Kulema kwaKudizishewa naNzambi

‘Nafuukulaña yuma yejima nami yakujimbañesha hohu, nanochu chasweja kuwaha kumwiluka Kristu Yesu.’—AFWILIPI 3:8.

1, 2. Yumanyi yafuukulawu akwaKristu amakwawu, nawa muloñadi?

 KUFUMA tuhu hampinji yatachikiliyi shikola, Robert wadiña namaana chikupu. Hadiñayi nayaaka yitanu nayisatu yakuvwalika, ntañishi yindi wumu wayili kwitala dawu nakumuleja nindi nateli kutaña shikola yidi yejima. Washimwini nindi Robert wukekala ndotolu. Hamuloña wakuzata chiwahi hashikola yasekondali wateleleli kuya nakutañila kuyuniveziti yeneni yidi yejima mwituña dawu. Ilaña Robert wakaanini chuma chamonañawu antu amavulu nawu hikukooleka kwenzaña kamu hohu muchihandilu kulonda yakalakaleña wupayiniya wampinji yejima.

² Kufwana Robert, akwaKristu amavulu akweti kukooleka kwakuyilaku hambidi mwituña damakonu. Amakwawu hiyeñijaña mutu muyuma yamuchidiwuku, ilaña afwilaña kushikija yikonkwanyi yawu yakuspiritu. (1 Akorinda 7:29-31) Chumanyi chasañumunaña akwaKristu adi neyi Robert kuzata nañovu mumudimu wakushimwina? Chuma chalema chiyazatilañawu nañovu mumudimu wakushimwina hikukeña kuyamukeñawu Yehova, ilaña eluka cheñi kulema kwakudizishewa naNzambi. Komana munanu mafuku munatoñojokuhu chadi kwikala wumi wenu neyi himwadizili chalalaku? Kutoñojoka hankisu jikwawu jabadika jitwadiluñishaña hamuloña wakudizishewa naYehova kukutukwasha kwanukaña kulema kwansañu yayiwahi nikudikita chikupu hakushimwina amakwawu.

Kudizishewa naNzambi hiKukooleka Kweneni

3. Muloñadi chitunakuhweleli netu Yehova wakeñaña kudizisha antu abula kuwanina?

³ Yehova wakeñaña kudizisha antu abula kuwanina hamuloña wakuwaha kwindi. Hakuhosha muwuprofwetu wakutena akwaKristu awayishewa, Isaya 54:13 yahosha nawu: “Anyaneyi ejima akekala alejewa kudi Yehova; kuwunda kwakamonawu anyaneyi kwakasweja.” Awa mazu akundama nankashi kudi “anyikoku acheñi” aKristu. (Yowanu 10:16) Wuprofwetu wunakushikijewa makonu hiwunsahu wunakumwekesha chumichi. Isaya wamweni muchimwenu antu akunyunza yejima anakuhwila kukudifukula kwalala. Wayilumbulula anakudileja wumu namukwawu nawu: “Tuyenu twakakanduki kumpidi yaYehova, kwitala daNzambi yaYakoba; akatuleji mwendelañayi, kulonda twakendaña munjila jindi.” (Isaya 2:1-3) Kudizishewa naNzambi hikukooleka kwakweni!

4. Indi Yehova wakeñaña nindi antu adizishañayi ekali amuchidinyi?

⁴ Chumanyi chitwatela kwila hakwila nawu atudizishi kudi Yehova? Chuma chalema chakeñekaña hikudizoza. Ñimbi yamasamu Davidi wasonekeli nindi: “Yehova himuwahi, woloka. . . . Antu adizoza wukuyileja chachiwahi njila yindi.” (Masamu 25:8, 9) Yesu wahosheli nindi: “Eyi Tata, Mwanta wewulu niiseki, nakusakilili chiwajindili akwamaana niakwakashinshi yumiyi, hiwukuyimwekesha kudi anyikeki.” (Luka 10:21) Komana himwakeñaña kukundamaña kudi Nzambi ‘wenkaña akwakudizoza luwuku’?—1 Petulu 5:5.

