“Ikalenu Neyena muSpiritu”
“Ikalenu Neyena muSpiritu”
‘Hansañu yatela kudikwatisha, bayi mulabajala hamudimu wenuku; ikalenu neyena muspiritu, nakumukalakela Mwanta.’—AROMA 12:11.
1. Muloñadi aIsarela chalambwilileñawu nyilambu yawanyama ninyilambu yikwawu?
YEHOVA wahamekaña nyilambu yahanañawu ambuñindi mukudikeñela kulonda kumwekesha nawu amukeña nikwila yuma yakeñañayi. Kumpinji yakunyima, Yehova wetejeleña nyilambu yashiyashana yawanyama ninyilambu yikwawu. Nyilambu yeniyi ayihanineña kudi aIsarela akeñeleña kuyanakena nshidi nikumwekesha kusakilila kwawu kwesekeja naNshimbi Yamwinkeluwu Mosi. Muchipompelu chawakwaKristu, Yehova hakeñaña nindi tulambuleña nyilambu yamuchidiwuku. Hela chochu, mukapetulu 12 kamukanda windi wasonekeleliyi akwaKristu akuRoma, kapostolu Pawulu wamwekesha nindi nimakonu tunateli kuhanaña nyilambu. Tutalenu njila mutwahaninaña nyilambu yeniyi.
Mulambu Wamumi
2. Chihandilu chamuchidinyi chitwahandaña etu akwaKristu, nawa yumanyi yakeñekaña?
2 Tañenu Aroma 12:1, 2. Kumatachikilu amukanda windi, Pawulu wamwekesheli hatooka nindi, akwaKristu awayishewa, chili aYudeya chili aJentili, ayiteneni kwikala aloña kumesu aNzambi hamuloña wachikuhwelelu chawu, bayi neyi hamuloña wanyidimu yawuku. (Aroma 1:16; 3:20-24) Mukapetulu 12, Pawulu walumbulula nindi akwaKristu atela kumwekesha kusakilila kuhitila mukudihana. Hakwila nawu tuzati mwenimu, twatela kuhimpa yitoñojoka yetu. Hamuloña wakubula kuwanina kutwaswana, wejima wetu twekala ‘mulushimbi lwanshidi nakufwa.’ (Aroma 8:2) Dichi twatela kuhimpa ‘nakwikala antu amaha muyitoñojoka yetu’ kuhitila mukuhimpa chikupu yaaku yetu. (Aefwesesa 4:23) Kuhimpa kwamuchidiwu, kunateli hohu kuzatika kuhitila mukutukwasha kudi Nzambi nispiritu yindi. Cheñi chakeñekaña kuzata nañovu chikupu. Dikwila nawu twatela kuzata hakumina ñovu jetu kulonda kubula ‘kulondeja mwelañawu antu amakonu’ akweti yililu yatama, atalaña yisela yamukunkulwayi nawa akweti yitoñojoka yatama.—Aefwesesa 2:1-3.
3. Muloña wutwakalakelaña nyidimu yawakwaKristu?
3 Pawulu natuleji cheñi kuzatisha wuswa wetu wakutoñojoka kulonda tushinshiki “mwaya muchima waNzambi, diwu wawuwahi, watiyishaña kuwaha, walala chikupu.” Muloñadi wutwatañilaña Bayibolu mafuku ejima, kutoñojoka chikupu hayuma yitwadizaña, kulomba, kuya kukupompa kwawakwaKristu nikuya mumudimu wakushimwina nsañu yayiwahi yaWanta? Hitwakalakalaña muniwu mudimu hamuloña wakwila aeluda amuchipompeluku atusañumunaña kwila mwenimuku, hela chochu, twahamekaña hayanukishu yawu yayiwahi. Ilaña twakalakalaña munyidimu yawakwaKristu hamuloña wakwila spiritu yaNzambi yatusañumunaña kumukeña Yehova namuchima wejima. Kubombelahu, tweluka chikupu netu kukalakala nyidimu yeniyi dichuma chakeñañayi Nzambi nindi twileña. (Zekariya 4:6; Aefwesesa 5:10) Chatwileñelaña kuzañalala chikupu kwiluka netu neyi tushakama neyi mukwaKristu walala, tunateli kwikala nawuselewa waNzambi.
