Kukeña kwaKristu Kwatusañumunaña Kukeñañana

‘Yesu . . . chakeñeliyi antu indi adiñi mumpata yamunu mwishina, wayikeñeli chikupu ndo-o nikunsa.’—YOWANU 13:1.

1, 2. (a) Indi kukeña kwamwekesheliyi Yesu kwahambakana munjilanyi? (b) Kukeña kwamuchidinyi kutukuhanjekahu muchinu chibaba?

 YESU wemika chakutalilahu chachiwahi chakukeña. Yuma yejima yahosheleñayi, yililu yindi, ntañishilu yindi nikuhana wumi windi neyi mulambu, kwamwekesheli kukeña kwindi. Yesu wakeñeli antu awanineñayi sweje-e dinu atumbanji twindi ndo-o nikukufwa.

² Yesu wemikila atumbanji twindi chakutalilahu chachiwahi chakukeña chatela kulondelawu. Chatusañumunaña cheñi kukeña amana kwetu niahela akuspiritu, hamu tuhu niantu ejima. Muchinu chibaba, tukuhanjeka yuma yatela aeluda amuchipompelu kudizilaku kudi Yesu hakukeña antu akoñaña yiluwa, hela yiluwa yamaneni. Tukuhanjeka cheñi kukeña kwaYesu chikwasañumunaña akwaKristu kukwasha amana kwawu niantu amakwawu hampinji yakukala niyikatu.

3. Hela chakwila Petulu wavulumwini chikupu, indi Yesu wamwililidi?

³ Ifuku dakwila Yesu kanda yofwi nampinji yawufuku, kapostolu kindi Petulu  wamukaanini mapampa kasatu. (Maku 14:66-72) Hela chochu, Petulu chafuntiliyi kwesekeja nachashimwineñahu dehi Yesu nindi wukafunta, Yesu wamwanakeneni. Yesu wamwinkeli Petulu nyidimu yalema. (Luka 22:32; Yililu 2:14; 8:14-17; 10:44, 45) Chumanyi chitwadizilaña kuyililu yaYesu kutalisha hadi muntu wunavulumuni chikupu?

Monenu Akwakuvulumuna Neyi Chayimweneñayi Kritu

4. Yumanyi yakeñekaña kumwekesha chikupu yitoñojoka neyi yaKristu?

⁴ Hakachi kayuma yayivulu yakeñekaña kumwekesha yitoñojoka yaKristu, chuma chinateli kutuneñesha chikupu hiyiluwa yawantu amakwawu, chili amuchisaka chili amuchipompelu. Chawushona, chineli mafuku akukumininaku akaayi kaSatana hiyakumana, spiritu yamwituña yinakuluwañesha antu chikupu. Kadiwu kawantu amwituña hela yililu yatama yinateli kutuluwañesha wejima wetu, nakuzeyesha kufuukulahu kwamuntu kwakwila yuma yaloña. Muyaaka nkulakaji yakusambila, antu amakwawu ayihañileña muchipompelu chawakwaKristu, amakwawu ayizuwilileña. Nimakonu elaña chuma chochimu. (1 Korinda 5:11-13; 1 Timotewu 5:20) Hela chochu, aeluda asompaña iyi nyiloña neyi amwekesha kukeña neyi kwaKristu, chumichi chikukwasha muntu wunavulumuni.

5. Indi aeluda anateli kwimbujola ñahi yitoñojoka yaKristu hakukwasha akwakuvulumuna?

⁵ Kufwana Yesu, aeluda atela kuhakwilaku nshimbi jaYehova jaloña mpinji yejima. Kwila mwenimu, embujolaña luwi lwaYehova, kwovwaha nikukeña. Neyi muntu yafutumuka chikupu, ‘yabaluka muchima’ nawa wukweti “spiritu yachikeka puchi” hamuloña wayuma yatama yinakoñiyi, hichikuyikalila aeluda ‘kumufuntisha muntu wudi ochu naspiritu yakudizozaku.’ (Masamu 34:18; Aŋalija 6:1) Chumanyi chatela kwilawu aeluda neyi muntu hanovwahili hela kubalumuka mumuchimaku?

