Komana Mwalemesha Chuma Chayikoñelayi Yehova haKuyikuula?

‘Yehova Nzambi yaIsarela akisulewi, muloña nenzi nakutala antu indi ayikuuli.’—LUKA 1:68.

1, 2. Indi kukala kutukweti makonu anateli kukulumbulula ñahi, nawa malwihwinyi itukuhanjekahu?

 FWIKIJENU anayitenteki muchipatela. Mukapeka mumudi antu ejima anakuyekela nakankati kokamu, musoñu wafwana wakadi kwiluka yihemba. Chimwatiya nawu ndotolu nakudikita chikupu kulonda yawani yihemba, mukutiya kuwaha. Mukukeña kwiluka neyi chakwila ndotolu nawani yihemba. Ifuku dimu, mutiya nikutiya nawu nawani dehi yihemba. Ndotolu wawana yihemba wadihana chikupu hakwila nawu yatweshi kuyuuka. Munateli kutiya ñahi? Chakadi nikujina mukumulemesha nikumusakilila chikupu muntu wawana yihemba yakuyuuka nachu niantu amavulu kulonda kuyikuula mukufwa.

² Iyi nsañu yinateli kumwekana neyi yakulumbisha, ilaña wonsu wetu tudi mukukala kweniku. Wejima wetu tudi mukukala kwabadika kukala kunashimunewi. Tunakukeña chikupu chamwinu. (Tañenu Aroma 7:24.) Yehova wadihana chikupu kulonda yatukuuli. Mwanindi niyena wadihanini nankashi. Ichi dinu, tushinshikenu malwihu awana alema. Muloñadi wutwakeñelaña kukuulewa? Chumanyi cheliliyi Yesu hakwila nawu yatukuuli? Indi Yehova  welilidi hakwila nawu yatukuuli? Nawa tunateli kumwekesha ñahi netu twalemesha kukuula kwatukuulayi Nzambi?

Muloña Wutwakeñelaña Kukuulewa

3. Indi nshidi yesekana ñahi nachipupu?

³ Kwesekeja nakuchinda kwakatataka, chipupu chamwekeni mu 1918, chajahili antu amavulu nankashi, achishimuna nawu hichipupu chatama mukuhanda kwawantu. Nyisoñu yikwawu yafwana chikupu. Hela chakwila antu antesha asambulaña iyi nyisoñu, ilaña antu amavulu asambulaña iyi nyisoñu afwaña. * Hela chochu, hitukutwesha kwesekeja yipupu yeniyi nanshiduku. Anukenu mazu ekala haAroma 5:12 akwila nawu: “Kudi iyala wumu nshidi yeñilili mumpata yamunu mwishina, ninshidi yaleteli kufwa; chochenochu nawa nikufwa kwashikeneni antu ejima, muloña wejima wawu avulumwini.” Nshidi yasambukila antu ejima, muloña antu ejima abula kuwanina avulumuna. (Tañenu Aroma 3:23.) Antu añahi afwaña hamuloña wanshidi? Pawulu wasonekeli nindi nshidi yaleteli kufwa kudi ‘antu ejima.’

4. Indi Yehova wamonaña ñahi wumi wetu, nawa chumichi chambuka ñahi nachamonañawu antu amavulu makonu?

⁴ Makonu antu amavulu amonaña nawu nshidi nikufwa hichuma chakuhemesha hohu. Akamenaña hohu kufwa muwansi, ilaña kufwa kwashikenaña antu hamuloña wawushinakaji akwidiwulaña. Chekala chaswayi antu kuvulamena mwafuukwiliyi Nleñi. Wumi wetu wekala wakapinji kantesha, kwesekeja nachafuukwiliyi Yehova. Kafwampi, kwosi muntu wahandahu dehi hela “ifuku dimu” kwesekeja nachamonañayi Yehova. (2 Petulu 3:8) Dichi, Izu daNzambi dahosha nawu wumi wetu wakapinji kantesha neyi chakulaña matahu hela neyi muuya wonañawu. (Masamu 39:5; 1 Petulu 1:24) Twatela kwanukaña chumichi. Muloñadi? Neyi twiluka “musoñu” watuyandishaña chiwafwana, tukulemesha chikupu ‘kuukewa’—kutukuula.

