Komana Mwatondahu Ifuku daKudiza Bayibolu?

CHAAKA chinamani, Izaza Dalombolaña dashimwini hakuhimpa kwandandanda yakupompa kwachipompelu kulonda kwikalaña nampinji yeneni yakudiza Bayibolu nikuhanjeka nachisaka. Neyi mudi mutu wachisaka, mwatela kulombola kudiza kwaBayibolu mpinji yejima nañodenu nianyanenu kwesekeja nayuma yinakukeña muchisaka chenu. Adisumbula abula anyana atela kuzatisha mpinji yeniyi kulonda kudizila hamu Bayibolu. Amana kwetu ajiki niahela abula nyidimu yayivulu muchisaka atela kuzatishaña mpinji yeniyi chiwahi kulonda adizeña Bayibolu halwawu.

Antu amavulu anakuhameka iyi ntajikilu yaKudifukula kwaChisaka kwamelela. Chakutalilahu, eluda wejina daKevin, wasonekeli nindi: “Chipompelu chetu chejima hitukweti nimazu akusakililaku. Aeluda ejima muchipompelu chetu twahanjekahu kulonda kwiluka chitwazatishaña iyi mpinji yawufuku yitukweti kulonda kwila mwatuleja Izaza Dalombolaña, dikwila nawu kudizaña nayisaka yetu.”

Jodi, wukweti nfumwindi eluda, wasonekeli nindi: “Tukweti anyana awambanda asatu, wumu wudi nayaaka 15, mukwawu 11 wamuchisatu wudi nayaaka 2. Chayinu mpinji twabuukila kuchipompelu chazatishaña idimi dawatumama. Chakeñekaña kwikala nampinji yeneni nikushaku ñovu hakwila nawu wuloñeshi yuma yejima yakudiza hakupompa. Hamuloña waniku kuhimpika, chayinu mpinji tukweti ifuku dikwawu datuleñelaña kusha maana kukudifukula kwachisaka.”

John niJoAnn, adisumbula akalakalaña mudimu wawupayiniya wampinji yejima, asonekeli nawu: “Kudiza kwetu kwaBayibolu kwachisaka kwadiña kwakukilokela muloña twadiña nakukwibombela munyidimu yashiyashana yamuchipompelu. Iyi ntanjikilu yayiha hichawaana chakufuma kudi Yehova, dichi neyi tuzatisha iyi mpinji chachiwahi tukwikala akola kuspiritu.”

Mana kwetu mujiki wejina daTony wudi muyaaka yamuma 20, wazatishaña mpinji yamelela hachiyedi kulonda kudiza halwindi. Wazatishaña mafuku amakwawu amumulungu kulonda kuloñesha yuma yakudiza kukupompa. Hela chochu, Tony wahosheli nindi, “Natalilaña chikupu Ifuku dachiyedi.” Muloñadi? Tony walumbulwili nindi: “Idi ifuku dihu hinadizaña chikupu hadi Yehova. Nadizaña nsañu yakoleshaña wubwambu wami naYehova kwakwihi namaora ayedi. Kwikala nampinji yeneni yakudiza kwankwashaña kutoñojoka chikupu hamavasi amuBayibolu inatañaña.” Chumanyi chinafumimu? “Kufumba kwaYehova kunakunshika hamuchima chikupu kubadika mafuku akunyima.” Komana nateli kushimuna yuma yinahetelumu? “Mumukanda waInsight, natañañamu nsañu yahosha hawubwambu wadiña hakachi kaDavidi naJonatani. Nadizili yuma yayivulu kutalisha hakudihana kwaJonatani kwakadi ichima. Chakutalilahu chindi chankwasha kwiluka chikupu yuma yakeñekaña hakwikala ibwambu walala. Mwalala natalilaña idi ifuku dachiyedi nampinji yamelela kulonda kwilukilahu yuma yayivulu yayiha!”

Chakadi nikujina, ambuña aYehova ejima akuhetelamu chikupu mukuzatisha iyi mpinji yinayiwejeluku kulonda kwikala nakudiza kwaBayibolu kwakuwahi nikudifukula kwachisaka.