6. Chumanyi chatela kutondolwelawu aeluda neyi anakukwasha mukwakuvulumuna, nawa muloñadi?

⁶ Neyi mukwakuvulumuna yakaana kufumba kwamuNsona hela yaleyela amakwawu yiluwa yindi, aeluda niamakwawu atela kutiya kutama. Hamuloña wakwila aneluki chinaluwañeshiyi, chikuyiletesha kuhosha yuma yahamuchima wawu kutalisha hayuma yinakoñiyi niyililu yindi. Hela chochu, kuzuwa kwatama nawa hikwamwekeshaña ‘yitoñojoka yaKristuku.’ (1 Akorinda 2:16; tañenu Yakoba 1:19, 20.) Yesu wasoñamishili antu amumafuku indi chakubula kuhita mumbadi, hela chochu, hahosheli mazu atama hela akukatisha kumuchimaku. (1 Petulu 2:23) Ilaña, wamwekesheli hatooka to-o nawu akwakuvulumuna abalumuki mumuchima nakufunta kudi Yehova. Eña, muloña waweni wenjililiyi Yesu hamaseki wadiña ‘wakwamwina akwanshidi.’—1 Timotewu 1:15.

7, 8. Chumanyi chatela kuyilombola aeluda hakusompa nyiloña?

⁷ Indi chakutalilahu chaYesu haniyi nsañu chikutukwasha ñahi kumona antu atela kubabeshawu kudi chipompelu? Anukenu nenu nshimbi yamuBayibolu yakubabesha muntu muchipompelu yakiñaña anyikoku nawa yaleteshaña mukwakuvulumuna anababeshuwu kubalumuka mumuchima. (2 Akorinda 2:6-8) Chawushona, amakwawu hiyabalumukaña munyichimaku nawa ayihañaña muchipompelu, ilaña twazañalala hakumona antu amavulu ahañañawu afuntaña kudi Yehova nimuchipompelu chindi. Aeluda neyi amwekesha yililu neyi yaKristu, chekalaña chaswayi kudi muntu wunaluwañeshi kutoñojoka cheñi hayililu yindi nakufunta. Kumafuku akumbidi, antu avulumwini hiyakatwesha kwanuka kufumba kwamuNsona kwejima kwayifumbiluwu aeludaku, ilaña akanukaña nawu aeluda ayilemesheli nikuyikeña.

⁸ Dichi aeluda atela kumwekesha ‘mukabu waspiritu,’ sweje-e kukeña kudi neyi kwaKristu, hela chakwila muntu wunavulumuni nakaani kufumba kwamuNsona. (Aŋalija 5:22, 23) Hiyatela kunyakala kuhaña mukwakuvulumuna muchipompeluku. Atela kumwekesha nawu anakukeña antu anavulumuni afunti kudi Yehova. Dichi, neyi mukwakuvulumuna yabalumuka  mumuchima, neyi chelañawu amavulu wukumusakilila Yehova chikupu ‘niantu enkawu yamukunkulu’ aletesheli yafunti muchipompelu.—Aefwesesa 4:8, 11, 12.

