wayilejeli nindi: ‘Oyu yihuñu yimwakamonenu ansoneki nawaFwarisi, amfwikiji! Mwenzelelaña akwenu hanzi yawanta wamwiwulu.’ Watwalekeluhu nindi, ‘Munaleki kwila yuma yaNshimbi yalema, wuñaji, niluwi, nichikuhwelelu. . . . Mwatookeshaña hanzi yalupasa nacheña, hakwila mukachi chochimwadisoma nanyilami nikubajama.’ (Matewu 23:13, 23, 25) Atumbanji twaYesu niwena hiyateleleli kutiya womaku muloña akulumpi jansakililu yakutwamba ayikabishili cheñi nikujaha amakwawu hakachi kwawu.—Matewu 23:34; 24:9.

¹⁴ Yesu hatiyili woma andemonuku. Ifuku dimu, wadiweni namuntu wadiña nawandemoni asweja ñovu chakwila kwosi muntu watwesheleña kumukasa mwileñuku. Yesu wafumishili andemoni amavulu amukabishileña ona muntu chakadi kutiya woma. (Maku 5:1-13) Makonu, Nzambi hayinka akwaKristu ñovu yakukoña yihayamisha yamuchidiwuku. Hela chochu, mumudimu wetu wakushimwina anetu nawa twatela kulwa njita yakuspiritu naSatana, ‘wunaputishi mesu ayitoñojoka yawantu abula kwitiya.’ (2 Akorinda 4:4) Kufwana Yesu, yitwa yetu ‘hiyachisemwa chahesekuku; hiyitwa yasweja ñovu kumesu aNzambi yakusanda nachu yuma yakola neyi mpwembu’ chidi neyi tushindikilu twatama twamunsakililu twakala kuhimpa. (2 Akorinda 10:4) Twadizaña yuma yayivulu kuchakutalilahu chaYesu hakuzatisha iyi yitwa yatwinkayi Nzambi.

15. Chumanyi chamuletesheli Yesu kwikala nawulobu?

¹⁵ Chikuhwelelu dichamuletesheli Yesu kwikala nawulobu, bayi neyi kubula woma hohuku. Anetu nawa twatela kwikala nachikuhwelelu. (Maku 4:40) Tunateli kwikala ñahi nachikuhwelelu chalala? Chakutalilahu chaYesu chikutukwasha cheñi. Yesu welukili Nyikanda chikupu nawa wayikuhweleleli nankashi. Yesu hazatishili mpoku yakabali yayeni neyi chitwaku, ilaña wazatishileña mpoku yaspiritu yakabali, Izu daNzambi. Mpinji yejima wamwekesheleña nawu yuma yatañishileñayi yashindamena muNsona. Kakavulu wasambilileña kuhosha mazu akwila nawu: “Anasoneki nawu,” dikwila nawu Mwizu daNzambi. *

16. Tunateli kwikala ñahi nachikuhwelelu chakola?

¹⁶ Hakwila nawu twikali nachikuhwelelu chakola chinateli kutukwasha kushinda kweseka kwakubula kutondolwela kwamonañawu atumbanji, twatela kutaña nikudiza Bayibolu mafuku ejima. Nawa twatela kuyaña kukupompa kwawakwaKristu, nikwanukaña nsañu yalala yekala chikuku chachikuhwelelu. (Aroma 10:17) Twatela cheñi kutoñojoka chikupu hayuma yitwadizaña, kulonda yishimati munyichima yetu. Chikuhwelelu chakola hohu dichatela  kutusañumuna kwikala nawulobu. (Yakoba 2:17) Nawa twatela kulomba spiritu yajila muloña chikuhwelelu chekala hakachi kamukabu waspiritu.—Aŋalija 5:22.

17, 18. Indi muhela wumu wakansi wamwekesheli ñahi kubula woma hashikola?