Yamukunkulu Yashiyashana
4, 5. Indi aeluda akwaKristu atela kuzatisha ñahi yamukunkulu yawu?
4 Tañenu Aroma 12:6-8. Pawulu walumbulwili nindi, ‘tukweti yamukunkulu yaambuka mwaya luwi lwatwinkeluwu.’ Yamukunkulu yikwawu yateneniyi Pawulu, hikukolesha nikulombola, sweje-e aeluda akwaKristu akonkomwenawu kulombola “nakashinshi.”
5 Pawulu wahosheli nindi, kashinshi kenaka atela kukimwekesha hatooka, munjila yakalakelañamu ankoñi neyi antañishi nikukalakala ‘mudimu muchipompelu,’ hela “mujimba wumu.” (Aroma 12:4, 5) Mudimu weniwu wudi neyi mudimu watenawu haYililu 6:4, hahosheliyi kapostolu Pawulu nindi: “Tukukakela kulomba, nimudimu wakushimuna mazu.” Mumudimu weniwu, aeluda akwaKristu azatishaña yamukunkulu yawu kulonda kukolesha antu amuchipompelu. Aeluda atela kulombola nikuhana nshimbi muchipompelu. Azataña chachiwahi mudimu weniwu kuhitila mukudiza, kusandujola, kutañisha nikwakamena akwakushimwina kuspiritu. Neyi aeluda ela mwenimu amwekeshaña nawu adikita mumudimu wawu. Ankoñi atela kuzatisha yamukunkulu yawu chachiwahi nikwakamena nyikoku ‘namuzañalu.’—Aroma 12:7, 8; 1 Petulu 5:1-3.
6. Tunateli kuzatisha ñahi kufumba kwekala haAroma 12:11, mutu wansona yachinu chibaba?
6 Pawulu wahosheli cheñi nindi: ‘Hansañu yatela kudikwatisha, bayi mulabajala hamudimu wenuku; ikalenu neyena muspiritu, nakumukalakela Mwanta.’ (Aroma 12:11) Neyi tumona netu hitunakuzata neyena mumudimu wetu wakushimwinaku, twatela kuhimpa njila yitwadizilañamu nikulomba chikupu spiritu yaYehova mafuku ejima kulonda kutukwasha kubula kuzeya nakwikala cheñi neyena. (Luka 11:9, 13; Chimwekeshu 2:4; 3:14, 15, 19) Spiritu yajila yayikwashili akwaKristu akusambila kuhosha ‘hanyidimu yaNzambi yañovu.’ (Yililu 2:4, 11) Chochimu, spiritu yajila yinateli kutusañumuna kudikita mumudimu wakushimwina, ‘kwikala neyena muspiritu.’
Kudizoza
7. Muloñadi wutwatela kwikalila adizoza hakukalakala nyidimu?
7 Tañenu Aroma 12:3, 16. Hamuloña ‘waluwi’ lwaYehova dichatuleñelaña kwikala nayamukunkulu. Pawulu wahosheli nindi: “Ñovu jetu jafumaña kudi Nzambi hohu.” (2 Akorinda 3:5) Dichi hitwatela kudihamekaña etu awenuku. Twatela kudikehesha nakwiluka netu mukabu wudi wejima wasoñaña mumudimu wetu wakushimwina chikweti nkisu jaNzambi, bayi neyi hamuloña wañovu jetuku. (1 Akorinda 3:6, 7) Pawulu wahosheli mazu adifwanaku nindi: “Naleji antu ejima adi mukachi kenu . . . nami muntu bayi aditoñojoka kulema kwakubadika mwatelela kutoñojokaku.” Chakeñekaña kudilemesha nikuzañalala chikupu mumudimu wetu waWanta. Hela chochu, kwikala adizoza hela kwiluka mwakukumina, chikutukwasha kubula kwikala antu abulaña kuyuulawu kudi akwawu. Ilaña, tunakukeña ‘kutoñojoka namuchima wawunda.”