5. Chumanyi chaletesheli nawu tumwiluki Nzambi?

⁵ Hakwikala ambuña aYehova, komana twadizili chalala namaana etu aweni? Inehi. Kafwampi, kanka wetu hitwadi kumwiluka Nzambuku. Yesu wahosheli nindi: “Kwosi muntu natweshi kwinza kudami chakadi kumukoka  kudi Tata wantemesheluku.” (Yowanu 6:44) Kuhitila mumudimu wakushimwina nispiritu yajila, Yehova nakukokola antu adi neyi anyikoku, ‘yuma yayiwahi yamunyunza yejima.’ (Hagayi 2:7) Komana himwamusakililaña Yehova hakwikala hakachi kawantu akundamishayi kudi Mwaninduku?—Tañenu Yeremiya 9:23, 24.

Kudizishewa naNzambi kwaHimpaña Yililu yaWantu

6. Indi ‘kumwiluka Yehova’ kunakuletesha antu kwiladi?

⁶ Hakuzatisha chakutalilahu chatiyakana chikupu wuprofwetu waIsaya walumbulula kuhimpika kwayililu yawantu kunakumwekana makonu. Antu adiña akwamadombu anekali awunda. (Tañenu Isaya 11:6-9.) Antu adiñi nankunyi hamuloña wachaambu chekowa, munza, muchidi hela chitachi chambuka anadizi kushakama hamu mukuwunda. Chidi neyi ‘mpoku jawu anajichili matemwa.’ (Isaya 2:4) Chumanyi chinakuletesha antu kuhimpa chikupu ñana? Antu ‘anamwiluki Yehova’ nawa anakuzatisha yuma yadizañawu muchihandilu chawu. Hela chakwila ambuña aYehova hiyawaninaku, anuñañana chikupu nawana kwawu mukaayi kejima. Chinakushimwinawu nsañu yayiwahi mukaayi kejima ninyikabu yayiwahi yinakufumamu hiwunsahu wunakumwekesha kulema kwakudizishewa naNzambi.—Matewu 11:19.

7, 8. (a) Indi kudizishewa naNzambi kunakuletesha antu kushinda ‘yumanyi yakola neyi mpwembu’? (b) Yumanyi yinakumwekesha nawu kudizishewa naNzambi kunakuleta kalemesha kudi Yehova?

⁷ Kapostolu Pawulu wafwanishili mudimu wawambuña aNzambi wakushimwina nanjita yakuspiritu. Wasonekeli nindi: ‘Yitwa yanjita yetu hiyachisemwa chahesekuku; hiyitwa yasweja ñovu kumesu aNzambi yakusanda nachu yuma yidi neyi mpwembu jakola, nikufumba nachu yitoñojoka, niyuma yejima yadimika kwiwulu yadikañaña nakubula kumwiluka Nzambi.’ (2 Akorinda 10:4, 5) Indi kudizishewa naNzambi kunakuletesha antu kusubuka ‘kuyumanyi yakola neyi mpwembu’? Ntañishilu yakutwamba, kukuhwelela mukupanda, nimaana awantu, hiyakutalilahu yantesha hohu. (Akolosi 2:8) Kudizishewa naNzambi kwakwashaña antu kuleka yililu yatama nikudiza yililu yamutiyishaña Nzambi kuwaha. (1 Akorinda 6:9-11) Kwakwashaña yisaka. Nawa kunakuleñela antu abula kuchiñeja kwikala nakuchiñeja kwalala muwumi. Dishikola yakeñekaña makonu.

