Komana Nzambi Wakana Kuyinka Maheta?

‘Nzambi wakeñaña nindi mwikali asamaheta—mwikali nanyotoka yayivulu, kuheta chikupu munsañu jakulanda nakulandulula. Kuminenu dakumukuhwelela, musukwilenu mali imukweti nawa mwinkenu yuma yejima yimunateli kumwinka.’

KWESEKEJA nachipapilu chansañu chasonekeluwu mwituña daBrazil, mazanvu ansakililu diwu atañishaña nsañu yeniyi. Antu amavulu atiyililaña nsañu yeniyi. Kwesekeja nakwihujola kwadiña muUnited States kwawantu aditenaña nawu hiyakwaKristu, chipapilu chansañu chahosha nawu: “Antu akushika kumapasenti 61 akuhwelela nawu Nzambi wakeñaña nindi antu ekali asamaheta. Nawa mapesenti akushika ku 31 . . . etejeli nawu neyi wumwinka Nzambi mali, Nzambi wukukwinka mali amavulu.”

Ntañishilu yamuchidiwu, yavula kutenawu nawu kudiza hayileñaleña nihansakililu, yinakuvulilaku chikupu sweje-e mumatuña akukabeta kambwela kaAmerica, chidi neyi Brazil, nawa ahwilaña kuyipompelu yatañishaña nawu Nzambi wahanaña maheta. Komana mwalala Nzambi wakana kuyinka antu amukalakelaña maheta? Komana ambuña aNzambi ejima akushankulu adiña aheta?

Munyikanda yachiHeberu, kakavulu twatañañamu nawu antu akiswililuwu kudi Nzambi adiña aheta yuma yakumujimba. Chakutalilahu, haKuhituluka 8:18 twatañañahu nawu: “Chiña wakaanukaña neyi, Yehova Nzambi yami diyi nanyinki ñovu yakuheta.” Ichi chakolesheli aIsarela kwiluka nawu neyi ovwahilili Nzambi adi kwikala munza waheta.

Komana ambuña aNzambi adiña aheta hamuntu hamuntu? Yoba muntu washinshika wadiña samaheta, nawa chelili Satana yamukisañeni maheta indi ejima, Yehova wamuhetesheli ‘nakumulunjikilahu amakwawu ashikila mumaheta akusambila.’ (Yoba 1:3; 42:10) Abarahama niyena wadiña samaheta. Mukanda waKutachika 13:2 wahosha nawu “wadiñi wasweja kuheta, niñombi, nisiliva, niwuru.” Chelili amashidika adibombeli afumini kumusela kudi anyanta awana enzi nakukwata mwihwa kaAbarahama Loti, Abarahama ‘hakutwala antu indi amayala adizishayi dehi njita, avwalikili hamukala windi, amayala makulakaji asatu namayala ikumi natanu nasatu.’ (Kutachika 14:14) Amayala ‘adizishiluwu’ akushika ku 318 ashikililumu kuzatisha yitwa yanjita, chisaka chaAbarahama chatela chadiña cheneni. Chineli wahembelaña chisaka cheneni chinakumwekesha nawu wadiña samaheta nawa wadina nayimuna yayivulu.

Eñañi, ambuña aNzambi ashinshika amavulu akunyima, Abarahama, Isaka, Yakoba, Davidi niSolomoni kutenahu hohu antesha adiña aheta. Komana chumichi chinayi mukwila nawu Nzambi waheteshaña antu ejima amukalakelaña? Munjila yikwawu, komana neyi muntu hikazweñi dikwila nawu hakweti wuselewa waNzambuku? Awa malwihu akuyakula muchibaba chinahiñuhu.