5. Indi nshidi yaletesha tubuli kudiluñisha chumanyi?

⁵ Hakwila nawu twiluki nshidi chiyatumweshaña kañalaña niyuma yafumamu, twatela kutiyisha yuma yitwamonaña hamuloña wanshidi. Chumichi chinateli kutukalila muloña nshidi yaletesha tubuli kudiluñisha yuma yadiluñishiluwu anvwali jetu atachi. Adama naEvu hakusambila adiña nawumi wawanina. Chineli adiña awanina, adiñi nawuswa wakufukulahu mwejima mwakeñeleñawu. Dichi adi kutwalekahu kwikala ambuña aYehova Nzambi, nikukalakala nyidimu yejima yayinkeluwu. Ilaña, akaanini chawaana chakwikala nawumi wawanina. Muloña wakwila adikañili naYehova, Adama naEvu ajimbesheli wumi wayitoñweleliyi Yehova hamu tuhu niwawa nyanawu. (Kutachika 3:16-19) Hampinji yoyimu, akwachikili “musoñu” watama wutunahanjekeñahu, anetu nawa atusambwisha. Dichi, Yehova wayihishili namuloña. Ilaña, etu tukweti kuchiñeja kwakukuulewa.—Masamu 103:10.

Chuma Cheliliyi Yesu Hakwila Nawu Atukuuli

6, 7. (a) Indi Yehova wasambilili kumwekesha ñahi nindi chikakeñeka kudihana chikupu hakwila yatukuuli? (b) Chumanyi chitwatela kudizila kunyilambu yahaniniyi Abeli, niankakulula adiñuku henohu Nshimbi kanda?

⁶ Yehova welukili nindi chinakukeñeka kudihana nankashi hakwila nawu yakuuli anyana kaAdamu naEvu. Muwuprofwetu wasonekawu haKutachika 3:15, twadizañamu chuma chakeñekeleña hakwila nawu atukuuli. Yehova waloñesheli ‘mbutu,’ hela chamwinu, wamba kamujilumuna Satana. Hela chochu, chamwinu yeniwu wakabakeni, nawa amuchikili kukatutu muchifwikija. Tuneluki netu kuchika kukatutu hichuma chakata nawa kunateli kukañesha muntu kuzata mudimu hela kumuzeyesha. Indi kuchika kukatutu  kwalumbulukadi muniwu wuprofwetu? Yumanyi yomikiliyi Watondewa waYehova?

⁷ Hakwila nawu yakuuli antu kunshidi, chamwinu waloñesheli chuma chakubuta nachu nshidi, njila yakukundamishilamu antu kudi Nzambi kuhitila mukufumishahu yuma yaleta nshidi. Indi chumichi chakeñekeleñadi? Kwadiña yuma yamwekesheleña nawu mulambu wakeñekeleña. Chelili Abeli, muntu watachi wakashinshi, yomulambuli Yehova mulambu wawatunyama, waweni wuselewa waNzambi. Chimwahitili yaaka, ankakulula amwakama Nzambi adi neyi Nowa, Abarahama, Yakoba niYoba alambwili nyilambu yadifwana yamuzañalesheli Nzambi. (Kutachika 4:4; 8:20, 21; 22:13; 31:54; Yoba 1:5) Nshimbi jamwinkeluwu Mosi jaletesheli antu kwiluka kuhana nyilambu.