Kumwekesha Kukeña Neyi kwaKristu muMafuku Akukuminina

9. Shimunenu chakutalilahu mwamwekesheleliyi Yesu nawu wakeña atumbanji twindi hachuma chazatiliyi.

⁹ Luka wasoneka nsañu yabadika kulema kutalisha hakukeña kwaYesu kwamwekeneni muyuma yazatiliyi. Chineli welukili nindi, kumbidi amashidika akuRoma akakuchika mukala waYerusalema wadiñi kwakwihi nakujilumuka nakukeñesha antu kutemuka, Yesu wasoñamishili atumbanji twindi munjila yakukeña nindi: “Himwakamona Yerusalema anayikuchiki dehi namajita kwi-ndo, henohu kelukenu nenu keña ayibalumuni yikali ihembi.” Chumanyi chateleleli kwilawu? Yesu waheni chadimu nshimbi yatiyakana. “Henohu adi muYudeya akatemukili kumapidi; adi mukachi kamukala akafumumu; adi mumaha bayi akeñila cheñi muñandaku. Muloña wenawa diwu mafuku akutenda, kulonda yuma yasonekeluwu yejima yakalumbuluki.” (Luka 21:20-22) Chelili amashidika akuRoma akuchiki Yerusalema mu 66 C.E., antu ovwahila atiyililili iji nshimbi.

10, 11. Indi kushinshika chafuminuwu akwaKristu akusambila muYerusalema kukutukwasha ñahi kudiloñesha ‘hayihuñu yasweja’ yinakwinza?

¹⁰ Hampinji yafumineñawu muYerusalema, akwaKristu ateleleli kukeñañana neyi chayikeñeliyi Kristu. Chalala, ateleleli kwinkahu akwawu yuma yiyadiñi nayu. Ilaña wuprofwetu waYesu wukweti kushikijewa kweneni kwabadika hakujilumuka kwawuna musumba wakushankulu. Wahosheli nindi: ‘Kwamba kekala yihuñu yasweja, yakwila kufumisha kutachi yamatuña kushika nikulelu, kanda ayimonañahu dehi, hela kumbidi hiyamba kayimona cheñuku.’ (Matewu 24:17, 18, 21) Henohu ‘yihuñu yasweja’ yidi hambidi kanda yishiki, nichiyakashika anetu nawa tukakabakana. Hela chochu, kwikala nayitoñojoka yaKristu kukatukwasha kuumika kukala kutukamona.

¹¹ Henohu yihuñu yasweja kanda yishiki nichiyakashika, twatela kwimbujola chakutalilahu chaYesu, chakukeñañana chikupu. Kutalisha haniyi nsañu, Pawulu wafumbili nindi: “Tutiyishenu akwetu kuwaha wejima wetu hamuntu hamuntu; tulondenu yuma yayiwahi yakukwasha akwetu. Muloña Kristu haditiyishili yomweni kuwahaku . . . Dichi Nzambi wakutatakena niwakukundeja, ayiiteji kwikala nayitoñojoka yoyimu muntu namukwawu, mwatoñojokañayi Kristu Yesu.”—Aroma 15:2, 3, 5.

12. Kukeña kwamuchidinyi kutwatela kwikala naku makonu, nawa muloñadi?

 ¹² Petulu amwekesheleluwu kukeña kudi Yesu, niyena wakonkomweneni akwaKristu ‘kukeña ana kwawu chakadi kudimbana’ ‘nikwovwahila nsañu yalala.’ AkwaKristu atela ‘kukeñañana chakumuchima chacheni.’ (1 Petulu 1:22) Makonu, twatela kumwekesha chikupu kukeña neyi kwaKristu. Antu jaNzambi ejima anakumona ikakeja dasweja. Kwosi muntu watela kukuhwelela muyuma yampata yamunu mwishinaku, neyi chichinakumwekana hatooka to-o makonu nawu mwituña mudi kukala kwamali. (Tañenu 1 Yowanu 2:15-17.) Dichi, chineli idi ituña didi dehi kwakwihi nakukuma, twatela kukundama kwakwiha naYehova nikudi akwetu, nikwikala nawulunda waweni muchipompelu. Pawulu wafumbili nindi: “Keñañanenu nawana kwenu nawushona; itejenu mwinenu abadiki kulema.” (Aroma 12:10) Petulu wakonkomweneni cheñi hanichi chikuma nakuhosha nindi: ‘Chasweja kulema yowu kukeñañana chacheni mukachi kenu; muloña kukeña kwabutaña nshidi jajivulu.’—1 Petulu 4:8.