¹⁷ Chuma chamweniyi muhela wakansi wejina daKitty chamuletesheli kwiluka chikuhwelelu chakola chichaleñelaña kwikala akadi woma. Kufuma tuhu kuwansi windi welukili nindi hatela ‘kutiya nsonyi nansañu yayiwahi’ hashikolaku, nawa wakeñeli nankashi kushimwina wunsahu wawuwahi kudi akwawu akashikola. (Aroma 1:16) Chaaka nichaaka wafuukwiluhu kushimwina nsañu yayiwahi kudi akashikola amakwawu ilaña wadiña nakushintajala muloña watiyileña woma. Chimwahitili yaaka wahimpili shikola. Wahosheli nindi, “Ichi dinu mpinji yejima yinombili chakubula kushimwina, nukushimwinaña.” Kitty walombeli kulonda yekali nawulobu neyi waKristu, kashinshi nimpinji yayiwahi.

¹⁸ Ifuku datachi kuya kushikola, atudizi ayilejeli kudilumbulula hamuntu hamuntu. Atudizi amavulu ashimwini nsakililu muyakulililuwu, nawa ahosheli cheñi nawu hiyayileña nakudifukula mafuku ejimaku. Kitty welukili nindi dichuma chalombeliyi. Hakudilumbulula wahosheli chakubula woma nindi, “Nidi Chinsahu chaYehova, nawa Bayibolu diyi yanlombolaña munsañu yakudifukula nikwikala nayililu yayiwahi.” Chatwalekeluhu kuhosha atudizi amakwawu amulembwili. Ilaña amakwawu ashiluku maana nawa amwihwili malwihu. Ntañishi wahosheli nindi Kitty wukweti chakutalilahu chachiwahi chakuhakwilaku kwitiya kwindi. Kitty watiyaña kuwaha hakudizila kuchakutalilahu chaYesu chakubula woma.

Ikalenu naChikuhwelelu Nawa Akadi Woma Neyi Kristu

19. (a) Indi kwikala nachikuhwelelu chalala kwakeñekañadi? (b) Tunateli kumuzañalesha ñahi Yehova?

¹⁹ Apostolu niwena elukili nawu chikuhwelelu dichatela kuyileñela kwikala akadi woma. Dichi amulembeleli Yesu nawu: ‘Tuvulishili chikuhwelelu.’ (Tañenu Luka 17:5, 6.) Kwikala nachikuhwelelu chalala kwakeñekaña yuma yayivulu kubadika kukuhwelela hohu nawu Nzambi wekala kwoku. Kwakeñekaña kwikala nawulunda waweni naYehova, neyi wulunda wekala hakachi kamwana wanyanya naTata yidi wukweti kukeña. Solomoni amoneneneni hakusoneka nindi: “Eyi mwanami, neyi muchima weyi wukwikala namaana, muchima wami wakatiya kuwaha, mwalala nakazañalala; nyivumbu yeyi chiyikuhosha yuma yoloka muchima wami mwivumu wukuluña.” (Yishimu 23:15, 16) Munjila yoyimu, neyi twikala nawulobu wakukakela kunshimbi jaloña tukumuzañalesha Yehova, nawa kwiluka chumichi kukutuletesha kubula woma. Dichi, twimbujoleña chakutalilahu chaYesu mpinji yejima, tubuleña kutiya woma wakukakela kuyuma yaloña.

[Tumazu twaheshina]

Munateli Kulumbulula?

• Chumanyi chikutukwasha kwovwahila hela chakwila hitwawaninaku?

• Indi wulobu washindamena hanka, nawa wunateli kutukwasha ñahi kwikala akadi woma?

• Chumanyi chikufumamu neyi twikala ovwahila nikwikala nawulobu neyi Kristu?

[Malwihu aKuzatisha haKudiza]

[Mwevulu wudi hefu 16]

Komana ‘munakuloñesha muchima wenu’ kulonda mudikañi nakweseka?

[Mwevulu wudi hefu 18]

Chikuhwelelu chinateli kutuletesha kwikala nawulobu neyi chadiñayi Yesu