8. Tunateli kutondolwela ñahi yililu ‘yakuditoñojoka netu yetu tweluka hohu’?
8 Chikwikala chaluwa neyi tudinkaña wanta nanyidimu yitwakalakalaña chiwahi. “Nzambi [diyi] wakulishaña.” (1 Akorinda 3:7) Pawulu washimwini nindi Nzambi wenka muntu wudi wejima wamuchipompelu ‘chikuhwelelu chamweseka.’ Chatela kudinka wanta, twatela kuhameka nyidimu yakalakalaña antu amakwawu kwesekeja nachikuhwelelu chawu. Pawulu watwalekeluhu nindi: “Ikalenu nayitoñojoka yoyimu muntu namukwawu.” Munyikanda yindi yikwawu, kapostolu watwileja kubula ‘kwila chuma chakuzuña hela chakudinka wanta; chiña nayitoñojoka yakudizoza, iwu atoñojoki mukwawu, nindi wambadikami kuwaha.’ (Afwilipi 2:3) Chakeñekaña kudizoza nikashinshi hakwiluka netu mana kwetu hela muhela wudi wejima watubadika muyuma yikwawu. Kudizoza kukutwileñela kubula ‘kuditoñojoka netu, yetu tweluka hohu.’ Chineli nyidimu yamuchipompelu yinateli kuleñela kutwiluka, ejima akuzañalalaña chikupu hakukalakala nyidimu ‘yabula kulema,’ yadiwulañawu antu.—1 Petulu 5:5.
Kunuñañana muChipompelu
9. Muloñadi Pawulu chesekejeleliyi akwaKristu awayishewa nayidi yamujimba?
9 Tañenu Aroma 12:4, 5, 9, 10. Pawulu wesekejeli akwaKristu awayishewa nayidi yamujimba, akalakalaña mukunuñañana nakuyilombola kudi Kristu, Mutu wawu. (Akolosi 1:18) Walejeli akwaKristu awayishewa naspiritu nindi mujimba wukweti yidi yayivulu nawa yazataña munjila jamboka mboka nawa nindi “etu tudi amavulu tudi mujimba wumu mudi Kristu.” Munjila yoyimu, Pawulu wakolesheli akwaKristu awayishewa amuEfwesesa nindi: “Tukulenu mudi yena muyuma yejima, diyi mutu, diyi Kristu. Kumutu owu diku kwadinuñila chachiwahi mujimba wejima, hiwukudikwata namanuñi akukwashañana, yidi yejima hiyikwila nyidimu yawu, iwu nawindi, iwu nawindi, kulonda mujimba wukulaña nakudituña mukukeña.”—Aefwesesa 4:15, 16.
10. Chumanyi chatela kwilukawu “anyikoku acheñi” kutalisha hawunlomboli?
10 Hela chakwila “anyikoku acheñi” hiyekala hakachi kayidi yamujimba waKristuku, anateli kudizilaku yuma yayivulu kunichi chakutalilahu. (Yowanu 10:16) Pawulu wahosheli nindi Yehova “wamwovwahishila dehi yuma yejima nakuyisha kwishina danyendu [yaKristu]; wamukunjika dehi kwikala mutu wahewulu dayuma yejima kuchipompelu.” (Aefwesesa 1:22) Makonu, anyikoku acheñi ekala hakachi ‘kayuma yejima’ Yehova yenkayi Mwanindi, neyi mutu. Cheñi ekala hakachi ‘kayuma’ yamwinkawu kuhemba ‘nduñu wamaana nikashinshi’ kudi Kristu. (Matewu 24:45-47) Dichi antu akweti kuchiñeja kwakushakama hamaseki, atela kwiluka nawu Kristu diyi Mutu wawu nawa atela kwovwahila izanvu danduñu wamaana nikashinshi niIzaza dindi Dalombolaña niantu atondawu kwikala ankoñi muchipompelu. (Aheberu 13:7, 17) Chumichi chaleñelaña akwaKristu kunuñañana.