⁸ Yehova nakukwasha antu kwikala nakashinshi, neyi chinakumwekesha nsañu yamwekeni yinalondeluhu. (Aheberu 13:18) Mumbanda wumu wakuIndia wadizileña Bayibolu nawa wekalili mukwakushimwina wabula kupapatishewa. Ifuku dimu wafumineña kumudimu wakutuña Itala daWanta, waweni chingelingeli chawuru kwakwihi nachitesheni chabasi chawuseya wakushika ku 800 dola mali aku U.S. Hela chakwila wadiña kazweñi, watweli chingelingeli chenichi kukapokola  kulonda akeñakeñi yomweni. Kapokola wahayamini nankashi. Kuhiñahu kapokola mukwawu wamwihwili nindi, “Wunafuntishilidi chingelingeli?” Walumbulwili nindi: “Yuma yinadizaña muBayibolu yinaleteshi kuhimpa yililu yami, ichi nindi muntu washinshika.” Kapokola yeniwu watiyili kuwaha, nakumwila eluda mukwaKristu wamutwaliluku ona mumbanda kukapokola nindi: “Muyinu mbaka mudi antu akubadika hayihita 38. Dichi neyi wukukwasha antu ikumi kuhimpa yililu yawu neyi iwu mumbanda, wukuzata mudimu weneni chikupu.” Tukweti nyiloña yayivulu nankashi yakumuhameka Yehova hakumona antu amavulu anakudizishewa naNzambi chiyanakuhimpa yihandilu yawu.

9. Indi antu anateli kuhimpa ñahi chikupu chihandilu chawu?

⁹ Ñovu yekala Mwizu daNzambi, niwukwashu wahanañayi Yehova kuhitila muspiritu yindi yajila, yinakukwasha antu kuhimpa chikupu yihandilu yawu. (Aroma 12:2; Aŋalija 5:22, 23) Hamukanda waAkolosi 3:10 hahosha nawu: ‘Vwalenu wuntu wawuha, wayaña nakubalumuka wawuha nakwiluka chalala, kulonda afwani neyi Wamuleñeli.’ Mazu ekala Mwizu daNzambi Bayibolu, akweti ñovu yakusolola yuma yekala muntulu yamuntu, nawa anateli kuhimpa yitoñojoka yamuntu nichamonañayi yuma. (Tañenu Aheberu 4:12.) Kuhitila mukwiluka nsañu yalala yekala muBayibolu nikwovwahila nshimbi jaYehova jaloña, muntu nateli kwikala ibwambu daNzambi, wukweti kuchiñeja kwakushakama haya nyaka.

Yehova Nakutukwasha Kudiloñesha haYuma Yikamwekana Kumbidi

10. (a) Muloñadi Yehova nkawindi chatelelayi kutukwasha kudiloñesha hayuma yikamwekena kumbidi? (b) Chumanyi chekomwesha chikamwekena antu amukaayi kejima?

¹⁰ Yehova hohu diyi watela kutukwasha kudiloñesha hayuma yikamwekena kumbidi muloña weluka yuma yikamwekana. Weluka chikekala chihandilu chawantu kumbidi. (Isaya 46:9, 10) Wuprofwetu wamuBayibolu washimuna nawu: “Ifuku daYehova deneni didi kwakwihi.” (Zefwaniya 1:14) Kutalisha hefuku denidi, mazu ekala haYishimu 11:4 akwila nawu, ‘Maheta hiyakakwasha muntu hefuku dandombuku, ilaña kuloña kwokwakapulwisha muntu mukufwa,’ akalumbuluka. Neyi ifuku daYehova dakusompesha kaayi kaSatana dinashiki dehi, chuma chalema chikatukwasha hikwikala nawuselewa waNzambi. Mali akekala amukukulwayi. Kafwampi, haEzekeli 7:19 hahosha nawu: “Siliva yawu akayinatila tuhu hanzi, niwuru wawu wakekala tuhu neyi chuma chamajilu.” Kwiluka chumichi henohu kanda chimwekani kukutukwasha kufuukula mwamaana yoyinu mpinji.