8. Indi kapristu muneni welileña chumanyi Hefuku daKubuta Nshidi hachaaka hachaaka?

⁸ Nyilambu yalambwileñawu Hefuku daKubuta Nshidi diyi nyilambu yalema nankashi yakeñekeleña muNshimbi. Hanidi ifuku, kapristu muneni wazatileña nyidimu yayivulu yachifwikija. Walambwileña nyilambu kudi Yehova kulonda kubuta nachu nshidi—wasambilileña kulambula nyilambu yezanvu dawatupristu, kuhiñahu yanyichidi yawantu abulili kwikala atupristu. Kapristu muneni weñilileña Mwasweja Kujila mukapeka katabanaka hela mutembeli, weñilileñamu kamu hohu hachaaka hefuku dakubuta nshidi. Wasampwileña mashi anyilambu kumensu achimbañu chachitiyañenu. Mpinji jikwawu hewulu dachimbañu chachitiyañenu hamwekeneña ivu ditooka, damwekesheleña nawu Yehova Nzambi wudi mwajila.—Kwidika 25:22; Alevi 16:1-30.

9. Hefuku daKubuta Nshidi, kapristu muneni wadiña nakwimenakwinyi? (b) Indi kapristu muneni cheñilileñayi Mwasweja Kujila chemeneneñaku chumanyi?

⁹ Kapostolu Pawulu amoneneni kulumbulula mwatalisha iyi nyidimu yachifwikija. Walumbulwili nindi kapristu muneni wemeneneñaku Mesiya, Yesu Kristu, nawa nyilambu yalambwileñawu yemeneneñaku kufwa kwaKristu neyi mulambu. (Aheberu 9:11-14) Mulambu wawanina wabutili chikupu nshidi yamazaza awantu ayedi, izaza dawatupristu ana kwaKristu awayishewa naspiritu a 144,000 ‘nianyikoku acheñi.’ (Yowanu 10:16) Cheñilileñayi kapristu muneni Mwasweja Kujila, wadiña nakwimenaku cheñililiyi Yesu mwiwulu kulonda kutumwekena kumesu aYehova Nzambi nakulema kwamulambu wefutu danyiloña.—Aheberu 9:24, 25.

10. Indi wuprofwetu wamuBayibolu washimuna nawu Mesiya wakamona yumanyi?

¹⁰ Chakadi nikujina, hakwila nawu akuuli anyana kaAdama niEvu chakeñekeleña kudihana chikupu. Mesiya wateleli kuhana wumi windi. Atuprofwetu amuNyikanda yachiHeberu ashimuna iwu wunsahu wawuvulu hachumichi. Chakutalilahu, kaprofwetu Danyeli washimwini chikupu nindi ‘Mesiya Kalamba’ “akamufumishamu” hela kumujaha, kulonda ‘kubuta nshidi.’ (Danyeli 9:24-26) Isaya washimwineñahu dehi nindi Mesiya akamukaana, akamukabisha, nikumujaha hela kumukatisha kukola nyiloña yawantu abula kuwanina.—Isaya 53:4, 5,  7.

11. Indi Mwana kaYehova wadihanini mujinjilanyi kulonda yatukuuli?

 ¹¹ Henohu kanda yenzi hamaseki, Mwana kaNzambi wasemuka kankawindi welukili yuma yateleleli kwilayi kulonda yatukuuli. Wateleleli kukabakana chikupu nikumujaha. Hampinji yamulejeleñawu iyi nsañu kudi Tata yindi, komana washintajalili hela kudikaña? Ilaña wovwahilili mwejima mwamulejeliyi Tata yindi. (Isaya 50:4-6) Chochimu, hampinji yadiñayi hamaseki, Yesu wovwahilili nakwila nkeñelu yaTata yindi. Muloñadi? Wakwili mumazu ahosheliyi nindi: “Nakeña Tata.” Wakwili cheñi hakuhosha nindi: “Hikudi kukeña kwabadika kwenikuku, kwakutulayi muntu wumi windi hanyijimba yawamabwambu jindi.” (Yowanu 14:31; 15:13) Dichi, kukuulewa kwetu kwashindamena chikupu hakukeña kwakweni kwaMwana kaYehova. Hela chakwila, waheni wumi windi wawanina, watiyili kuwaha kwila mwenimu kulonda kutukuula.