11. Indi kunuñañana kwetu kwashindamena hankahi, nawa kufumbanyi kukwawu kwashimwiniyi Pawulu?
11 Kunuñañana kwamuchidiwu kwashindamena hakukeña, “mpanda yasweja kunuña antu hamu.” (Akolosi 3:14) Mumukanda waAroma kapetulu 12, Pawulu wakonkomweneni hanichi chikuma nindi kukeña kwetu kwatela kwikala ‘kwakubula wufwikiji’ nawa nindi ‘hakukeñañana nawana kwetu’ twatela ‘kuditiyila wushona wumu namukwawu.’ Ichi chaleñelaña kudilemesha wumu namukwawu. Kapostolu wahosheli nindi: “itejenu mwinenu abadiki kulema.” Kafwampi hitwatela kubombaña kukeña nakukeña kwekalaña hakachi keyala namumbandaku. Twatela kuzata nañovu kulonda chipompelu chikali chakadi majilu. Hampinji yafumbileñayi hakukeña, Pawulu wabombeleluhu nindi: “Tiyenu kutama nayuma yatama, kakelenu yuma yayiwahi.”
Njila yaKutambwilamu Enyi
12. Chumanyi chitwatela kudizila kudi akwaKristu akuMasidoniya wakushankulu kutalisha hakutambwila enyi?
12 Tañenu Aroma 12:13. Kukeña amana kwetu kukutuleñela ‘kukwasha akwakujila nayuma yabulawu’ kwesekeja nahakumina ñovu jetu. Hela chakwila tudi atuzweñi, tunateli kuyikwasha amana kwetu nayuma yitukweti. Hakusoneka hadi akwaKristu akuMasidoniya, Pawulu wahosheli nindi: “Iku adi nakuyitompa nankashi nalukadi, hela neyi aswejeli wuzweñi, hiyakutiya muzañalu wakuhana mahetawu. Muloña ami nukutwesha kushimunamu nami ahanini chakunyichima yawu mwatwesheleluwu, hela chakubadika mwatwesheleluwu. Hiyakutulembelela nakulembelela kwakweni nawu ayiteji kukundañana nawu nakukwasha akwakujila.” (2 Akorinda 8:2-4) Hela chakwila adiña atuzweñi, akwaKristu akuMasidoniya hiyadiña nachifwaku. Atiyileña kuwaha kukwasha ana kwawu amuYudeya adiña mukukankila.
13. Indi ‘kutambwila enyi’ kwatalisha mudihi?
13 Nhoshelu yakwila nawu ‘kutambwila enyi’ ayibalumuna muchiGiriki nezu dakwila nawu kutachikilahu. MuBayibolu yaThe New Jerusalem Bible nhoshelu yeniyi ayibalumuna nawu ‘kuwana njila mwakutambwila enyi.’ Kutambwila enyi mpinji yikwawu akumwekeshaña kuhitila mukutambika muntu nakudya nindi hamu, nawa chikuwaha neyi mwila mwenimu namuchima wumu. Ilaña neyi tutachikilahu, tukwiluka njila jajivulu jakutambwilamu enyi. Dichi neyi hamuloña wakubula mali hela neyi twakata tukañanya kuloñesha yakudya, tunateli kumwekesha chisambu kuhitila mukuyinka yakudya yidi neyi ntaamba, mayañwa hela nyikabu.
14. (a) Mazwinyi ekala munhoshelu yachiGriki yabalumunawu nawu ‘kutambwila enyi’? (b) Tunateli kwakamena ñahi enyi mumudimu wamwiha?