11. Njilanyi yimu mwatukwashilaña shikola yawuNzambi kudiloñesha hayuma yikamwekana kumbidi?

¹¹ Njila yimu yambukaku mwatukwashilaña shikola yawuNzambi kudiloñesha hefuku daYehova dinakwinza, hikutanjika yikonkwanyi yayiwahi. Kapostolu Pawulu wamusonekeleli Timotewu nindi: “Yileji akwakuheta amakonu neyi, bayi muditoñojoka nenu mwalemaku, bayi mukuhwelela maheta abulaña kushakamaku; chiña kusha muchima kudi Nzambi.”  Hela chakwila hitukweti mali amavuluku, tunateli kuhetelamu muniku kufumba kwakufuma kudi Yehova. Indi chumichi chakeñekañadi? Chatela kulwisha nakufwila maheta, twatela kuzata nañovu ‘hakwila yuma yayiwahi nikusweja kwila nyidimu yayiwahi.’ Kuhitila mukutwamijaku mudimu waYehova hambidi muchihandilu chetu, ‘tukudilumbikilaña yakutuña nachu kunyaka yakenza.’ (1 Timotewu 6:17-19) Kudihana kwamuchidiwu kwamwekeshaña nawu tudi namaana, neyi chahosheliyi Yesu nindi, “neyi muntu wukuheta mpata yamunu mwishina yejima, ajimbeshelaku wumi windi, wakadiila kwodi?” (Matewu 16:26, 27) Chineli ifuku daYehova didi kwakwihi, wejima wetu twatela kudihula netu: ‘Inakulumbikila maheta kudihi? Komana inakukalakela Nzambi ntahindi Maheta?’—Matewu 6:19, 20, 24.

12. Muloñadi wutukubulila kuzeya neyi antu adiwula mudimu wetu wakushimwina?

¹² Chuma chasweja kulema hakachi ‘kanyidimu yayiwahi’ yawakwaKristu yashimunawu Mwizu daNzambi himudimu wakupulwisha antu wakushimwina Wanta nikwilisha atumbanji. (Matewu 24:14; 28:19, 20) Neyi chichadiña kudi akwaKristu amuyaaka nkulakaji yakusambila, antu amakwawu anateli kudiwula mudimu wetu wakushimwina. (Tañenu 1 Akorinda 1:18-21.) Ilaña chumichi hichaleñelaña nsañu yetu kwikala yamukunkulwayuku, nawa hitwazeyaña hakushimwina antu kulonda akuhweleli muniyi nsañu hohanu hikuchidi mpinjuku. (Aroma 10:13, 14) Neyi tukwasha amakwawu kudizishewa naNzambi twakatambwila nkisu yayivulu.

Yehova Wankiswilaña Ambuñidi Adihanaña

13. Indi kapostolu Pawulu wadiheni ñahi kukoola nsañu yayiwahi?

¹³ Henohu kanda yekali mukwaKristu, kapostolu Pawulu amudizishili kulonda yakekali nachihandilu chachiwahi mumafuku awaYudeya. Chashikijiliyi yaaka 13 yakuvwalika, wafumini kumukala wawu kuTarusa nakuya kuYerusalema kulonda akamudizishi kudi Gamaleli ntañishi waNshimbi alemesheluwu nankashi. (Yililu 22:3) Mukuhita kwampinji Pawulu watachikili kuya mpuhu hakachi kawakwawu, nawa neyi watwalekeluhu kwila chumichi wadi kutiyakana nankashi mukwitiya kwawaYudeya. (Aŋalija 1:13, 14) Chetejeliyi nsañu yayiwahi nakutachika mudimu wakushimwina, walekeli yuma yejimiyi. Komana Pawulu waditoñesheli hachuma chafuukwiluhu? Inehi. Kafwampi, wasonekeli nindi: “Nafuukulaña yuma yejima nami yakujimbañesha hohu, nanochu chasweja kuwaha kumwiluka Kristu Yesu, Mwanta wami. Hadi yena najimbañeshi yuma yejima, ninochu nayifuukulaña nami hiwuzondu hohu, kulonda niheti Kristu.”—Afwilipi 3:8.