Cheliliyi Yehova Hakwila Nawu Yatukuuli

12. Ifutu danyiloña hinkeñelu yanyi, nawa wahenenenidi ifutu danyiloña?

¹² Yesu hidiyi wafuukwili nindi ahani ifutu danyiloña hela kufuukula mwatela kuhaninawuku. Ilaña iyi njila yakukulilamu yadiña chuma chalema munkeñelu yaYehova. Kapostolu Pawulu wahosheli nindi kameña kadiña mutembeli, halambwilileñawu nyilambu kadiña nakwimenaku nkeñelu yaYehova. (Aheberu 10:10) Dichi, kukuula kwatukuulawu kuhitila mumulambu waKristu hichuma chasweja kulema chitwamuhamekelaña Yehova. (Luka 1:68) Nzambi wamwekesheli nkeñelu yindi yalala nikukeña kwakweni kwakeñayi antu.—Tañenu Yowanu 3:16.

13, 14. Indi chakutalilahu chaAbarahama chinateli kutukwasha ñahi kwiluka nikulemesha chuma chatwililayi Yehova?

¹³ Indi Yehova welilidi hakwila nawu yatumwekesheli kukeña muniyi njila? Chumichi chakala kutiyisha. Hela chochu, kwekala nsañu yamuBayibolu yinateli kutukwasha kutiyisha chikupu. Yehova wamulejeli muntu washinshika Abarahama kwila chuma chakala nankashi, kulambula mwanindi Isaka neyi mulambu. Eña, Abarahama wadiña tata yawantu wukweti kukeña. Yehova wahosheli kutalisha hadi Isaka nindi “mwaneyi, weyi wumu hohu wakeña.” (Kutachika 22:2) Hela chochu, Abarahama welukili nindi kwila nkeñelu yaYehova hichuma chalema hama kubadika kukeña kwamukeñeliyi Isaka. Abarahama wovwahilili. Ilaña, Yehova hakeñeli Abarahama kukoña chuma chadi kukoñayi Yomweni kumbiduku. Dichi Nzambi watemesheli kañelu kulonda kamulekeshi Abarahama henohu kanda yolambuli mwanindi. Abarahama wafukwiluhu kumwovwahila Nzambi yindi muniku kweseka kwasweja nawa wadiña nachikuhwelelu chakumona mwanindi neyi nasañuki dehi. Hela chochu, wamukuhweleli Nzambi chikupu nindi wakamusañula. Eña, Pawulu wahosheli nindi Abarahama wamutambwilili Isaka mukusañuka munjila ‘yachifwikija.’—Aheberu 11:19.

¹⁴ Komana munateli kufwikija chatiyiliyi Abarahama kumuchima kukata hampinji yadiloñesheleñayi kulonda yolambuli mwanindi? Munjila yoyimu, chuma chamweniyi Abarahama chakutukwashaña kwiluka chatiyiliyi Yehova hakulambula muntu wateneniyi nindi,  “Mwanami nakeña.” (Matewu 3:17) Ilukenu nenu, Yehova chamukatili nankashi kumuchima. Adikundili chikupu naMwanindi hadi yaaka yayivulu hadaha mabiliyoni ayaaka. Mwana wakalakeleña namuzañalu naTata yindi neyi “mukalawenu” windi wakeñewa nawa neyi Mukwakumuhoshelaku, “Izu.” (Yishimu 8:22, 30, 31; Yowanu 1:1) Hitunateli kutiyisha kumika kwomikiliyi Yehova chelili Mwanindi, hiyakumuyadisha, kumusekesha, nikumujaha neyi mbanjuku. Yehova wadiheni chikupu hakwila nawu yatukuuli. Hanu dinu, tunateli kumwekesha ñahi netu twalemesha iwu wamwinu?

Munateli Kumwekesha Ñahi Nenu Mwalemesha kuKuulewa?

15. Indi Yesu wamanishili ñahi mudimu weneni wakubuta nshidi, nawa chumichi chaleteshadi?

¹⁵ Yesu wamanishili mudimu wakubuta nshidi hasañukiliyi nakuya mwiwulu. Chadiwaniniyi cheñi naTata yindi wukweti kukeña, waheni mulambu walema kudi Nzambi. Amukiswilili nankashi. Antu ayanakeneni chikupu nshidi jawu, tachi nshidi yawana kwaKristu awayishewa, kuhiñahu “yawantu ampata yamunu mwishina ejima.” Hamuloña waniwu mulambu, antu ejima abalumuka mumuchima hanshidi jawu makonu nakwikala atumbanji twaKristu alala anateli kwikala nawuselewa waYehova Nzambi. (1 Yowanu 2:2) Indi chumichi chayikuma ñahi?