14 Kutambwila enyi mwabombela niyililu yetu. Nhoshelu yachiGriki yabalumunawu nawu ‘kutambwila enyi’ yikweti mazu ayedi alumbuluka nawu ‘kukeña nimwenyi.’ Indi enyi twayimonaña ñahi? Njila yimu yakutambwilamu enyi yekala yakufwila kudiza idimi dacheñi kulonda kushimwina nsañu yayiwahi kudi enyi anenzi mwiluña dakushimwina dachipompelu chetu. Kafwampi, hamuloña wachihandilu chetu, etu amavulu chinateli kutukalila kudiza idimi dacheñi. Hela chochu, ejima wetu tunateli kukwasha enyi kuhitila mukuzatisha chachiwahi mukanda wetu waGood News for People of All Nations, wasonekawu muwundeli. Hela chakwila mutu wamukanda weniwu awusoneka muwundeli, wukweti nsañu yamuBayibolu mumadimi amavulu. Komana kudi yuma yayiwahi yafuminumu hampinji yimwazatishili iwu mukanda mumudimu wamwiha?
Kutiyila Antu Luwi
15. Indi Yesu wazatishili ñahi kufumba kwekala haAroma 12:15?
15 Tañenu Aroma 12:15. Kufumba kwaPawulu muniyi vasi kunakuhosha hakutiyila antu luwi hela kuzañalela nawu hamu. Twatela kwiluka chinakutiyawu antu nikuyitiyila luwi hela kuzañalela nawu hamu, chili mumpinji yamuzañalu chili mumpinji yakuneña. Antu anateli kutwilukila kumuzañalu hela luwi lutwamwekeshaña neyi chakwila twekala neyena muspiritu. Hampinji yafuntiluwu namuzañalu atumbanji twaKristu 70 mumudimu wakushimwina, nikushimuna yuma yayiwahi yafumini mumudimu wawu, Yesu ‘wazañaleli mudi spiritu yajila.’ (Luka 10:17-21) Wazañaleli nawu hamu. Hampinji yikwawu, Yesu ‘wadilili hamu nawantu adiñi nakudila’ hampinji yafwili ibwambu dindi Lazaru.—Yowanu 11:32-35.
16. Tunateli kumwekesha ñahi luwi, nawa sweje-e anyi atela kwila mwenimu?
16 Tunakukeña kulondela chakutalilahu chaYesu chakutiyila antu luwi hela kuzañalela nawu hamu. Neyi mukwetu mukwaKristu nazañalali, anetu nawa twatela kuzañalela nindi hamu. Chochimu, twatela kusha maana kumakabi ayimwekenaña amana kwetu niahela. Sweje-e, tunateli kukolesha antu anakukabakana neyi twikala nampinji yakutiyilila chikupu kuyuma yinakuyimwekena. Mpinji jikwawu, tunateli kuyitiyila luwi chikupu chakwila tunateli nikudila. (1 Petulu 1:22) Sweje-e dinu aeluda atela kulondela kufumba kwaPawulu kwakutiyila antu luwi hela kuzañalela nawu hamu.
17. Yumanyi yitunadizi mumukanda waAroma kapetulu 12, nawa yumanyi yitwakahanjekahu muchibaba chinalondeluhu?
17 Mavasi itunahanjekuhu mumukanda waAroma kapetulu 12, anatufumbi hachitwatela kwila muchihandilu chetu hakwikala akwaKristu nihakudikunda nawana kwetu. Muchibaba chinahiñuhu, tukahanjeka hamavasi anashaluku munaka kapetulu, ahosha hachitwatela kumona nikuzata nawantu abula kwikala muchipompelu chawakwaKristu, kubombelahu niayilumbu jetu niantu atukabishaña.
Kuhitulukamu
• Twamwekeshaña ñahi netu ‘twekala neyena muspiritu’?
• Muloñadi wutwatela kwikalila adizoza hakumukalakela Nzambi?
• Munjilanyi mutwatela kuzañalela hamu nawakwetu nikuyitiyila luwi?
[Malwihu aKuzatisha haKudiza]
[Nyevulu yidi hefu 12]
Muloñadi wutwazatilaña muniyi nyidimu yawakwaKristu?
[Mwevulu wudi hefu 14]
Tunateli kukwasha ñahi enyi kudiza hadi Wanta?