14, 15. Nkiswinyi yitwawanaña hakwikala ‘akwakukalakala hamu naNzambi’?

¹⁴ Kufwana Pawulu, akwaKristu makonu adihanaña kulonda ashimwini nsañu yayiwahi. (Maku 10:29, 30) Komana hitukweti yuma yikwawuku hamuloña wakushimwina? Robert atenawu hakusambila, watoñojokaña neyi chatoñojokañawu antu amavulu hakuhosha nindi: “Hinaditoñeshañaku. Mudimu wampinji yejima wanzañaleshaña chikupu, nawa wunakojeji ‘kumutompa Yehova nakumutiya chawahayi.’ Chinaleka yuma yakumujimba kulonda nifwili yikonkwanyi yakuspiritu, Yehova wankiswilaña mpinji yejima kuhitila mukunyika yuma yabadika hayuma yinalekaña. Chidi neyi kwinji kwosi chuma chinnajimbeshi. Nakuminaña dakuheta.”—Masamu 34:8; Yishimu 10:22.

¹⁵ Neyi munakalakali mudimu wakushimwina nikudizisha antu hadi mpinji yayilehi,  chakadi nikujina ninenu mwadiña nakukooleka kwakutompa nakutiya chawahayi Yehova. Komana mpinji yimu mwamwenuhu dehi nenu Yehova nayikwashi naspiritu yindi hampinji yimwatañishileña amakwawu nsañu yayiwahi? Komana mwamwonahu dehi antu chazañaleluwu hampinji yayikwashiliyi Yehova kulonda atiyilili chikupu nsañu? (Yililu 16:14) Komana Yehova wayikwashahu dehi kuumika ikañesha, hadaha nikuyileñela kukalakala chikupu mumudimu wenu wakushimwina? Komana chimwamweni kukala Yehova wayikwashili, kulonda mutwalekahu kukalakala hampinji yimwatoñojokeli nenu munazeyi? (Afwilipi 4:13) Neyi Yehova yatukwasha hampinji yitunakukalakala mudimu wakushimwina, twamwilukaña chikupu nawa twakundamaña kwakwiha nayena. (Isaya 41:10) Hikukooleka kwakweni kwakwikala ‘akwakukalakala hamu naNzambi’ muniwu mudimu walema wakudizishewa naNzambi.—1 Akorinda 3:9.

16. Mwatiyaña ñahi chimwadikitaña nikudihana kutalisha hashikola yawuNzambi?

¹⁶ Antu amavulu afwilaña kuzata yuma yalema chikupu muwumi wawu. Tweluka netu hela yuma yalema yakalakalañawu antu mukanu kaayi makonu kakavulu ayivulamenaña. Hela chochu, mudimu wunakukalakalayi Yehova makonu kulonda kujilika ijina dindi hiyakawuvulamena haya nyaka munsañu yateokalatikuku. Iyi nyidimu akayanukaña haya nyaka. (Yishimu 10:7; Aheberu 6:10) Wejima wetu twatela kulemesha kukooleka kutukweti kwakudizisha antu amakwawu hadi Yehova mumudimu wakabula kuvulamenawu.

Mukwakula Nenudi?

• Indi Yehova wakeñaña nindi antu adizishañayi ekali amuchidinyi?

• Indi kudizishewa naNzambi kunakwashi ñahi antu kuhimpa yihandilu yawu?

• Atukiswilaña munjilanyi hakukwasha antu amakwawu kudizishewa naNzambi?

[Malwihu aKuzatisha haKudiza]

[Mwevulu wudi hefu 25]

Antu alejewaña naYehova anuñañana nawana kwawu mukaayi kejima

[Mwevulu wudi hefu 26]

Komana kwikala ‘akwakukalakala hamu naNzambi’ hikukooleka kwakwenuku?