16. Tunateli kulumbulula ñahi muloña wutwatelela kumusakilila Yehova hakwila nawu yatukuuli?

¹⁶ Tufuntenu cheñi kuchakutalilahu chidi kumatachikilu. Neyi chakwila ndotolu wawana yihemba yakuuka nachu musoñu yenza nakuwana ayeji ejima mukapeka mwayitentekawu nakuyileja nindi: Muyeji wejima wukutambula yihemba nikulondela yijila wukukola. Indi neyi akwenu ayeji amavulu akaana kulondela nshimbi jandotolu, nakuhosha nawu chikuyikalila kutambula yihemba hela kulondela yijila? Komana ninenu mukukaana hela chakwila muneluki chikupu nenu yihemba yenoyu yinakukwashana? Inehi. Chakadi nikujina mukusakilila chikupu hakuyinka yihemba nawa mukulondela nshimbi jandotolu nakashinshi, hadaha mukulejaku niakwenu chuma chimunafuukuluhu. Munjila yoyimu, wejima wetu twatela kumusakilila chikupu Yehova, hayuma yatukoñelayi kulonda yatukuuli kuhitila mwifutu danyiloña daMwanindi.—Tañenu Aroma 6:17, 18.

17. Munjilanyi mumukumwekeshela kusakilila hayuma yakoñayi Yehova kulonda yayikuuli?

¹⁷ Neyi chakwila twasakililaña yuma yatukoñelayi Yehova niMwanindi hakwila nawu atukuuli kunshidi nikukufwa, tukumwekeshaña chumichi. (1 Yowanu 5:3) Tukulwishaña chikupu kulonda tubuleña kuvulumuna. Hitunateli kuvulumuna mumushikila nikwila yuma yatama mukuswamujokaku. Neyi twila chumichi chikumwekesha nawu hitwalemesha hela kusakilila ifutu danyiloñaku. Ilaña, tukumwekeshaña netu twalemesha ifutu danyiloña neyi tuzata nañovu kulonda twikali nawulunda wawuwahi naNzambi. (2 Petulu 3:14) Tukumwekesha cheñi netu twalemesha ifutu danyiloña kuhitila mukulejaku amakwawu kuchiñeja kwetu kwakukuulewa kulonda niwena ekali nawulunda wawuwahi naYehova nikucheñeja kwawumi wahaya nyaka. (1 Timotewu 4:16) Chalala twatela kudikita mpinji yejima nakumuhameka Yehova niMwanindi. (Maku 12:28-30) Toñojokenu chumichi! Tunakuchiñeja mpinji yakatukuulawu chikupu kunshidi. Tukahandaña kwesekeja nachafuukwiliyi Nzambi nindi tuhandeña, kwikala awanina haya nyaka—chumichi chaswayi muloña wayuma yakoñayi Yehova kulonda yatukuuli.—Aroma 8:21.

[Tumazu twaheshina]

Mukwakula Nenudi?

• Muloñadi wumunakukeñela kuyikuula swayi-swayi?

• Indi Yesu chadihaniniyi chayikwashaña ñahi?

• Mwatiyaña ñahi hachawaana chaYehova chamulambu?

• Anayikoleshi kwiladi kwesekeja nayuma yakoñayi Yehova hakuyikuula?

[Malwihu aKuzatisha haKudiza]

[Mwevulu wudi hefu 30]

Hefuku daKubuta Nshidi, kapristu muneni wamuIsarela wemeneneñaku Mesiya

[Mwevulu wudi hefu 31]

Chadikeñeleleliyi Abarahama kulambula mwanindi chatudizishaña yuma yayivulu hakudihana kwabadika kwaYehova