13-15. Indi amana kwetu amakwawu amwekesheli ñahi kukeña kudi neyi kwaKristu hanyima yakwila wubanji wunamwekeni dehi?

¹³ Mukaayi kejima, aYinsahu jaYehova ayiluka nawu hiyantu amwekeshaña kukeña kwalala. Shinshikenu aYinsahu adihanini kukwashana hanyima yakwila mpepela yeneni nihurricanes yikisañani iluña deneni dakabeta kambwela kaUnited States mu 2005. Kukeña kudi neyi kwaYesu kwasañumwini akwakudikeñela akubadika ha 20,000 kukwasha ana kwawu adiñi mukukala, amakwawu ashili matalawu amawahi ninyidimu yayiwahi.

¹⁴ Mwiluña dimu meji amukaluñalwiji amwañeli mwiluña dakushika kumakilomita 80, meji atuñili mbañu yayilehi jimita 10. Meji chiyakeheluwu matala amavulu ayikisañeni chikupu. A Yinsahu akwakudikeñela afumini kumatuña amavulu amakwawu akuluka yitembi enjili nakukwasha nikuleta yozelu yakutuña nachu heluña nawa adiheni kukalakala mudimu wejima. Ahela ayedi evumu dimu nawa antuluwa, aloñeli yikumba yawu mumotoka yanyanya nawa endeli makilomita akubadika ha 3,000 kulonda akakwashani. Muhela wumu washeli kunidi iluña, wuchidi kuzata nakomiti yakwashaña antu adi mukukala nawa wazataña neyi payiniya wampinji yejima.

¹⁵ Matala awaYinsahu niawantu amakwawu akubadika 5,600 munidi iluña ayituñulula hela kuyiwahisha. Indi aYinsahu amunidi iluña atiyili ñahi hampinji yayimwekesheleluwu kukeña kwabadika ñana? Muhela wumu wukweti itala dahumukili watuntulukilili mwitala danyanya dakukoka namotoka dadiña nakuvwa nawa wadiña nasitovu yafwa. Amana kwetu amutuñilili itala danyanya dadiwahi. Wemeni nakutala itala dindi dadiha dadiwahi nakumusakilila Yehova niana kwindi iku nakudila hamuloña wamuzañalu. A Yinsahu amavulu amunidi iluña amweni ikezeñi atwalekeluhu kushakama mumatala mwatuntulukililuwu hakapinji kantesha hadi tukweji twatuvulu hanyima yakwila matala  awu anayituñululi dehi. Muloñadi? Muloña amana kwetu akakukwasha antu adi mukukala ashakameña mumatalawu amaha. Ichi hichakutalilahu chachiwahi chakumwekesha yitoñojoka yaKristu.

Kumwekesha Yitoñojoka yaKristu Kudi Akata

16, 17. Jinjilanyi mutwatela kutiyila akata wushona neyi Kristu?

¹⁶ Antu antesha hohu hakachi ketu diwu omikahu dehi wubanji weneni wadimwekenaña waweni. Hela chochu, wejima wetu twamonaña kukala kwayikatu, yikatu yetwetu aweni hela yawantaña. Yesu watwimikila chakutalilahu chachiwahi chitwatela kumona akata. Kukeña kwamuletesheli kutiyila wushona akata. Chiyamuleteleluwu ayeji, ‘wokili adiña akata ejima.’—Matewu 8:16; 14:14.

¹⁷ Makonu, akwaKristu hiyakweti ñovu yakuuka muchihayamisha neyi Yesuku, ilaña atiyilaña akata wushona neyi chayitiyilileñayi Yesu. Eleña ñahi mwenimu? Wunsahu wumu wuyamwekeshelañawu aeluda yitoñojoka yaKristu hikuloñesha mudimu wakukwasha akata amuchipompelu nikwiluka nawu antu wenawa anayikwashi nawa alondelaña lushimbi lwalema lwashimunawu haMatewu 25:39,40. * (Tañenu.)

