Komana Nsakililu Yejima Yayiwahi?

TUNAKUSHAKAMA mukaayi mudi jinsakililu jambokamboka. Kusandujola kwakatataka kwamwekesha nawu kwekala nsakililu jamaneni 19 ninsakililu janyanya 10,000 mukaayi kejima. Iji nsakililu jashiyashana jaleñelaña antu kuditondela nsakililu yakeñawu. Komana chalema kutonda chachiwahi nsakililu?

Antu amakwawu ahoshaña nawu nsakililu jashiyashana jidi neyi njila jambokamboka jaya kumpidi. Amonaña nawu chaambu hosi, chineli njila jejima jaya kwiluña dimu. Atoñojokaña nawu kwekala Nzambi Watwesha Yejima wumu hohu, dichi nsakililu jejima jalombolaña antu kudi yena.

Komana Njila Jejima Jaya Kudi Nzambi?

Indi Yesu Kristu ntañishi wasweja kulemeshawu munsañu janyaka, wahosheli nindidi kutalisha haniyi nsañu? Wayilejeli atumbanji twindi nindi: “Iñililenu kuchisu chanyanya.” Muloñadi? ‘Muloña chisu cheneni, ninjila yabwambwañana yaya kukujilumuka, mweñilaña amavulu. Muloña chisu chanyanya, ninjila yanyanya yaya kuwumi, ayimonaña antesha.’—Matewu 7:13, 14.

Komana chalala Yesu wahosheli nindi nsakililu jikwawu jaya “kukujilumuka”? Tahindi watañishileña nindi antu abula kwitiya hohu diwu adi munjila  yabwambwañana, ilaña amukuhwelela Nzambi—hichikweti muloña nansakililu muyayañawuku—adi munjila yanyanya yaya kuwumi?

Hanyima yakushimuna nindi kudi njila jiyedi hohu, Yesu wahosheli nindi: “Babelenu atuprofwetu akutwamba, enzaña kudenu avwala yitembi yanyikoku, ilaña mukachi hiyatuñwidi atuhuka.” (Matewu 7:15) Kuhiñahu wahosheli nindi: “Antu ejima akuntenatena nawu, Mwanta, Mwanta; hiyakawanina kwiñila muwanta wamwiwuluku, chiña muntu welaña muchima waTata yami wudi mwiwulu.” (Matewu 7:21) Neyi muntu amutenaña nawu hikaprofwetu hela wahoshaña nindi Yesu diyi “Mwanta” windi, chikuwaha kumutena nawu wetiya, bayi neyi muntu wabula kwitiyaku. Dichi dinu, Yesu wasoñamishili nindi bayi neyi nsakililu yejima yayiwahuku nawa bayi neyi antañishi ejima amunsakililu atela kuyikuhwelelaku.

Komana Chaswayi Kwiluka Njila Yanyanya?

Chineli njila jejima hijaya kudi Nzambuku, munateli kwiluka ñahi njila yanyanya yaya kuwumi hakachi kajinjila jajivulu? Shinshikenu ichi chakutalilahu: Fwikijenu neyi mudi mumusumba weneni hanu munajimbali njila. Himukwihula kulonda ayikwashi. Muntu wumu hakuyileja chikupu nindi muyili kumusela. Mukwawu hakuyikonkomweni nindi muyili kumujika. Ilaña mukwawu hakuyileja nindi mutonduhu enu aweni njila yimunamoni nenu yayiwahi. Nkumininaku, muntu mukwawu hakunona mapu yalala nawa yayileja ninjila yalala. Dichi yoyinka nimapu nindi mutaleñahu chimukuyaña munjila. Komana himukukuhwelela nenu mukushika kumunakuyaku?

Chochimu, neyi hitukutonda njila yansakililu yalala, twatela kwikala namapu yanjila yalala yakuspiritu. Komana mapu yeniyi yekala kwoku? Eña. Mapu yeniyi hiBayibolu, yahosha nawu: “Nyikanda yajila yejima ayonena dehi kudi Nzambi; yawaha kuleja nachu, nikutanyisha nachu, nikwolola nachu, nikufumba nachu mwaloña.”—2 Timotewu 3:16.

Chakadi nikujina mukweti Bayibolu mwidimi denu yimwatela kuzatisha neyi mapu yanjila yakuspiritu. Ansoneki yayinu magazini, aYinsahu jaYehova, akweti Bayibolu yayiwahi yatenañawu nawu, New World Translation of the Holy Scriptures. Hela chochu, neyi mudi aChinsahu chaYehova wanyi, munateli kuzatisha Bayibolu yidi yejima hampinji yimunakutaña nsañu yakwiluka nsakililu yayiwahi niyatama. Dichi, iyi yibaba yinalondashani yinazatishi Bayibolu yalemeshawu nankashi kudi antu amunsakililu yikwawu.

Chimukutañaña yibaba yinalondeluhu, esekejenu yuma yimweluka dehi nayuma yahosha Bayibolu. Anukenuña mazu ahosheliyi Yesu kutalisha hachitwatela kwambula nsakililu yayiwahi nayatama. Wahosheli nindi: “Nyitondu yayiwahi yejima yasoñaña nyikabu yayiwahi, ilaña mutondu watama wasoñaña nyikabu yatama. Mutondu wawuwahi hiwukutwesha kusoña nyikabu yatamaku, nimutondu watama hiwukutwesha kusoña nyikabu yayiwahuku.” (Matewu 7:17, 18) Shinshikenu nyikabu yayiwahi yisatu hohu yashimuna Bayibolu nawu yakwilukilaku ‘mutondu wawuwahi.’

[Mazu ekoku adi hefu 3]

Bayibolu yidi neyi mapu yalala yinateli kukwasha muntu kuwana njila yansakililu yalala