Komana Mali Diwu Aleñelaña Kwikala naMuzañalu Waweni?

SONIA wavwalikilili mwituña daSpain. Henohu wuchidi kansi wayileña kukupompa kwawaYinsahu jaYehova nawamama yindi. Chakuliliyi wayili kuLondon, kuEngland, nawa nkumininaku watachikili kuzata namutayi watalaña jamali.

Sonia wakeñeli mudimu windi. Wadiña nakukwata mali amavulu nawa nikwakamena mali awantu asondamishileña kukampani yeniyi. Wadiñi mudimu wawuwahi nawa wawukeñeli chikupu. Sonia wadiñi nakuzata maora 18 hefuku, dichi mpinji jikwawu wakamineña hohu maora ayedi hela asatu. Wumi windi wejima washindameneni hamudimu windi. Nkumininaku, chihandilu chaSonia chahimpili neyi mukulambula kwadisu. Wakatili chikatu chakalepa, chenjili hamuloña wakuzeya mpinji yejima. Wadiñi hohu nayaaka 30 yakusemuka.

Sonia welili kalepa kabadi kamu kamujimba, nawa andotolu ahosheli nawu hakatwesha cheñi kuhoshaku. Hohenohu amama yindi ayili kuEngland nakumuhemba. Chatachikiliyi kwenda cheñi, amama yindi amulejeli nawu, “Inakuya nakupompa, hanu dinu twatela kuya hamu muloña hinateli kukushika nkaweyuku.” Sonia wetejeli kuya nawamama yindi. Chumanyi chafuminumu?

Sonia wahosheli nindi, “Yuma yejima yinatiyili yadiña yalala. Kupompa kwawahili chikupu. Nazañaleli hama hakwiteja kudiza kwaBayibolu kudi wumu hakachi kawantu enjili nakuñimusha ifuku datachi dinayili Kwitala daWanta. Amabwambu jami akusambila alekeli kuhempula, hakwila amabwambu jami akatataka adiña aseha nawa adiña nakuñakamena.”

Chimwahitili mafuku, Sonia watachikili cheñi kuhosha nawa wayililuku hambidi kuspiritu. Henohu chaaka kanda chimani, Sonia wapapatisheweli. Amabwambu jindi amaha amavulu adiña mumudimu wampinji yejima wawakwaKristu, nawa wamweni chiyadiñawu namuzañalu. Sonia watoñojokeli nindi: ‘Anami nawa inakukeña kwikala neyi wena. Inakukeña kumuzatila Yehova Nzambi hakumina ñovu jami jejima.’ Ichi Sonia wakalakalaña mudimu wampinji yejima wakushimwina.

Chumanyi chinadiziyi Sonia kuyuma yamumwekeneni? “Hela chakwila natambwileña mali amavulu, kuzeya nikutiya woma hamudimu kwanleñeleleña kwakama nikuneña. Ichi neluki nami chuma chabadika kulema muchihandilu hikwikala nawubwambu wawuwahi naTata yami wamwiwulu, Yehova. Chayinu mpinji nidi wamuzañalu hama.”

Kapostolu Pawulu wasonekeli nindi: “Kufwila mali diwu muji wayuma yatama yejima; diyi nsañu yinasenwishi amakwawu mukwitiya kwakukuhwelela, anadipwiki yihuñu yayivulu, zwa nikwishinadi.” (1 Timotewu 6:10) Sonia nateli kwiteja nindi awa mazu alala.