18. Indi ahela ayedi amwekesheli ñahi kukeña kwalala kudi muhela wumu, nawa chumanyi chafuminumu?

¹⁸ Kafwampi, kukwasha antu hichaya mukwila nawu muntu chiña yekala eludaku. Talenu chakutalilahu chaCharlene wayaaka yakuvwalika 44, wadiña nachikatu chakansa nawa amulejeli nawa kunashali mafuku ikumi nakufwa. Hakumona kukala kwadiñiyi naku nikukala kwamweneñayi mfumwindi wadikita chikupu, ahela ayedi akuspiritu, Sharon naNicolette, adiheni kumukwasha hanawa mafuku asheleluku hakwila yofwi. Sharon niNicolette amuhembeli Charlene sampu nichafwiliyi, hiyamuhembeli hadi mafuku ikumi hohuku, ilaña hadi nyilungu yitanu nawumu. Sharon wahosheli nindi: “Chekala chakala neyi wuneluki neyi muntu wukuhanda wanyi. Hela chochu, Yehova watukwashili kuumika. Chuma chitwamweni chatuletesheli kukundama kudi Yehova nikudi wumu namukwawu.” Mfumwa Charlene wahosheli nindi: “Nakanukaña mafuku ejima chatukwashiluwu awa ahela ayedi. Yililu yawu yayiwahi yamukwashili mwinikwami Charlene wakashinshi kuumika mumafuku akuleta kukufwa kwindi nawa chumichi chankolesheli nikunkundeja. Nakayisakililaña hohu haya nyaka. Kudihana kwawu kwakolesheli chikuhwelelu chami mudi Yehova nikukeña kunakeña amana kwetu amukaayi kejima.”

19, 20. (a) Yililwinyi yitanu yayitoñojoka yaKristu yitunadizi? (b) Chumanyi chimunafuukuluhu kwila?

¹⁹ Muniyi yibaba yisatu yakulondashana, tunadizi yililu yitanu yayitoñojoka yaYesu nichitwatela kutoñojoka nikwila yuma neyi Yesu. Twikali ‘awunda, nawa adizoza mumuchima’ neyi Yesu. (Matewu 11:29) Twatela cheñi kufwila kwila antu kakawahi, hela chakwila chinamwekani hatoka to-o nawu aluwañeshaña. Tufwilenu kwovwahila nshimbi jaYehova jejima chakadi woma, hela tunakumona makabi.

²⁰ Nkumininaku, tukeñenu amana kwetu ejima neyi chayikeñeliyi Kristu ‘ndo-o nikunsa.’ Kukeña kwamuchidiwu kwaleñelaña antu kutwiluka nawu tudi atumbanji twaKristu alala. (Yowanu 13:1, 34, 35) Eña, “kakelenu kukeñañana nawana kwenu.” (Aheberu 13:1) Bayi mufunta hanyimaku. Fuukulenuhu kumuhameka Yehova muwumi wenu nikukwasha amakwawu. Yehova wukayikiswila chimwadikitaña nakashinshi.

[Tumazu twaheshina]

Munateli Kulumbulula?

• Indi aeluda anateli kumwekesha ñahi yitoñojoka yaKristu kudi antu anavulumuni?

• Muloñadi kwimbujola kukeña kwaKristu chikwalemena sweje-e munanu mafuku akukuminina?

• Tunateli kumwekesha ñahi yitoñojoka yaKristu kudi akata?

[Malwihu aKuzatisha haKudiza]

[Mwevulu wudi hefu 19]

Aeluda akeñaña antu anavulumuni afunti kudi Yehova

[Mwevulu wudi hefu 21]

Indi akwaKristu afumineña muYerusalema amwekesheli ñahi yililu yaKristu?

[Mwevulu wudi hefu 22]

A Yinsahu jaYehova ayiluka nawu hiyantu amwekeshaña kukeña kwalala