Nsakililu Yayiwahi Yatañishaña Antu Kulemesha Izu daNzambi

YESU walemesheli Bayibolu, Izu daNzambi. Njila mwamwakwililiyi Diyabolu hampinji yamwesekeluwu yamwekeshaña nawu walemesheli Izu daNzambi. (Matewu 4:4-11) Chakutalilahu, indi Yesu welilidi chelili Satana yamwili nindi yabalumuni malola ekali mankendi? Yesu wakaanini kumweseka kuhitila mukusombolola mazu onenewa ahosheliyi Mosi, awa mazu munateli kuyitaña haKuhituluka 8:3. Indi Yesu wakwili nindidi chelili Diyabolu yomwinki wanta wakutala mawanta ejima amukaayi neyi yadinata nakudifukula kamu hohu? Wakaanini kuhitila mukuzatisha lushimbi lwamuNsona lumukuwana haKuhituluka 6:13.

Toñojokenu chumichi! Hela wadiñi Mwana kaNzambi, Yesu washindameneni haBayibolu nakuyizatisha hakutañisha. Hadiwili Izu daNzambi nakuyiñisha tushidikilu twawantuku. (Yowanu 7:16-18) Ilaña, akulumpi jansakililu amavulu amumafuku aYesu akañenyeña kulemesha Izu daNzambi. Muloñadi? Muloña atachikili kumona tushidikilu twawantu nawu twalema kubadika Nyikanda Yajila. Dihafumini Yesu hakuleja ana akwansakililu hatooka to-o nindi: ‘Munapepeleshi lushimbi lwaNzambi nachaaku chenu. Enu amfwikiji! Komana chaprofweteliyi Isaya waprofweteli chachiwahi, chayiteneniyi nindi, Antu awa anlemeshaña nanyivumbu yawu, hakwila nyichima yawu yidi kwakulehi nanami. Adifukulaña tuhu kudami, chatañishañawu akwawu yijila yawantu nawu diku kutañisha kwalala.’—Matewu 15:6-9.

Nsakililu yayivulu mukaayi, akwaKristu niabula kwikala akwaKristu, ahoshaña nawu alemesha  Bayibolu. Hanu dinu, nsakililu jiñahi jimweluka jadiwulaña tushidikilu twawantu neyi tunakuzuñesha ntañishilu yayiwahi yekala Mwizu daNzambi? Shinshikenu yakutalilahu yiyedi hohu.

MUTU WANSAÑU: Yifulu yamuchipompelu.

CHATAÑISHAÑA BAYIBOLU: Yesu wahishili akulumpi jansakililu amumafuku indi muloña wakukeña yifulu nikufwila kutiyakana. Wahosheli nindi awa antu “akeña kushakama halema, nimumashikola akeña kushakama hamatanda alema. Akeña kuyimwosha kuwulandilu, akeña kuyitena kudi antu nawu, Rabi.” Dihafumini Yesu kuyileja atumbanji twindi nindi: ‘Bayi ayitenaña nawu Rabuku, muloña Nkuluñaña yenu wumu hohu, wejima wenu ivumu denu dimu. Bayi mutenaña muntu hanu heseki nenu Tata yetuku, muloña Tata yenu wuduku wumu hohu, yowu wamwiwulu.’—Matewu 23:1-10.

LWIHU: Komana anlomboli amuniyi nsakililu atiyaña kuwaha kuyitena majina akuyilemesha nikufwila kutiyakana mwiluña, tahindi ovwahilaña lushimbi lwaYesu lwakutondolwela chumichi?

MUTU WANSAÑU: Kuzatisha yifwikija hakudifukula.

CHATAÑISHAÑA BAYIBOLU: “Kudilila mukishi wakusoña, hela kufwikija chuma chamwiwulu, hela chuma chahamaseki munu mwishina, hela chuma chamumeji mwishina damaseki, chinjila. Kuyifukamina hela kuyipesha chinjila.”—Kwidika 20:4, 5.

Kapostolu Yowanu wayisonekeleli akwaKristu nindi: ‘Dihembenu kunsañu jawankishi.’—1 Yowanu 5:21.

LWIHU: Komana iyi nsakililu yovwahilaña nshimbi yamuBayibolu yayiwahi yakubula kuzatisha yifwikija hela ankishi hakudifukula kudi Nzambi?

Munateli Kuwana Njila Yayiwahi

Hichikweti muloña nansakililu yayivulu yaluwañeshaña antu makonuku, munateli kuwana njila yaya kuwumi. Kudi yuma yayivulu yakwilukilaku ‘kwitiya kwamonañayi Nzambi nindi kwalala nawa kwakuwahi.’ (Yakoba 1:27) Nsona jinazatishuwu muyinu yibaba jinakushimuna yinjikijilu yakuyikwasha kwiluka iyi nsakililu.

Kwila mwihula aYinsahu jaYehova kulonda ayilumbulwili ñakwilu yanawa malwihu adi muniyi yibaba nehi? Chimukutoñojokaña hayuma yinakuhoshawu, londelenu chakutalilahu chachiwahi chawantu ashakamineña mumusumba waBereya muyaaka nkulakaji yakusambila. Chatiyiluwu nsañu yashimwininiyi kapostolu Pawulu, ‘atalatalili munyikanda yajila kulonda amoni neyi yumiyi dimu yaya.’ (Yililu 17:11) Neyi mulemesha Izu daNzambi nikudiza nakashinshi neyi aBereya, mukuwana njila yaya kuwumi. Munateli kufuukulahu neyi chakwila mukutondahu iyi njila hela nehi.

[Mazu ekoku adi hefu 9]

Nsakililwinyi yalejaña antu kudiza Nyikanda yajila kulonda amoni neyi yuma yinakudizawu yalala?